Lewo: Lologena Wo Kienane Yesu Kristo New Testament

Lologena Wo Kienane Yesu Kristo

Ana kas lap̃as p̃aro pa rui, ana Yoane Nakeena, narina ne Sakaraea, naga pimi m̃aliv e yokorena. Naga nene e pogos nap̃a pupia P̃arin Sup̃e Taepirias Sisa nae Rom naga pe sup̃e keviu ke tol kana kas lualima taaga pa lima rui, a e poglis nene na mliganar kiena yerkawa lap̃as rui, sane Ponses P̃aelat, naga pisuar Yutea, a Erot, naga pisuar Kalele, a wenla nap̃a Pilip, naga pisuar lepas nae Ituraea amio Trakonatis, a Lasanias, naga pisuar lepas nae Apilin. A e m̃ena ga e pogos nene, lalua nap̃a ape p̃ar na yaru wa lala asike garu Yerusalem, naga Anas amio Kaep̃as.
Ana Yoane sike garu yokorena, ana Ntewa mla visena la pania, ana naga pa make e lepas punu ga na wii nae Yortan, naga sum̃a mlologon ke pisape yaru la punu ga monar avilopu la, a monar ava e nakeena, ana yoko Ntewa naga viewo kiela mlamulena viowa lala. Naga kila sa ga nap̃a Navisawalena Aisea pisa nanua rui e kiena tusi, nap̃a sape
“Pulgo tai sum̃a pio ke e yokorena, sape
Akila ruru make mrapa kiena ne Ntewa,
vena naga kilia imi m̃alivi e kiamiu malena lala.
Yoko kam na monar asinwo make pulp̃alu lala,
a monar akilro kunus la su ga tano,
a yo la nap̃a kapinia la monar aim amesmesu ruruia
a yo la nap̃a p̃ilp̃il la monar aim ameri ruruia;
ana sanene, yoko yolai la punu ga avisu kiela Natamaliaena nap̃a Ntewa ligania yalin la e mrapa nene imi m̃alivin la.”

Yum̃aena kiena ne Yoane, naga mlologon sanene narui, ana pogos nap̃a p̃ina la moki amolue apa e yokorena vena naga kee la, naga pis m̃arera pan la, pisa sanini, pisape “Kam na sa ga lom̃ara la nap̃a amaraun kapi tai ana ap̃ure, ana kam na asitom asape akilia aurmatan pupia anen kapi nap̃a Ntewa yoko ligan imi? Peraga, komin pe apilopu amiu ruru re poli wa. Ana visae lelaga kemua nap̃a amaraun nakoaena nene, kiamiu malena lala monar war mras wo la nap̃a torokin kiamiu navilopuena nene. Ana avisuaria, ve awarwar amiu re sina, sa nap̃a akila ke rui, nap̃a asum̃a apisa ke asape ‘E, ita na tesum̃a poga ga rui, okilakan ita ke narui tepe lus kiena ne Epraam nena nap̃a.’ Ana nanene na pe sur re tai nene poli, komin nap̃a visae Ntewa sinenania, naga kilia war kilavaru la nene, yum̃aen lus kiena ne Epraam la ve moki ea, vena la akus lelemiu. In na nevisa van amiu, nevisave m̃ekiavi mon ruru m̃eke rui, vena te plan laki la nap̃a pe ap̃ar re mras wo la poli, akoven la ava e kapi.”
Ana pogos nap̃a p̃ina la amloge nene, amarau na amarau, ana apiunia, asape “Ana visae ve sa nene, yoko imimi mekila ve sanape narui?”
Ana Yoane pisatam̃e la, pisape “Yar nap̃a m̃ana kulsaket lua, yoko naga monar tam̃an tai va yar nap̃a pe m̃ana re tai poli. Yaru nap̃a kana kinanena keviu, yoko naga monar vion re komp̃as va yar nap̃a pe kana re poli.”
A yar na takis la moki, nap̃a ape li nakila keuiaen nena yar lala, apimin vena Yoane kila nakeena van la, ana la m̃ena ga apisu kilale kiela napiowaena lala, ana la apiun m̃ena ga asape “?Navianena, sanapen imimi, yoko imimi monar mekila ve sanape?”
Ana naga pisa pan la, sape “Yoko awarpolo vetan yaru lala torokin ga ya nap̃a la monar aulia, ana ve yuve re, sa nap̃a akila ke p̃isi rui.” Ana yaru na mara m̃ena lap̃asia apiun sanini pa Yoane, asape “?A imimi, yoko mekila ya?”
Ana naga pis pan la, pisape “Amiu apuarar ke kiamiu suri na mara lala, ana yaru la asum̃a amaraun amiu pap̃isi, lala sane visae pog tai sinemiun kiela suri tai, amiu avisa ga ana monar atam̃ania. Ana p̃elaga nene, yoko monar ve akila re sina. A asum̃a sinemiu mimi lue silaga asape yerkawa la nene apul amiu ve tokak ga, pona torok ga yo, ana monar akekaran ga narui.”

E pogos nene, le Yu lala asum̃a asitom ke asape kiela Navisaarena lavisi m̃alivi, ana amloge visena wo la nene kiena ne Yoane, akekarania, ana naviunena sike e kiela sitomena lala, asum̃a apiuviun ke, asape “O, pona yaru ne nanene yo, naga pe kieta Navisaarena, pona peraga?”
Ana Yoane sum̃a pisawal ruru merarava pan la, pisape “Peraga. In na nepitom sumo, vena nesum̃a nekee amiu ke ga e wii, ana yaru tap̃ena tai vim siraun inu. Yaru nene, naga to laa metavan inu, a in na pe netorokin re nap̃a nelup̃arlua kulus nen lana poli pona nekila kiena yum̃aena tap̃ena. Ana naga ke narui, yoko kee amiu e Ninuna Wa, amio kana kapi nena, vena kekan plan kororaki lala vetan kiamiu malena. Naga sa nap̃a naga tarar ke koruak nayuraren wit, vena silsilin plan kana kinas lala. Ve sanene, yoko naga war ruru kinas nen wit la nene va um̃a, ana yoko naga koven vinus va e kapi tai nap̃a tap̃atete mare pogos tai.”
Nanene narui, Yoane Nakeena mlologon Lologena Wo pa yeririna la sa ke nene narui, a naga sum̃a pisa ke m̃ena visena wo naiilaaren tap̃ena la pan la, a visena nakila p̃egelaena. Ana yar tai pe kekaran re nena Yoane, nane P̃arin Sup̃e Erot, komin Yoane sum̃a pis ke pania vanon nap̃a naga p̃erelua sira nene Lerotias, nap̃a wona wenla, a pis pania vanon sur tap̃ena m̃ena lap̃asia nap̃a naga kila. Ana metavan kiena napiowaena tap̃ena lala, Erot sinen kar Yoane pano-o, sum̃al narui koven pa e yum̃a naloge viowaena.


Ana pogos nap̃a Yoane pe pa re e yum̃a naloge viowaena poli wa, naga kee m̃a yeririna la pano-o, ana pog tai Yesu m̃ena pimi e yo nene, ana Yoane kee m̃ena naga. Ana pogos nap̃a Yesu molue e wii, sum̃a mlen m̃aga, ana veraga ga sinapane pike, a Ninuna ne Ntewa pimi pe tasa, mom̃a pitomi tano sane lom̃e tai, pitomi pran ea. Ana Ntewa pis ma e peni pitomi pania, pisape “Ko Naruu nene, nap̃a nepinaia ko pap̃isi. Kiau sitomena sike ga e ko, nekekaran ko pap̃isi.”


Ana siraun nap̃a Yoane kee Yesu, ana naga siar kiena yum̃aena narui, a e poglis nene, naga kiena kas la tol lualima telu. A lus nap̃a Yesu molue komea, e lepas na yerm̃ene, siar e Yosop, nap̃a apisu sane arimanane Yesu, pa sanini:
Yosop, naga narina ne Eli;
Eli, naga narina ne M̃atat;
M̃atat, naga narina ne Livae;
Livae, naga narina ne Melki;
Melki, naga narina ne Sanae;
Sanae, naga narina ne Yosop;
Yosop, naga narina ne M̃atateas;
M̃atateas, naga narina ne Amos;
Amos, naga narina ne Neam;
Neam, naga narina ne Esli;
Esli, naga narina ne Nagae;
Nagae, naga narina ne M̃at;
M̃at, naga narina ne M̃atateas;
M̃atateas, naga narina ne Semein;
Semein, naga narina ne Sosek;
Sosek naga narina ne Sot;,
Sota, naga narina ne Soanan;
Soanan, naga narina ne Resa;
Resa, naga narina ne Serup̃apel;
Serup̃apel, naga narina ne Saltiel;
Saltiel, naga narina ne Neri;
Neri, naga narina ne Melki;
Melki, naga narina ne Ati;
Ati, naga narina ne Kosam;
Kosam, naga narina ne Elm̃atam;
Elm̃atam, naga narina ne Ere;
Ere, naga narina ne Yosua;
Yosua, naga narina ne Eliesa;
Eliesa, naga narina ne Sorim;
Sorim, naga narina ne M̃atat;
M̃atat, naga narina ne Livae;
Livae, naga narina ne Simion;
Simion, naga narina ne Suta;
Suta, naga narina ne Yosop;
Yosop, naga narina ne Sonam;
Sonam, naga narina ne Eliakim;
Eliakim, naga narina ne Melea;
Melea, naga narina ne Mena;
Mena naga narina ne M̃atata;
M̃atata, naga narina ne Natan;
Natan, naga narina ne Tepet;
Tepet, naga narina ne Sese;
Sese, naga narina ne Opet;
Opet, naga narina ne Poas;
Poas, naga narina ne Sala;
Sala, naga narina ne Nason;
Nason, naga narina ne Aminatap;
Aminatap, naga narina ne Atmin;
Atmin, naga narina ne Ani;
Ani, naga narina ne Esron;
Esron, naga narina ne Peres;
Peres, naga narina ne Suta;
Suta, naga narina ne Sekop;
Sekop, naga narina ne Aisak;
Aisak, naga narina ne Epraam;
Epraam, naga narina ne Tera;
Tera, naga narina ne Nao;
Nao, naga narina ne Seruk;
Seruk, naga narina ne Reu;
Reu, naga narina ne Pelek;
Pelek, naga narina ne Ep̃a;
Ep̃a, naga narina ne Sela;
Sela, naga narina ne Kaenan;
Kaenan, naga narina ne Ap̃aksati;
Ap̃aksati, naga narina ne Sem;
Sem, naga narina ne Noa;
Noa, naga narina ne Lamek;
Lamek, naga narina ne
Metusela;
Metusela, naga narina ne Inok;
Inok, naga narina ne Saret;
Saret, naga narina ne Malalil;
Malalil, naga narina ne Kaenan;
Kaenan, naga narina ne Enos;
Enos, naga narina ne Set;
Set, naga narina ne Atam; ana
Atam, naga narina ne Ntewa.

Terera ku Luk 3