Lik - 2013 WBT (NT) Non Drama

Lik - 2013 WBT (NT) Drama

Sik nirya damabuka unmeka ani, Sabat sum akunum ubukopura, Maria Magdalena ap, Yakobus el lin Maria ap, Yohana ap, awinilye kilapu nintong teleb ning kintinibuka deipmekak dobuka, ‘Yesus el nong deice dikuka likipnuyap’ tenen, bobuka biyik. Minggu sum beren tam kuna dakalongoyukura, awinilye kilapu Yesus weipmekak binuka, ‘Nintong teleb ning el nong deice dikuka likipnuyap’ tenen, Yesus weipmek keil deiyok dam biyik. Biyikopura, erebuka dipdeyikbuk, keil deiya buplan dekmoka weik pala keil ara akunum amuplopmokak eibik. Eibikura, keil deiya pum yanuka wekikce, dipdeyik bukni, Yesus el nong kum eibik.
Kum eibikce, ‘Yesus el nong dan do?’ tenen, teniltonmek talak ara, wel nang bitinye bebeya lingum ablirye, dirina weik ulamle tok, pia kurun baju ongopmarik nang, talye karin arye tikilyarik. Winiprikura, akilapu eibikce, lukdayikce ilil weik ubuka ati, koupdongobuka tikmek. Ilil weik ubukura, anang arye akilapu ati nyaprik. “Diplamak ninye wein dam, ‘Yesus aunmal do?’ tenen, dilyanmaluma ara, yata ati do?
El asukum kum unmale. El akunum kam bukmale. Anggun Yesus ap, Galilea mutuku noutamak neika ulalum talak nyalilamsuk yupu ara, moubuka tuba bikilulum do kum do? Bita moubuka tenipdelulume. Yesus arye nyapsuk yupu ara ani. ‘Nara, Ninye Mi Koprop Atonunye dobukapnikirye, malye un nang arepniceura, wanwanun yo deice opnicopura, dipmanya ani, like winilye sum akunum uplyopura, tamubuka kam buknamne,’ Yesus arye nyalamsuke.” Abitinye nang arye nyaprik. Nyaprikopura, akilapu arye, ‘Yesus nyamuk yupu ara, anye’ tenen, tamubuka tenebik.
Tenebikce, akeil deiyok dam batakuka banmeka ani, sik Yesus arye wibuka deiamuk nang, koklom barye 11 nang unmekak biyikce, awinipmok ning nirya ati, laka nyabikura, anang koklom barye 11 nang ap, sik ap, yuk nang ap, neika unmek nang ap, kekebik. Ayupu laka nyalbiyik kilapu si ara, ani. Ara, Maria Magdalena ap, Yohana ap, Yakobus el lin Maria ap, sik neika dilbiyik kilapu ap arye, sik Rasul nang ati, ayupu laka nyabik.
Laka nyabikura, Yesus arye, ‘Na yupu dobuka peterelbinamak’ tenen, wibuka deiamuk nang, ayupu akunum kekebik bukni, diba kum tenebik. Akilapu arye laka nyanmek yupu ara, ‘Talya motona nang arye nyalamak touk nyanmasiake,’ tenebik. Utenepmeka anye arye, diba kum tenebik. Sik nirya diba kum tenebik bukni, Peterus eluk ara, Yesus weipmekak keil deiyok dam bik-bik abuka dilbiyuk. Biyukopura, nong kanipdongobukce, keil deiya pum bita dipdeyukce, Yusuf arye mitang baju kitibuka weipmok ninguk aupmokak eibuk. Eibukce, el kanye pum tam aryuk, ‘Yata wiripmal do?’ tenen, teninmokce banmok.

Asumuk ara, Yesus el wibuka deiamuk nang, bitinye nang, ‘Emaus mutuku binunam’ tenen, bisik banmarik. Yerusalem mutuku arye, Emaus mutuku bisik ban karen ara, tonok sum noutamak bisik balamak touk, sebelas kilometer uamuk. Sik bisik noutamak banmarik talak ara, aning nirya winibukak, eiprik ning ap, kekeprik ning ap ati, yupu talipdanin banmarik. Sik yupu talipdanin banmarikura, Yesus sik kum tenepmarik bisik arye, yangayukak eiprik. Eiprikura, sik ap, Yesus ap banmek. Yesus yayukura, sik ap ansinibuka banmek bukni, ‘Na yanman ati akunum bikmaniak,’ tenebukce, sik kanye tenen ning, duknubuk ati ara, Yesus el urasin eiprik bukni, sikce, ‘Yesus ara anye,’ kum teneprikce, el urasin kum bikdike.
Sik banmeka ani, bisik noutam ara, Yesus arye abitinye nang ati, asipdeyuk. “Anggun bisik banmarumce, yata yupu talipdanin banmarum do?” nyabuka asipdeyuk. Asipdeyukura, sik bitinye nang atikilbirikce, ‘Se’ tenen, koupdongobuka tukwak dinmarik. Winibuka dinmarikbuk, tonoknye Keleopas arye, Yesus ati nyabuk. “Ambusum winipmo ning nirya ara, nun Yerusalem mutuku noutamak unyap nang nirya eibuka kel bikinyap bukni, an tonok ara, kum eiplum arye, kum biklum do? Anda winiryuk Yerusalem mutuku dam yanmalama ati, kum bikmalam do?” nyabuk. Nyabukura, Yesus arye tamubuka, “Yata ning ati nyapmanilam do?” nyabuka asipdeyuk. Asipdeyukura, sik bitinye nang arye tamubuka nyaprik.
Kume Nasaret nang arye deiyamiknye, el si Yesus ati nyapname. Yesus ara talinye kume. Elda Allah yupu laka nyalamuknye nabi ulamuk. Tonda, Allah nyapdeibukura, Yesus arye nyalamuk yupu ap, pil dolamuk ning ap ara, weik mikip deice arye winilamuk. Ninye nirya arye aning nirya elilamuburye, ‘Anye bira mikip weiknye’ tenen kel bikamubu.
Nun Yahudi yala deiyok nang ap, Allah arena ati weik deiyok nang ap arye, ‘Yuk nang arye opnamak’ tenen, Yesus dobuka arebikura, wanwanun yo deice obike. Se, nunda, ‘Yesus arye, Roma mutuku nang amu tam ulamibyak loplopsilirye, Israel ninye nirya lyebuka talipsilirye, nun Weik Deiyoknye eluk unamsil,’ tenelamubu bukni, sik anang arye Yesus obike. Tonda, sikce Yesus obikura, liki winilye sum akunum uple.
Tonda, aninguk kume. Nun tam kilapu arye yupu nyapmasungubuk, kekepmabce, lukdanmabe. Ara, beren tam ara, Yesus keil deiya weibikak dilbinmangu bukni, Yesus el nong kum eipmangue. Kum eipmangurye, nun dam ayupu nyalyanmasunge. “Lengdar mana atonun deice arye malaikat eipmabe, ‘Yesus akunum kam bukmale,’ nyaipmasile,” nyapmangue. Nyapmasungu ura, nun kayapu ton nang, Yesus weipmek keil deiya dam dilbinmangue, akilapu nyapmangu touk upmoba, eipmangu bukni, Yesus el nong kum eipmangue. Abitinye nang arye Yesus ati nyaprik.
Nyaprikura, Yesus arye tamubuka anang ati nyabuk. “Anggun walwal nang ululum ani. Anggun Allah yupu laka nyalamik nang nabi-nabi nang arye sekamik yupu ara, diba kum tenelulumce, lik asa kel bikilulume. Ninye weik lyeplirye, sik kanye talima talinamlanye, Kristus ara, elti, Allah arye utenebuk. Ara, ‘Sik malye nang arye el nong deice ikin ning weik deibiki bukni, donmalya ani, diplirye, kam bukuka pia teleb dirinak im deice welepnamle,’ tenyamuk ning ara, kum tenepmalumce nyapmanurum do?” nyabuk.
Nyabukopura, Musa ap, Allah yupu laka nyalamik nang, Nabi-Nabi nang ap arye el Yesus ati sekamik yupu ara, ayupu arye deiyok koubuka, Allah yupu noutam ulye yupu nirya arye el Yesus ati seklamik yupu dobuka, Yesus arye abitinye nang ati, laka nyapnin banmok. Laka nyabukura, sik bisik banmeka ani, sik binurik asik dam tam bayikura, ‘El yuk bisik binula atia, tenepnuniraka’ tenen, Yesus arye el yuk deiyok kobuka bayuk.
Yuk bisik baleyuk bukni, sik yupu mikip arye nyaprik. “Kume, akunum inipnin banmala anye arye, anda nun ap mapnuyabe,” nyaprik. Nyaprika anye arye, el ap asik binuka neika amabik. Aik unmekce din ning dipnuyik talak ara, Yesus arye roti doprobukce, Allah ati, “Telebe,” nyabukopura, tobukabukce anang ati arinmok. Roti arinmok talak ara, ‘Yesus ani’, kum tenepmarika ati, Allah arye, ‘Yesus biknurak’ tenen, sik kanye pakeibukce, asing teleb kipdeibukura, Yesus nong bikrik. Kel bikrik bukni, Yesus adiparyuk tunim abukura, tonap kum eiprik.
Tunimabukopura, sik bitinye nanguk yupu talipdarik. “Kume, ambusum el ap bisik noutamak banmapu talak ara, Musa sekamuk yupu ap, Nabi-nabi nang arye sekamik yupu ap, yuk Allah yupu buku ap, laka arye nyanmasubuk, nun kanye talima dukduk anmasu ning ara, deiyok akunum tenepmaname. Ara dipkoprop Yesus el uka tenepmaname,” nyaprik.
Uteneprikopura, adiparyuk amutuku batakuka, Yerusalem mutuku tamubuka birik. Birikopura, Yesus wibuka deiamuk nang koklom barye 11 nang ap, sik neika ulamik nang ap, sik bulubuka unmek asik binuka wekrikura, eipdayik. Wekrikopura, anyasik unmek nang arye ayupu laka nyanmek. “Sik akilapu nyapmasungu yupu ara, dipkoprobuk ulule. Nun ni koprop Yesus akunum kam bukukce, Simon dam tikilyayukura, eibuke,” nyabik.
Nyabikura, abitinye nang arye, sik bisik noutamak banmarik talak winipmok ning ap, Yesus arye roti tobuka aribukura, el nong kel kiprik ning ap, laka nyanmarik.

Sik nirye arye ayupu tuba nyanmek talak ara, Yesus talye karin arye sik kan-kan kutukuka tikilyayukce, anang nirya ati ayupu nyabuk. “Allah arye teleb updeipsilyeura, anggun teleb kanye bobuka unamlulume,” nyabuk. Nyabukopura, sikce, ‘Se, dibik nang kanya eibabe,’ tenebikce, sik ilil weik ubuk. Ilil ubuk bukni, Yesus arye anang nirya ati nyabuk. “Yata ati, ilil kanye bobuka kanye bokoltonmasilce, ‘Yesus do, kum do?’ tenen, teniltonmanulumce ilil upmasil do? Na taruk tatang ap, na yan ap dila dipdenululume. Na aunman ani. Na yok ap, tup ap, aupmanilba, eipmanuluma ati, anggunce talipdenululume. Ninye diplamak nang kanya ara, aning tuba kum ulule,” nyabuk.
Nyabukopura, el taruk tatang ap, el yan ap amubukce, anang ati peterebukura, eibik. Peterebukura, eibikce, weik kanye deibuka, kil-kil unmokura, pia ngalukunmek akarye, mitik anun ton tuba kanye bokol tonmok. Wininmok ati, Yesus arye anang ati asipdeyuk. “Din ning ara, anggun ton aupmasil do?” nyabuka morobuk.
Morobukura, sikuku arye dapmek mekin bal arebikura, doprobukce, sik dinmek talak aryuk dibuk. Yesus amekin bal dibukopura, ayupu nyabuk. “Na ap, anggun neika ulamuburye, nyalamsise yupu ara, tonap nyapnusine. Yata yupu do nirya, Musa sekamuk yupu ap, Allah yupu laka nyalamik nang, nabi-nabi sekamik yupu ap, Mazmur noutamak sekamik yupu ara, nati sekeiyamnik touk dipkoprop upnamle,” nyabuk.
Nyabukce, elti, Allah yupu sekamik ning nirya ara, ‘Kel kipnuyak’ tenen, sik kanye talima tenen ning aribuk. Tonda, ayupu nyabuk. “Allah yupu noutamak nati sekamnik ning ara, ani. Ara ninye weik lyeplirye, sik kanye talima talinamlanye Kristus ara, el nong deice ikin ning weik deibiceura, daunmalya ani, diplirye, like winilye mapmalya, kam buknamle. Kam buklyopura, el si deice arye ayupu bitinye laka nyabuka peterepra banamake. Ara, ninye nirya sik malye tenenyak ning ap, malye wininyak ning ap batakuka, kanye danguna ap, tonda, Allah arye ninye, sik malye un ning namin kiplirye, kum danipnamle ning ap ara, ayupu bobuka ninye mutuku-mutuku nirya ati peterepra banamake. Ara, Yerusalem mutuku arye deiyok koubuka dana-dana mutuku nirya peterepra banamake. Ayupu nirya ara, na si Yesus deice arye peterelbinamake.”
“Anyapmasin ning nirya ara, akunum winibukak elilulum nang anye arye, aning ara ninye kekenak ati, ‘Dipkoprop akunum uple,’ nyabuka nyalinamlume. Na ni Allah arye, ‘Na Dib Kanye arepnamsine,’ nyalilamuk touk, na im deice arye dopkwetepnamsine. Dopkwetepsinyeura, anggun kanye talima noutamak weksilirye, mikip weik upnamsil bukni, Allah El Dib Kanye arye min kum weik mikip kum upmasilye talak ara, Yerusalem asik noutamuk unamlume.” Yesus arye nyabuk.

Yesus arye ayupu nyabukopura, Yerusalem mutuku el minop bayukura, el mapu nirya ara aminyan bisik banmek. Banmeka ani, Betania mutuku dam biyikopura, ‘Allah arye anang teleb updeipnamle’ tenen, Yesus el taruk amubuka, Allah ati morobuk. Yesus arye Allah tuba moronmok talak ara, Allah arye Yesus el nong erepdakuka, im deice doprobukce, anang asukumuk batakuk. Akunum im deice biyukopura, anang nirye arye Yesus ati, kibuka, el si erenmek. Erenmekce, kanye pia deibikura, Yerusalem mutuku tamubuka biyik. Yerusalem mutuku biyikopura, daulamikce, Allah arilbalamik aik dam, pia asum-asum wekelbalamikce, Allah si erelamik.
Telebe, na Lukas arye ayupu akunum sekeipsine.

Terera ku Lukas 24