Lk 3
3
Yôanes Babtist, *nlôman wo ke Yésus ôsu
(Mt 3:1-12; Mk 1:1-8; Yo 1:6-8, 19)
1E mbu awôm a tane, Kéza Tibér a too njôô, Pons Pilat a too ngovina ya Yudé, Hérôde a jô'ô e Galilé, Filip monyañ ke a jô'ô Ituré a Trakonitide, Lizanias a too njôô Abilén, 2Hanne a Kayif ke betuni, ajô Zambe e nga koban e be Yôanes e mone Zakari e *nkôte si. 3A nga zu afôla ese ya Yordan, a kele a yôtane nduan asu nkôñelane wo sôñe njamane mam abé 4aval e ne ntilan e kalate *nkulu mejô Ezayi na:
Tyiñ ja yôtan e *nkôte si:
Kômane zene Nti
sô'an asozene dé *zôsôô.
5Ebé ése ja ye jineban
beta nkôl ase a mone nkôl ase
ba ye silibane si;
mimfaka mi bili mekot
ba ye sôane mie zôsôô
nalé fe minjoñ mi ne bikpwekpwek
ba ye tyee mie,
6a e nsôn ôse wo ye yene nyiane Zambe.
7Ajô te a mbe a jô'ô ba be mbe be za'a beta minsamba be nye na a duu be na: A mvoñe mekpwe, za a nga ye'ele mia na mi mate ayaa da zu' 8Ajô te ñhe wumane bibuma bia yiane *nkôñelane nlem a te jôan e miabebien été na: Abraham a ne ésaa wongan. Amu ma kate mia na: Zambe a ne ve Abraham *bon be so'o meko'o mana 9éyoñ ébiene ji ôvôn ô bôô e tine bilé: élé ése ñhe ja bo te wum mbamba bibuma ja ye ba'éban a wuaban e nduan.
10Jama bôt a nga sisili nye minsili na: Bia ye ñhe bo jé' 11Nye be na: E môt a bili melô'ô mebaé a kaba'ane me a nyô a nji bi, a nyô a bili jôme ya di a bo'o avale da.
12Benyoñe *toya fe be nga zu na be duban, be nye na: A Nye'ele, bia ye bo jé' 13Nye be na: Te yetane jôm a dañ abim be nga bendé mia.
14Bezimbi fe be nga sili nye na: Bia ke bia ye bo jé? Nye be na: Te nyoñane môte jôm a ngu, nge a bibôta mejô ve nyoñane tañ ba ya'ane mia na ja yian.
15Amu bôt be mbe be yange'e, a bese be mbe be sili'i bebiene minlem été nge Yôanes aa mbe ke Krist. 16A nga yalane bese na: Ma, ma duu mia a Mendim, ve môt a zu a ne ngu a dañe ma, a me nji bo nyô a yiane kuli nye minkole bikôndé. Nye, a ye duu mia a Mfufube Nsisim a nduan. 17A bili éfeba'a e wo wé, wôna a ye vos e vôme wé ba fiale fes, a ye kôane nlisi angune dé, ve a ye di'i bivua e nduan é ne teke dim.
18Yôanes a mbe a kañete'e bôte mbamba foé a fulan abui melebe mefe. 19Ve Hérôde, nyô be mbe be lo'one tétrark, e nye Yôanes a nga ve bijô ajô Hérôdiade nga monyañ a ajô mbia mimboone mise a mbe a bo'ok, 20a nga beté mbia jam afe ya futi Yôanes e *nda mimbôk e yôbe ya mbia be mam bevo'o bese.
Yésus a duuban
(Mt 3:13-17; Mk 1:9-11)
21Bôt be ngenan be za'a na be duuban, e nde Yésus fe a nga duuban; a bo'o meye'elan, e nde yôp da yombô, 22a Mfufube Nsisim a nga sise be Nye a bili éyeka'a nyôl, éfunan ane zum. Ane *tyiñ é nga so yôbe na: Ô ne e Mone Wom ma dañe nye'e, ma yene wo mvaé.
Endane Yésus
(Mt 1:1-16)
23Yésus a nga bili mimbu bebé mewôm mela éyoñ a nga taté ésaé jé. Bôt be nga simesane na a mbe e mone Yôsep, Yôsep Héli, 24Héli Mattat, Mattat Lévi, Lévi Melki, Melki Yanayi, Yanayi Yôsep, 25Yôsep Mattati, Mattati Amôs, Amôs Nahum, Nahum Esli, Esli Nangayi, 26Nangayi Maat, Maat Matatias, Matatias Semeyin, Semeyin Yôsek, Yôsek Yôda, 27Yôda Yôanañ, Yôanañ Résa, Résa Zôrôbabél. Zôrôbabél Salatiél, Salatiél Néri, 28Néri Melki, Melki Adi, Adi Kôsam, Kôsam Elmadañ, Elmadañ Er, 29Er Yésus, Yésus Eliézer, Eliézer Yôrim, Yôrim Mattat, Mattat Lévi, 30Lévi Simeyôn, Simeyôn Yuda, Yuda Yôsep, Yôsep Yônam, Yônam Eliakim, 31Eliakim Méléa, Méléa Ména, Ména Mattata, Mattata Natan, Natan David, 32David Yessé, Yessé Yôbéd, Yôbéd Bôaz, Bôaz Salmon, Salmon Naasoñ, 33Naasoñ Aminadab, Aminadab Admin, Admin Arni, Arni Esrôm, Esrôm Farés, Farés Yuda, 34Yuda Yakob, Yakob Izak, Izak Abraham, Abraham Tara, Tara Nakor, 35Nakor Séruk, Séruk Ragayu, Ragayu Pélég, Pélég Eber, Eber Sila, 36Sila Kayinam, Kayinam Arfaksad, Arfaksad Sem, Sem Noé, Noé Lemék, 37Lemék Matusalém, Matusalém Enok, Enok Yeréd, Yeréd Malélél, Malélél Kenam, 38Kenam Enos, Enos Sét, Sét Adam, Adam e mone Zambe.
Aktuálne označené:
Lk 3: BDCB
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Bible en langue Bulu © L'Alliance Biblique du Cameroun, 2007, 2015.