 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

ئِنْيَا عِيْسَى ذِي ثْغَرَّابُوْت، ئِقْضع ڒبْحَر يروّح غَار دْشَار نّس. ذِنِّي شَان يِوْذَان ؤُوِين-د غَارس يجّن ن ورْيَاز مُّوْثن-اَس يضَارن، ئِزّڒ ذِي ثَاسُّوْث نّس. وَامِي عِيْسَى يࢲْرَا لْإِيمَان إِي ذَايْسن ينَّا-ٱس إِ ونشْرُوْف نِّي: "وَار تݣّْوذ شَا آ مِّي، قَا تْوَاغْفَرنْت-اَش ڒْمُعْصِيَاث نّش." ذِنِّي شَان يمْسڒْمَاذن ن شَّرِيعَا قَّارن ذݣ وُوْڒَاون نْسن: "بْنَاذم-أَ يقَّار اَوَاڒ وَار يحْڒِين خ أَربِّـي."
عِيْسَى يسّن مِين تْفكَّرن ذِي ڒَعْقُوْڒَاث نْسن ينَّا-ٱسن: "مَايمِّي تْفكَّرم اَمُّو ذِي مِين وَار يحْڒِين؟ مِين يسهْڒن اَطَّاس اَذَاس ينِيغ إِ ونشْرُوْف-أَ، مَا ٱذَاس ينِيغ: تْوَاغْفَرنْت-اَش ڒْمُعْصِيَاث نّش؟ نِغ مَا ٱذَاس ينِيغ: كَّر شك ؤُيُوْر؟ نش خْسغ اَذ تسّْنم بلِّي مِّيس ن بْنَاذم غَارس سُّلْطَا خ ثْمُوْرْث حمَا اَذ يغْفَر ڒْمُعْصِيَاث." أُوْشَا ينَّا-ٱس إِ ونشْرُوْف نِّي: "كَّر، يْسِي ثَاسُّوْث نّش، رُوْح اَذ تْروّْحذ غَار ثدَّارْث نّش." ئِكَّر ورْيَاز نِّي يروّح. وَامِي ࢲْرِين يِوذَان مَانَاينِّي، ݣّْوْذن حمْذن أَربِّـي خ سُّلْطَا إِي ذَاسن يتِيشّ إِ يِوْذَان.

وَامِي يُوْيُوْر سّنِّي عِيْسَى، يُوْفَا يجّن ن ورْيَاز قَّارن-اَس مَتَّى يقِّيم ذݣ ومْشَان مَانِي جمّْعن ضَّرِيبَا. ينَّا-ٱس عِيْسَى: "ذْفَار-اَيِي-د!" أُوْشَا يكَّر مَتَّى يذْفَار-يث.
ئِقِّيم عِيْسَى ذِي ثدَّارْث ن مَتَّى يتتّ نتَّا ذ يمحْضَارن نّس. أَطَّاس ن يعشَّارن ذ يِنِّي يعْصَّان زَعْمَا قِّيمن تتّن اَكِذس. وَامِي ࢲْرِين ڒْحِزب ن يفَرِّيسِيْين مَانَاينِّي كَّرن نَّان-اَسن إِ يمحْضَارن نّس: "مَايمِّي يتتّ لْمُعَلِّم نْوم اَك يعشَّارن ذ يِنِّي يعْصَّان؟"
ئِسْڒَا-يَاسن عِيْسَى ينَّا-ٱسن: "ئِوْذَان يصحَّان وَار تحْذِيجن بُو وضْبِيب، أَضْبِيب تحْذَاجن-ث يمهْرَاش. رُوْحم رْزُوْم خ ڒْمَعْنَا ن لْأَيَا إِي يقَّارن: خْسغ اَذ تْرحْمم يوْذَان، وَار خْسغ بُو اَذ تْغَرْصم إِ ڒبْهَايم." ينَّا-ٱسن: "وَار د ؤُسِيغ شَا اَذ ڒَاغِيغ إِ يِنِّي يدْجَان نِيشَان، ؤُسِيغ-د اَذ ڒَاغِيغ إِ يِنِّي يعْصَّان!"
ثُمَّا قَارّْبن-د يمحْضَارن ن يَحْيَى غَار عِيْسَى نَّان-اَس: "مَايمِّي نشِّين ذ ڒْحِزب ن يفَرِّيسِيْين ڒبْدَا نتْࢲُوْمَّا، ئِمحْضَارن نّش وَار تْࢲُوْمِّين شَا؟"
ينَّا-ٱسن عِيْسَى: "ئِمدُّوْكَاڒ ن مُوْڒَاي، مَا زمَّرن اَذ خيّْقن ذِي نْهَار نِّي ن ڒْفَارْح نّس؟ لَّا، وَلَكِن اَذ د اَسن وُوْسَّان اَذ يميْسِي مُوْڒَاي زِي ڒْوسْط نْسن. ڒخْدّنِّي اَذ ࢲُوْمّن! وَار يدْجِي حَدّ يتْرقَّاع اَرُّوْض ذ ڒْبَاڒِي س يِجّن ن ثْرقِّيعْث ن تُّوْب ذ جْذِيذ، مَايمِّي؟ ڒَاحقَّاش ثَرقِّيعْث نِّي ن جْذِيذ اَذ تْنجْمع أُوْشَا اَذ تْوَاكّس زݣ وَارُّوْض نِّي ن ڒْبَاڒِي. ڒخْدّنِّي اَذ يقِّيم وشَارِّيݣ يمْغَر! ؤُڒَا ذ اَمَان ن وضِيڒ ذ جْذِيذ وَار خدْجْقن شَا ذݣ يڒمَاون يقْذِيمن، حمَا وَار دُّوْقُّوْزن وَار تْزدْجِيعن شَا وَامَان ن وضِيڒ اَذ ضيّْعن يڒمَاون نِّي. وَلَكِن اَمَان ن وضِيڒ ذ جْذِيذ خدْجْقن ذݣ يڒمَاون ذ جْذِيذ. أَمنِّي وَار تْضيِّيع ؤُڒَا ذ يجّن ن ڒْحَاجث: لَّا اَمَان وضِيڒ، لَّا يڒمَاون."

وَامِي تُوْغَا عَاذ يقَّار عِيْسَى مَانَايَا، يُوْسَا-د غَارس يجّن ن اَرَّايس يسجّذ-اَس ينَّا-ٱس: "يدْجِي قَا ڒخُّو إِي ثمُّوْث. يَالَّاه اَكِذِي سرْس خَاس فُوْس نّش حمَا اَذ تدَّر." ئِكَّر عِيْسَى يذْفَار-يث نتَّا ذ يمحْضَارن نّس.
ذِنِّي يجّن ن ثمْغَارْث ثنْعَاش يسݣّْوُسَا زݣ وَامِي إِي ثهْڒش، تَازَّڒ س يذَامّن. ثذْفَار عِيْسَى، ثْحَاذَا-يَاس طَّارْف ن وسڒْهَام نّس. ثنَّا قْبڒ ذݣ وُوْڒ نّس: "مڒَا حَاذِيغ غِير اَسڒْهَام نّس اَتَاف اَذ ݣنْفِيغ." ئِنقْڒب غَارس عِيْسَى يࢲْرِي-ت أُوْشَا ينَّا-ٱس: "وَار تݣّْوذ شَا آ يدْجِي، شم لْإِيمَان نّمْ يسْݣنْفَا-شم." ثْݣنْفَا ثمْغَارْث نِّي ڒخْدّنِّي.
وَامِي يُوْوض عِيْسَى غَار ثدَّارْث ن اَرَّايس نِّي، ئِتْوَاڒَا ذِنِّي ڒبْعَاض زِي ڒْغَاشِي يتْزمَّارن لْمُوْسِيقَا ومتِّين أُو ذ يِجّن ن لْهَرَاج. ينَّا-ٱسن عِيْسَى: "فّْغم سَّا! أَقَا ثَحنْجِيرْث-أَ وَار ثمُّوْث شَا، ثطّص وَاهَا!" ڒخْدّنِّي بْذَان ضحّْشن خَاس. وَامِي سُوْفْغن يوْذَان نِّي، يُوْذف غَار وخَّام يطّف-اَس ذݣ وفُوْس إِ ثْحنْجِيرْث نِّي أُوْشَا ثكَّر. ئِفّغ ڒخْبَار غَار مَارَّا اَيثْبَاب ن ثْمُوْرْث نِّي.

يُوْيُوْر سّنِّي عِيْسَى، ذْفَارن-ث ثْنَاين ن يضَرْغَاڒن تْڒَاغَان قَّارن: "آ مِّيس ن أَيث-دَاود، رْحم-اَنغ!" وَامِي يُوْذف عِيْسَى غَار ثدَّارْث، قَارّْبن غَارس يضَرْغَاڒن نِّي. ينَّا-ٱسن عِيْسَى: "مَا ثُوْمْنم بلِّي نش زمَّرغ اَذ ݣّغ مَانَايَا؟" نَّان-اَس: "وَاه آ سِيذِي." أُوْشَا يحْذَا-يَاسن عِيْسَى ثِيطَّاوِين ينَّا-ٱسن: "عْلَاحْسَاب لْإِيمَان نْوم إِي غَا تْوَاݣنْفَام." ڒخْدّنِّي نُوْرْزْمنْت ثِيطَّاوِين نْسن. يعْڒم-اَسن عِيْسَى ينَّا-ٱسن: "غَارْوم اَذ يفّغ ڒخْبَار-أَ غَار شَا حَدّ!" وَلَكِن نِثْنِي رُوْحن سُوْفْغن ڒخْبَار نِّي خ عِيْسَى ذِي ثْمُوْرْث نِّي مَارَّا.
ذِي ڒْوقْث إِي ذِي رُوْحن، شَان يِوْذَان ؤُوِين-اَس-د إِ عِيْسَى يجّن ن ورْيَاز ذ اَزيْنُوْن ذَايس جّنّ. وَامِي يسُوْفغ عِيْسَى جّنّ نِّي، يبْذَا وزيْنُوْن نِّي يسَّاوَاڒ. قِّيمن تْعجّْبن ڒْغَاشي نِّي نَّان: "عمَّارْص مَا يوْقع مَانَايَا ذِي ثْمُوْرْث ن أَيث-إِسْرَائِيل." وَلَكِن ڒْحِزب ن يفَرِّيسِيّْين نَّان: "نتَّا يسُوْفُوْغ جْنُوْن ڒَاحقَّاش اَرَّايس ن جْنُوْن يُوْشَا-ٱس جّْهذ-أَ."
يُوْيُوْر عِيْسَى ذِي مَارَّا ثِندَّام ذ ڒدْشُوْر، ئِسڒْمَاذ ذِي ثمْزِيذَاوِين ن أَيث-إِسْرَائِيل يتْحدَّاث يتْبشَّار س ڒْمُلْك ن أَربِّـي. ئِسْݣنْفَا مَارَّا ڒهْڒَاشَاث ذ دِّيعَان ن دَّات. يࢲرّ عِيْسَى ڒْغَاشِي نِّي قّْسن-اَس مِينْزِي تْوَاعدَّابن تْنهْوَاڒن، ݣِّين اَمشْنَاو يحُوْڒِيْين وَار غَارْسن شَا ؤُو ثن غَا يَروْسن. ينَّا-ٱسن إِ يمحْضَارن نّس: "ثَفدْجَاحْث اَطَّاس وَلَكِن ذْرُوس يشوَّارن إِي غَا يخذْمن. تَّارث زِي بَاب ن ثْفدْجَاحْث اَد يَرْنِي يشوَّارن ذݣ ومَرْجع نّس."

Terera ku متى 9