Bible Text in Txitxopi© SociedadeBíblica de Moçambique, 1999 Audio recording of the Bible Text ℗ Hosanna, 2018

Txitxopi - 1999 MOZ (NT) Drama

A Bíblia em Txitxopi © Bible Society in Mozambique, 2016.

Se va to khukha votshe va txi mu heleketa ka Pilato; va txi khata ku mu mangalela, va txi kha vona:
“Hi mani m'thu wuwa a txi kujetela ditiko dathu, a txi tsimba resa ka Khezari, a txi khene Ene ngene Mkoma Mesiya.”
Pilato a to mu wotisa, a txi khene:
“Ina awe u Mkoma wa Vajudha kani?”
Jesu a to xamula, a txi khene:
“Ngawe u wombako tona tata!”
Konako Pilato a to gela vaphaxeli va hombe ni dibutho, a txi khene:
“Ani kha ni mani mnandu ka m'thu wuwa.”
Aniko vona va to tamarisa va txi kha vona:
“Ene wa kujetela vathu kuwusa vhilinganya, a txi gondisa ka dotshe ditiko da Judheya, kukhukhela Galileya, amuwa a nga khatela kona kala kuhoka hawa.”

Sekoko ngako a di engisile tiya, Pilato a to wotisa ti to Ene mbwa Galileya kani; Se a di engisile ti to Ene mbwa ditiko da kufumelwa ngu Herodha, a to m'rumela kwakwe Herodha, nga ngu hawa nene a nga txi maneka Jerusalema ka ona masiku ale.
Mbimo yi a nga wona Jesu, Herodha a to tsaka ngutu, nguko i ti kale, a txi vilela ku mu wona, ngu mhaka ya tiya a nga txi tiengisa va txi womba-womba ngu ngene, a txi rinzela ti to mwendo Ene a nga thuka a txi maha txixamaliso txokari masoni kwakwe. A mu wotisete to tala, kambe ene kha angula txilo. Vaphaxeli va hombe ni vabhali, va nga ti ho konaho, va ti ti ya masoni ngu ku mu mangalela. Herodha ni masotxhwa akwe va to womba-womba nayo ngu ku mu eyisa ni ku mu poyilela. Se ve mu ambeka nguwo yo khetima, va txi tshumela ve m'rumela ka Pilato. Ka ditshiku dile, Herodha ni Pilato va to txitxa ve maha vangana, vona kale va nga txi vengelana ngu txawe.


Se Pilato a to ramba vaphaxeli va hombe ni vathangeli ni vathu va ditiko, a txi khene kwawe:
“Mi tisile m'thu wuwa masoni kwangu, mi txi khanu Ene i mkujeteli wa vathu. Ni mu wotisile masoni kwanu, kambe kha na mana txionho ni txa tximwetxo ka sile mi mu mangalelako ngu sona. Herodha nene kha mana txilo kwakwe, nguko a mu wuyisile kambe kheno kwathu. Kota nga ti nanu mi ti wonako, Ene kha maha txilo txa kuza txi mu abanisela kufa. Ngu toneto, ni na mu thukunyula e tsula, msana ka ku mu tsayisa.”
[Se ngu mbimo ya M'buso wa Pasika, Pilato a ti ni fanelo ya ku va thukunyulela mmweyo wa vale vo sungwa.] Aniko konaho votshe va to kwangula ngu dipswi dimwedo, va txi kha vona:
“Daya wuwa, u txi hi thukunyulela Bharabhasi!” Kasi Bharabhasi wuwa a ti ko khotelwa ngu mhaka ya kuwusa dizunga didhoropani, ni kudaya m'thu.
Pilato a tshumete kambe a txi va angula ngu kulava kuthukunyula Jesu. Kambe vona va txi kwangula va txi kha vona:
“Mu bethele! Mu bethele!”
Sekoko Pilato a to va angula ka wuraru, a txi khene: “Kasi njionho muni a nga txi maha Ene kani? Kha na mana txilo kwakwe, txi sikotako ku mu abanisela kufa. Ngu kota yeto, ni na mu thukunyula e tsula, msana ka ku mu tsayisa.”
Aniko vona va txi tamarisa ngu mapswi a kumaha diguwa, va txi kombela ti to a na bethelwe ha txihambanoni, kambe diguwa dawe di to xula. Sekoko Pilato a to wila ti to ku na mahwe ati vona va nga txi kombela tona; A to thukunyula awule a nga ti khotetwe ngu mhaka ya kuwusa yimbi ni kudaya m'thu, kota nga ti vona va nga txi vilela tona, se e va ninga Jesu, va txi ya mu maha tiya vona va nga txi lava tona.


Se mbimo yi va nga ti mu heleketa, va to kurumeta Simoni wa Kirene, a nga ti wuya ngu thembweni, va txi mu pakatisa txihambano, na a txi txi pakata ngu msana ka Jesu.
Va txi mu londetela vathu votala, ni vavasikati vokari, va nga txi peka tihuwa, va txi mu dilela. Jesu a to tshembereka a txi va wonetela, a txi khene:
“Anu vanana vamahorana va Jerusalema, mi nga ni dileleni; ti dileleni anu mipune ni vanana vanu, nguko ma nata masiku awa ku nota wombwa ti to va katekile vavasikati va i ku sifule, ni va va nga mbi veleka, ni va va nga mbi mamisa. Sekoko ka yoneyo mbimo, va nata gela mimango va txi kha vona: ‘Welani txitimwi kwathu!’ Ka situnga va nata kha vona: ‘Hi khubhunyeteni!’ Nguko, akuwa va nga maha tiya ka mndonga wo nakana, nji txani va no mbi txi maha ka wu wa kuoma kani?”
Se va to teka vamwani vavambidi, i nga ti sigevenga, kasi kuya dawa kumweko nayo Jesu. Ngako va di hokile ka wukhalo wu wu dhanwako ku i “Txikwakwa,” va to mu bethela ha txihambanoni Ene ni sigevenga sile sa simbidi, tximwetxo ngu didhawa da txineneni kwakwe, tximwani ngu didhawa da txibhabha kwakwe.
Se Jesu a ti ti khene:
“Tata, va divalele, nguko kha va ti zivi ati va ti mahako.”
Ngu msana, va to abanela syambalo sakwe, ngu kuxaxuva tixolo. Dibutho da vathu di ti zumbile kona hale, va txi wonetela, se vathangeli va kona va txi poyilela va txi kha vona:
“A ponisile vamwani, a na ti ponise nene apune, ngako i di Mesiya Msawulwa wa Txizimu!” Masotxhwa ni ona ma txi mu xowokisela, ma txi mtshuketela kufela ku mninga vhinagre. Va txi kha vona: “U di Mkoma wa Vajudha, ti hanyise upune!”
Se ngu txitimwi kwakwe, ku ti bhatwe ti taku: “AWUWA, MKOMA WA VAJUDHA.”
Mmweyo wa sigevenga sile a nga ti bethetwe naso, a to mruketela, a txi khene:
“Ngako i di awe Kristu, ti hulukise awe, kumweko ni nathu.”
Aniko awule mmwani a to teka dipswi a txi mu kawuka, a txi khene:
“Khu xoniphi Txizimu, hambiko nawe u manekako u di kona kuabaniswani kumweko nayo, kani? I di athu hi tsayiswa ngu kona; hi dihela mithumo yathu. Kasi ene kha onha txilo.”
Se a to txhatekela mapswi a ku khene:
“Jesu, ni alakanye, mbimo yi u no wulela Mfumoni kwako.”
Ene a mu xamute a txi khene:
“Kha ditshuri na kugela tito: Nyamsi, u na va kumweko ni nani Paradhiseni.”


Ngu txikhati txo lava kudingana ni txa wutxhanu ni tximwetxo, txidema txi to khubhunyeta dotshe ditiko kala txikhati txa wutxhanu ni mune, ngu mhaka ya kuphumiswa ka ditambo, se nguwo ya Dithepele yi to vharuka ngu hagari; Se Jesu a to huwelela ngu dipswi da hombe, a txi khene:
“Tata, na ningela moya wangu manzani kwako.”
A di gwitile kuwomba tiya, a to fa. Se ngako nduna ya 100 da masotxhwa yi di woni tile ti nga maheka, yi to dhumisa Txizimu, yi txi kha yona:
“Kha ditshuri m'thu wuwa i ti wo lulama!”
Ni votshe vathu vale votala, va nga ti tile ku ta diwuka mhaka yile, ngako va di woni tile ti nga maheka, va to tshumela ve tsula mitini kwawe, na va txi ti peka tikhana. Votshe va va nga ti zivana nayo ni vavasikati va va nga ti mu londetela kukhukhela Galileya, va to ema ngu kule, va txi wonetela totshelele tiya.


Ku ti ti ho wamwamna, a nga ti dhanwa ku i Josefa, i nga ti txihango txa Dibanza, m'thu wamnene, na a di lulamile, awu a nga ti sa pfana navo ka malamulelo awe ni mthumo wawe. I ti wa Arimateya, didhoropa da Vajudha, awu a nga ti rinzela Mfumo wa Txizimu. Ene a to tsula ka Pilato, a txi ya kombela mmidi wa Jesu. A to ya wu hawula, a txi wu phutela amu ka dilasori, a txi wu veka diyivani, di nga ti ketwe ha dirigwini, amuwa ku nga sanzi kutshotshwa m'thu. I di ditshiku da kulongisela, na se ditshiku da Sabbata di txi khata kuhuma wuronga wa kutxa.
Sekoko, vavasikati vale va nga ti tile kumweko ni Jesu ngu Galileya va to longoloka ni Josefa veya wona diyiva ni kuwona kambe ati va nga vekisa tona txirumbi txa Jesu. Se va di wuyile, va to longela makha ni mafura o bhumula. Se ngu ditshiku da Sabbata va to humula, nga kuruma ka Mlayo.

Terera ku Luka 23