لوقا ۱۸
۱۸
جدّیت اَمرأ وأستی دوعأ کودن
1 ایتأ روج عیسا خو شأگردأنٚ رِه ایتأ مٚثٚل بأوٚرده کی نیشأن بٚده وأستی همیشٚک دوعأ بوکونٚد و تأ خوشأنی دوعأ جوأبَ فأنگیفتٚد جٚه دوعأ کودن دٚس اونسأنٚد.
2 پس اَطؤ بٚفرمأسته: «ایتأ شهرٚ دورونی ایتأ قأضی ایسأبو کی نه خودا جَا ترسِئی و نه مردومٚ محل کودی. 3 ایتأ ویوه زٚنأی هو شهرٚ دورونی ایسأبو کی مودأم اَمؤیی و گفتی: "اَ دعوأ دورون، می دوشمنٚ جَا می حقَّ فأگیر." 4 او قأضی چن او وخت کی اونی شیکأیتَ محل نوکود. امّا آخرپٚسی خو اَمرأ بوگفته: "بأ اَنکی نه خودا جَا ترسٚم و نه مردومٚ محل نٚهٚم، 5 امّا چونکی اَ زنأی دٚم به سأعت مِرِه دردٚسٚر چأکونه، پس اونی حقَّ فأگیرٚم کی دِه مٚرَه وأزٚده نأوٚره.»
6 بأزون عیسای خوداوند بٚفرمأسته: «بیدینید کی اَ بی‌اینصأفٚ قأضی چی گه! 7 اگه اَ آدمی کی اینصأف نأرِه رأضی بوبوسته کی مردومٚ دأد فأرٚسِه، آیا خودا خو اینتخأب بوبوسته‌یأنٚ دأد کی شبندروج اونی ورجأ دوعأ و ایلتیمأس کونٚده نٚرٚسه؟ 8 قوبیل بٚدأرید کی خٚیلی زود اوشأنٚ دوعأ جوأبَ دِهه. امّا ایتأ سؤال شیمی جأ وأوٚرسٚم کی او وخت کی اینسأنٚ پٚسر #۱۸:۸ «اینسأنٚ پٚسر» ایتأ لقب ایسه کی عیسا خؤرَه بٚکأر بردی.وأگرده اَ دونیأ میأن، چن نفرَ یأفه کی ایمأن بٚدأرٚد؟»
فریسی و بأج‌فأگیر
9 بأزون اَ مأجیرأیَ اوشأنی رِه کی خوشأنی خُب کردکأر کودن و پأکی‌یَ گولأز کودأندوبود و البأقی مردومَ پٚست دأنستید وأگویا بوکود:
10 «دو نفر دوعأ کودنٚ وأسی بوشؤده معبد، ایتأ فریسی کی خؤرَه گولأز کودی و اویتأ ایتأ بأج‌فأگیر کی بدنأم بو. 11 فریسی ایتأ گوشٚه بئیسأ و خو اَمرأ اَجور دوعأ بوکوده اَی خودا تٚرَه شوکر کونم کی البأقی مردومٚ مأنستَن، بٚخصوصٚ اَ بأج‌فأگیرٚ مأنستَن گونأکأرٚ نییٚم. نه دوزدی کونم، نه کسی‌یَ ظولم کونم و نه زٚنأ کونم. 12 هفته دو وأر روزه گیرم و جٚه اونچی‌یَ کی به دٚس اَوٚرم ایتأ قیسمت جٚه ده قیسمتَ تی رأ میأن خرج کونم.
13 «امّا او گونأکأرٚ بأج‌فأگیر دؤر بئیسأ و دوعأ وخت حتّا خو سٚرَ شرمندگی وأسی رأستَ نوکود بلکی غورصه‌دأر خو سینه‌یَ زِئی و گفتی خودایأ، منٚ گونأکأرَ رحم بوکون!
14 «شٚمٚره گم کی اَ گونأکأرٚ مردأی، بٚبخشه بوبوسته و بوشؤ بٚخأنه، امّا او فریسی کی خؤرَه قوبیل دأشتی، خودا بخشش و محبتٚ جَا غأفیل دکفته. چونکی هر کی حقٚ سعی بٚزٚنه خؤرَه پیلّه کونه، کوچیکَ بِه، امّا اونی کی خؤرَه گولأز بوکونه، سٚربولندَ بِه.»
عیسا کوجه زأکأنَ محبت کونه
15 مردوم خوشأنی زأکأنَ عیسا ورجأ بأوٚردٚد کی اوشأنی رو دٚس بٚنه تأ اوشأنَ برکت بٚده. امّا عیسا شأگردأن او وخت کی اَ مأجیرأیَ بیدِده، اوشأنَ شمأتٚت بوکودٚد. 16 امّا عیسا او کوجه زأکأنَ خو ورجأ بٚخأسته و شأگردأنَ بٚفرمأسته: «وئألید زأکأن می ورجأ بأیٚد و اوشأنی جولویَ نیگیرید. چونکی خودا پأدیشأیی اوشأنٚ شین ایسه کی اَ زأکأنٚ مأنستَن ایسٚد. 17 رأس‌رأسِی شٚمٚره گم کی اگه هر کی خودا پأدیشأیی‌یَ ایتأ کوجه‌دأنه زأکٚ مأنستَن قوبیل نوکونه، هیوخت اونَ بودورون نیشه.»
زیأدی مأل و مینأل دأشتنٚ خطر
18 ایروج ایتأ جٚه یوهود قومٚ پیله کسأن عیسا جَا وأوٚرسِه: «اَی خوروم اوستأد چی وأ بوکونم کی اَبدی زٚندیگی بیأفٚم؟»
19 عیسا اونی جَا وأوٚرسِه: «چٚره مٚرَه خوروم دؤخأنی؟ هیکس خوروم نییٚه، جغرز خودا! 20 و امّا تی سوألٚ وأسی؛ تو کی حوکمأنَ دأنی: زٚنأ نوکون، قتل نوکون، دوزدی نوکون، ایفترأ نوأزِئن و دورُغ نوگو و تی پئر و مأرَ عزیز بٚدأر.»#۱۸:۲۰ خروج ۲۰:۱۲‑۱۶ و تثنیه۵:۱۶‑۲۰.
21 او مردأی جوأب بٚدأ: «همٚتأ، جٚه اَ حوکمأنَ جٚه او وخت کی زأی بوم انجأم بٚدأم.»
22 عیسا بٚفرمأسته: «هنو ایچی کم دأری. بوشو و هر چی دأری بوفروش و اونی پولَ فِقِرأنَ فأدن کی ایتأ پیله گنج آسمأنٚ دورون تٚرَه بٚبه نه زیمین سٚر! بأزون می دونبألسر بیأ!»
23 امّا او وخت کی او مردأی اَ گبَ بشتأوسته، غورصه‌دأرَ بوسته و جٚه اویَه بوشؤ، چونکی خٚیلی مأل و مینأل دأشتی. 24 هو وخت کی شؤئؤندوبو، عیسا اونَ فأندرستی. بأزون خو شأگردأنٚ ور بٚفرمأسته: «ایتأ پولدأرٚ رِه چنقذر سخته کی خودا پأدیشأیی دورونی بشه. 25 سوزن سولأخٚ جَا دٚوأرٚستن، ایتأ شوتورٚ رِه رأحتتره تأ ایتأ مأل و مینألدأر خودا پأدیشأیی‌یَ بودورون بشه.»
26 اوشأنی کی اَ گبأنَ بشتأوٚستٚد، بوگفتد: «پس اَ دونیأ دورون کی تأنه نیجأت بیأفه؟»
27 عیسا بٚفرمأسته: «اونچی اینسأنٚ رِه بوستنی نییٚه، خودا رِه ایمکأن دأره.»
28 پطرس بوگفته: «اَمأن اَمی خأنه زٚندیگی‌یَ سرأ دأییم کی تی جَا ایطأعت بوکونیم.»
29 عیسا جوأب بٚدأ: «شیمی خأطر جم بٚبه هر کی خودا پأدیشأیی وأسی شیمی مأنستَن خو خأنه، زن، زأکأن، برأرأن و خأخورأن، پئر و مأرَ ترکَ کونه، 30 اَ دونیأ دورونی چندر ویشتر اونَ فأدأ به و او دونیأ میأنم اَبدی زٚندیگی‌یَ یأفه.»
عیسا خو مٚردن و قیأمَ جٚه قبل اعلام کونه
31 بأزین، او دوأزده‌تأ شأگردَ خو دؤر جمَ کود و اوشأنَ بٚفرمأسته: «اَطؤ کی دأنید، اَمأن شؤئؤندٚریم اورشلیم. او وخت کی اویَه فأرٚسِییم، تومأمٚ اونچی کی قدیمی پیغمبرأن اینسأنٚ پٚسر وأسی جٚه قبل اعلام بوکودٚد، انجأم بِه. 32 اویَه، اونَ رومیأنٚ دٚس ایسپأرٚده و اوشأن، اونَ دٚسپٚره گیرده، اونَ بی‌ایحترأمی کونٚده و اونی دیمٚ رو فیلّی فوکونده، 33 اونَ شلأق زنٚده و کوشٚده. امّا سیومی روج زٚنده بِه!»
34 امّا شأگردأن جٚه اونی گبأن هیچی نفأمٚستٚد و اونی مأنیأن، اوشأنی جَا جیگأ بٚدأ بوبوسته و نفأمٚستٚد چی رِه گب زِئندره.
ایتأ کورٚ گدأ شفأ یأفتٚن
35 اوشأن رأ میأن اَریحا شهرٚ نیزدیکی فأرٚسئد. رأ کنأره ایتأ کورٚ مردأی گدأیی کودی. 36 چونکی کی مردومٚ شؤئؤن و اَمؤنَ ایشتأوستی، وأوٚرسِه: «چی خٚوٚر ایسه؟» 37 بوگفتد: «عیسای ناصری جٚه اویَه دٚوأرٚستأندره!» 38 دفأتن ایجگره اَمرأ بوگفته: «اَی عیسا، اَی داوودٚ پٚسر، مٚرَه رحم بوکون!»
39 اوشأنی کی عیسا جَا پیش دکفته بود، اونی سٚر ایجگره بٚزِده: «سأکیتَ بو!» امّا اون خو صدایَ بوجؤرتر بردی کی: «ای داوودٚ پٚسر، مٚرَه رحم بوکون!»
40عیسا بئیسأ و فرمأن بٚدأ کی اونَ بأوٚرٚد اونی ورجأ. او وخت کی او کورٚ مردأی نیزدیکٚ بوسته، عیسا اونی جَا وأوٚرسِه: 41«چی خأیی، کی تٚرَه انجأم بدم؟» جوأب بٚدأ: «آقأ جأن، خأیم کی بیدینٚم.»
42 عیسا بٚفرمأسته: «خٚیلی خُب، بیدین! تی ایمأن تٚرَه شفأ بٚدأ!»
43 هو وخت او کورٚ مردأکٚ چوم وأزَ بوسته و هطؤ کی خودایَ شوکر کودی، عیسا دونبألسر رأ دکفته. او وخت کی مردوم اَ مأجیرأیَ بیدِده، همٚتأن خودایَ شوکر بوکودٚد.
Aktuálne označené:
لوقا ۱۸: GLK_NT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2024 Transform Iran