If you would like a copy of this version please contact info@davaraudiobibles.org

Tavoyan: Dawei Bible, CC-BY-SA-4.0, The Word for the World International, 2024. (Text)
Tavoyan: Dawei New Testament Audio Bible, CC-BY-SA-4.0, Davar Partners International, 2025. (Audio)

Tavoyan: Dawei New Testament

ယေရှုဟှာ တဗဲ့တော်ဆယ့်နှေ့ပါးဟှို အယ်မူဇာလေ ဂူလောင်း မိန့်မှာဘီးဟှာ ဂါလိလဲပြည်ရဲ့ ဗြို့လေမာ ဆောင်းမဩဝါဒပေးဘီး ဒန်းကောန်းဟှို ကြေညာဟှို့တွပ် အယ်ရပ်ဟှနေဘီး ထွပ်ကြွဟှားတော်မူလေဟှယ်။
ခရစ်တော် ပြုလောက်နေဟှူ ကြောန်းရာလေဟှို ထောန်ထဲမာ ယောဟန်ကြားရဟှူ ခီမာ သူ့တဗဲ့တချို့ဟှို ကိုယ်တော်နားဟှို လွှတ်ဘီး “ကိုယ်တော်ဟှာ ကြွလာတော်မူဟှူ ခရစ်တော်ဘဲ့လော။ နော့‑က်မှုဘဲနေဟှာ တခြားတယော့‑က်ဟှို စောန့်မျှော်ရဟှို့သေးလော” ဆိုဘီး မေးလျှော့‑က်စေလေဟှယ်။
ယေရှုဟှလည်း “နန်းနို့ကြားသိဟှူ ဇာလေ၊ ဗြင်တွိဟှူ ဇာလေဟှို သွားဘီးဟှာ ယောဟန်ဟှို ပြောပြဂေ့ပါ။ မျစ်စိကန်းနေဟှူ သူလေဟှာ မျစ်စိဗြင်ရဟှယ်။ ခေလတ်သေနေဟှူ သူလေလည်း လမ်းသွားရဟှယ်။ နူနာရောဂါသယ်လေဟှာ သန့်ရှင်းမှုဟှို ရဟှယ်။ နားကြားဘဲနေဟှူသူလေ နားကြားရဟှယ်။ သေဟှူသူလေဟှာ ပ္လန်ရှင်ဇာဟှိုခံရဟှယ်။ ဆင်းရဲသားလေလည်း ဝန်းသာဇာဒန်းကောန်းဟှို ကြားရလေဟှယ်။ ငါ့ဟှို ငြင်းပယ်ဘဲဟှူ လူလေဟှာ မင်္ဂလာရှိဟှယ်!” ဆိုဘီး မိန့်တော်မူလေဟှယ်။
ယောဟန်ရဲ့ တဗဲ့လေ ပ္လန်ဟှားခီမာ ယေရှုဟှာ ယောဟန်ဟှို ကြောန်းပြုဘီးဟှာ ဒေသနာ နားထောန်ဟှို့ လာဟှူသူလေဟှို “နန်းနို့လေဟှာ ဖယ်ဇာဟှို ကေ့ဟှို့ တောထဲဟှိုသွားဂေ့နူး။ လေတိုက်ဘီး လှောက်ရှားတတ်ဟှူ ကျူဗန်ဟှို ကေ့ရှင်ကြောန့် သွားဂေ့လော။ အယ်မျိုးမှုဟှ ဆိုဟှာ ဝတ်ကောန်းစားလှဝတ်ဟှားဟှူသူဟှို ကေ့ရှင်ကြောန့် သွားဂေ့လော။ အယ်မျိုးဝတ်ဟှားဟှူ သူလေဟှာ မန်းဂီးရဲ့ နန်းတော်လေမာဘဲ့ ရှိဂေ့ဟှယ်! ပရောဖက်ဟှို ကေ့ရှင်ကြောန့် သွားဇာလော။ မှန်ဟှယ်။ ပရောဖက်ထတ် ကီးမြတ်ဟှူ သူလည်းဖြစ်ဟှယ် ဆိုဘီး နန်းနို့လေဟှို ငါပြောဟှယ်။ ကျမ်းစာမာ ‘နန်သွားမယ့် လမ်းဟှို ပြင်ဟှို့တွပ် ဘုရားသခင်ဟှ ငါ့ရဲ့တမန်ဟှို နန့်ရှေ့မာ စေလွှတ်မယ်’ ဆိုဘီး ယောဟန်ကြောန်းဟှို ရေးဟှားလေဟှယ်။ ငါ မှန်ပြောရမယ် ဆိုဟှာ မီးမမွီးဟှူ သူလေထဲမာ ဗတ္တိဇံယောဟန်ထတ် ကီးမြတ်ဟှူသူ တယော့‑က်လည်း ပေါ်ထွပ်သေးဟှ။ အယ်ဘေမဲ့ ကောန်းဂန်နိုင်ငံတော်မာ ငယ်ဆောင်းဖြစ်ဟှူသူဟှာ ယောဟန်ထတ် ပိုဘီး ကီးမြတ်လေဟှယ်။ ဗတ္တိဇံယောဟန် လတ်ထတ်ဟှနေဘီး ခုခီထိ ကောန်းဂန်နိုင်ငံတော်ဟှာ အဓမ္မလူလေရဲ့ ကြမ်းဖတ်မှုလေဟှို ခံရလေဟှယ်။ ယောဟန်ပေါ်ထွပ်ခန်ဂဒဲဟှ မောရှေရဲ့ ပညတ္တိကျမ်းန ပရောဖက်လေ ဂူလောင်းဟှာ ကောန်းဂန်နိုင်ငံတော်ကြောန်းဟှို ပြောဟှားဟှယ်။ နန်းနို့လေဟှာ လတ်ခံဟှို့ ဆန္ဒာရှိမယ် ဆိုဟှာ အယ်သူဟှာ ဧလိယဘဲ့ ဖြစ်ဟှယ်။ နန်းနို့မာ နားရှိဟှယ် ဆိုဟှာ ကြားဂေ့!”
“အယ်ခေတ် လူလေဟှို ငါဖယ်မျိုး နှိုင်းပြရဟှို့နူး။ ဇာတ်ပွဲကနေဟှူ လူငယ်လေဟှာ သူးနို့ငယ်ဂျင်းလေဟှို အော်ဘီးဟှာ ‘နို့လေဟှာ သားသာယားယာ တီးမှုဂေ့ဟှူလည်းဘဲ့ နန်းနို့လေ ကဂေ့ဟှ! ဝန်းနဲပူဆွေးဟှူချင်းဟှို ဆိုဟှူလည်းဘဲ့ ငိုဂေ့ဟှ!’ ဆိုဘီး ပြောဟှူလူငယ်လေန အယ်လူမျိုးလေဟှာ တူလေဟှယ်။ ယောဟန်ဟှ စားသော့‑က်ဘဲန လာဟှယ် ဆိုဟှာ သူးနို့လေဟှာ ‘အယ်သူဟှာ နတ်ဆိုးဝမ်နေဟှူ သူဖြစ်ဟှယ်!’ ဆိုဘီး ပြောဆိုဂေ့လေဟှယ်။ လူ့ရဲ့သားဟှာ စားသော့‑က်ဘီးလာဟှယ် ဆိုဟှာ ‘ကေ့ကေ့ အယ်လူဟှာ စားမတ်ဘီး ဝိုင်သော့‑က်သူ၊ ခွန်ကော့‑က်မားလေန ပြစ်သားလေရဲ့ မိဆွေဖြစ်ဟှယ်!’ ဆိုဘီး ပြောဂေ့ဗ္လန်ဟှယ်။ အယ်ဘေမဲ့ ဘုရားသခင်ရဲ့ ဉာဏ်ပညာတော်ဟှာ မှန်ကန်ကြောန်းဟှို အယ်မူကြောန်းရာအားဖြင့် သတ်သေပြဟှယ်” ဆိုဘီး မိန့်တော်မူလေဟှယ်။


အယ်ဘီးန ယေရှုဟှာ နိမိတ်လတ်ခဏာလေဟှို ပြဘီးလည်းဘဲ့ နောန်ဒရဂေ့ဘဲဟှူ ဗြို့လေဟှို ပြစ်တန်ဘီး ဆောင်းမတော်မူလေဟှယ်။ “အို၊ ခေါရဇိန်ဗြို့၊ နန်ဟှာ အမင်္ဂလာရှိလေဟှယ်! အို၊ ဗက်ဇဲဒဗြို့၊ နန်ဟှာ အမင်္ဂလာရှိလေဟှယ်! နန်းနို့လေမှာ ငါပြဟှူတဂိုးလေဟှို တုရုဗြို့န ဇိဒုန်ဗြို့လေမှာ ပြလိုက်မယ် ဆိုဟှာ အယ်ဗြို့လေဟှာ ရှေးမဆွဂဒဲဟှ လျှော်တေဝတ်ဟှို ဝတ်ဘီး၊ ပ္လာနလူးဘီး နောန်ဒရဟှားဂေ့ဘီ! ငါပြောမယ်။ တရားစီရင်ဟှူနေ့မာ ဘုရားသခင်ဟှာ နန်းနို့လေထတ် တုရုဗြို့န ဇိဒုန်ဗြို့ဟှို ပိုဘီး ကရုဏာတော် ပြလေ့မယ်! ကပေရနောင်ဗြို့! နန်ဟှာ ကောန်းဂန်ဘောင်ထိအောန် မ္လော့‑က်စားခံရလေ့မယ် ဆိုဘီး ထန်နေလော။ မရဏာနိုင်ငံဟှို ပစ်ခ္လခံရလေ့မယ်! နန်းနို့နားမာ ပြလိုက်ဟှူ တဂိုးလေဟှို သောဒုံဗြို့မာလည်း ပြဖူးမယ် ဆိုဟှာ အယ်ဗြို့ဟှာ ခုခီထိ ပျစ်စီးဘဲရှိနေလေ့မယ်။ ငါပြောမယ်။ တရားစီရင်ဟှူနေ့မာ ဘုရားသခင်ဟှာ နန့်ထတ် သောဒုံဗြို့ဟှို ပိုဘီး ကရုဏာတော် ပြလေ့မယ်!” ဆိုဘီး မိန့်တော်မူလေဟှယ်။


အယ်ခီမာ ယေရှုဟှ “ဖ၊ ကောန်းဂန်ဘောင်န မ္လေဂီးရဲ့သခင်! ကိုယ်တော်ဟှာ ပညာရှိလေဟှို သိစေဘဲ ဖောင်းကွယ်ဟှားဘီး ပညာမှေ့ဘဲဟှူ သူလေဟှိုဘဲ့ ဖွမ့်ပြပေးဟှိကြောန့် ကျွန်တော်ဟှို ချီးမွမ်းပါဟှယ်။ မှန်ပါဟှယ် ဖ၊ အယ်မူဇာဟှာ ကိုယ်တော် လိုတော်ရှိဟှူဇာဖြစ်ဟှယ်။
“ငါ့ဖဟှာ ရှိမျှဂူလောင်းဟှို ငါ့ဟှို ပေးဟှားပီးဘီ။ ဖဟှလွဲဘီး ဖယ်သူလည်း သားတော်ဟှို သိဂေ့ဟှ။ ဖဟှိုလည်း သားတော်န သားတော်ဟှ ဖွမ့်ပြလိုဟှူ သူဟှလွဲဘီး ဖယ်သူလည်း သိဂေ့ဟှ။
“ဝန်လေးဘီး ပန်ဘန်းနေဟှူ သူလေ ဂူလောင်း ငါ့နားဟှို လာဂေ့ပါ။ ငါနန်းနို့ဟှို နားပေးမယ်။ ငါ့ထမ်းဘိုးဟှို ယူဘီးထမ်းဂေ့ပါ။ ငါ့နားမာ သန်ယူဂေ့ပါ။ ငါဟှာ နူးညံ့သိမ်မွေ့ဘီး နှိခ္လဟှူ စိသဘောရှိကြောန့် နန်းနို့ဟှာ သတ်သာမှုဟှို တွိဂေ့လေ့မယ်။ ဖြားဖြစ်ကြောန့်နူးဆိုဟှာ ငါ့ထမ်းဘိုးဟှာ ထမ်းရလွယ်ဘီး ဝန်လည်းပေါ့ဟှယ်” ဆိုဘီး မိန့်တော်မူလေဟှယ်။

Terera ku မဿဲ 11