मत्ती 18
18
परमेस्वर का राज मा सबसे खास कु?
(मर 9:33-37; लूका 9:46-48)
1अर वे ही बगत चेला यीशु का पास ऐके पूछण लगि गैनी, “गुरुजी, परमेस्वर का राज मा सबसे खास कु च?” 2तब वेन एक बच्चा तैं अपणा पास बुलै के ऊंका बीच मा खड़ु कैरी। अर बोलि, 3“मि तुम बटि सच्चि बोन्नु छौं कि जबरि तक तुम खुद तैं बदलि के एक #भजन 131:2-3बच्चा का सभौ का जन नि बणि जैल्या, तबरि तक तुम स्वर्ग का राज मा नि जै सकद्यां। 4अर जु कुई अफ तैं ये बच्चा का जन नमर सभौ को बणालु, वु परमेस्वर का राज मा सबसे खास होलु। 5अर जु कुई मेरा नौ से इन्द्रया एक बच्चा तैं स्वीकार करदु उ मितैं स्वीकार करदु।”
दुसरो खुणि पाप की वजा बणण
(मर 9:42-48; लूका 17:1,2)
6फिर यीशु न अपणा चेलों कू इन भि बोलि, “अगर तुम मा बटि कुई भि यों छुटो तैं जु कि मि पर बिस्वास करदिन, अगर कै एक तैं भि पाप का बाटा पर लि जान्दु, त वे मनखि खुणि यू जादा ठिक च, कि वेका गौळा मा जंदरु डालि के वेतैं समुन्दर मा ढुळै जौ। मगर या सजा भि वे मनखि खुणि कम च, किलैकि इन्द्रया मनखि तैं येसे भि जादा खतरनाक सजा मिलण। 7अर हाय च दुनियां का लोगु खुणि जु कि एक-दुसरा तैं पाप का बाटा पर लि जनदिन। अर या बात भि सच्च च कि लोगु तैं पाप मा लि जाण को काम त होलु, मगर जै मनखि का द्वारा यू काम होलु वे पर हाय च। 8अर अगर तेरु हाथ या खुटु त्वेसे पाप करौणु च त तू वेतैं काटी#18:8 इख मा यीशु मसीह सच्चि मा हाथ-खुटा तैं काटी के ढोळण का बारा मा (8) अर (9) आंख तैं निकळि के ढोळण का बारा मा बात नि च कनु, मगर पाप करण कथगा खतरनाक च ईं बात का बारा मा ये उदारण तैं बतौणु च। के ढोळि दे, किलैकि त्वे खुणि यू जादा खूब च कि तू लूलु-लंगड़ु ह्वेके सदनि का जीवन तैं पै। अर अगर जु तू अपणा दुई हाथ या खुटों समेत नरकलोक मा डळै जाणि छैई, त फिर त्वेतै क्या फैदा ह्वे। 9अर अगर तेरी आंख त्वेसे पाप करौणि च त वींतैं निकळि के ढोळि दे, किलैकि त्वे खुणि यू जादा खूब च कि तू कांणु ह्वेके सदनि का जीवन तैं पै। अर अगर जु तेरा दुई आंख्यों समेत तू सदनि की आग मा डळै जाणि छैई, त फिर त्वेतै क्या फैदा ह्वे।”
10यीशु न ऊंकू इन भि बोलि, “सुणा, तुम मेरा पिछनै चलण वळा यों छुटो तैं सुद्दी नि समझा, अर मि तुमतै चितै देन्दु किलैकि स्वर्ग मा रौण वळा स्वर्गदूत जु की ऊंकी देख-रेख करदिन, वु सदनि मेरा पिता का समणि हाजिर रौनदिन। 11[अर मनखि को पुत्र हरच्यां लोगु तैं बचौणु खुणि अयूं च।”]
हरचि भेड़ को उदारण
(लूका 15:3-7)
12तब यीशु न ऊंकू इन भि बोलि, “तुम क्या सोचद्यां? अगर तुम मा बटि कै मनखि का पास सौ भेड़ हो अर ऊंमा बटि एक हरचि जौ, त तुम मा बटि इन्द्रयो कु च, जु ऊं निन्याणबे भेड़ों तैं छोड़ि द्यो, अर वीं एक हरचि भेड़ तैं खुज्याण का बानो पाड़ो पर चलि जौ? 13अर अगर वा भेड़ वेतैं मिली जौ, त मि तुम बटि सच्च बोन्नु छौं कि उ मनखि ऊं निन्याणबे भेड़ों का खातिर जु हरचि नि छै इथगा खुशी नि मणालु, जथगा कि वु वीं हरचि भेड़ का बानो मणालु। 14अर ठिक इन्नि तुमरा स्वर्ग मा रौण वळा पिता की मनसा च, कि यों छुटो मा बटि कै एक को भि नास नि हो।”
विरोध करण वळा तैं बिस्वासी लोगु तैं सुधरण
(लूका 17:3)
15अर यीशु न ऊंकू इन भि बोलि, “अगर जु तेरु भै या बैंण तेरा खिलाप मा कुछ अपराध करदु, त वेतैं अकेला मा लि जैके वेका अपराध तैं बतौ जु कि ऊंन कैरी। अर अगर उ तेरी बात तैं मणदु, त इन समझि जा कि तिन वेतैं फिर से वापस पयेलि। 16अर अगर वु तेरी बात नि माणो, त एक या दुई आदमियों तैं अफ दगड़ा मा लि जा, ताकि परमेस्वर को यू वचन पूरु ह्वे जौ। अर वु इन च कि,
#
व्यव 19:5
“‘दुई या तीन लोगु का द्वारा या बात साबित की जौ।’
17अगर जु वु मनखि ऊं गवाओ की भि नि माणो, त बिस्वासी समुदाय का लोगु कू बोलि दे, अर अगर वु समुदाय का लोगु की भि नि माणो, त फिर तू वेतैं चुंगी लेण वळो अर ऊं लोगु का जन माण जु परमेस्वर तैं नि मणदिन।
18“मि तुम बटि सच्च बोन्नु छौं, कि जु कुछ तुम ईं धरती पर बन्द करिल्या, उ स्वर्ग मा बन्द किये जालु, अर जु कुछ तुम धरती पर खुलिल्या, उ स्वर्ग मा खुलै जालु। 19मि तुम बटि फिर से सच्च बोन्नु छौं, अगर तुम मा बटि दुई लोग ईं धरती पर कैं चीज खुणि एक मन ह्वेके मंगला, त स्वर्ग मा मेरा पिता की तरफा बटि तुम खुणि उन्नि किये जालु। 20किलैकि जख दुई या तीन लोग मेरा नौ से इकट्ठा होनदिन, उख मि ऊंका बीच मा होन्दु।”
निरदै नौकर को उदारण
21तब पतरस न यीशु का पास ऐके बोलि, “प्रभु, अगर कुई भि मनखि मेरा खिलाप मा अपराध कनु रौ, त मि वेतैं कथगा बार माफ कैरुं? क्या सात बार तक?” 22यीशु न वेकू बोलि, “मि त्वे बटि बोन्नु छौं कि सात बार तक ही ना, बल्किन मा सात का सत्तर गुणा#18:22 इख मा यीशु को बोन्न को मतलब यू च कि हमतै दुसरो तैं हमेसा माफ करण चयेणु। तक माफ कनु रौ।
23“इलै मेरा ये उदारण तैं सुणा, परमेस्वर को राज वे राजा का जन च, जैन अपणा नौकरों का दगड़ा मा हिसाब-किताब करण चै। 24अर जब उ हिसाब-किताब कनु छौ, त एक नौकर वेका पास लये गै, जै पर करोड़ो रुपयों को करज होयुं छौ। 25अर करज चुकता करणु खुणि ये नौकर मा कुछ नि छौ। तब वे नौकर खुणि राजा न बोलि, ‘येतैं अर येकी घरवळी, अर येका बाल-बच्चों तैं, अर जु कुछ भि ये मा च वु सब कुछ बेचि के करज की भरपूरी किये जौ।’ 26अर ईं बात पर उ नौकर वेका खुटों मा पोड़ि गै अर गिड़गिड़ै के बुलण लगि गै, ‘साब, जरा कुछ दिन और रुकी जा, मि तुमरो सब कुछ चुकता कैरी द्यूलु।’ 27अर यू देखि के राजा का मन मा बड़ु तरस ऐ अर वेन नौकर तैं जाणि दिनी, अर वेको करज भि माफ कैरी दिनी।
28“पर जब यू नौकर राजा का पास बटि निकळि गै, त उ अफ दगड़ा का नौकरों मा बटि वे नौकर से मिली, जैन वेका हजार रुपया देण छा। अर येन वेको गौळो दबै के बोलि, ‘जु करज तेरु मि बटि लियूं च वेतैं अभि वापिस दे।’ 29अर ईं बात पर वेको दगड़्या नौकर वेका खुटों मा पोड़ि अर गिड़गिड़ै के बुलण लगि गै, ‘भैजी, जरा कुछ दिन और रुकी जा, मि तुमरो सब कुछ चुकता कैरी द्यूलु।’ 30पर ये नौकर न अपणा दगड़्या नौकर की बात नि माणी, बल्किन मा वेतैं जेलखाना मा डलवै दिनी, ताकि जबरि तक उ करज चुकता नि कैरी द्यो तबरि तक उखि रौ। 31अर जब वेका दगड़ा का दुसरा नौकरों न यू सब होन्द देखि, त भौत उदास ह्वे गैनी। अर ऊंन जैके राजा तैं सब कुछ बतै दिनी। 32तब वे राजा न वे नौकर तैं बुलै के बोलि, ‘हे दुष्ट नौकर, मिन तेरु पूरु करज माफ कैर दिनी, किलैकि तिन मि बटि दया कि भीक मांगि छै। 33अर जन मिन त्वे पर दया कैरी, क्या तेरु भि इन फरज नि बणदु छौ कि तू भि अपणा दगड़ा नौकर पर दया कैर?’ 34तब राजा तैं भौत गुस्सा ऐ, अर वेन वे नौकर तैं दण्ड देण वळो का हाथ मा सौंप दिनी, ताकि जबरि तक यू करज चुकता नि कैरी द्यो, तबरि तक यू ऊंका हवाला मा रौ।
35“इलै अगर जु तुम मा बटि हरेक उ मनखि, जु अपणा भै तैं मन से माफ नि करलु, त स्वर्ग मा रौण वळु मेरु पिता भि तुमरा दगड़ा मा ठिक इन्नि करलु।”
Aktuálne označené:
मत्ती 18: GBM
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© (Active) Wycliffe Bible Translators, Inc. All rights reserved.