Bible text: Luvale © Bible Society of Zambia, 2017 www.biblesociety-zambia.org/ Recording of the New Testament ℗ Hosanna, 2022

Luvale - 2017 BSZ (NT) Drama

Jino chimenemene, vapilishitu vavalemu vosena navakulwane javaYuleya vatwamine Yesu punga mangana vawane mwakumujihila.
Kaha vamukashile, vamutwalile nakumuhana kumavoko anguvulu, Pilatu.

Kaha Yuta, uze ámuhanyine kumavoko avaka-kole, omu amwene Yesu vanamuhane mulonga ngwavo afwenga, alinyengele hachize alingile. Kaha ahilwishile jize jimbongo ja palata makumi atatu (30) kuli vapilishitu vavalemu navakulwane javaYuleya nakwamba ngwenyi,
Ngunavulumuna hakuhana mutu wakuzeneka mulonga kumavoko enu. Oloze vakiko vamwambile ngwavo, Ocho chili naka nayetu? Ojo jove!
Kaha omu ambilile jize jimbongo ja palata mu Tembele , afumineko, ayile nakulisukika.
Jino vapilishitu vavalemu vanonele jize jimbongo ja palata nakwamba ngwavo, Mwaya Jishimbi jaMose, kacholoka kujihaka mwakulamina luheto lwajilako mwomwo jinafwiki manyinga.
Kaha valivwasanyine, vajilanjile mavu atengi yaunonga mangana vafundengamo vangeji.
Shikaho aze mavu vawavuluka ngwavo Mavu-amanyinga nakulelo.
Haze vene vateselemo muze vahanjikile muli kapolofweto Yelemiya ngwavo,
Kaha vambachile jize jimbongo japalata makumi atatu (30),
Jikiko ndando yaUze vátongwelele vana vaIsalele,
Kaha vajilanjile mavu atengi yaunonga,
Ngana muze angulwezele MWATA.


Jino Yesu emanyine kumeso anguvulu. Kaha nguvulu amuhulishile ngwenyi, Ove yove Mwangana wavaYuleya tahi? Yesu amukumbulwile ngwenyi, Mwomwo vene unambe.
Kaha omu vapilishitu vavalemu navakulwane javaYuleya vapwile nakwaula chihande chenyi, kakumbulwileko.
Haze vene Pilatu amuhulishile ngwenyi, Kaweshi nakwivwa omu vali nakuhana unjiho wauvulu ngana hali oveko tahi?
Oloze Yesu kamukumbulwileko, chipwe halizu limwe, ngocho nguvulu alikomokelele chikuma.


Jino hachiwanyino chaKuzomboka, nguvulu apwilenga nakwechela lizavu lyavatu weshowo funge navasaka.
Halwola luze vaLoma vapwile nafunge wapuho yayipi, lijina lyenyi Mbalapa.
Shikaho omu vakungulukile Pilatu avahulishile ngwenyi, Namusaka ngumyechele iya? Mbalapa tahi, nyi Yesu, Ou vavuluka ngwavo Kulishitu?
Mwomwo atachikijile ngwenyi vanamuhane kumavoko enyi halisungu.
Jino omu Pilatu atwamine halitanda lyakusopela, pwevo lyenyi amutuminyine mazu ngwenyi, Fumisaho mavoko hali Owo Mutu wakwoloka, mwomwo lelo ngunayande chikuma hali Ikiye mukulota.
Jino vapilishitu vavalemu navakulwane vakunyukishile mazavu avatu mangana Pilatu avahane Mbalapa, anongese Yesu Kulishitu.
Oloze nguvulu avahulishile cheka ngwenyi, Hali ava vavali, iya munasake ngumyechele? Vakiko ngwavo, Mbalapa.
Pilatu avahulishile ngwenyi, Nyi ngulinge muka nayOu Yesu, Ou vavuluka ngwavo Kulishitu? Vosena vakumbulwile ngwavo, Vamupapalile hakulusu!
Ikiye ambile ngwenyi, Mwomwo ika? Kupihya muka nalingi? Oloze vakiko vahambakanyine kutambakana ngwavo, Vamupapalile hakulusu!
Jino omu Pilatu amwene ngwenyi nevi ali nakulinga vyauchi, shina chizungo kaha chaputukile kukatuka, ambachile meya nakusana kumavoko kumeso alize lizavu, nakwamba ngwenyi, Ami kangweshi namulonga wamanyinga ayOuko! Talenuko enu vavene!
Kaha vatu vosena vambile ngwavo, Manyinga enyi atutelelenga etu navana vetu!
Haze vene Pilatu avechelele Mbalapa, oloze amwipwishile Yesu vikote, amuhanyine kumavoko avo mangana vamupapalile hakulusu.


Haze vene maswalale janguvulu vatwalile Yesu mulilapa vavuluka ngwavo Peletolyume . Vamukungulwilile chendo chamaswalale chosena.
Kaha vamuzulile nakumuvwika chikovelo chachisuku chawangana chichila.
Kaha vavinjile muchama wamingonga nakumuvwikawo kumutwe, vamukamachishile lukosa mulivoko lyachilyo, kaha vamufukaminyine nakumuhenda ngwavo, Vulye! Ove Mwangana wavaYuleya!
Vamufwijilile maleji, kaha vamutambwile lukosa nakumuveta-vetalwo kumutwe.
Omu vakumishile kumuhenda, vamuzulile chize chikovelo, nakumuvwika cheka uvwalo wenyi. Kaha vamutwalile, vakamupapalile hakulusu.


Hakulovoka munganda, vawanyine mutu waku Kulene , lijina lyenyi Shimona. Vamukanjikijile mangana amumbachile kulusu.
Kaha omu vahetele kuchihela vavuluka ngwavo Ngolongota , nge ngwavo, Chihela chaChikola,
vahanyine Yesu vinyo yakufutula navitumbo vyavisasu nge nyangwa vyakukehesa kukola ngwavo anwenga. Oloze omu ayimakilile akanyine kuyinwa.
Omu vamupapalilile hakulusu, valipangilile uvwalo wenyi hakuutahisa navitaho.
Kaha vatwamine kuze nakumulama.
Uze mulonga vamuhanyine vausonekele helu yamutwe wenyi ngwavo,
OU IKIYE YESU
MWANGANA WAVAYULEYA.
Halwola vene luze vihwanga vavali naIkiye vavapapalilile hajikulusu, umwe kuchilyo, umwe kuchimoswe.
Kaha vaze váhichilenga kuze vamusawilenga nakupyakwojola mitwe yavo, nakwamba ngwavo,
Ove wamba kushiula Tembele nakuyitunga mumakumbi atatu, lilwile Ove Ivene! Nge uMwanaKalunga, suluka hakulusu!
Chochimwe nawa vapilishitu vavalemu navaka-kusoneka navakulwane javaYuleya, vamulangulwile ngwavo,
Nalwilinga veka, oloze Ivene kahashile kulilwilako. Ikiye ngwenyi apwa Mwangana wavaIsalele, asuluke jino hakulusu, numba tumufwelele.
Afwelela Kalunga; Kalunga amuyovole jino, nge namusake, mwomwo ambilenga ngwenyi, NguMwanaKalunga.
Navaze vihwanga nawa vapapalilile hajikulusu naIkiye, vamutolekele mwomumwe.


Jino kufuma halwola lwamuchitanu nalumwe hamavu hosena hapwile milima kokolo palanga nakulwola lwamuchitanu najiwana.
Kaha kafwe halwola lwamuchitanu najiwana Yesu atambakanyine ngwenyi,
Eli, Eli, lama savakatanyi?
Nge ngwenyi,
Ove Kalunga kami, Ove Kalunga kami, unangusuvila ika?
Kaha vamwe vemanyine kuze hakuchivwa vambile ngwavo, Ali nakusanyika Elija.
Hahaze vene umwe wavo alahile nakunona mupelo, auvombekele muvinyo yingangamina, automekele kuchitondo nakumuhana anwenga.
Oloze vakwavo vambile ngwavo, Mweche! Tutale nge Elija mweza nakumulwila!
Yesu atambakanyine cheka, kaha echele shipilitu yenyi.
Hahaze vene, lihina lyapimo yayinene lyakuvatasana mu Tembele lyapulikile muvihanda vivali, kufuma kwilu mbwe nakwishi. Mavu andendele, kaha malolwa apulikile,
vimbumbe vyasokolokele, kaha mijimba yavaka-kujila vavavulu, vaze vásavalile tulo, vayisangwile,
kaha kufuma hakusanguka chaYesu, valovokele muvimbumbe, vengilile munganda yajila, kaha vasolokele kuli vavavulu.
Kaha omu kapitau kamaswalale navaze apwile navo nakulama Yesu vamwene uze mundenda navize vyasolokele, vevwile woma chikuma, vambile ngwavo, Mwamuchano, Ou apwanga vene MwanaKalunga.
Kwapwile mapwevo vavavulu vakuNgalileya, vaze vakavangijilenga Yesu nakumuzachila, vemanyine hahasuku nakutala.
Hakachi kavo hapwile naMaliya wakuMangatala, naMaliya nevo yaYakova naYose, nanevo yavana vaZevete nawa.


Hakulembalemba chalikumbi kwejile muka-luheto waku Alimateya , lijina lyenyi Yosefwe, naikiye nawa apwile kambaji kaYesu.
Ayile kuli Pilatu nakulomba mujimba waYesu. Haze vene Pilatu avalwezele vamuhanewo.
Yosefwe ambachile uze mujimba nakuujingila halihina lya linyu lyakuzeneka majilo,
kaha ausavalikile muchimbumbe chachihya, chize álitotelele ivene mulilolwa. Kaha ashindumwinyine lilolwa lyalinene kuchikolo chachimbumbe nakufumako.
Maliya wakuMangatala, nauze Maliya mukwavo kuvapwile, vatwamine kwakulitalasana nachimbumbe.

Kaha jino, halikumbi lyakavile halize lyakulongesa vyaSambata, vapilishitu vavalemu navaFwaliseu vakungulukilile kuli Pilatu.
Kaha vamwambile ngwavo, Ove mwata, tunanuka muze ambile uze muka-kuhungumwisa vatu shimbu apwanga nakuyoya ngwenyi, Omu namuhita makumbi atatu navangusangula.
Shikaho valweze valame chimbumbe kuheta nakulikumbi lyamuchitatu, kuchina tumbaji twenyi navaya nakumwivamo, hinavalweza vatu ngwavo, Vanamusangula muvafu. Kaha kuhungumwisa chakukumishilako nachihambakana chize chakavanga.
Pilatu avambile ngwenyi, Mbatenu maswalale ava, yenu mukalameko mweshomwo namuhashila.
Ngocho vayile nakulama chimbumbe — valamikile katachikijilo halize lilolwa, nakuhakako maswalale.

Terera ku Mateu 27