Pianciilna 17
17
Vunteap atna sia Thuciamna Lim lakna
1Abram kum sawmkua le kum kua a phak ciang ama tungah Topa kilangh a, “Keima in Vaanglianbelpa Pathian ka hi hi. Ka thu hong ni ta'n a, a maan in seam tawntung in. 2Nangma taw ka thuciamna ka vawt tu a, suan le paal tam tatak kong pia tu hi,” ci hi. 3Abram sia a maitang lei a phak dong kunsuk a, Pathian in, 4“Nang taw hi thuciamna ka vawt hi: nang in minam tam mama te ii taanghpupi na hi tu hi ci in kong kamciam hi. 5Na min, Abram hi nawn ngawl tu a, Abraham kici zaw tu hi; banghang ziam cile minam tamte ii taanghpupi tu in kong siam zo hi. #Rom 4:17 6Keima in suan le paal tam mama kong pia tu a, kimkhatte kumpi suak tu hi. Nangma in suan le paal tam mama na nei tu a, amate sia minamte suak tu uh hi.
7“Ka kamciam ka kipsak tu a, nangma le na suan na paal khangkikte tungah, tawntung thuciamna hi tu hi. Keima in na Pathian ka hi tu a, na suan na paalte ii Pathian ka hi tu hi. #Lk 1:55 8Tu in ngamdangmi khat bangin na omna hi leitang sia nangma le na suan na paalte tungah kong pia tu hi. Canaan ngam bup sia na suan na paalte in a tawntungin lua tu a, keima in amate ii Pathian ka hi tu hi,” ci hi. #Sawl 7:5
9Pathian in Abraham tungah, “Nangma le na suan na paal khangkikte in keima taw ih thuciamna sia a zui tu in nangma zongh na thukim kul hi. 10Nangma le na suan na paalte theampo in no sung pan pa a minpiang ii vunteap at tu na thukim uh kul hi. #Sawl 7:8; Rom 4:11 11Tu pan kipan note sung pan a sua zawk ni liat a pha pano peuma, vunteap ki at tu a, na inn sungsuak silate le ngamdang pan na lei silate zongh kihel tu hi. 12Note vunteap ki atna in, no le kei kilaklaw a thuciamna khat a om hunlam lak tu hi. 13A mi simin vunteap ki at nanak tu hi, hisia in note taw ka thuciamna kip tawntung hi ci in a lak tu na pumpi tungah limlakna khat hi tu hi. 14Pasal a minpiang vunteap a ki at ngawl peuma keima mi khatin kingaisun nawn ngawl tu hi, banghang ziam cile keima taw ka thuciamna ama in paltan hi,” ci hi.
15Pathian in Abraham tungah, “Na zi sia Sarai na ci nawn bua het tu hi; tu pan kipan ama min Sarah hi. 16Ama thupha ka pia tu a, ama taw tapa khat kong pia tu hi. Ama thupha ka pia tu a, ama in minamte ii nu hi tu hi, tuaciang ama suan le paal sung pan kumpite piang tu hi,” ci hi.
17Abraham sia a maitang lei a phak dong kunsuk a, ahizong hi bang thu teng a ngaisut ciang a nuiza hi; a thinsung ah, “Kum zakhat a pha pasal khat in ta khat nei thei tu ziam? Kum sawmkua a pha Sarah in ta khat nei thei tu ziam?” ci hi. 18Ama in Pathian tungah, “Banghangin, Ishmael sia ka inn lua tu suaksak ngawl tu ni ziam?” ci in dongh hi.
19Ahizong Pathian in, “Hi ngawl hi, na zi Sarah in nang atu in tapa khat hong nei tu a, a min Isaac na phuak tu hi. Ama tung ahizong a suan a paalte tung ahizong ka thuciamna sia a tawntungin ka kholet tu hi. Tua in a tawntung a kip thuciamna khat ahi hi. 20Ishmael huvau nong ngetna ka za zo hi, tua ahiciang ama thupha ka pia tu a, ta tam mama, suan le paal tam mama ka pia tu hi. Ama in kumpi sawm le nii te ii pa hi tu a, a suan a paalte sia minam lian khatin ka siam tu hi. 21Ahizong mai kum tu hun khawng ciangin Sarah sung pan hong suak tu na tapa Isaac taw ka thuciamna ka kholet tu hi,” ci hi. 22Abraham tungah a thuson tu teng a man ciang, Pathian in ama nusia hi.
23Tua ni mama in, Abraham in Pathian thu ni a, ama tapa Ishmael, a inn sungsuak pasal dang theampo, a inn sungsuak silate le a lei silate zongh vunteap atsak hi. 24Abraham vunteap a ki at lai in kum sawmkua le kum kua pha a, 25a tapa Ishmael kum sawm le kum thum pha hi. 26Ni khat sungin, amate nii sia 27Abraham ii silate theampo taw vunteap at khawm uh hi.
Aktuálne označené:
Pianciilna 17: SCB2
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Siyin Chin Bible © Bible Society of Myanmar, 2016