Mbula- Bwazza for Nigeria 2016 NBTT/WBT - Non-Drama (NT)

Mbula

Yesu ka, eau amur Nkono mala anggun Olif. Ban fana nǝ tadǝmbari ka, nyare wario a Ndàmǝgule mala Ɓakuli. Sǝ ɓwapǝndǝa yiu rambǝa abani, pǝlǝa do tita kania wia gir. Amalǝm Nggurcau mala Musa andǝ amǝ Farisi yiu nǝ ɓe mɓwama mǝnana à bwalia amur rǝarǝia andǝ ɓe ɓwabura ka, sǝ à yì tamsǝi a ɓadǝm ɓwapǝndǝa. À ɗi Yesu ama, “Malǝm, mɓwama man ngga à bwali amur rǝarǝia andǝ ɓwabura. Nggurcau mala Musa bangŋa ama mɓwama mǝnana pak ulang man yì gir ka, ɓǝa ɓukki nǝ atali ɓǝ̀ wú. Sǝ ado ka, mana a na amuri?” Cau mǝnia à ne ka, gbǝli na à dambi Yesu ka, acemǝnana ɓǝ̀ na ɓe kǝ cau sǝ à nǝ̀ bwali nǝi ka.
Sǝ Yesu ka kūndǝo kǝ gilǝgir a nzali nǝ munabui. Lang à came arǝ ɗike ka, pǝlǝa loasǝ muri sǝ nea wia ama, “Ɓwa mǝnana ata wun pànǝ cauɓikea raka, ɓǝ̀ tita tur tali.” Sǝ nyare kūndǝo aban gilǝgir a nzali. Lang amalǝm nggurcau andǝ amǝ Farisi ongŋǝna cau mǝnana Yesu na ka, kara à purki banì mwashat-mwashat, tite aban ɓwamǝgule. Sǝ à nying Yesu nǝmurǝì andǝ mɓwame aban came aɓalǝ aɓwana.
Yesu lo cam nǝ came, sǝ ɗi mɓwame ama, “Aɓwana mǝnana à yinǝ we ka, à nda ke le? Kǝɓwa pà kàm atea mǝnana ueo nǝ̀ pakko ɓashi-lú ka re?”
Pǝlǝa eare ama, “Awo, Ɓwamǝgule, kǝɓwa pà kàm ɗang.”
Yesu banggi wi ama, “Nggearǝ mim gbal ka ǝn kasǝo ɓashi-lú ɗang. Kyane, sǝ kǝa pak cauɓikea ɗǝm ɗang.”]

Yesu nyar ɗǝm banggi aɓwana ama, “Mǝ nda tǎlaban mala ɓanza! Ɓwa mǝnana kat kpatam ngga, pà nǝ̀ gya a pǝndǝa ɗang, nǝ̀ kum tǎlaban mala yilǝmu.”
Amǝ Farisi ne wi ama, “Ado ka a ban nakun ɓamuro, cau mo ka à pà nǝ̀ é ama mǝsǝcau na ɗang.”
Sǝ Yesu nea wia ama:
Ko ɓǝ̀ ǝn nakun ɓamuram ngga, cau mem ngga à nǝ̀ earnǝi, acemǝnana ǝn surǝna rǝ ban mǝnana ǝn pur kam ngga, sǝ ǝn surǝna rǝ ban mǝnana mǝ nǝ ká kam ngga. Sǝ wun ngga, wu surǝ ban mǝnana ǝn pur kam, andǝ ban mǝnana mǝ nǝ ká kam ngga ɗang. Wu kǝ pak ɓashi aɓa nggūrǝu, sǝ mim ngga ǝn nggǝ ɓashi kǝɓwa ɗang. Sǝ ɓǝa na ama ǝn nggǝ pak ɓashi ka, ɓashi mem ngga mǝsǝcau na, acemǝnana ǝn pa nǝmurǝam ata ɓashi ɗang, Tárram mǝnana tasǝam ngga nda atam. Nggurcau ma'wun bangŋa ama, ɓǝ̀ kun aɓwana ɓari yiu mwashat amur cau ka, ce ka mǝsǝcau na. Sǝ mim ngga, ǝn nakun ɓamuram, sǝ Tárram mǝnana tasǝam ngga nakunam gbal.
Sǝ à ɗi ama, “Tarró na ake?”
Pǝlǝa Yesu earia wia ama, “Wu surǝam ɗang, sǝ wu surǝ Tárram ɗang. Ɓǝ̀ wu surǝna rǝam ngga, ɓǝ̀ wu surǝna rǝ Tárram gbal.”
Yesu naki amǝnia yì acau ka mǝnana nda rǝ kanigir a buban mǝnana à kǝ tsǝk boalo kam andǝ agir mǝɓoarne aɓa Ndàmǝgule mala Ɓakuli ka. Sǝ kǝɓwa bwali ɗang, acemǝnana pwari male malaká karǝ ɗang.
Yesu nea wia ɗǝm ama, “Mǝ ndo mǝ nǝ o; ɓǝn umna ka, wu nǝ̀ altam, sǝ wu nǝ̀ wú aɓalǝ acauɓikea ma'wun. Pa wu nǝ̀ gandǝ ká aban mǝnana mǝ nǝ ká kam ngga ɗang.”
Pǝlǝa aɓwana-mǝgule mala amǝ Yahudi ɗiban ama, “Nggearǝì ka nda ban earce nǝ̀ wal ɓamuri le? Mana tsǝa sǝ na ama, pà sǝm nǝ̀ gandǝ ká aban mǝnana nǝ̀ ká kam ngga ɗang?”
Yesu ear ama, “Tǝta wun ngga a ɓanza mǝnia a nzali ka sǝ pa, sǝ mim ngga ǝn pur nǝ kuli. Wu nda ka mala ɓanza man, sǝ mim ngga mǝ nda mala ɓanza man ɗang. Nda gir mǝnana tsǝa sǝ ǝn na wun ama wu nǝ̀ wú aɓalǝ acauɓikea ma'wun ngga; ɓǝ̀ wu earnǝ mim ama Mǝ Nda ɓwa mǝnana ǝn na nǝma Mǝ Nda ka raka, wu nǝ̀ wú aɓalǝ acauɓikea ma'wun.”
Pǝlǝa à ɗi Yesu ama, “A nda yana?”
Sǝ Yesu earia wia ama, “Mǝ nda kǝ ɓwa mǝnana ǝn na wun a dǝmbe nǝma mǝ nda ka. Mǝ ndanǝ acau pas amur wun, mǝnana mǝ nǝ ɓashia wun nǝia ka, sǝ pa mǝ nǝ pe ɗang. Tárram mǝnana tasǝam ngga mǝ'mǝsǝcau na, sǝ ǝn nggǝ ne ɓanza gir mǝnana ǝn o a kuni ka.”
Sǝ kǝɓwa sǝlǝa atea ama Yesu na ban nea wia cau amur Tarrí Ɓakuli ɗang. Ace mǝno ka, Yesu nea wia ama, “A pwari mǝnana wu loasǝna Muna mala Ɓwa a kuli amur nggun-gangndi ka, akano sǝ wu nǝ̀ sǝlǝ ama Mǝ Nda ɓwa mǝnana ǝn na wun nǝma Mǝ Nda ka. A pwari mǝno sǝ wun nǝ̀ sǝlǝ gbal ama ǝn nggǝ pak kǝgir aɓa rǝcandǝa mem ɗang. Kǝ gir mǝnana Tárram kaniam ngga kǝ nda ǝn nggǝ na ka. Ɓwa mǝnana tasǝam ngga nda atam; nyem nǝmurǝam ɗang. Acemǝnana koya pwari ka ǝn nggǝ pak gir mǝnana kǝ pwasǝbumi ka.” Pas ata aɓwana mǝnana à ok Yesu aban na amǝnia yì acau ka à pà ɓamuria abaní.

Yesu ne aɓwana mǝnana à pà ɓamuria abaní ka ama, “Ɓǝ̀ wu kpata kanigir mem ngga, wu nda ka amǝkpatam amǝ'mǝsǝcau nì. Sǝ wu nǝ̀ surǝ mǝsǝcau, sǝ mǝsǝcau ka nǝ̀ panzǝki wun.”
Pǝlǝa à eari wi ama, “Sǝm ngga, sǝm nda ka amǝkau mala Ibǝrayim, sǝm duk aguro mala kǝɓwa àkǝ̀ pwari ɗang. Lang sǝ a nǝ na sǝm ama à nǝ̀ panzǝ sǝm?”
Yesu nea wia ama:
Mǝ nda ban na wun mǝsǝcau, ɓwa mǝnana kat kǝ pak cauɓikea ka, guro mala cauɓikea na. Guro pà nǝ̀ do a ɓala nǝ̀ ue kam ɗang, sǝ muna ka, mala ɓala na, do male a ɓala ka pà nǝ́ masǝlǝate ɗang. Ɓǝ̀ Muna mala Ɓakuli nǝ̀ panzǝo ka, panzǝban mo ka mǝ'mǝsǝcau nì na. Ən sǝlǝna ama wu ndaka amǝkau mala Ibǝrayim, sǝa ma wu kǝ earce walam, acemǝnana wu eari cau mem ɓǝ̀ kum ban-do a ɓabum wun ɗang. Mim ngga ǝn nggǝ bang gir mǝnana ǝn sǝni aban Tárram ka. Sǝ wun ngga wu kǝ pak gir mǝnana tár wun kǝ na wun ngga.
Sǝ à eare ama, “Ibǝrayim nda kà-sǝm.”
Yesu nea wia ama, “Ɓǝ̀ kàngkàng wu ndaka amǝkau mala Ibǝrayim ngga, wu nǝ̀ pak agir mǝnana Ibǝrayim pea ka. Wu kǝ earce ama wu nǝ̀ wal-luem, acemǝnana ǝn bangga wun mǝsǝcau mǝnana ǝn o a kun Ɓakuli ka. Sǝ Ibǝrayim pak kǝgir anggo ɗang. Wu nda rǝ pak gir mǝnana nggearǝ tár wun pakkiyi ka.”
Amǝ Yahudi ne wi ama, “Ɓakuli nda kǝ Tár sǝm, sǝm ndaka muna tà-jam ɗang.”
Sǝ Yesu nea wia ama:
Ɓǝ̀ tar wun nda Ɓakuli ka, wu nǝ̀ earcem, acemǝnana ǝn pur aban Ɓakuli, sǝ ado ka mǝ ndakani. Ən yipi ɓamuram ɗang, Ɓakuli nǝ̀ turam. Man tsǝa sǝ wu bwalta acau mǝnana ǝn nggǝ na wun ngga ɗang? Nda ace mǝnana wu gandǝ ok cau mem ɗang. Wun ndaka muna mala tár wun yì Shetan, sǝ wu kǝ earce lumsǝî tár wun a kun aturo male. Yì ka, tita walki-alú ɗiɗyal, sǝ kǝ earce mǝsǝcau ɗang, acemǝnana mǝsǝcau pa a ɓalǝi ɗang. Ɓǝ̀ ndarǝ na nyir ka nda ban lǝmndǝ girbui, acemǝnana yì ka, mǝ nyira, sǝ nda tár amǝ nyir kat.
Sǝ acemǝnana ǝn nggǝ na mǝsǝcau ka wu earnǝ mim ɗang. Yana ata wun nǝ̀ lǝmndǝ bui arǝ kǝ cauɓikea mǝnana ǝn pe ka? Sǝ ɓǝ̀ mǝsǝcau na ǝn nggǝ bang ngga, mana tsǝa sǝ wu ginǝ earnǝ mim? Ɓwa mǝnana mala Ɓakuli na ka kǝ kwaki kiri arǝ cau mala Ɓakuli. Sǝ wun ngga wun ndaka mala Ɓakuli ɗang, nda gir mǝnana tsǝa sǝ wu kǝ kwaki kir wun a rǝì raka.

Sǝ aɓwana-mǝgule mala amǝ Yahudi ɗi Yesu ama, “Cau mǝnana sǝm na ama a nda ɓwa Samariya sǝ kukwar na a rǝo ka mǝsǝcau na re?”
Pǝlǝa Yesu nea wia ama, “Ən panǝ kukwar a rǝam ɗang. Ən nggǝ pe Tárram gulo sǝ wu kǝ nyesǝam ɓà. Ən pa aban alita ɓamuram gulo ɗang. Tárram na kǝ alamta gulo ka, sǝ yì nda ɓwa mǝnana pakkiyi ɓashi mǝ'mǝsǝcau nì ka. Mǝ nda ban bangga wun mǝsǝcau, ɓwa mǝnana kǝ kpata cau mem ngga pà nǝ̀ wu ɗang.”
Pǝlǝa aɓwana-mǝgule mala amǝ Yahudi ne wi ama, “Ado sǝ sǝm sǝlǝa aɓa mǝsǝcau ama, a ndanǝ kukwar a rǝo! Nggearǝ Ibǝrayim ngga wǔ, sǝ amǝ'ɓangna mala Ɓakuli wú, pǝlǝa a nǝ yia na sǝm ama, ‘Ɓǝ̀ ɓwa kpata cau mem ka pà nǝ̀ wu ɗang.’ A kuti kà-sǝm Ibǝrayim le? Yì ka, wǔ, sǝ amǝ'ɓangna mala Ɓakuli gbal ka à wǔ. Sǝ we ka a kǝ sǝni kǝla a nda yana?”
Yesu earia wia ama, “Ɓǝ̀ ǝn pe ɓamuram gulo ka, gulê pà a kun kǝgir ɗang. Sǝ Tárram mǝnana wu twali ama nda Ɓakuli ma'wun ngga, nda mǝnana pākiyam gulo ka. Wun ngga wu surǝì ɗang, sǝ mim ngga ǝn surǝì. Ɓǝ̀ ǝn na ama ǝn surǝì raka, mǝ nda mǝ'nyir kǝla wun. Sǝ mim ngga ǝn surǝì, sǝ ǝn nggǝ kpata cau male. Kà wun Ibǝrayim ngga, pak banɓoarnado ama nǝ̀ sǝn pwari yiu mem, pǝlǝa sǝni sǝ bumi pwasǝo.”
Pǝlǝa amǝ Yahudi banggi Yesu ama, “A malaká bwal pǝlǝa lumi-tongno ɗang, sǝ lang sǝ a nǝ na ama a sǝn Ibǝrayim?”
Yesu earia wia ama, “Mǝ nggǝ bangga wun mǝsǝcau, kaniama à nǝ̀ ɓǝl Ibǝrayim ngga, ‘Mǝ ndakam.’” À nǝ̀ ok mǝno yì cau ka, kara à pwan atali ama à nǝ̀ ɓukki, sǝ Yesu gbar rǝì, pǝlǝa puro nying Ndàmǝgule mala Ɓakuli.

Terera ku Yohana 8