Samba Leko - 2007 - BSCAM NT Drama

Nouveau Testament en Samba Leko © Alliance Biblique du Cameroun, 1998. 

Zɔ̀ŋ aa Yéésù bé' nɛ́b zùúm bəd gə́, zá' na' kɔ̀l wàà yílú, bít kùm yɛ́b ba. Nɛ́b sáànmbə̀ oò bəd ìì gbarà oò sunú, bít sɔ̀d bə̀ in sáànmbə̀ kə̀ aakíin:


«Nɛ́b aa bə̀ tə́ yíl boò ɛgǹ kə̀ nɛ́b búúd bə̀ bəd kíin, Vɛnɛ́b númú rə,
Vɛnɛ́b dá bə̀ nɛɛ̀n zígǹ yílú, kə̀ tɛ́m làmkèá,
kàandə, Vɛnɛ́b dá gààd ləə̀n boò yílú!
Nɛ́b aa bə̀ tə́ kuùm kə̀ tɛ́m nwuukè rə,
Vɛnɛ́b dá bə̀ nɛɛ̀n zígǹ yílú, kə̀ tɛ́m làmkèá,
kàandə, Vɛnɛ́b dá bə̀ tɛ́m tɛ́'nàá!
Nɛ́b aa bə̀ tə́ kuùm kə̀ tɛ́m ɔ̀gke rə,
Vɛnɛ́b dá bə̀ nɛɛ̀n zígǹ yílú,
kàandə, bə̀ dá sə̀n yɛ́b aa Vɛnɛ́b bàà dàà rə bɔbàá!
Nɛ́b aa bə̀ tə́ saàn kə̀ tɛ́m nə́ŋ̀ní, in aa Vɛnɛ́b í' rə ma'ǹmbə̀ rə,
Vɛnɛ́b dá bə̀ nɛɛ̀n zígǹ yílú, kə̀ tɛ́m làmkèá,
kàandə, Vɛnɛ́b dá bə̀ tɛ́m nyɛ́'nàá!
Nɛ́b aa bə̀ tə́ ɔ̀dnə́ŋ̀ búúd ɛgǹ bé'ǹ də,
Vɛnɛ́b dá bə̀ nɛɛ̀n zígǹ yílú,
kàandə, Vɛnɛ́b dá bə̀ búúd ɛgǹ bé'ǹ kɔ̀!
Nɛ́b aa bə̀ tə́ kuùm kə̀ tɛ́m nyɛdkè rə,
Vɛnɛ́b dá bə̀ nɛɛ̀n zígǹ yílú,
kàandə, bə̀ dá Vɛnɛ́b kíìn bé'nàá!
Nɛ́b aa bə̀ tə́ tɛbə̀ saàn boò tə́ŋə́ rə,
Vɛnɛ́b dá bə̀ nɛɛ̀n zígǹ yílú,
kàandə, bə̀ dá bə̀ dɛdǹ Vɛnɛ́b yɛb bərá!
Nɛ́b aa bə̀ tə́ bə̀ búúd í'ǹ nɛɛ̀n aa bə̀ tə́ ma'ǹ dú,
kìínmbə̀ nɛɛ̀n aa Vɛnɛ́b í' rú rə kíin də,
Vɛnɛ́b dá bə̀ nɛɛ̀n zígǹ yílú,
kàandə, bə̀ bɔ̀b Vɛnɛ́b Gààd lɛgə́ paà bə̀ì gbə̀ə́d!
«Màìgə́, nɛ́b bəd tə́ ii dúlàá, bə̀ tə́ ii búúd í'nàá, bít bə̀ tə́ gúsuúm nwɔŋ vaksə́ bəd gáàm aí yílú, nɛɛ̀n aa íí bàg mə́ rə bòórú gə́, Vɛnɛ́b dá ii nɛɛ̀n zígǹ yílú. Ìì kùm kə̀ tɛ́m làmkèá, tɛ́m íí oò yád kúnú; kàandə, mú'sɛ̀l dùm íí dá kuùm gbà'á, lɛgə́ poú. Kə̀ aarə kíin, bə̀ í' taà Vɛnɛ́b gbantumsə̀ bəraa nyàamdoorú rə búúrá.»


«ÍÍ tə́ kìínmbə̀ nwuùm yɛ́b kíin, nɛ́b zɔ̀ŋə yɛ́b bə bə̀ tə́ŋú. Zá dáà nwuùm yɛ́b bɔ̀m bùmkè oòì gə́, báan níì báàn ma'ǹmbə̀, bɔ̀b oò bə̀ bí'ǹmbə̀ bùmkè sɔ̀ŋ gú? In nə́ŋ̀má nɛ́ŋə̀ bán ma'ǹmbə̀ kə̀ kùrú sɔ̀ŋ gá, sìná pú' bə̀ dáù zadǹ gbaarú, bít nɛ́b bəd dáù nádǹ dunú.
«Íí tə́ kìínmbə̀ laa nyɛdkè kíin, nɛ́b bəd tə́ŋú, zɔ̀ŋə yɛ́b ba. Bìl aa bə̀ wə̀ə̀ kɔ̀l yílə́ rə, mə́' núùrú gá. Bít íí kó' lampə̀ì gə́, íí wúbə̀ kɛ̀ɛ̀l dùù gá. Zá aa sɔ̀ɔ̀n də gə́, íí zígə̀ téé dàndunwà yílú, bít nyɛ́' nɛ́b aa kùm wúu wərə̀ rə gə́ kóólé. Ogə́, laa nyɛdkè aí bə̀ kɔ̀ bììd oò nyɛd kàani, nɛ́b bəd númú, bɔ̀b boò bé' tù' sɔ̀ɔ̀nkè bəraa íí tə́ ma'ǹ doó, bít boò káŋ Báá íí Vɛnɛ́b aa lɛgə́ paà roó.»

«Ìì gú' baànmbə̀ gə́, mə́ yaà Musa indaŋ̀mbə̀ bəd lo'ǹmbə̀ kə̀ nwɔŋ aa Vɛnɛ́b gbantumsə̀ bəd ìì sán nɛ́b bəd də tá. Mə́ yaà lo'ǹmbə̀ gá, zá mə́ yaà ma'ǹ zə́'ǹmbìá. Kə̀ aakíin də, mə́ tə́ ii kíìn baanàá, aarə nwɔŋ sɔ̀ɔ̀ná, bə́ŋ̀ lɛg kə̀ yɛ́b tá ìì tə́ kuùm dáàn númú ní gə́, insedké wàà nə́ŋ̀má bɔ̀b indaŋ̀mbə̀ bərú gá, in bəd kóólé yaà dá ma'míìn zé. Kə̀ taàbìá, màn aa məə indaŋ̀mbə̀ bɛ̀ŋ́sə̀ yɛb aa ìì nə́ŋ̀, bít sán nɛ́b bəd boò mà' kàandə, bə̀ dáù dɛdǹ nɛ́d bɛ̀ŋ́sə̀wàá, Vɛnɛ́b Gààd lɛgə́ paà bə̀ rú. Zá màn aa kò' kùd yàá, bít sán nɛ́b bəd yàá, boò mà' nɛɛ̀n aarə rú rə, bə̀ dáù dɛdǹ nɛ́ŋ gbàároá, Vɛnɛ́b Gààd lɛgə́ paà bə̀ rú. Kə̀ aakíin də, vɛ́nà mə́ tə́ ii kíìn baanàá, wɔ̀ɔ̀lə̀ íí aa Vɛnɛ́b númú rə, kàn nɛ̀n indaŋ̀mbə̀ bəd gə̀b bə̀ kə̀ Farisa bəd gə̀b bə̀ tə́ síngə́, íí pìì Vɛnɛ́b Gààd lɛgə́ paà bə̀ rú gá.»

«Íí kìì Vɛnɛ́b bàà doo bə́n bəd yàá: ‹Ǹ lò' yíl sí. Màn aa lò' yíl lə, kò' bə̀ dáù fágǹ gààd númú.› Zá máá gə́, mə́ tə́ ii kíìn baanàá, màn aa mà' nɔ̀mì kə̀ ɔrə̀ nə́ŋ̀ də, də́ŋì ko'ǹ aànmbə̀ nɛ́b fágə́n bə̀ ma'ǹ bəd númú. Màn aa bàà ɔrə̀ nə́ŋ̀ ‹Yáá› rə kɔ̀, dam bəd wálke gbà'á oò í'ù búúrá. Bít nɛ́ŋə̀ aa bàà ɔrə̀ nə́ŋ̀ì: ‹Ń kèérá› rə kɔ̀, də́ŋì oò bə̀ aànmbə̀ laa aa fə́' bə gá rə rú. Ń yaaì gannyàgə̀lú, Vɛnɛ́b in piìnmbìá, bít sèl ń zá' gə́, ɔ̀dnə́ŋ̀ ń tə́ kə̀ nwɔŋ kə̀ ám gə́, zíg ǹ dàà in piìnmbə̀ ń də gannyàgə̀l númú wərà, ɛ̀m dáá ǹ saŋ̀ sína kə̀ ɔ̀dnə́ŋ̀ ń da, kidbíd yaà ǹ pii taà in piìnmbə̀ ń də Vɛnɛ́b númú. Ɔ̀dmáàn ń kò' tə́ən aàn fágə́nú gə́, yaà ǹ saŋ̀ kə̀ báŋ kə̀ oòra. M̀ mà' kə̀ aakíin, bɔ̀b bə́ŋ̀ íí wə́ə́ fágə́n zɔ̀ŋú sé. Ń saŋ̀ kə̀ oò síngə́, kò' dá n piìn nɛ́b fágə́n bə̀ bəd nɛɛ̀n tɛ́mú. Bít kamgə́, nɛ́d fágə́n bə̀ kò' dá n piìn sóózè oò bəd naú, bɔ̀b boò páá n wúltígə́l bə̀ rú. Mə́ tə́ən kíìn baanàá, aarə nwɔŋ sɔ̀ɔ̀ná: ‹Ń dá vúgǹ wərə̀ gə́, ń dá sína kpob ń də káàn bɛ́'ǹ kə̀ ba'wà lɛ̀ɛ́ŋə̀ aa dùg kə̀ bòd də tá. Síngə́, ḿ bɔ̀b vúgǹmbə̀ rú wərə̀ gá sə́g sə́g.› »

«Íí kìì yàá bə̀ bàà: ‹M̀ mà' labsə̀ sí.› Zá máá gə́, mə́ tə́ ii kíìn baanàá, kóó nɛ́ɛ̀réè, ɛ̀g nɛ́ŋ kéèndo yàá, ɔ̀rə̀wì oò tɛ́mú gə́, mà' labsə̀ì kə̀ oòra. Dáà núùwà nɛɛ̀n váànú bə̀ ḿ bòórú, ń tə́ taà piìn sáàn invaksə́ rú gə́, ǹ sɔ̀rə̀ kúnú, làà ǹ lɛ́'ù zɔ̀ŋ bùúd ba. Aa dá sɔɔ̀n də, m̀ pìì Vɛnɛ́b yiìl kə̀ núù nə́ŋ̀ní, kə̀ piìnmbə̀ kə̀ núù iira, laa aa fə́' bə gá rə rú gə́ roó. Bít dáà nɛɛ̀n váàn ḿ bòórú, ń tə́ taà piìn sáàn invaksə́ rú gə́, kò'ǹ və̀rə̀ kúnú, bít làà ǹ lɛ́'ù zɔ̀ŋ bùúd bə kə̀ ámda. Aa dá sɔɔ̀n də, m̀ pìì Vɛnɛ́b yiìl kə̀ nɛɛ̀n nə́ŋ̀ní, kə̀ piìnmbə̀ kə̀ nɛɛ̀n iira, laa aa fə́' bə gá rə rú gə́ roó.»


«Núúboòd Gìdń bààì nyàam dam ba: ‹Màn aa vú' kéèn oòrə, bád oò piiù núúboòd nɛɛ̀n tɛ́mú.› Zá máá gə́, mə́ tə́ ii kíìn baanàá, màn aa vúŋ kéèn oò kàaní, labsə̀ nwɔŋ bòórú síndə gə́, pááùwì labsə̀ rú, bít màn aa pà' kéèn aa vúŋ bə̀ lɛ́' yérəì kɔ̀, mà' labsə̀ yàá.»

«Íí kìì yàá sɔ̀ŋ, bə̀ bàà doo bə́n bəraa nyàam dam bəroó: ‹Nwɔ̀m m̀ yɛ̀l in sí, zá nɔ̀ŋ ǹ mà' in aa ḿ bàà bəǹ dá ma'ǹ də kíìn Báátììkpɛ̀ŋ númú.› Zá máá gə́, mə́ tə́ ii kíìn baanàá' Ìì nwɔ̀m in kə̀ in nə́ŋ̀má sí. Ìì nwɔ̀m in kə̀ lɛg sí; kàandə, lɛg də Vɛnɛ́b Gààd mə̀ə̀rá. Ìì nwɔ̀m in kə̀ yɛ́b sí, kàandə, yɛ́b də zɔ̀ŋ dun bə̀ náàn oòra. Ìì nwɔ̀m in kə̀ Urusalima bìl sí, kàandə, aarə gààd gbà'á bìlá. Ǹ nwɔ̀m in kə̀ yíl ń sí, kàandə, ḿ bán yíl gí' nə́ŋ̀má bí'ǹmbə̀ biídoá, sínkɔ̀ diíŋdo gá. Nwɔŋ aa íí tə́ gáàm də, oò kùm ‹èè,› sínkɔ̀ ‹ə́ùwə́.› Nwɔŋ ɔ̀d aa bàà íí zəg yílə́ rə gə́ kóólé, vúgà Nɛ́ŋə̀ Vaksə́ naú.»


«Íí kìì Núúboòd Gìdń bààì nyàam dam ba: ‹Nɛ́ŋə̀ kpò' n núùì gə́, ǹ kpò'ù núù kɔ̀, bít nɛ́ŋə̀ kɛ̀d n nə́gə́lì gə́, ǹ kɛ̀rə̀ nə́gə́l kɔ̀.› Zá máá gə́, mə́ tə́ ii kíìn baanàá, ìì bí' vaksə́ kə̀ vaksə́ sí. Aa dá sɔɔ̀n də gə́, dáà nɛ́ŋə̀ nə́ŋ̀ zìbmmì lám nɛɛ̀n váànú bə̀ bə gə́, lìb m̀ bí'ù lám nɛɛ̀n kéènú bə̀ kɔ̀. Dáà nɛ́ŋə̀ nə́ŋ̀ bààì bəǹ dá n kíìn luùn fágə́nú, bɔ̀b bə ǹ dá gɔ̀'wà dùù bə̀ ń nyá'ǹ ke'ǹ gə́, lɛ́' ǹ dààù oò kè' kə̀ dàál ń tá. Dáà nɛ́ŋə̀ nə́ŋ̀ pè' n yàá, bə̀ pà' ǹ àà bəǹ inpi'kè kílomɛ́tà nə́ŋ̀ gə́, pà' tá' ǹ ààù kílomɛ́tà iira. Nɛ́ŋə̀ aa nyɛ̀m m in də, ǹ piiù kúnú, bít màn aa í' kpob ke'ǹmbə̀ ám naà rə kɔ̀, ǹ nya'ù sí.»


Yéésù tə́ diìn nɛ́b bəd in ní sáànmbìá: «Íí kìì yàá, Núúboòd Gìdń bàà nyàam dam ba: ‹Ǹ í' ɔ̀dnə́ŋ̀ ń da, bít ǹ zèè ɔ̀dmáàn ń da.› Zá máá gə́, mə́ tə́ ii kíìn baanàá' ìì í' ɔ̀dmáàn íí bərá, bít ìì nyɛ̀m Vɛnɛ́b kə̀ nɛ́b aa bə̀ tə́ ii búúd í'ǹ doó, bɔ̀b ìì kùm Báá íí Vɛnɛ́b lɛgə́ paà bə̀ yɛbá. Kə̀ aakíin, oòra mà' gó' sə̀n nyàm oò nɛ́b in vaksə́ bə̀ ma'ǹ bəd yílú, kə̀ nɛ́b insɔ̀ɔ̀nkè bə̀ ma'ǹ bəd yílú; bít náŋ nwan, nɛ́b insɔ̀ɔ̀nkè bə̀ ma'ǹ bəd yílú, kə̀ nɛ́b invaksə́ bə̀ ma'ǹ bəd yílú. Dáà íí í' tə́ nɛ́b aa bə̀ tə́ ii í'ǹ də ní gə́, kə̀ níìbə̀ kùm íí nwán taà Vɛnɛ́b oò káá ii mú'sɛ̀l dùm bə gú? Nɛ́b ba'káám bə̀ ke'ǹ bəd kɔ̀, ìì mà' tə́ kàani. Íí dɔ̀m tə́ ɔ̀dkuvɛɛ̀l íí bəd ní gə́, níì in gbà'á íí mà' taà gú? Nɛ́b aa ìì bàg Vɛnɛ́b síndə kɔ̀, ìì mà' tə́ nɛɛ̀n aarə rú. Ìì kuùm wɔ̀ɔ̀lə̀ Vɛnɛ́b kpaŋú, kìínmbə̀ nɛɛ̀n aa Báá íí Vɛnɛ́b lɛgə́ paà bə̀ kùm dú wɔ̀ɔ̀lə̀ rə kíni.»

Terera ku Mata 5