Markus 16
16
To panagungar ne̍ Je̍sus
Mat. 28:1-8; Luk. 24:1-2; Juan 20:1-10
1Ito nalpas to Algew Ngilinin, de̍ Marya nga iMagdala, Marya nga ina de̍ Santiyagu, se̍ e̍ Salume̍, nawe̍ da ngimina ka bangbanglu nga ipay da kuma iya bangkay ne̍ Je̍sus. 2Ket ito sumingsingising pekkem ya sinag iya agsapa niya Duminggu, nawe̍ da iya nakaitamennan ne̍ Je̍sus.
3Ket ito manmanalan dito babey, nagtetebbar da nga kinunen da, “Nagan ngata ya pangibagaan tida nga mangbukalig ito dackel nga batu nga naigiset ito tamen?” kunen da.
4Ket ito limang-ug da, nasingen da nga naibukalig met gayamin to dackel nga batu nga naigiset. 5Ket imuneg da ngarud ito nakaitamennan na. Ket uwed met nasingen da nga isa nga bagbagu nga agtugtugew iya dumna diwanan, nga nakakawwes met ka puraw nga sutana. Ket nasikuran ngarud nga unay dito babey yin.
6Ket to bagbagu, kinunen na igida, “Madi kayu masikuran. Emmuc nga sapsapulen nu nge̍ Je̍sus nga iNasare̍t nga nailansa ka krus. Ngem nagungar mettin, ket awan idi nin. Singen nu kad ya nangipayan da igina. 7Ngem kalpasan na, mawe̍ kayu lugud ibaga kadiya adalan na, agraman e̍ Pe̍dru nga kunen nu ya agten idi: ‘Mon-ona nge̍ Je̍sus ngem dakayu nga mawe̍ enna Galilya ngin. Masingen nu nad ngarud antuni, maikanatad mettas ito kinunen na dakayu itun,’ kunen nu,” kunen nito nakapuraw.
8Ket rinumwar ngarud dito babey, nga nagtalew da ito edyan nito tamen, ta nakapilpig dan, se̍ nagewweng da pe̍ yin. Ket awan met kinagkagi da ka orey nagan na, ta mansing da met.
To panagpasingen ne̍ Je̍sus ito Marya nga iMagdala
Mat. 28:9-10; Juan 20:11-18
9[Ket nagungar ngarud nge̍ Je̍sus ito nasapa pekkem iya algew Duminggu. Ket nagpasingen nga nona e̍ Marya nga iMagdala, nga itu to nangpatalawan na ka pitu nga sairu itun pekkem. 10Ket kalpasan nito panagpasingen ne̍ Je̍sus igina, nawe̍ ngarud nipakaemmu ne̍ Marya kadito kinabkabulun ne̍ Je̍sus itun, nga agladladingit se̍ agberberrit. 11Ket ito nagicna da nga nabiyag kanu nge̍ Je̍susin se̍ nasingen kanu pe̍ ne̍ Marya, ket madi da met pinati.
To panagpasingen ne̍ Je̍sus kadito duwa nga pasurut na
Luk. 24:13-35
12Ket kalpasan niyan, e̍ Je̍sus, nagbaliw ya langa na ito nagpasingen itun kadiya duwa nga pasurut na nga manmanalan iya dalan nga gayat ito siyudad. 13Ket dito duwa nga pasurut na, simoli da mettas iya siyudad, ket nipakaemmu da ngarud kadito kabulun da to napasamac. Ngem madi da latta namati igida.
To panagpasingen ne̍ Je̍sus kadito adalan na
Mat. 28:16-20; Luk. 24:36-49; Juan 20:19-23; Ara. 1:6-8
14Ket itun, nagpasingen pe̍ nge̍ Je̍sus kadito sangapulu ket isa nga adalan na, ito nagsasangu da nga mangmangan. Ket dinanengdengngan na da ngarud gapu ta di da gabay ya mamati, se̍ gapu ta nasukir da. Ta madi da met namati iya kagi dito nakasingen igina kalpasan nito panagungar na.
15Ket kinunen pe̍ ne̍ Je̍sus igida, “Mawe̍ kayu kadiya amin nga parte̍ niya lubung, tasun ikasaba nu ya Makaparagsac nga Damag kadiya amin nga toltoley. 16Ket ya mamati se̍ mabautisaran, maisalakan met. Ngem ya madi mamati, ket maukum met.
17“Ket uwed nad pagilasinan nga maibulun kadiya mamati, nga agten idi: Gapu iya kinaturay ku, makapatalew da ka sairu, se̍ makakagi da nad kadiya sabali nga pagkakagi nga bekken da nga naadal. 18Ket orey no makaikem da nad ka malaga, winno makainum da ka gamut, ket madi da nad maan-anu. Se̍ ipatey da nad diya ima da kadiya agsacsakit, ket malaingan da met,” kunen na.
To ipeppen ne̍ Je̍sus ka langit
Luk. 24:50-53; Ara. 1:9-11
19Ket itun, kalpasan nito pannakitbar ne̍ Apu Je̍sus igida, ket naipangudu ka langitin. Ket enna langit, nagtugew iya kadayawan nga edyan, nga itu ya madiwanan ne̍ Apu Diyus.
20Ket dito adalan na, pimanaw da ito edyan da, nga nawe̍ da ngarud nangaskasaba kadiya amin nga luglugar. Ket ya Apu, tinulungan na da ngarud pe̍, ta nipanecnec na ya kinapudnu dito nikasaba da, gapu kadiya pagilasinan nga naibulun kadiya panangikasaba da iya kagi na.]
Aktuálne označené:
Markus 16: YBT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 1990 New Tribes Mission, Sanford, FL 32771-1487, USA.
Printed in the Philippines.