Lugbara - 1966 BSU (NT) Drama

Bible in Lugbara © United Bible Societies, 1966. 

Omu mikate akufi kokoru nyazuri eca ogogo, omvele Agaza ’ba drilesiri’i. ’Ba wara kuhaniru ’diyi pi ’ba azita sipi ’diyi be yi nda geri eri fuzuri; te yi ru ’bani. Satani nga fi Yudasi omvele Isikarioti’iri ma alia, eri’i ’ba mudri drini iri ’diyi ma eseliari, Eri nga mu e’yo ’yozu ’ba wara kuhaniru ’diyi pi be, opi asikari ma drilia ’diyi pie, geri ndazu eri fezu yi dri. Yi ovu ayikosi, yi azi silingi fezu eri dri. Eri a’i ra, nga geri nda eri fezu yi dri de ’ba ongulumuru yi yo.

O’du mikate akufi kokoruni eca ra, o’du ndesi yi adri kabilo agaza ’ba drilesiriniri li. Eri pe Petero pi ma ti Yohana be, ’yozu kini, Emi mu agaza ’ba drilesiri edezu ama dri, ama ma nya. Yi ’yo eri tia, Mi le ama ma ede ngoa ya? Eri ’yo yi tia, Mi ndre, emini firia aku amboria, emi nga dri fu agupi yilemvu beri be; emi la vutini kpere jo erini fizuria, emi ’yo jo e’i ma tia, ’Ba ’ba Imbapiri ’yo mi tia, omuni, pari mani ngazu agaza ’ba drilesiri nyazu alenia ’ba mani imbale ’diyi beri ngoa ya? Agu nderi nga emi dri jo aliza amboru uruleruri ece edezaru afa dria be; emi ’ba afa ngonde ’daa. Yi mu ra, yi isu ekile erini ’yole yi tiarile; yi nga di agaza ’ba ’drilesiri ede ani.
Etu ka eca ra, eri ri va ’ba erini ti opele ’diyi be. Eri ’yo yi tia indi, Ma le omu agaza ’ba drilesi ’diri nyazu emi be avasi tu, de nga yi ecandini ma ku; te ma ’yo emi tia, ma ngani eri nya dika ku, de nga eri ’yeni i i paria suru Mungu­niria ku. Eri nga okele ’du, ka awa’difo fe ’bo, eri ’yo, Emi ’du ’diri, awa emi eselia; te ma ’yo emi tia, engazu curu’do ma ngani efi zabibuni ’yaleri ma su mvu dika ku, de nga suru Munguni ecani ku. Eri ’du mikate ra, eri ka awa’difo fe ’bo, eri anyo aleni, awa fe yi dri, kini, ’Di rua mani, fele emisiri. Emi ’ye ’dri ma egazu. Nyaka ma vutia eri nga okele ’du ’dinile indi, kini, Okele ’diri eri e’yo aziza o’diru ari mani rapi emisiri ma aliari. Te mi ndre, ’ba ma o’di nyapiri ma dri ovu maniri be mesa dria. Te adaru Mvi ’bani mu di geri edele eri dri driori ma alia ra; te candi agu eri ma o’di nyapi ’dari dri! Yi ’ba e’yo ozi yi eselia, kini yi eselia a’dini ’ye e’yo ’diri ’yeni ya.

Yi’ba agata ga yi eselia, kini ’ba yi eselia egale amboru tori eri a’di’i ya. Eri ’yo yi tia, Opi ’ba jururu ’diyini adri yi drilia opiru okposi; azini omve ’ba yi drilia azita fepi okposi ’diyi ma ru, ’Ba azi ’yepi onyiru ’diyi. Te emi ma ovu ’dinile ku; te ’ba amboru agapi ra emi eseliari ma ovu ekile osipi vilerile, azini ’ba ’ba dri cepiri ma ovu ekile ’ba ’ba aza kopi azisirile. Te ngori aga ra, kani ’ba ripi mesa tiari’i, kani ’ba ’ba aza kopi azisiri’i ya? Eri ’ba ripi mesa tiari’i ku ya? Te ma ovu emi eselia ekile ’ba ’ba aza kopi azisirile.
Te emi ovu ’ba adripi tepi ma be tualu obeta mani ma alia ’diyi; ekile ma Atini suru nyaza azile ma dririle, ’dinile ma azi emi dri emi ma nya, emi ma mvu, mesa mani ma tia suru nyaza mani ma alia, emi ma ri vini oguna ma dria suru Israelini mudri drini iri ’diyi ma e’yo lizu.

Simoni la, Simoni la, mi ndre, Satani a’i emi o’bizu, emi ndrizu ko’bisi anyale. te ma’i, ma zi i Mungu matusi misi ’bo, ’dini a’ita mini ma de i ku beni; te mi’i, mi ka mi oja dika ’bo, mi ’ba di mi adripi ma asi okporu. Eri ’yo eri tia, Opi, ma ovu ngonde muzu mi be arujoa, kpere dra vu indi. Eri ’yo ra, Petero, ma ’yo mi tia, de nga a’nata ’beni cere andru ku, mi nga ma ga si pale na, kini mi nini ma ku.

Eri ’yo yi tia, Ma ka ndra emi ti pe ovuzu okporo kokoru, jurua kokoru, enyiriko paari kokoru, afa azini ma alio nde ndra emi ra ya? Yi kini, Yo. Te eri ’yo yi tia, Te curu’do okporo e’i ma ’du di iniri, jurua e’i ma ’ye ’dinile indi. ’Ba sei kokoruri ma ozi bongo ’beza erini, ma je sei ani. Te ma ’yo emi tia kini e’yo yini sile ’diri ma ’ye i ma ruaa, ’yozu kini, La eri ’ba ezapi ’diyi ma aziru; te e’yo sile masiri ovu ’yeza ini i pariari be. Yi ’yo ra, Opi, mi ndre, sei iri yi ’doa. Eri ’yo yi tia, Fu dri ra.

Eri efu amve, mu oni Mizeitu­niri ma dria erini adrile ’yelerile; ’ba erini imbale ’diyi nga eri vuti bi indi. Eri ka eca pari nderia eri ’yo yi tia, Emi zi Mungu emi kazu fizu obeta ma alia ku. Eri nze i esele yi be were, ekile ’bani ecole oni ’bezu rarile, eri nga kumuti osi va Mungu zizu, kini, Ata, mi ka le ra, mi ’du okele ’diri ma vurisi ra; te e’yo mani leleri’i ku, te e’yo mini leleri ma ’ye’ini. Malaika engapi ’buari e’da i eri vu, okpo fezu eri dri, Erini ovuria candisi amboru, eri zi asi driasi aga okori ra; ondi erini oja i ekile ari i olipi otipi va nyakuarile. Eri ka enga erini Mungu zizu ’boria, eri emu ’ba erini imbale ’diyi vu, nga yi isu o’du koria candisi; eri ’yo yi tia, Emi o’du ko a’disi ya? Emi enga uru; emi zi Mungu, emi kazu fizu obeta ma alia ku.

Erini nga e’yo ’yoria, mi mire, ’ba ongulumuru eca, de agu ’bani omvele Yudasi’i, ’ba mudri drini iri ’diyi ma azi aluri, ce yi ma drini. Eri, esi Yesu vu inyia, o’boloni ndruzu; te Yesu ’yo eri tia, Yudasi, mi Mvi ’bani fe ari’ba dri o’bolo ndruzasi ya? ’Ba eri ma ageia ’diyi ka e’yo ngapi i ’yepiri ndre, yi ’yo ra, Opi, ama ma oga yi seisi ya? ’Ba alu yi eseliari ga ati’bo ’ba kuhani agapirini, li bini dri ndiari va. Te Yesu nga e’yo omvi ’yo ra, Mi ku nga ’dipi! Eri nga bini elo, nga eri ati ra. Yesu nga ’yo ’ba ’wara kuhaniru ’diyi pi ma tia, ambo asikari ma drilia hekalua ’diyi pie, ’ba ’wara be, emupi eri vu ombasi ’diyi, kini, Emi efu sei pi emi dria abe­leku pie, ekile oguou bizurile ya? Mani ovuria emi be hekalua etuzu, emi ejuni dri ma bizu ku. Te ’diri eri etu emini, azini okpo ininiri indi.

Yi bi eri ra, ji eri ofizu kuhani agapiri vile joa. Te Petero nga eri vuti bi re. Yi ka ad edu aku ma eselia agadua, yi ka ri va tualu, Petero ri yi eselia indi. Zana alu ndre erini riria aci diza ma tia, nga eri ni ’dani, eri ’yo ra, ’Ba ’diri ovu eri be indi. Te eri ga si, kini, Oku, ma nini eri ku. Vutinia were ’ba azini ndre eri ra, nga ’yo ra, Mi indi, mi ’ba yini. Te Petero nga ’yo, Agu la, ma ’ba yini yo. Ekile sawa alu ma vutia, ’ba azini ’yo ti mbazasi kini, Adada, ’ba ’diri indi ovu te eri be; erini ovule ’ba Galilianirisi. Te Petero nga ’yo, Agu la, ma nini e’yo mini ’yoleri ku. Perepere erini nga e’yo ’yoria, a’nata nga cere o’be. Opi oja i, nga Peteroni lu. Petero ega e’yo Opini ’yole i tia kini, De nga a’nata ’beni cere andru ku, mi nga ma ga si pale na-ri ra. Eri fu amve, eri wu candisi, mindre be tu.

’Ba Yesuni bipi ’diyi onzi eri, nga eri co indi; yi anzu eri mile bongosi, yi zi eri kini, Mi ondri e’yo ’diri nabile! A’di gba mini ya? Yi o’yo e’yo azini karakarau eri ruaa eri o’dazu.

Angu ka ati ra, ’ba ’wara ’ba drilia ’diyi pi nga yi oku tualu ’ba wara kuhaniru ’diyi pie, ’ba azita sipi ’diyi pie dria, nga eri ji ’ba yini e’yo amapi ’diyi vu, kini, Mi ka ovu Kristo’i, mi olu amani, Te eri ’yo yi tia, Ma ka olu emini ti, emi ngani ma a’i aluni ku; ma ka emi zi ra ti, emi ngani e’yo omvi ku. Te engazu ewu ’dirisi Mvi ’bani nga ri okpo Munguni ma dri ndiria. Yi dria ’yo ra, Ka’dini mi di Mungu Mvi’i ya? Eri ’yo yi ria, Emi ’yo ’bo; ma eri’i. Yi ’yo ra indi, Ama di kiri ’ba e’yo eti nzepi ’diyi le ’dani a’disi ya? Te ama ngulupi eri e’yo efupi eri tiliari ’bo.

Terera ku Luka 22