Nai Vakatekivu 2
2
Sa lesi na siga tabu, 1-3. Ai buli ni ka kecega, 4-6, kei na cakavi ni tamata, 7. A were ko Iteni, 8-17. Sa vakayacani na ka kecega; a sa cakavi ko Ivi, 18-25.
1A sa caka oti na lomalagi kei vuravura, kei na lewena kecega. 2Ia e na kenai kavitu ni siga sa vakaotia na Kalou na nona cakacaka sa cakava ko koya; a sa vakacegu ko koya e na kenai kavitu ni siga mai na nona cakacaka kecega sa cakava ko koya. 3A sa vakalougatataka na kenai kavitu ni siga na Kalou, ka vakatabuya; e na vuku ni sa vakacegu kina mai na nona cakacaka kecega sa bulia na Kalou ka cakava.
4SA vakaoqo nai tukutuku kei lomalagi kei vuravura ni sa buli, e na siga sa bulia kina na vuravura kei lomalagi na Kalou ko Jiova, 5kei na kau kecega ni vanua ni sa sega ni tu e vuravura, kei na co kecega ni vanua ni sa sega ni tubu: ni sa sega ni vakatauca oti na uca ki vuravura na Kalou ko Jiova, a sa sega na tamata me wereca na vanua. 6A sa lako cake na kabukabu mai na qele, ka vakasuasuataka na delana kecega ni vanua.
7A sa cakava na tamata na Kalou ko Jiova e na kuvu ni qele, ka ceguva na ucuna e na cegu ni bula, a sa yaco kina na tamata me yalo bula.
8A sa tea e dua na were na Kalou ko Jiova, mai cake mai Iteni, a sa kauta kina na tamata ka cakava ko koya. 9A sa vakatubura mai na qele na Kalou ko Jiova na kau kecega sa vinaka na kenai rairai, ka yaga me kakana; na kau ni bula talega e loma ni were, kei na kau sa kilai kina na ka vinaka kei na ka ca. 10A sa lako e dua na uciwai mai Iteni me vakasuasuataka na were; a sa wasewase maikea, ka yaco me va na kenai davedave. 11A yaca ni kenai matai, ko Pisoni: ko ya sa volita na vanua kecega mai Avila, sa kune kina na koula; 12a sa vinaka na koula ni vanua ko ya; sa kune talega kina na mata-ni-civa, kei na vatu na yacana na onikisa. 13Ia na yaca ni kenai karua ni uciwai, ko Kihoni: ko ya sa volita na vanua kecega ko Kusi. 14Ia na yaca ni kenai katolu ni uciwai, ko Hitikeli: ko ya sa lako vaka ki Asiria, kivaka ki cake. Ia nai kava ni uciwai ko Uferetisi.
15A sa kauta na tamata na Kalou ko Jiova, ka vakatikora ki na were ko Iteni me wereca ka vakatawa. 16A sa vakarota na tamata na Kalou ko Jiova, ka kaya, E tara mo kana loa mai na kau kecega sa tu e na were: 17ia mai na kau sa kilai kina na ka vinaka kei na ka ca, mo kakua ga ni kana maikina: ni ko na mate vakaidina e na siga ko sa kana maikina.
18A sa kaya na Kalou ko Jiova, Sa sega ni vinaka me tiko duadua na tamata: au na cakava e dua na dauveivuke e yaga vua. 19Ia na Kalou ko Jiova sa bulia e na qele na manumanu kecega ni vanua,, kei na manumanu kecega ni lomalagi; ka sa kauti ira vei Atama, me raica se cava na yaca ena vakatokai ira kina. Ia na yaca sa kaciva kina ko Atama na ka bula kecega, ko ya ga na yacana. 20A sa vakayacana na manumanu kecega ko Atama, kei na manumanu ni lomalagi, kei na manumanu tawa lasa ni vanua; ia ka sa sega ni kune vei Atama e dua na dauveivuke e yaga vua. 21Ia na Kalou ko Jiova sa cakava me tauvi Atama e dua na moce lutu sara, a sa moce kina ko koya: a sa kauta tani ko koya e dua na sui ni sarisarina, a sa cakava na lewena me veiuturi me kenai sau: 22ia na sui ni sarisarina ka kauta tani na Kalou ko Jiova mai vua na tagane, sa bulia kina e dua na alewa, a sa kauti koya vei Atama. 23A sa kaya ko Atama, O qo dina na sui mai na suiqu, kei na lewe mai na lewequ: ena kacivi ko koya me Tamata-alewa, e na vuku ni sa kauti tani mai vua na tamata-tagane. 24O koya o qo me na laiva kina na tamana kei tinana na tagane, ka kabita na watina: a rau na lewe dua ga. 25A rau sa luvawale, na tagane kei na watina, a rau sa sega ni madua.
Aktuálne označené:
Nai Vakatekivu 2: FIJ1864
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First full Bible in the Fijian language © British and Foreign Bible Society, 1864.