Chenesis 7
7
1Mihma Chihowah ʋt Noah ya̱, Chishno, micha chin chuka achʋfa moma aienʋt peni chito ya̱ ant hʋsh chukowashke: aiitishali achʋfa ilʋppa chishno ak osh aiʋlhpiesa kʋt sa tikba ya̱ ish ahanta na chi pi̱hi̱sa li hoke.
2Nampoa kashofa puta kʋt nakni, micha tek itichapa hosh untuklo bieka, micha nampoa kashofa keyu ʋt nakni, micha tek itichapa hosh tuklo bieka,
3Micha hushi ʋba itʋnowa nakni, micha tek itichapa hosh untuklo bieka ho̱ ish ishi cha, ish okchalinchi na, ishtai unchuloli ʋt yakni paknaka moma ka̱ aiashashke.
4Nitak untuklo momakma, nitak pokoli ushta, micha ninak pokoli ushta ho̱ yakni paknaka ya̱ on umbʋche la chi̱ hoke; micha nan okcha̱ya puta ikbi li tuk ʋt yakni paknaka ya̱ a mosholichi la chi̱ hoke, im achi tok.
5Mihma Chihowah yʋt im apesa tuk mak o̱ Noah hʋt mominchit yʋmihchi tok.
6Mihma Noah hʋt afʋmmi tahlepa hannali ho̱ oka falama ʋt yakni paknaka ya̱ onʋtola tok.
7Mihma oka falama yʋt a̱ya chi̱ pulla kak o̱, Noah hʋt ushi ʋhleha, micha tekchi, micha ushi ʋhleha ha̱ tekchi ʋhleha aiena kʋt api̱ha ho̱ peni chito ya̱ chukowa tok.
8Nampoa kashofa, micha nampoa kashofa keyu, micha hushi puta, micha nana hosh yakni paknaka ya̱ om balʋlli chatuk moma mʋt,
9Chitokaka yʋt Noah ya̱ im apesa tuk mak o̱, tuklo aiyukali hosh nakni, micha tek ita tuklo hosh Noah ya̱ im onʋt peni chito ya̱ chukowa tok.
10Atuk o̱ yakohmi tok, nitak untuklo ha ya̱, oka falama yʋt yakni paknaka ya̱ onʋtoyula tok.
11Noah hʋt ʋtta tok a̱ afʋmmi tahlepa ishit hannali hosh hʋshi atukla, hʋshi yash nitak ont isht auah untuklo, mih nitak fehna ho̱ oka hofobi chito oka akohcha puta kʋt momʋt mitahli tok, mikma ʋba shutik okhissushi puta kʋt tiwa tok.
12Mihma nitak pokoli ushta, micha ninak pokoli ushta ho̱ yakni paknaka ya̱ ai on umba tok.
13Nitak yʋmma fehna akinli ho̱ Noah, micha Shem, micha Ham, micha Chafelh Noah ushi ʋhleha hash, micha Noah tekchi, micha ushi ʋhleha tekchi tuchina aiena kʋt api̱ha ho̱, peni chito yash chukowa tok.
14Yʋmma, micha nampoa puta ilap ai achʋfa aiyukali, micha nan ʋlhpoa moma ilap ai achʋfa aiyukali, micha nana balʋlli puta yakni paknaka om balʋlli ilap ai achʋfa aiyukali, micha hushi puta ilap ai achʋfa aiyukali, hushi chipinta ai il aiyukali puta aiena tok.
15Micha nanipi a̱sha puta kʋt ilhfiopak okcha̱ya mʋt atakali hatuk ʋt momʋt tuklo bieka hosh Noah ya̱ im onʋt, peni chito yash ibachukowa tok.
16Micha chukowa kʋt, Chihowah yʋt im apesa tuk mak o̱, nanipi a̱sha puta moma ai achʋfa ʋt nakni, micha tek aiena kʋt chukowa tok: mihma Chihowah yʋt im okhishta tok.
17Mihma oka falama yʋt nitak pokoli ushta ho̱ yakni paknaka ya̱ onʋtoyula tok: mihma oka yʋt i̱ shahlit ma̱ha̱ya mʋt, peni chito yash shalit wakeli na yakni ya̱ ai ʋba takali tok.
18Mihma oka yʋt yakni paknaka ya̱ okchito kʋt i̱ shahlit ma̱ha̱ya fehna tok; mihma peni chito ʋt oka paknaka ya̱ takalit a̱ya tok.
19Mihma oka yʋt yakni paknaka ya̱ okchito atampa fehna tok; mihma nʋnih chaha moma, shutik, nutaka moma aiasha tuk ʋt ompoholmo tok.
20Oka chito isht i̱ shahlit ʋba ia kʋt kubit auah tahlapi ho̱ isht ʋbanʋbli tok; mihma nʋnih chaha puta kʋt ompoholmo tok.
21Mihma nana nipi moma yakni paknaka ya̱ ai itʋnowa tuk, hushi, micha nanʋlhpoa, micha nampoa, micha nana balʋlli puta yakni paknaka om balʋlli tuk, mikmʋt hatak puta aiena kʋt illi tok:
22Ilhfiopak okcha̱ya ʋt ibishakni ya̱ foyuka hatuk moma yakni shila aiasha tuk ʋt momʋt illi tok.
23Micha nan okcha̱ya moma yakni paknaka ya̱ aiasha tuk, hatak, micha nan ʋlhpoa, micha nana balʋlli puta, micha hushi ʋba itʋnowa aiena kʋt illit taha tok; yʋmmak osh yakni paknaka ya̱ ai illit taha tok: mihma Noah, micha api̱hʋt peni chito ya̱ aiasha tuk ak illa hosh okcha̱ya tok.
24Mihma oka yʋt yakni pakna̱ka ya̱ ai okchito kʋt onʋtoyula na nitak tahlepa achʋfa cha pokoli tahlapi tok.
Aktuálne označené:
Chenesis 7: CHH
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the American Bible Society 1848-1886, reprinted 1913