Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so a le lé á mbū nnɔ yí ŋ́gɛ: «Tɛ mbɔɔ eséŋɛ́ lɛ́, ajū mīi á gɔ eghʉ̄ʉ, ŋiŋ á fa nzhɛ, á gɔ le púŋ. Táʼ, ndɔ e é athū ŋiŋ yīi, a á tshóne á ŋiŋ, ńnéŋ á ntē mefa. A ghʉɛ épúp, tɛ mbɔɔ á mbū taʼ, á nnɔ ewɔŋkhʉ̄ puɔ, mbɔŋ á gɔ́ mbū yí, á mɛ́ legaŋ á mía mía tɔ́ á ntɔ̄ŋ yí, ḿmāʼ á yí á ntē mía ntshi, ńtɔ́k á letshi á yí néŋ, á kʉɛ ndɔ á mbū Ndém. Pɛ epá nnɛ̄t zɛ, ánɛ ntií menu muɔ mɛ́t.
Méŋ mɔ́ wu a faa anu á mbū wu, o egʉɔ njʉ́ɔ á yí, ńték á yí. Ŋ́gɔ́ éyi a á gɔ nnɛ̄t zi, ḿvéŋ mefa, o elēkne ŋgyá á mbū yí. A zi ŋgē ezók á taʼ aleʼé alāʼ, éfā á mbū wu ŋgʉɔ esambīa, ḿbīŋ nnɔ̄ŋ mbīŋɛ nzem etsiɛ́ legʉɔ lɛ́, ḿvéŋɛ mefa mí, o elēkne ŋgyá á mbū yí. »

Meziŋ‑ntō Yɛɛ́so é shʉʼ ndé á mbū yí ŋ́gɛ: «Lɛɛ ŋghʉ̄, pek etswiʼne efɛ́ nnɛ̄t zek, ŋ́gyá á mbū Ndém. » Yɛɛ́so á pwɛt ŋ́gɛ: «Lefɛ̄ nnɛ̄t wɛ ŋgyá á mbū Ndém, a á ŋgwíʼe efáŋ páʼ lesa sésōk, mbɔ pɛ lʉ́ɛ́ á mbū athʉ́ jʉɔ ŋ́gɛ: “Fhó ega ntsɔ́ʼɔ mé meŋgaŋ, ŋ́gʉɔ ntshí á ntē mía ntshi.” Mbɔ a tsɔ́ʼɔ páʼ pɛ é lé épúp. »

Yɛɛ́so á zéŋ ndé ŋ́gɛ: «Ḿpɛ elé ŋ́gɛ, ŋiŋ wɛ a wiɛ á ŋgaŋ afaʼ yīi, a pípɛ mena pí, kɛɛ éyi a jʉ́ʼɛ ŋgɔ̄ŋ yí lɛ́ɛ, á lɛ ŋgē ekɔ́ʼ afaʼ, wu mɔʼɔ́ afaʼ yi, o elé á mbū yí ŋ́gɛ, a egákne eshʉʼ ḿpfɛ́t azō o? Ŋgáŋ, mbɔ mɔʼɔ́ afaʼ a a lé á mbū yí é ghʉ áa lɛ: “Cuŋte nnɛ̄t, ńdá lekʉŋ, ńdɔ̄k etsō eshʉ̄ʼ, meŋ mpfɛ́t etsá tɛ e emī, tɛ́ o epfɛ́t ecú.” A ghʉɛ páʼ mɔʼɔ́ yi a á tswi épúp, mɔʼɔ́ yi á piŋ nzóko esyákne syákne lɛ́? Á zéŋ ŋgɔ́ ndeŋ ndeŋ épúp á mbū pɛ. Pɛ ghʉɛ afaʼ zīi, mɛ́ ntswī á mbū pɛ tɛ á mī, pɛ elé azɛ́ ŋghʉ̄ áa lɛ: “Pek lɛɛ̄ ŋgɔ́ áa megaŋ afaʼ, ŋ́ghʉ̄ azék áa ajū mīi mɛ́ tswi.”»

Yɛɛ́so a le shʉ̄ʼ nnɔŋ nzɛ́t ŋ́gʉ̄ɔ gʉɔ mé Yelósalɛm, ńnɔŋ ntɔ́kɔ á ndhʉ alāʼ epuɔ Samalía pɔ́ epuɔ Ŋgaliléa. Pɔ́ nnɔ yí é gʉɔ tɛ nnɔ̄ŋ ŋkúɔ́ ánɛ amɔ̄ʼ akap alāʼ, megaŋ kaʼpáp legēm é jʉ́ɔ á yí, ńnɔŋ eshʉ̄ʼɛ mé lezēŋ tsí, ńtshí tɛ éwú, ńdé mé ŋghi teté á mbū yí ŋ́gɛ: «Ndi Yɛɛ́so, tsɔ́ʼɔtsɔ́ʼ, lɛ ntsá mezeŋɛ mék. » Á júʼ, ńjʉ́ɔ á wɔ́p, ńdé á mbū pɔ́p ŋ́gɛ: «Pɛ egʉɔ ntswī nnɛ̄t zɛ á mbū wɔ nɔŋ‑epɔʼ, pɔ́ etsāʼ á wɛ́ njʉ́ɔ. » Pɔ́ júʼ épúp, ńnɔŋ ŋgʉ̄ɔ, ŋ́kó á mɛnzhɛ, ńdɛ ntē.
Taʼ ŋiŋ á nnɔ pɔ́p á jʉ́ɔ páʼ yí é te, ḿbīŋ nzem, ńziŋɛ nzɔ̄pɔ ŋgūʼtɛ á Ndém, mé ŋghi teté. Éshʉʼ tɛ ŋkó á lezēŋ Yɛɛ́so, ńtswíʼte á mvhɔ á yí, ŋ́ŋɔ́ʼne tɛ athū zí á pfeŋ esī, ésyákne á yí. Ŋiŋ wuɔ mɛ́t, a lɛ ŋiŋ Samalía. Yɛɛ́so á jʉ́ɔ tɛ mbwɛ̄t ŋ́gɛ: «Meŋ á zhɛ́ ŋ́gɛ, epuɔ legēm é mbú ntē, ewuɔ ŋiŋ a piīŋ ŋgɔ́ ega páʼa, epi emɔ̄ʼ epuɔ levuʼɔ́, é gɔ́ egɔ́? Ŋiŋ yīi a á kwaŋte á leshʉʼ esyákne á Ndém, a ka á nnɔ pɔ́p túɔ́, tɛ ndaʼ á ŋge wuɔ lɛ́?» Ńdɛ ndé á mbū ŋiŋ wuɔ mɛ́t ŋ́gɛ: «Lu á esī, ŋ́gʉ̄ɔ mé mba ju. O ó te páʼa, melaʼ mīi o ó fɛ́ nnɛ̄t ju, ŋ́gyá á mbū meŋ. »


Afʉʼ á kuʼ, epuɔ Falísia é shʉʼ nzɛ́tte á Yɛɛ́so ŋ́gɛ: «Ndém a a láʼ ezi á lesāʼ lefɔ tsí á ndo esī atsetsáʼ ega eséŋɛ́?» Yɛɛ́so á pwɛt á mbú pɔ́p ŋ́gɛ: «Amɔ̄ʼ ayiŋne zīi, mɛ́ é si nzwíʼtɛ, ázi, a shʉʼ etswi á légɛ, Ndém a á si nnɔ̄ŋ ŋgɔ̄ ezi á lesāʼ lefɔ tsí, á té éwú ú. Mɛ́ té shʉʼ eghíte ŋ́gɛ, Ndém a á zi á lesāʼ lefɔ tsí ega kɛ́ egʉ ʉ́. Pɛ ezhɛ́ á mbɔŋɔ́ á légɛ, Ndém a á ndáʼ ŋgɔ́ si esáʼa lefɔ tsí á nnɔ pɛ. »
Á zéŋ ndé á mbū nnɔ yí ŋ́gɛ: «Emɔ̄ʼ meleʼé e shʉʼ ekuʼe, pɛ esé á wɛ́ a Méŋ‑Ŋiŋnɔŋ wuɔ á lezēŋ nzók tsɔ taʼ aleʼé alāʼ, tɛ́ afʉʼ á yí á leshʉʼ, a ké nzɛ́t té kuʼ. Meleʼé mɛ́t, mɛ́ elé á mbū pɛ ŋ́gɛ, yí wuɔ ega, kɛ yí a ayi egʉ lɛ, ndɛ́ʼ pɛ egʉ̄ɔ éwú, ndɛ́ʼ pɛ ezhɛ̄ne á wɔ́p. Méŋ‑Ŋiŋnɔŋ a a láʼ egē eshʉʼe, éshʉʼ áa páʼ ŋŋí mbeŋ zīi, e ŋwaŋa, ḿbú ŋkɛ̄ʼɛ lephū ntsem lā. Táʼ, a a zi eké eláʼ ege eshʉʼ épúp, mbɔ a ke té njhʉ̄, ńjʉ́ɔ ŋgeŋge tɛʼ, epuɔ ŋguʼ puɔ é ŋkʉŋne á yí.

«A a láʼ ege eshʉʼe, anu zīi á le láʼ ŋghʉ̄ epuɔ, ŋguʼ Noe, a ezéŋ ŋghʉ̄. Epuɔ menɔŋ é lɛɛ́ nnáŋa mpfɛ́tɛ, ńnúu, ńdáa‑ŋgyā, ńtsóʼo epɔ̄ pɔ́p, tɛ ŋkó aleʼé zīi, Noe pɔ́ atseŋ ŋgyā zí, é le kó á ntē mía mɛtúa ntshi, pík‑ŋgɔŋ mbeŋ á pú ndú, ntshi é pú ŋkɔ́ʼ ńdɔ̄k mvoʼ epuɔ. A láʼ ezéŋ egɔ́ páʼ anu zīi, á le láʼ ŋghʉ epuɔ, ŋguʼ Lɔ́ɔt: epuɔ menɔŋ é lɛɛ́ nnáŋa, ḿpfɛ́tɛ, ńnúu, ńtáŋa esaá, ńjʉ́ʼɛ ŋgɔ̄ŋ, ŋ́kwɛ́tɛ meŋgyā. Tɛ ŋkó aleʼé zīi, Lɔ́ɔt pɔ́ atseŋ ŋgyā zí, é le fhó á ntē tésɔŋ Sodɔm ntó, Ndém á piŋ ŋghʉ̄, mmók meka é fhó á athʉ́, ésóʼo páʼ mbeŋ lā, ḿbú nzwhíte epuɔ tésɔŋ Sodɔm mɛ́t. Ndeŋ ndeŋ épúp, emuɔ menu mɛ́t, e láʼ ezéŋ etɔ́ke, aleʼé zīi Méŋ‑Ŋiŋnɔŋ a tswii lefɔ tsí. A láʼ ekuʼ aleʼé mɛ́t, ŋ́gɔ́ éyi ŋiŋ a á ŋgɔ́ á athʉ́ ŋgyā, ntsi zí é piŋ nzɛ́t á ŋgyā, ndɛ́ʼ á piŋ nzem á ŋgyā ŋ́gɛ, yí gʉɔ mé mbíɛ́, tɛ́ kʉʉ. Ndeŋ ndeŋ épúp, ŋiŋ yīi a á ŋgɔ́ á ŋkāʼ, ndɛ́ʼ á piŋ nzem á mba. Pɛ ekímte ajū mīi á le ghʉ̄ á nzwí Lɔ́ɔt. Ŋiŋ a nɔŋ ŋŋíŋɛ efāʼa á lepīp athū nnɛ̄t zí, ŋ́gɛ yí té láʼ ekwhʉ́ ɛ́, mbɔ a a ké eláʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí, melaʼ Ndém, mbɔ a a láʼ egɔ́ éwú.
Meŋ echʉ́ nnɛ̄t eshúŋ á wɛ́, a láʼ egɔ́ etsōʼ aleʼé mɛ́t, epuɔ mémpīa pīi pɔ́ nnɔ̄ŋ á ndo ekó ndíi, mɛ́ elɔ̄k mmɔʼ ŋgʉ̄ɔ, ḿbiŋ ntshī mmɔʼ néŋ. Wɔnzwí mémpīa pīi pɔ́ nnɔŋ nzéŋnɛ ŋgɔ̄ʼɔ ŋgesáŋ, mɛ́ elɔ̄k mmɔʼ ŋgʉ̄ɔ, ḿbiŋ ntshī mmɔʼ néŋ. [ Epuɔ mémpīa pīi, pɔ́ ŋgɔ́ á ŋkāʼ efāʼa, mɛ́ elɔ̄k á taʼ ŋgʉ̄ɔ, ḿbiŋ ntshī mmɔʼ néŋ. »] Nnɔ Yɛɛ́so é júʼ épúp, ńzɛ́tte á yí ŋ́gɛ: «Mɔʼɔ́ wek, emuɔ menu mɛ́t e láʼ etɔ́k egɔ́?» Yɛɛ́so á pwɛt ŋ́gɛ: «A láʼ elem, membhʉ̄ e ejúʼ. »

Terera ku Lúkási 17