Lk 13
13
Nloon asu nkôñelane minlem
Nkana nkôkôme figié
(Yo 8:24; Mt 21:18-19, 43; Rm 2:3-6; Ezé 18:30-32)
1Melu mete, bôte b'éziñ be nga zu kañete nye e jam e nga kui e be bôte ya Galilé e mbe bete Pilat a nga bundane metyi map a ma *bityi'a biap. 2A nga yalane be na: Ye mia simesane na bôte ya Galilé bete be mbe beta bebo *abé a dañe ba bevo'o bese amu be nga tôbane mintaé avale te' 3Ma jô mia na momo. Ve nge mi nji kôñelane minlem, mia ye fe jañe bese avale te. 4Nge na e bôte awôm a muam e nkume ya Siloé ô nga ku yôp a wôé, ye mia bumi na be mbe be bili mekua a dañe bôte bevo'o bese be too Yérusalém' 5Ma jô mia na momo. Ve nge mia bo teke kôñelane minlem, mia ye jañe bese avale te ebien.
6A nga kane fe e *nkana wu: môt éziñ a nga bili élé figié mbéan afube mindi'i dé été. A nga zu jeñe bibuma y'été ve teke koone jôm. 7E nde a nga jô mba'ale afube mindi'i na: tame yen, den a ntoo mimbu milaa, me za'a jeñ bibuma bi figié nyô, ve teke koone jôm. Baké'é je; amu jé ja di si e zesé' 8Mba'ale afube mindik a nga yalane na: A Masa, beta'a jôé je e mbu wu; ataté éyoñe ji a kui éyoñe te, ma ye fa'a je mbôma'an a kut akun été. 9Melu ma zu éko éziñe na ja ye wume bibuma; nalé momo, wo ye ba'é je.
Ñyeyeme minga wo saéban
(Mt 12:9-13; Lk 14:1-6; Sam 146:8)
10Yésus a ye'ele'e e da ya meba me Zambe e môse Sabat, 11minga éziñe mbia *nsisim ô nga veñesane ñyeyem den mimbu awôm a muam a mbe valé; a mbe kukuu teke fo'o nguleya tebe. 12Yésus a nga yene nye a nga kobô nye a jô nye na: A minga, ô kôtébaneya mfa'a ya éyeme jôé. 13A nga beté nye mo. Awolo te a nga tebe a kañe Zambe. 14Ve évete ya *aba Zambe é nga yene nalé *abé na Yésus a nga saé môt e môse Sabat, nye jama bôte na: mimôse ya saé mi ne misaman, za'ane ñhe saéban mimôse mite saa e môse *sabat. Nti a nga yalane nye na: 15A bôte bebadu'u, ye môt ase ya be mia, e môse *sabat, a nji tii e nya'a jé nge éjakase jé na a ke nyuu je mendim' 16Ye e nji yiane na minga nyô, ngon Abraham, e nje Satan a biya nka'an den a ntoo mimbu awôm a muam, be tii nye, ngata'a éte e môse Sabat' 17Eyoñ a mbe a kobô'ô nalé, besiñe bé bese be mbe njalan a meyat, a jama bôt a nga vak amu bitôto'o bi mam bise a mbe a bo'ok.
Minkana ajô fes ôndôndôô a mvusu
(Mt 23:34-39; Lk 19:41-44)
18A nga beta jô na: éjôé Zambe ja funane jé, a ma ye ve'ane je a jé' 19Ja funane fes ôndôndôô, e nje môt a nga nyoñ a wua je afube dé été; ja faa a bo élé, a anone ya yôp da tabe je mintyaé.
20A nga beta jô na: Ma ye ve'an éjôé ya yôp a jé' 21Ja funane mvusu e nye minga a nga nyoñ a futi nye avut mve'an ôvek biyoñ bilaa a kui na ébañ é vus.
Ofanefane mbé
(Mt 7:13-14, 21-23; 8:1-12)
22Yésus a mbe a tyi'ila'ane bitison a minlam, a a mbe a ye'ele'e a kelek e mfa'a ya Yérusalém.
23Môt éziñ a nga jô nye na: A Nti, ye ve bôte tyôtyoé e mbe da ye yen ényiñ? A nga yalane be na:
24Va'ane ngule ya nyiin ôfanefane *mbé. Amu ma jô mia de na: ézuk ja ye jeñe na é nyiin, ve teke ngul. 25Eyoñe mie ndaa a kôlôya si a a feteya *mbé a na, éyoñ mi li'iya atan, mia ye taté na mia kute *mbé a jô na: A Nti! Di'i bia e *mbé! A ye yalane mia na: Mi ne bôte ya vé' 26Eyoñe te mia ye taté na mia jô na: Bi nga di a nyu ôsu viôé, a ô nga ye'ele e minjoñe miangan. 27A a ye yalane mia a jô na: Kelane ma ôyap, mia bese mia bo ékotekot. 28Minyôn a nlatane mesôñ bia ye bobane valé, éyoñe mia ye yen Abraham, Izak, Yakob a bekulu mejô bese éjôé Zambe, a éyoñe mia ye wuaban atan. 29Bôte ba ye so e jôbe da tôô a e jôbe da dim, akôé a e nké; a ba ye tabe tawôlô éjôé Zambe. 30A tama yenan: e ba be tele mvus, ba ye tebe ôsu a ba be tele ôsu, ba ye tebe mvus.
Yésus a ke e Yérusalém
(Mt 23:34-39; Lk 19:41-44)
31Eyoñe te Befarizieñ b'éziñ be nga zu jô nye na: Kelek, kôlô'ô va, amu Hérôde a kômbô wôé wo. 32A nga jô be na: Kela jôan nkemva'a te na: ô lôô ma vaa mimbia minsisim a ma saé bôt den a akiti; a e môse lale wo ye bo wu e mmanan ésaé. 33Ve ma yiane wulu den, a akiti a e môse wo tôñe valé; amu e nji yiane na *nkulu mejô a wu e Yérusalém atan.
34Yérusalém, Yérusalém, wo wôé bekulu mejô a lume ba ba lômbane *mekok, abime biyoñ avé me nga kômbô kôane bone bôé, ane nyia kup a kôan e mefabe mé si e metyi a bô'ô yôp, ve mi nji ke kômbô nalé. 35Tame yenan, e *nda jenan ja ye li'i mia bilik; ve ma jô mia de na, mia ye bo te beta yen ma akekui mi jôya na: Ebotan é bo'o be nyô a zu a jôé Nti!
Aktuálne označené:
Lk 13: BDCB
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Bible en langue Bulu © L'Alliance Biblique du Cameroun, 2007, 2015.