Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወቀርበ በዓለ መጸለት ዘስሙ ፋሲካ። ወየኀሠሡ ሊቃነ ካህናት ወጸሐፍት በዘይቀትልዎ ወኮኑ ይፈርህዎሙ ለሕዝብ።

ወቦአ ሰይጣን ውስተ ልበ ይሁዳ አስቆሮታዊ ዘእምዐሠርቱ ወክልኤቱ ኍልቁ። ወሖረ ወተናገሮሙ ለሊቃነ ካህናት ወለጸሐፍት ዘከመ ያገብኦ ሎሙ። ወተፈሥሑ ወተሰናዐዉ ምስሌሁ ወተናገርዎ የሀብዎ ሠላሳ ብሩረ ወአስተኃለቁ ነገረ። ወየኀሥሥ ሣኅተ ያግብኦ ሎሙ እንዘ አልቦ ሰብእ።

ወበጽሐት ዕለተ መጸለት አመ ይጠብሑ ፍሥሐ። ወይቤሎሙ እግዚእ ኢየሱስ ለጴጥሮስ ወለዮሐንስ ሑሩ ወአስተዳልዉ ለነ ፍሥሐ ዘንበልዕ። ወይቤልዎ በአይቴ ትፈቅድ ናስተዳሉ ለከ። ወይቤሎሙ በዊአክሙ ሀገረ ትረክቡ ብእሴ ዘይጸውር ጻሕበ ማይ ወትልውዎ ኪያሁ ኀበ ቦአ ቤተ። ወበልዎ ለበዓለ ውእቱ ቤት ይቤለከ ሊቅ አይቴኑ ቤት ኀበ እበልዕ ፍሥሐ ምስለ አርዳእየ። ወውእቱ ያርእየክሙ ጽርሐ ዐቢየ ወንጹፈ ወሥርግወ ወበህየ አስተዳልዉ ለነ። ወሐዊሮሙ ረከቡ በከመ ይቤሎሙ ወአስተዳለዉ ፍሥሐ።

ወሶበ ኮነ ጊዜሁ ረፈቀ እግዚእ ኢየሱስ ወዐሠርቱ ወክልኤቱ ሐዋርያቲሁ ምስሌሁ። ወይቤሎሙ ፈቲወ ፈተውክዎ ለዝንቱ ፋሲካ እብላዕ ምስሌክሙ ዘእንበለ ይብጽሐኒ ሕማምየ። እብለክሙ ባሕቱ ከመ ኢይበልዕ እንከ እምኔሁ እስከ ይትፌጸም በመንግሥተ እግዚአብሔር። ወተመጠወ ጽዋዐ ወአእኰተ ወይቤ ንሥኡ ዘንተ ወተካፈልዎ ኵልክሙ። እብለክሙ ኢይሰቲ እንከ እምዝንቱ ፍሬ ወይን እስከ ትመጽእ መንግሥተ እግዚአብሔር ። ወነሥአ ኅበስተ ወአእኲቶ ፈተተ ወወሀቦሙ ወይቤሎሙ ዝንቱ ውእቱ ሥጋየ ዘይትወሀብ በእንቲኣክሙ ለቤዛ ብዙኃን ወከመዝ ግበሩ ተዝካርየ በእንቲኣየ። ወከማሁ ጽዋዐኒ እምድኅረ ተደሩ ይቤሎሙ ዝንቱ ጽዋዕ ዘሐዲስ ሥርዐት ደምየ ውእቱ ዘይትከዐው በእንቲኣክሙ ወበእንተ ብዙኃን።

ወባሕቱ ናሁ እዴሁ ለዘያገብአኒ ምስሌየ ውስተ ማእድ። ወወልደ ዕጓለ እመሕያውሰ የሐውር በከመ ተሠርዐ በእንቲኣሁ ወባሕቱ አሌ ሎቱ ለውእቱ ብእሲ ዘበውስተ እዴሁ ይትሜጠውዎ ለወልደ ዕጓለ እመሕያው። ወተባሀሉ በበይናቲሆሙ አርዳኢሁ መኑ እንጋ ውእቱ እምኔሆሙ ዘዘንተ ይገብር።

ወእምዝ ተዋክሑ በበይናቲሆሙ እንዘ ይብሉ መኑ እንጋ የዐቢ እምኔሆሙ። ወይቤሎሙ ነገሥቶሙ ለአሕዛብ ይኴንንዎሙ ወይቀንይዎሙ ወመኳንንቲሆሙ ረዳእያነ ይብልዎሙ። ወለክሙሰ አኮ ከመዝ አላ ዘየዐቢ እምኔክሙ ይኩንክሙ ከመ ዘይንእስ ወሊቅኒ ይኩን ከመ ላእክ። መኑ ውእቱ ዘየዐቢ ዘይረፍቅኑ ወሚመ ዘይትለአክ አኮኑ ዘይረፍቅ ወአንሰ ናሁ ከመ ላእክ በማእከሌክሙ። ወአንትሙሰ ባሕቱ እለ በእንቲኣየ ተዐገሥክሙ ምስሌየ በሕማምየ። አነኒ አስተዳሉ ለክሙ መንግሥተ በከመ ሊተ ወሀበኒ አቡየ። ከመ ትብልዑ ወትስተዩ በማእድየ በመንግሥትየ ወትነብሩ ዲበ መናብርት ወትኴንኑ ዐሠርተ ወክልኤተ ሕዝበ እስራኤል።

ወይቤሎ እግዚእ ኢየሱስ ለስምዖን ስምዖን ስምዖን ናሁ ስኢለ ሰአለ ሰይጣን የኀንፅፅክሙ ወየኀንፍጽክሙ ከመ ዐለስ። ወአንሰ ሰአልኩ በእንቲኣክሙ ከመ ኢይድክም ሃይማኖትክሙ ወአንተኒ ተመዪጠከ ጸንዖሙ ለአኀዊከ። ወይቤሎ እግዚኦ አንሰኬ ጥቡዕ ለሐዊር ምስሌከ ውስተ ኢየሩሳሌም እመኒ ለተሞቅሖ ወእመኒ ለመዊት። ወይቤሎ እብለከ ጴጥሮስ ዮም ዘእንበለ ይንቁ ዶርሆ ሥልሰ ትክሕደኒ ከመ ዘኢተአምረኒ። ወይቤሎሙ አመ ፈነውኩክሙ ዘእንበለ ቍናማት ወጽፍነት ወአሣእን ቦኑ ዘተጸነስክሙ። ወይቤልዎ አልቦ ወይቤሎሙ ይእዜሰኬ ዘቦ ቍናማት ይንሣእ ሎቱ ወከማሁ ዘሂ ጽፍነት ወዘሰ አልቦ መጥባሕት ይሢጥ ልብሶ ወይሣየጥ ሎቱ መጥባሕተ። እብለክሙ ከመ ይበጽሐኒ ዘጽሑፍ ወይትፌጸም በላዕሌየ ዘይብል ምስለ ኃጥኣን ተኈለቈ ወኵሉ ዘበእንቲኣየ ይትፌጸም። ወይቤልዎ እግዚኦ ነዋ ሀለዉ ኀቤነ ክልኤቱ መጣብሕ ዝየ ወይቤሎሙ የአክለክሙ እንከሰ።

ወወፂኦ ሖረ በከመ ያለምድ ይጸሊ ደብረ ዘይት ወተለውዎ አርዳኢሁ። ወበጺሖ ህየ ይቤሎሙ ጸልዩ ከመ ኢትባኡ ውስተ መንሱት። ወተአተተ እምኔሆሙ መጠነ ሙጋረ እብን ወሰገደ ወጸለየ። እንዘ ይብል አባ ለእመ ትፈቅድ አግኅሦ ለዝንቱ ጽዋዕ እምኔየ ወባሕቱ ፈቃደ ዚኣከ ይኩን ወአኮ ፈቃደ ዚኣየ። ወአስተርአዮ መልአከ እግዚአብሔር እምሰማይ ዘይጼንዖ። ወፈርሀ ወአውተረ ጸልዮ ወኮነ ሐፉ ከመ ነጸፍጻፈ ደም ዘይወርድ ውስተ ምድር። ወተንሢኦ እምኀበ ይጼሊ ሖረ ኀበ አርዳኢሁ ወረከቦሙ እንዘ ይነውሙ እምኀዘን። ወይቤሎሙ ምንትኑ ያነውመክሙ ተንሥኡ ወጸልዩ ከመ ኢትባኡ ውስተ መንሱት።

ወእንዘ ዘንተ ይብሎሙ በጽሑ ሕዝብ ወይሁዳ አሐዱ እምዐሠርቱ ወክልኤቱ አርዳኢሁ ይመርሖሙ ወቀርበ ኀቤሁ ለእግዚእ ኢየሱስ ወሰዐሞ ወዝ ውእቱ ትእምርት ዘወሀቦሙ ወይቤሎሙ ዘሰዐምክዎ ውእቱ ኪያሁ አኀዙ አጽኒዐክሙ። ወይቤሎ እግዚእ ኢየሱስ ለይሁዳ በስዒምኑ ታገብኦ ለወልደ ዕጓለ እመሕያው አኮኑ ከመ ታቅትሎ። ወርእዮሙ እለ ምስሌሁ ይቤልዎ ለእግዚእ ኢየሱስ እግዚኦ ትፈቅድኑ ንዝብጦሙ በመጥባሕት። ወዘበጦ አሐዱ እምኔሆሙ ለገብረ ሊቀ ካህናት ወመተሮ እዝኖ ዘየማን። ወአውሥአ እግዚእ ኢየሱስ ወይቤሎ ኅድግ ዘንተሰ ወገሠሦ እዝኖ ሶቤሃ ወአሕየዎ። ወይቤሎሙ እግዚእ ኢየሱስ ለእለ መጽኡ ኀቤሁ የአኀዝዎ ሊቃነ ካህናት ወመገብተ ምኵራብ ወረበናት ከመ ሰራቂኑ ተአኀዙኒ መጻእክሙ ምስለ መጣብሕ ወዕፀው። ወእንዘ ኵሎ አሚረ ሀለውኩ ምስሌክሙ በምኵራብ እዴክሙ ጥቀ ኢሰፋሕክሙ ላዕሌየ ወባሕቱ ዝንቱ ውእቱ ሰዓትክሙ ወሥልጣኑ ለመኰንነ ጽልመት።

ወአኀዝዎ ወወሰድዎ ቤተ ሊቀ ካህናት ወተለዎ ጴጥሮስ እምርኁቅ። ወአንደዱ እሳተ ማእከለ ዐጸድ ወነበሩ ወጴጥሮስኒ ነበረ ምስሌሆሙ ማእከሎሙ። ወርእየቶ ወለት እንዘ ይነብር መንገለ በርህ ወተጠየቀቶ ወትቤ ዝኒ ምስሌሁ ሀሎ። ወክሕደ ወይቤላ ብእሲቶ ኢየአምሮ ለዘትብሊ። ወእምድኅረ ሕቅ ርእዮ ካልእ ወይቤሎ አንተሂ እምኔሆሙ አንተ ወይቤሎ ጴጥሮስ አንተ ብእሲ ኢኮንኩ። ወኀሊፎ መጠነ አሐቲ ሰዓት አጥወቆ አሐዱ ካልእ እንዘ ይብል አማን ዝንቱሂ ምስሌሁ ሀሎ ወገሊላዊ ውእቱ ብእሲሁ። ወይቤሎ ጴጥሮስ አንተ ብእሲ ኢየአምሮ ለዘትብል ወእንዘ ውእቱ ይትናገር ዘንተ ነቀወ ዶርሆ ሶቤሃ። ወተመይጠ እግዚእ ኢየሱስ ወነጸሮ ለጴጥሮስ ወተዘከረ ጴጥሮስ ቃሎ ለእግዚእነ ዘይቤሎ ሥልሰ ትክሕደኒ ዮም ዘእንለ ይንቁ ዶርሆ። ወወፂኦ አፍኣ ጴጥሮስ በከየ ብካየ መሪረ።

ወዕደውኒ እለ አኀዝዎ ለእግዚእ ኢየሱስ ኮኑ ይሣለቁ ላዕሌሁ ወይዘብጥዎ። ወይገለብብዎ ወይጸፍዕዎ ገጾ ወይሴአልዎ ወይብልዎ ተነበይ ለነ መኑ ውእቱ ዘጸፍዐከ። ወባዕደኒ ብዙኀ ይቤልዎ እንዘ ይፀርፉ ላዕሌሁ።

ወጸቢሖ ተጋብኡ ሊቃነ ካህናት ወጸሐፍት ወሊቃናተ ሕዝብ ወወሰድዎ ውስተ ዐውዶሙ። ወይቤልዎ እመ አንተሁ ክርስቶስ ንግረነ ገሃደ ወይቤሎሙ እመኒ አይዳእኩክሙ ኢተአምኑኒ። ወእመኒ ተስእልኩክሙ ኢትነግሩኒ ወኢሂ ተኀድጉኒ። ወባሕቱ እምይእዜሰ ይነብር ወልደ ዕጓለ እመሕያው በየማነ ኀይለ እግዚአብሔር ። ወይቤልዎ ኵሎሙ አንተኑ እንከ ውእቱ ወልደ እግዚአብሔር ወይቤሎሙ አንትሙ ትብሉ ከመ አነ ውእቱ ወልደ እግዚአብሔር ። ወይቤሉ ምንተ እንከ ንፈቅድ ሰማዕተ በእንቲኣሁ ናሁ ለሊነ ሰማዕነ እምአፉሁ።

Terera ku ወንጌል ዘሉቃስ 22