Text: © The Bible Society of Zambia, 2003 Audio: ℗ 2012 Hosanna

Lunda - 2003 Edition (Drama - NT)

The Holy Bible in Lunda Ndembu © United Bible Societies, 2003. 

Ilaŋa Yesu wayili kumpidi yaOliveta.
Hakwiŋila cheŋi muTembeli budidi yayeni; antu ejima hiyakwinza kudi yena, yena hakushakama nakuyitaŋisha.
Ansoneki nawaFwarisewu hiyakumuletela mumbanda akwatawu dehi nakwila wuvumbi.
Chanamushuwu mukachi hiyakumwila nawu, Eyi Ntaŋishi, mumbandiwu anamukwati nakwila wuvumbi, anamushintakeshi wakushintakesha.
Kunshimbi yaMosi atuleja nawu muntu wudi ichi chiŋa kumwasa malola; indi eyi neyi tumwili ŋahi?
Chahosheluwu chenochu alondeli kumweseka, kulonda amoni hakumwinkela muloŋa. Ilaŋa Yesu hakubandama, hakusoneka namunu windi hamaseki.
Chanamwihuluwu ihule-e, hakubanduka, hakuyila nindi, Muntu nabuli nshidi hakachi kenu asambili kunona ilola amwasi.
Hakubandama cheŋi nakusoneka namunu windi hamaseki.
Wena chanachitiyuwu, hiyakwidikamu, wumu, wumu, kutachikila kudi mukulumpi, ndo-o nikudi kansi. Yesu yoshala nikankawindi, namumbanda saŋa adiyi mukachi.
Yesu hakubanduka, hakumwihula nindi, Eyi mumbanda, antu anakwinki muloŋa adi kudihi? Kwosi muntu nakuhishuku?
Mumbanda nindi, Kwosi Mwanta. Yesu nindi, Hela ami hinakuhishuku; yaŋa kweyi, ilaŋa kufumisha kulelu bayi wufunta cheŋi munshiduku.]

Dichi Yesu hakuhosha cheŋi nawena, nindi, Ami yami chejeji champata yamunu mwishina, muntu wukunlondelami hakendela mumwidimaku, ilaŋa wakekala nachejeji chawumi.
Dichi aFwarisewu hiyakumwila nawu, Wadishimunaŋa eyi aweni; wunsahu weyi hiwalalaku.
Yesu hakuyakula nindi, Hela neyi nadishimunaŋa ami aweni, wunsahu wami walala; muloŋa neluki kunafumini nikunukuya, ilaŋa enu himweluka kunafumini hela kunukuyaku.
Enu mwasompeshaŋa mwasompeshaŋawu antu. Ami hinasompeshaŋa muntuku.
Chalala, hela neyi nasompeshaŋa, kusompesha kwami kwalala; muloŋa hinekala kankawamuku, nidi naTata wantemesheli.
Chalala, hela munshimbi yenu anasoneki nawu,
Wunsahu wawantu ayedi walala.
Ami nadishimunaŋa ami aweni, niTata wantemesheli hakunshimuna wunsahu.
Dichi hiyakumwihula nawu, Tata yeyi wekala kudihi? Yesu hakwakula nindi, Hela ami, hela Tata yami himwatwilukaku; neyi mwaŋilukami mwadi kwiluka niTata yami.
Mazu awa wayihosheleli mwitala dakuswekela mali, chadiŋi nakutaŋishayi muTembeli. Hikwadiŋi muntu wamukwatiluku, muloŋa henohu mpinji yindi kanda yishiki.
Dichi hakuyila cheŋi nindi, Ami hinukufumahu, enu mwakankeŋakeŋa, mwakafwa munshidi jenu. Kunukuyami himukutwesha kushika kwoku.
AYudeya hiyakwila nawu, Chaneliyi nindi, Kunukuyami himukutwesha kushika kwoku, keŋa adijahi, tahindi?
Yena hakuyila nindi, Enu mudi antu ampata yamunu mwishina, ami nidi wamwiwulu; enu mudi ampata yinu, ami hinidi wampata yinuku.
Dichi chinayili nami, Mwakafwa munshidi jenu. Muloŋa neyi mukubula kunkuhwelela nenu, Ami Yami, mwakafwa munshidi jenu.
Dichi hiyakumwihula nawu, Ochu yeyinyi? Yesu hakuyila nindi, Nayileja dehi kufumisha kutachi.
Nidi nayuma yayivulu yakuhosha yakuyisompeshenu; hakwila yena wantemesheli walala, ami nahoshaŋa nawantu ampata yamunu mwishina mazu inatiyili kudi yena.
Wena hiyelukili nawu nateni Tata yinduku.
Dichi Yesu hakuyila nindi, Chimwamba kanyamuna Mwana kaMuntu kwiwulu, henohu dihu mwamba kelukila nenu Ami Yami; nenu hinelaŋa chuma chakankawamuku, ilaŋa nahoshaŋa mazu awa mwomwanlejeluwu kudi Tata.
Yena wantemesheli nekala hamu nindi, hananshiyi kankawamuku; muloŋa nelaŋa yuma yamutiyishaŋa kuwaha mafuku ejima.
Chadiŋi nakuhoshayi ochu antu amavulu amukuhwelela nikumukuhwelela.

Yesu hakuhosha nawaYudeya anamukuhweleli nindi, Neyi mukushakama mwizu dami, mukwikala atumbanji twami chalala;
mukwiluka walala, niwalala wukuyikasununa.
Wena hiyakumwakula nawu, Etu anyana kaAbarahama, kanda tushakamaŋahu dehi muwuduŋuku, indi eyi wunahoshi ŋahi neyi, Akuyikasununa?
Yesu hakuyakula nindi, Chalala chalala, nukuyileja nami, antu ejima aputolaŋa, diwu anduŋu janshidi.
Nduŋu hashakamaŋa mwitala hayanyakaku; mwana washakamaŋa hayanyaka.
Dichi dinu, neyi Mwana wukuyikasununa, mukukasunuka chikupu.
Neluki nami enu mudi anyana kaAbarahama; hela chochu, enu mwafwilaŋa kunjaha, muloŋa izu dami hidikweti hawushakaminu mudenuku.
Ami nahoshaŋa yinamweni kudi Tata yami, enu mwelaŋa yuma yimwatiyili kudi tata yenu.
Wena hiyakumwakula nawu, Tata yetu Abarahama. Yesu hakuyila nindi, Neyi mwadiŋi anyana kaAbarahama, mutenowu mwadi kwila nyidimu yaAbarahama.
Ilaŋa dinu enu mwafwilaŋa kunjaha, ami muntu nayileja dehi mwalala múnatiyili kudi Nzambi; hidichi chelili Abarahamaku.
Enu mwelaŋa nyidimu yatata yenu. Hiyakumwila nawu, Hitudi anyana amuchiputaku, tukweti tata yetu wumu, yowu Nzambi.

Yesu hakuyila nindi, Neyi Nzambi hitata yenu mwadi kunkeŋami, muloŋa ami nafumini kudi Nzambi, diku nenjili; ami hinadinjila ami awenuku, yena diyi wantemesheli.
Munakaŋenyidi kwiluka munahoshaŋa? Chinafumi hakubula kutiya izu dami.
Enu tata yenu diyabolu; mwakeŋaŋa kwila mwafwilaŋayi tata yenu. Yena wadiŋi mbanji kufumisha kutachi; yena hemanaŋa muwalalaku, muloŋa mudi yena himwekala walalaku. Chahoshaŋayi yakutwamba wahoshaŋa yindi yomweni, yena hintwambi, hitata yachu.
Enu mwabulaŋa kunkuhwelela muloŋa nahoshaŋa walala.
Mwinenwinyi wukunkonkolola nindi ami neli nshidi? Neyi nahoshaŋa walala mwalekelaŋadi kunkuhwelela?
Muntu waNzambi watiyaŋa mazu aNzambi. Chimunabuli kwikala antu aNzambi, dihu hanafumi kubula kutiya mazu indi.

AYudeya hiyakwakula nawu, Chitwakutenaŋa netu eyi wukaSamariya wudi nandemoni, hitwakutenaŋa mwalalaku?
Kuchinka Yesu nindi, Hinikweti ndemonuku; ami nalemeshaŋa Tata yami, enu mwansawulaŋa.
Ilaŋa hinakeŋi kudilemesha ami awenuku; wákeŋaŋa kunlemesha yowu mukwakusompesha.
Chalala chalala, nukuyileja nami, muntu wahembaŋa izu dami hamba kamona kufwaku.
AYudeya hiyakumwila nawu, Ichi dinu tuneluki netu wudi nandemoni. Abarahama wafwa dehi, niatuprofwetu nawa, hakwila eyi hiwukwila neyi, Muntu wahembaŋa izu dami hamba katompa kufwaku.
Eyi wunabadiki tata yetu Abarahama niatuprofwetu afwili, tahindi? Wudi nakuditena neyi yeyinyi?
Yesu hakwakula nindi, Neyi nukudilemesha ami aweni, kulema kwami kwamukunkulwayi. Tata yami diyi wanlemeshaŋa, iwu mwatenaŋa nenu Nzambi yenu.
Enu himunamwilukuku, ilaŋa ami namwiluka. Neyi nukwila nami hinamwilukaku, nukwikala ntwambi neyi enu. Ilaŋa namwiluka, nahembaŋa izu dindi.
Tata yenu Abarahama waluŋili chamweniyi ifuku dami; chadimweniyi hakuzaŋalala.
Dichi aYudeya hiyakumwila nawu, Kanda wushiki munyaka makumi atanu (50), wunamoni dehi niAbarahama?
Yesu hakuyila nindi, Chalala chalala, nukuyileja nami, hadiŋi Abarahama kanda avwaliki, Ami Yami.
Dichi hiyakunona malola nawu amwasi; ilaŋa Yesu hakubatama, edika nimuTembeli.

Terera ku Yowanu 8