ഈ ബുക്ക്‌ണ പറ്റി സിന്നൊരു സേദി
<<ലൂക്കോസ് എ്ള്‌ദിന ണല്ല സേദിലി>> സൊല്ലിര്‌ക്ക കാര്യഗാക്ക് പ്‌റ ണഡാന്ത കാര്യഗണ എ്ള്‌ദിന ബുക്ക്‌ത്തെ <<അപ്പൊസലല സെയ്‌ദ ബേലെഗ.>> മുദ ഏസുദ് സൊല്ലുപഡി ണഡാക്കവാര്‌ഗ ഏസുണ പറ്റി സൊല്ലുറ ണല്ല സേദിന സാമിണിഗാല് ബിലാത്തിലി എര്‌സലേമിലിമ്, എഗുദ ണാഡ്‌ദ് മുച്ചുഡ എ്ഡേഗളിലിമ്, പിന്നെ സമര്യ ണാഡിലിമ്, ഉലഗ പൂരാമ് എച്ചെ എജ്ജിസിനാദ് എന്ത് തെര്യ ബേ്ണ്ടിത്തെ ഈ ബുക്ക് എ്ള്‌ദിര്‌ക്കാദ് (1:8). എഗുദ ണാഡിലിര്‌ന്ത് ഉലഗാത്തിലിര്‌ക്ക ആള്‌ഗാക്ക് മുച്ചുഡാമ് ഈ ണമ്പിക്കെ എജ്ജിന സരിത്ത്‌റാത്തെ ഇദ്. റോമ ണാഡ്‌ക്കാറാരോഡെ പോട്ടി പ്‌ഡിക്കവാരല്ല ഏസുക്കാറാര് എന്ത്‌മ്, എഗുദാര് മദാത്തിലി പഡിസിര്‌ന്ത കാര്യഗ അദേപാസെ താനെ ണഡാന്ത് മുഡിന്താദ്‌ത്തെ ഏസുക്കാറാര് ണമ്പ്‌റ കാര്യഗ എന്ത്‌മ് സൊല്ലികൊഡുക്ക്യാത്തെ എ്ള്‌ത്ത്‌കാറാ് ആസെപട്ടാദ്.
<<അപ്പൊസലല സെയ്‌ദ ബേലെഗ>> എങ്ക ഈ ബുക്ക്‌ണ സെരിക്ക്‌മ് മൂണ് ബാഗ ആയി പ്‌റ്‌ത്തിര്‌ക്കാര്. ഏസു മേലോഗാക്കെ പോന പ്‌റ എര്‌സലേമിലി ഏസുക്കാറാര് കൂട്ട ഉണ്ടാനാദ്‌ണ പറ്റി ഒണ്ണാവദ് സൊല്ലിര്‌ക്കാ്. റണ്ടാവദ് ഏസുണ പറ്റി സൊല്ലുറ ഈ ണല്ല സേദിന ഏസുക്കാറാര് പാലസീന് എങ്ക ണാഡ്‌ദ് പല പല എ്ഡേഗാക്ക് പരാത്ത്‌റാദ്‌ണ പറ്റി സൊല്ലിര്‌ക്കാ്. മൂണാവദ് ഏസുണ പറ്റി സൊല്ലുറ ഈ ണല്ല സേദിന ഏസുക്കാറാര് എഗുദാര് അല്ലാത്ത ജാദിഗ ഇര്‌ക്ക പട്ട്‌ക്ക് പരാത്ത്‌റാദ്‌ണ പറ്റി സൊല്ലിര്‌ക്കാ്.
സാമിണിഗാല് സെയ്‌ദ ബേലെഗാത്തെ <<അപ്പൊസലല സെയ്‌ദ ബേലെഗ>> എങ്ക ഈ ബുക്കിലി മുച്ചുഡാമ് കാണ്‌റാദ്. ബെന്ത്‌ക്കോസ് ണാളിലി എര്‌സലേമിലി ബെത്ത് ഏസുണ ണമ്പിനവാര്‌ക്കെ സാമിണിഗാല് ബന്ത് ഏ്റിറ്റ്. അന്റ് ഇര്‌ന്ത് സാമിണിഗാല് സെയ്‌ദ കാര്യഗ ഏസുക്കാറാര് കൂട്ടാക്ക്‌മ്, ഏസുക്കാറാര് കൂട്ടാത്തില്യ തലെവലാക്ക്‌മ് ണല്ല ബില കൊഡുത്ത് കൊണ്ടിര്‌ന്താ്. അദേപാസെ താനെ മുന്തുക്കേത്ത കാലാത്തില്യ ആള്‌ഗണ പഡിസിര്‌ന്താദ്‌ണാമ് ഈ ബുക്കിലി സുരുക്കി സൊല്ലിര്‌ക്ക്‌ദ്. സൊല്ലി പഡിസിര്‌ന്ത ഈ കാര്യഗണെല്ല ഏസുക്കാറാര് കൂട്ട ഒന്റായി എജേരാദിലിമ് ഏസുക്കാറാര്‌ദ് പെ്ളേപ്പിലിമ് ഒരേപാസെ ണല്ല ബില കൊഡുത്ത്‌ദ് എന്ത്‌മ് ഈ ബുക്കിലി കാണില.
ഈ ബുക്കിലി അഡാങ്കിര്‌ക്കാദ്
ഏസുണ പറ്റി സൊല്ലുറ കാര്യഗ ആള്‌ഗാക്കെ സൊല്ല്യ ഒരുങ്ക്‌റാര് 1:1–26
ഏസു കഡേസി തന്ത സട്ടാമ് ബാക്ക്‌മ് 1:1–14
ജൂദാന്‌ക്ക് ബദ്‌ള് ബേ്റെ ആള്‌ണ എ്ഡ്‌ക്കാര് 1:15–26
ഏസുണ പറ്റി സൊല്ലുറ കാര്യഗണ ആള്‌ഗാക്കെ എര്‌സലേമിലി സൊല്ലുറാര് 2:1—8:3
ഏസുണ പറ്റി സൊല്ലുറ കാര്യഗണ എഗുദേലിമ്, സമര്യാലിമ് ആള്‌ഗാക്കെ സൊല്ലുറാര് 8:4—12:25
പവുലോസ് സാമിക്ക് ബേ്ണ്ടി സെയ്‌ദ ബേലെഗ 13:1—28:31
ണല്ല സേദി സൊല്ല്യ പോര പവുലോസ്‌ദ് മുദ പോക്ക് 13:1—14:18
എര്‌സലേമിലി ണഡാന്ത മദ്ദേസ 15:1–35
ണല്ല സേദി സൊല്ല്യ പോര പവുലോസ്‌ദ് റണ്ടാവദ് പോക്ക് 15:36—18:22
ണല്ല സേദി സൊല്ല്യ പോര പവുലോസ്‌ദ് മൂണാവദ് പോക്ക് 18:23—21:16
പവുലോസ് എര്‌സലേമ് ജെയിലിലിമ്, കയ്യിസര്യ ജെയിലിലിമ്, റോമ ജെയിലിലിമ് 21:17—28:31

Terera ku അപ്പൊസലല ഈ ബുക്ക്‌ണ പറ്റി സിന്നൊരു സേദി