مادتھا 4
4
شیطانی حضرت عیسیٰ تشودلتاس۔
1تینے شیطان گونّی گوبا تشودلتا چوگچیسلا خُدے رُوح بوے حضرت عیسیٰ ریستونگی نانّگا کھیرّا زادس۔ 2تشانّین جیبچُو دونتانگ مادونّا روزا جوگسپا حضرت عیسیٰ ہلتوخسے یودپین۔
3تشودلداکھانّی شیطان کھونگی لدُونلا یونگستے زیرس، ”کالتیس نیرانگ خُدےبوژا اینّا اِردوا گُون تاگی گیورچیسلا کا سال؟“
4حضرت عیسیٰ مسیح لانسالس، ”ہلژخمہ شوقبُو بوے نانّگا ڈِیازادتے دوگ،
’می تاگی چیگپوے سونتیا میلوس
اِین نانگ خُدے جالنے بینّگا زادکھانّی
جالتا ریریے کھا نیانچیسنے سونتیا لُوسی۔‘“#4:4 شریعتی شوقبُو نیسپے 8۔ 3
5تینے شیطانی حضرت عیسیٰ ہلژخمہ گیالسا یروشالیمّا ٹھیدتے کھیرس یانگ بیت المقدِس سی میناریکا کھیرتے 6کھونّگا زیرس، ”کالتیس نیرانگ خُدےبوژا اینّا یکانے تُھورلا لچیبّانگ چیازیرنا شوقبُو بوے نانّگا ڈِیازادتے دوگ“
” کھیرانگ سکیوبچیسلا خُدے فرشتا گُونلا کا سالین۔“
کھیرانگی کانگپانگ ردویکا پھوگ میچوگچیسّی پھیا،
فرشتا گُونی لاگپا کیانگستے کھیرانگ زومّا زادِین۔ #4:6 زابور شوقبُو 91۔ 11، 12
7حضرت عیسیٰ سی کھوا لانسالس، ”ہلژخمہ شوقبُو بوے نانّگا ایبوانگ مولدوگ۔
’مسیح کھیوجارانگی خُدا تشود ماستا‘۔“ #4:7 شریعتی شوقبُو نیسپے 6۔ 16
8یانگسکیار شیطانی گوبے کھونگ ری تھونپوجیکّیکا کھیرتے دُنیائی گیالثید تشانگما تانگ تیگونّی سپال ستانتے، 9زیرس، ”کالتیس کھیرانگی نگا چھاگ پھولتے چولنا، نگے کھیورانّگا ای تشانگما تانگین۔“
10حضرت عیسیٰ سی کھوا مولس، ”شیطان کھیرانگ اکانے سونگ، چیازیرنا ہلژخمہ شوقبُو بوے نانّگا ڈِیازادتے دوگ،
’کھیوجے مسیح کھیوجارانگی خُدا چولگوس۔
یانگ کھونگ چیگپوا جابستوگ جوگوس۔‘“ #4:10 شریعتی شوقبُو نیسپے 6۔ 13
11تینے شیطان گونّی گوبا کھونگنے بیتے سونگ یانگ خُدے فرشتاگون سکیودتے کھونّگا ستاستوگ چوا زادس۔
حضرت عیسیٰ مسیح گلِیلی نانّگا جابستوگ گوزوگ زادس۔
12حضرت یُوؔحنّا ٰ زومستے تسونکھانّگا کاگسکھانبو حضرت عیسیٰ مسیح سانّاچیگ، کھونگ گلِیلی یولجونگسلا لوگستے سکیودّا زادس۔ 13ناصرة ای ڈونگکھیرلا ماجوگسّا، تشوے لدُونلا یودکھان زبُولون تانگ نفتالیؔ یولجونگسّی کفرنحُوم ڈونگکھیرلا سکیودتے جوگسا زادس۔ 14سنگونمے پیغمبر یسعیاہ پیغمبری گیُودتے خُدے مولکھانبو ڈانڈا ڈوبتھوبچیسّی پھیا حضرت عیسیٰ تے تشانگما چوا زادس۔ حضرت یسعیاہ ڈِیازادتے دوگ،
15”زبُولون تانگ نفتالیؔ یول گُون،
تشوے لامیکا یوردان لژانگسپو ے پھارکا،
گلِیلی یولجونگسّی نانّگا دُوگکھان یہُودی مانکھان،
16مونپے نانّگا دوگکھانگونلا
اوت لتانگشانجیک تھونگین ۔
شیچیسّی مونپے یولّا دُوگکھان گُون
نییما شارتے اوت پھوگین۔“ #4:16 حضرت یسعیاہ شوقبُو 9۔ 1، 2
17تینّا توسنے پھارلا حضرت عیسیٰ سی چھوسشادچیس گوزوگ زادس، ”نامکھے گیالثید نیمو اینوگ، گیودپا چوستے خُدے چھوگسلا سیمس گیورشیگ۔“
حضرت عیسیٰ سی گومے لوبٹوگسگون لدامّا زادس۔
18حضرت عیسیٰ مسیح گلِیلی تشوے تھامانے جابڈول زادِین یودتوس، کھونگی فونو نو نیس، شمعُوؔن کابوا پطرؔس سانگ زیرّاد یانگ کھوے نو اندرؔیاس زِیگس۔ کھونگونی تشوے نانّگا نیادول پھانّگادپین چیازیرنا کھونگون نیا زومکھان اِنپین۔ 19حضرت عیسیٰ سی کھونگونلا مولس، ”نگے گیابنے یونگستے نگے لوبٹوگس گیور، تانیپھارلا نگے کھیوجاگونلا نیے تشابسلا میگون زُومچیس لاباین۔“ 20تینّامالّا نیادول سپانگستے کھونگون حضرت عیسیٰ گیابنے ڈانگس۔
21حضرت عیسیٰ تیکانے سکیود زانے فونو نو نیس، زبدی بُوژا حضرت یعقُوبؔ تانگ حضرت یُوؔحنّا ٰ زِیگس، کھونگونی ابا نیامپو، ٹُھوزینگی نانّگا کھورانگونّی نیادول ڈالڈیگ چوادپین، حضرت عیسیٰ سی کھونگونلا بودّا زادس۔ 22تینّامالّا حضرت یعقُوبؔ تانگ یوحنّانی ٹُھوزینگ تانگ ابا بورتے حضرت عیسیٰ مسیح گیابنے ڈانگس۔
حضرت عیسیٰ سی نادپاگون پھانچوگا زادس۔
23حضرت عیسیٰ مسیح گلِیلی یولجونگس گانگپوے نانّگا سکیودس، کھونگیم مجلِس گُونی نانّگا لابجا سالین، نامکھے گیالثیدّی گاموےناتسُولبو شادّا زادس، یانگ زُومو تانگ ناد تشانگمانے میگون پھانچوگا زادس۔ 24کھونگ مینگچانّی ناتسُولبو تھاگرینگ سیرییا یولجونگس تشوگپا کھییبس پاسانگ میگونّی زُومو مینڈا مینڈا یونگسکھانّی نادپاگون کھیونگس۔ سپیرنا ناتشا ماثانٹے، ردود جوگسکھان، میرگی یونگکھان تانگ، زاپھوگکھان گُون، تے نادپا تشانگما حضرت عیسیٰ مسیح گیالچوگّا زادس۔ 25گلِیلی، گیالسا دِکپُلِس زیرسا، یروشالیم، یہُودیہ تانگ یوردان لژانگسپو ے نیکھورنے می مانگپو حضرت عیسیٰ مسیح ستینگرانگنے یونگس۔
Aktuálne označené:
مادتھا 4: LBJNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Ladakhi Bible by The Love Fellowship is licensed under Creative Commons Attribution-ShareAlike 4.0 License.