ମାତିଉ 2
2
ୱେଲାରାଜି ଇନ୍ଦେଟି ୱାନ୍ନି ପଣ୍ଡିତଙ୍ଗ୍ ଜିସୁନିକି ପୁଁଣ୍ଡନ୍
1ହେରଦ ରାଜେଞ୍ଜି ଆକୁଡ଼୍ କିଚ୍ଚି ତୁକାତାୱା ଜିହୁଦା ରାଜିତି ବେତଲିହିମ ଗାଡ଼ାନାଜୁତାୱା ଜିସୁ ପ୍ଲିତି ଡେଗ୍ଗା ହୁଡ଼ାଟୁ, ୱେଲାରାଜି ଇନ୍ଦେଟ୍ତି ଏଚ୍ଚୁରି ପଣ୍ଡିତଙ୍ଗ୍ ଜିରୁସାଲମଇନ୍ଦା ୱାତେରି । 2ଏୱାରି ୱାନ୍ ୱେଚ୍ଚେରି, “ଜିହୁଦିଙ୍ଗ୍ତି ରାଜେଞ୍ଜି ଆନ୍ ପ୍ଲିଆନ୍ନେଞ୍ଜି ଏୱାଞ୍ଜି ଇମ୍ୱିନାୱା ମାନ୍ନେଞ୍ଜି ? ଇନାକି ମାମୁ ୱେଲାରାଜି ଦେସାତାୱାଟି ତା ସୁକା ହୁଡ଼ାନ୍ ତାଙ୍ଗେ ଅଲ୍ଗି ଆନାହି ଜୁହାରି କିଅନ୍ ୱାନ୍ନାମୁ ।” 3ଇଦା ୱେଞ୍ଜାନ୍ ହେରଦ ରାଜେଞ୍ଜି ଅଟେ ତା ଡ଼ାହି ଜିରୁସାଲମତାୱା ମାଚ୍ଚି ହାବେ ଦାଲ୍ଲା ଆଜ୍ଜିତେରି; 4ଆଟେ ହେରଦ ରାଜେଞ୍ଜି ହାବେତ୍ ଗାମିନ୍ ଜାଜକଙ୍ଗ୍ ଅଟେ ସାସ୍ତ୍ରିଙ୍ଗ୍ନିକି ରପାଟ୍ଟେ କିଆନ୍, କ୍ରିସ୍ଟ ଇମ୍ୱିନାୱା ପ୍ଲିଆନ୍ନେଞ୍ଜି, ଏଦା ଏୱାର୍ତାୱାଟି ପୁନ୍ବନ୍ ବାଗା ସେସ୍ଟା କିତେଞ୍ଜି । 5ଏୱାରି ତାଙ୍ଗେ ୱେସ୍ତେରି, “ଜିହୁଦା ରାଜିତି ବେତଲିହିମ ଗାଡ଼ାନାଜୁତାୱା” ଇନାକି ରଃଅଞ୍ଜ୍ ବାବବାଦି ଇହିଙ୍ଗିସି ୱ୍ରିଗାନ୍ନେଞ୍ଜି, 6“ଆଟେ ଏ ଜିହୁଦା ରାଜିତି ବେତଲିହିମ, ନିନୁ ଜିହୁଦା ରାଜିତି ହାବେତ୍ ବେର୍ ଗାଡ଼ାନାସ୍କା ତାୱାଟି ଡଟି ଆଃଏ, ଇନାକି ନା ଇସ୍ରାଏଲ ଦାଲ୍ଲାନିକି ଆଙ୍ଗୁଲ୍ ଆନେଞ୍ଜି, ଇହିଙ୍ଗିସି ରଃଅଞ୍ଜି ଆକୁଡ଼୍ କିଅନ୍ତାଞ୍ଜି ନି ତାୱାଟି ପ୍ଲିନେଞ୍ଜି ।” 7ଏ ଡେଗ୍ଗା ହେରଦ ପଣ୍ଡିତଙ୍ଗ୍ନିକି ମ୍ଡାମି ଆର୍ଚାନ୍, ଏ ସୁକା ଇମ୍ୱିନ୍ ତୁକାତାୱା ତଞ୍ଜାଚ୍ଚେ ଇଦା ଏୱାର୍ତାୱାଟି ନେହେନ୍ ୱେଚ୍ଚେଞ୍ଜି । 8ଆଟେ ଏୱାଞ୍ଜି ଏୱାରିକି ବେତଲିହିମଇନ୍ଦା ପାଣ୍ଡାନ୍ ୱେସ୍ତେଞ୍ଜି, “ମିରୁ ହାଜ୍ଜାନାହି ଏ ବଦାନିକି ନେହେନ୍ ଦାହ୍ଦୁ, ଆଟେ ହୁଡ଼ନ୍ ପାଟେସି ନାଙ୍ଗେ ୱେସ୍ତାଟୁ, ଆଟେ ନାନୁ ୱାଡ଼େ ହାଜ୍ଜାନ୍ ତାଙ୍ଗେ ଅଲ୍ଗି ଆନ୍ ଜୁହାରି କିଃଇ ।”
9ଏୱାରି ରାଜେଞ୍ଜ୍ତି କାତା ୱେଞ୍ଜାନ୍ ଏ ଗର୍ରିତାୱାଟି ହାଚ୍ଚେରି; ଆଟେ ହୁଡ଼ାଟୁ, ଏୱାରି ୱେଲାରାଜି ଦେସାତାୱା ଇମ୍ୱିନ୍ ସୁକା ହୁଡ଼ାଚ୍ଚେରି, ଏଦି ଏୱାର୍ତି ନକେ ନକେସ୍ ହାଜ୍ଜାନ୍, ଇମ୍ୱିନାୱା ବଦା ମାଚ୍ଚେ, ଏ ଗର୍ରି କୁଃଏଟି ବାସାଆତେ । 10ଏୱାରି ଏ ସୁକା ହୁଡ଼ାନାହି ଗାପ୍ଚି ରାହାଙ୍ଗ୍ ଆତେରି । 11ଆଟେ ଏୱାରି ଇଡ୍ଡୁ ଲାଃଇ ହାଜ୍ଜାନାହି ତା ଇୟା ମରିୟମ ଡ଼ାହି ବଦାନିକି ହୁଡ଼ିତେରି ଅଟେ ତାଙ୍ଗେ ଅଲ୍ଗି ଆନ୍ ଜୁହାରି କିତେରି, ଆଟେ ତା ତା ହାକୁସ୍କା ଗେର୍ଚାନ୍ ସୁନା, କୁନ୍ଦୁର ଅଟେ ଗନ୍ଦରସ ତାଙ୍ଗେ ଉପହାର ହିତେରି । 12ଡେଗ୍ଗା ହେରଦ ଟାକ୍କେ ୱ୍ଡେଚାନ୍ ହାଃଲ୍ଲାନ୍ ବାଗାଟି କ୍ଡିଞ୍ଜାଟି ମୁଲାପେନୁ ଏୱାରିକି ୱେସ୍ତେଞ୍ଜି, ଏମ୍ୱାଟି ଏୱାରି ବିହି ଗିଜ୍ଜୁ ଇନ୍ଦେଟ୍ ଆନ୍ ତା ଦେସାଇନ୍ଦା ୱ୍ଡେଚାନ୍ ହାଚ୍ଚେରି ।
ଜିସୁନିକି ଆହାନ୍ ଜସେପ ଅଟେ ମରିୟମ ମିସର ଦେସାଇନ୍ଦା ଡେହନି
13ପଣ୍ଡିତଙ୍ଗ୍ ୱ୍ଡେଚାନ୍ ହାଚ୍ଚାୱିଃଆଟି ହୁଡ଼ାଟୁ, ଦାର୍ମୁତି ଦୁତ କ୍ଡିଞ୍ଜାଟି ଜସେପନିକି ତଞ୍ଜୁଆନାହି ୱେସ୍ତେଞ୍ଜି, “ନିଙ୍ଗାମୁ, ବଦା ଅଟେ ତା ଇୟାନିକି ଆହାନ୍ ମିସର ଦେସାଇନ୍ଦା କାର୍ବେକ୍ ହାଲ୍ମୁ, ନାନୁ ମିଙ୍ଗେ ୱେଃସାନ୍ ଟିକ୍ନା ମିରୁ ଏଦିମ୍ୱା ବାସାଆଦୁ, ଇନାକି ହେରଦ ବଦାନିକି ପାଗନ୍ ବାଗା ଦାହ୍ପନ୍ତିକି ଏଲୁ କିନ୍ନେଞ୍ଜି ।” 14ଇମ୍ୱାଟି ଏୱାଞ୍ଜି ନିଙ୍ଗାନ୍ ଏ ଡାଡ଼ିଙ୍ଗ୍ ବଦା ଅଟେ ତା ଇୟାନିକି ଆହାନ୍ ମିସର ଦେସାଇନ୍ଦା ହାଚ୍ଚେଞ୍ଜି, 15ଆଟେ ହେରଦ ରାଜେଞ୍ଜ୍ ହାତି ଟିକ୍ନା ଏୱାରି ଏଦିମ୍ୱା ବାସାଆତେରି, ଇନିସ୍କି ମିସର ଦେସାତାୱାଟି ନାନୁ ନା ମ୍ରିଃଏଞ୍ଜିକି ଆର୍ତେ ଇଞ୍ଜାନ୍ ଦାର୍ମୁ ହୁସୟ ବାବବାଦି ତାୱାଟି ୱେସାଚ୍ଚି ବାକ୍ୟ ସପଲ ଆତେ ।
ହେରଦ ବେତଲହିମତି ଡଟି ମ୍ଡେହା ବଦାଙ୍ଗ୍ନିକି ପାଗନ୍
16ଏମ୍ୱାଟି ପଣ୍ଡିତଙ୍ଗ୍ ନାଙ୍ଗେ କଲ କିଆତେରି ଇଞ୍ଜାନ୍ ପୁଞ୍ଜାନାହି ହେରଦ ରାଗା ଆତେଞ୍ଜି, ଆଟେ ଏୱାର୍ତାୱାଟି ଇମ୍ୱିନ୍ ତୁକା କୁଲାଟି ନେହେନ୍ ୱେଞ୍ଜାନ୍ ପୁଞ୍ଜାଚ୍ଚେଞ୍ଜି, ଏଚିଡେହେଙ୍ଗ୍ ରି ଅଁଣ୍ଡୁଟିଆଟି କକ୍ଚି ଏଚ୍ଚେ ଡଟି ମ୍ଡେହା ବଦାଙ୍ଗ୍ ବେତଲିହିମ ଗାଡ଼ାନାଜୁତାୱା ଅଟେ ଏ ଟାକ୍କେ ମାଚ୍ଚି ହାବେତ୍ ନାସ୍କାତାୱା ମାଚ୍ଚି ଏ ବଦାଙ୍ଗ୍ନିକି ତା ଦାଲ୍ଲାନିକି ପାଣ୍ଡାନାହି ହେରଦ ରାଜେଞ୍ଜି ପାଗି କିତେଞ୍ଜି । 17ମୁଲାପେନୁ ଜିରିମିୟ ବାବବାଦି ତାୱାଟି ଇନ୍ନା ୱେସାଚ୍ଚେଞ୍ଜି ଏଦି ଏଚିତୁକାତାୱା ସପଲ ଆତେ, 18ରାମା ଗାଡ଼ାନାଜୁତାୱା ରଣ୍ଡି ଏଗେଲ୍ କିରେଡ଼୍ ଆନ୍ ଡ଼ିଅନ୍ତି ଉକୁଡ଼୍ ୱେନ୍ବନ୍ ଆତେ, ରାହେଲ୍ ତା ମ୍ରିକା ବାଗାଟି ଡ଼ିନ୍ନେ; ଆଟେ ଏଦାଡ଼ିକି ମାତି କିତେସି ୱାଡ଼େ ଏଦି ମ୍ରିକା ହେଃଲ୍ଲେରି ଇଞ୍ଜାନାହି ମାତି ଆଏହେଃଲ୍ଲାତେ ।
ମିସର ଦେସାତାୱାଟି ୱ୍ଡେପନି
19ହେରଦ ହାତାୱିଃଆଟି ହୁଡ଼ାଟୁ, ଦାର୍ମୁତି ଦୁତ ମିସର ଦେସାତାୱା ଜସେପନିକି କ୍ଡିଞ୍ଜାଟି ତଞ୍ଜୁ ଆତେଞ୍ଜି । 20ଆଟେ ଏୱାଞ୍ଜି ୱେସ୍ତେଞ୍ଜି, “ନିଙ୍ଗାମୁ, ବଦା ଅଟେ ତା ଇୟାନିକି ଆହାନାହି ଇସ୍ରାଏଲ ଦେସାଇନ୍ଦା ହାଲ୍ମୁ, ଇନାକି ଏମ୍ୱେନାରି ବଦାତି ପରନ୍ ନାହେଡ୍ କିଅନ୍ ବାଗାଟି ଇଚ୍ଚା କିଚ୍ଚେରି ଏୱାରି ହାନ୍ନେରି ।” 21ଏମ୍ୱାଟି ଏୱାଞ୍ଜି ନିଙ୍ଗାନାହି ବଦା ଅଟେ ତା ଇୟାନିକି ଆହାନ୍ ଇସ୍ରାଏଲ ଦେସାଇନ୍ଦା ୱାତେଞ୍ଜି । 22ମତ୍ର ଆର୍କିଲିୟ ତା ଆବା ହେରଦତି ଗର୍ରିତାୱା ଜିହୁଦା ରାଜିତି ରାଜେଞ୍ଜି ଆନ୍ନେଞ୍ଜି, ଇଦା ୱେଞ୍ଜାନାହି ଏ ଗର୍ରିଇନ୍ଦା ହାଲ୍ବନ୍ ବାଗା ଏୱାଞ୍ଜି ଆଜ୍ଜିତେଞ୍ଜି; ମତ୍ର ମୁଲାପେନୁ ତାଙ୍ଗେ କ୍ଡିଞ୍ଜାଟି ୱେସ୍ତାୱିଃଆଟି ଏୱାଞ୍ଜି ଗାଲିଲି ରାଜିଇନ୍ଦା ହାଚ୍ଚେଞ୍ଜି । 23#ମାର୍କ ୧:୨୪; ଲୁକ ୨:୩୯; ଜହ ୧:୪୫ଆଟେ ଏୱାରି ନାଜରିତ ପାରୁଗାଟି ଗାଡ଼ାନାଜୁତାୱା ହାଜ୍ଜାନାହି ବାସାଆତେରି, ଇନିସ୍ “ଏୱାଞ୍ଜି ନାଜରିତିୟ ଇଞ୍ଜାନ୍ ପଙ୍ଗିନେଞ୍ଜି” ବାବବାଦିଙ୍ଗ୍ ତାୱାଟି ୱେସାନ୍ନି ଇ ବାକ୍ୟ ସପଲ ଆତେ ।
Aktuálne označené:
ମାତିଉ 2: DWK
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás