©New Life Computer Institute ℗ 2020 Hosanna

Moudadan Chetty NLCI (NT) Drama

Moudadan Chetty NLCI (NT) Non-Drama

ஒந்துஜின பரீசம்மாரும், சதுசேயம்மாரும் ஏசின பரீஷண கீவத்தெபேக்காயி, ஏசினப்படெ பந்தட்டு, “நீ ஆகாசந்த ஒந்து அடெயாள காட்டிதருக்கு” ஹளி ஹளிரு. அதங்ங ஏசு ஆக்களகூடெ, “சந்நேர ஆப்பதாப்பங்ங ஆகாச சொவந்நட்டு ஹடதெ; அதுகொண்டு இனி ஒள்ளெ காலவஸ்த்தெ ஆயிக்கு ஹளி ஹளீரெயல்லோ? பொளகாப்பதாப்பங்ங ஆகாச சொவந்நட்டு ஹடதெ, மோடகெட்டி ஹடதெ அதுகொண்டு செலசமெ காற்றும் மளெயும் உட்டாக்கு ஹளி ஹளீரெ? ஆகாசதாளெ ஏனொக்க நெடதாதெ ஹளி நிங்காக ஒயித்தாயி கொத்துட்டல்லோ, எந்நங்ங ஈக நெடிவுது ஏன ஹளி நிங்காக ஹளத்தெ கொத்தில்லே? ஈ காலதாளெ ஜீவுசா ஜன கெண்டன புட்டு பேறெ ஒப்பனகூடெ சூளெத்தர கீவாக்கள ஹாற, தெய்வத அனிசரிசாத்த ஜனஆப்புது; ஆக்க நன்னகூடெ ஆகாசந்த ஒந்து அடெயாள காட்டி தா ஹளி கேட்டீரெ; எந்நங்ங யோனா ஹளா பொளிச்சப்பாடிக சம்போசிதா ஹாற தென்னெ நனங்ஙும் சம்போசுகு ஹளிட்டுள்ளா அடெயாள அல்லாதெ, பேறெ ஒந்து அடெயாளும் நனங்ங காட்டிதப்பத்தெ பற்ற” ஹளி ஹளிட்டு ஆக்களபுட்டு ஹோதாங்.


சிஷ்யம்மாரு கடலின அக்கரெக எத்திகளிவதாப்பங்ங தொட்டி எத்தத்தெ மறதண்டுஹோதுரு. அம்மங்ங ஏசு ஆக்களகூடெ, “நிங்க பரீசம்மாரினும், சதுசேயம்மாரினும் புளிச்சமாவின ஹாற உள்ளா உபதேசதபற்றி ஜாகர்தெயாயிற்றெ இத்தணிவா!” ஹளி ஹளிதாங். எந்நங்ங சிஷ்யம்மாரு தம்மெலெ, நங்க தொட்டி எத்தத்தெ மறதுதுகொண்டாயிக்கு ஏசு இந்த்தெ ஹளுது ஹளி கூட்டகூடிண்டித்துரு. ஏசு அதன அருதட்டு, “நிங்காக இஞ்ஞி நம்பிக்கெ இல்லே? தொட்டி எத்தத்தெ மறதுதுகொண்டாயிக்கு ஹளி ஹளுது ஏனாக? இஞ்ஞி நிங்க மனசிலுமாடிபில்லே? ஐது தொட்டித ஐயாயிர ஆள்க்காறிக பங்குமாடி கொட்டுதும், பாக்கி பந்துதன ஏசு கூட்டெயாளெ துமிசிரு ஹளிட்டுள்ளுதும் நிங்காக ஓர்மெஇல்லே? ஏளு தொட்டித நாக்காயிர ஆள்க்காறிக பங்குமாடி கொட்டுதும், பாக்கி பந்துதன ஏசு கூட்டெயாளெ துமிசிரு ஹளிட்டுள்ளுதும் நிங்காக ஓர்மெஇல்லே? பரீசம்மாரினும், சதுசேயம்மாரினும் புளிச்சமாவின பற்றி ஜாகர்தெயாயிற்றெ இரிவா ஹளி நா ஹளிது தொட்டித பற்றியல்ல, ஹளி நிங்க மனசிலுமாடாத்துது ஏக்க?” ஹளி கேட்டாங். அம்மங்ஙாப்புது ஆக்காக மனசிலாதுது, தோசெ மாடத்துள்ளா புளிச்சமாவின பற்றி அல்ல; பரீசம்மாரினும், சதுசேயம்மாரினும் உபதேசத பற்றியாப்புது ஹளிது ஹளிட்டுள்ளுது.


அதுகளிஞட்டு ஏசு, செசரியா பிலிப்பியாளெ உள்ளா ஒந்து பட்டணாக பந்தட்டு, “மனுஷனாயி பந்தா நன்ன ஜனங்ஙளு ஏற ஹளி ஹளீரெ?” ஹளி தன்ன சிஷ்யம்மாராகூடெ கேட்டாங். அதங்ங ஆக்க, “செலாக்க நின்ன யோவான்ஸ்நான ஹளியும், செலாக்க எலியா ஹளியும், செலாக்க எரேமியா, அல்லிங்ஙி பொளிச்சப்பாடிமாராளெ ஏரிங்ஙி ஒப்பனாயிக்கு ஹளி ஹளீரெ” ஹளி ஹளிரு. அம்மங்ங ஏசு, “செரி! நன்னபற்றி நிங்க ஏன பிஜாரிசீரெ? நா ஏற?” ஹளி கேட்டாங். அதங்ங சீமோன்பேதுரு, “நீ ஜீவோடிப்பா தெய்வத மங்ஙனாயிப்பா கிறிஸ்து தென்னெ” ஹளி ஹளிதாங். ஏசு அவனகூடெ, “யோனாவின மங்ஙனாயிப்பா சீமோனு, நீ பாக்கியசாலியாப்புது; ஈ காரெ நினங்ங மனுஷம்மாரு ஹளிதந்துது அல்ல; சொர்க்காளெ இப்பா நன்ன அப்பனாப்புது இதன நினங்ங ஹளிதந்துது. நா நின்னகூடெ ஒந்து காரெகூடி ஹளுதாப்புது; நின்ன ஹெசறு பேதுரு; அதன அர்த்த பாறெக்கல்லு ஆயிப்புதுகொண்டு, ஈ பாறெக்கல்லினமேல நன்ன சபெத கெட்டுவிங்; பாதாளத சக்தி அதன ஜெயிப்பத்தெபற்ற. சொர்க்கராஜெத தாக்கோலு நா நின்னகையி ஏல்சிதப்பிங்; நீ பூமியாளெ ஹூட்டுதன நானும் சொர்க்காளெ ஹூட்டுவிங், நீ பூமியாளெ தொறிவுதன நானும் சொர்க்காளெ தொறிவிங்” ஹளி ஹளிதாங். எந்தட்டு ஏசு சிஷ்யம்மாராகூடெ, “நா கிறிஸ்து ஹளா ஏசு ஆப்புது ஹளி நிங்க ஒப்புறினகூடெயும் ஹளுவாட” ஹளி ஒறப்பாயிற்றெ ஹளிதாங்.


ஆ சமெந்த ஹிடுத்து ஏசு, தன்ன சிஷ்யம்மாராகூடெ தாங் எருசலேமிக ஹோப்பத்துட்டு ஹளியும், அல்லிபீத்து மூப்பம்மாரும், தொட்டபூஜாரிமாரும், வேதபண்டிதம்மாரும் தன்ன ஹிடுத்து உபதரிசி கொல்லுரு ஹளியும், மூறாமாத்த ஜினாளெ தெய்வ தன்ன ஜீவோடெ ஏளுசுகு ஹளிட்டுள்ளா காரெத பற்றியும் ஹளத்தெகூடிதாங். அம்மங்ங பேதுரு ஏசின தனிச்சு ஊது கொண்டுஹோயிட்டு, “குரூ! தெய்வ நினங்ங அந்த்தெ ஒந்தும் பருசாதெ இறட்டெ; அந்த்தெ ஒந்தும் நினங்ங சம்போசாதெ இறட்டெ” ஹளி ஏசினகூடெ ஜாள்கூடிதாங். அதங்ங ஏசு அவனபக்க திரிஞட்டு, “நன்ன கண்ணா முந்தாக நில்லாதெ செயித்தானே! நீ நனங்ங தடசாக நில்லுது ஏக்க? நீ தெய்வகாரெபற்றி சிந்திசாதெ மனுஷன காரெபற்றியாப்புது சிந்திசுது” ஹளி ஹளிதாங். எந்தட்டு ஏசு தன்ன சிஷ்யம்மாராகூடெ, “நன்ன பட்டெத அனிசரிசி ஜீவுசத்தெ இஷ்ட உள்ளா எல்லாரும் ஆக்கள சொந்த இஷ்டத மாற்றி பீத்தட்டு, அவங் நனங்ஙபேக்காயி கஷ்டப்படத்தெயும், சாயிவத்தெயும் தயாராயி நன்ன அனிசருசுக்கு. நன்ன ஜீவிதாத நானே காத்தம்மி ஹளி பிஜாருசாவங்ங அது நஷ்ட ஆயிண்டுஹோக்கு; எந்நங்ங நன்ன ஹேதினாளெ ஒப்பன ஜீவித நஷ்ட ஆதங்ஙும், அது அவங்ங திரிச்சு கிட்டுகு. ஒப்பாங் தனங்ஙபேக்காயி ஈ லோகாளெ உள்ளா சொத்துமொதுலு ஒக்க சம்பாரிசிட்டு, தன்ன ஜீவித நாசமாடிதங்ங, அவங்ங ஏன பிரயோஜன? அவங் தன்ன ஜீவிதாக சமமாயிற்றெ ஏதன கொடத்தெபற்றுகு? மனுஷனாயி பந்தா நா நன்ன அப்பன பெகுமானதாளெ, நன்ன தூதம்மாராகூடெ பொப்பிங்; அம்மங்ங ஒப்பொப்பங்ஙும் அவாவன பிறவர்த்தி அனிசரிசிட்டுள்ளா பல கொடுவிங். நா சத்தியமாயிற்றெ நிங்களகூடெ ஹளுதாப்புது, மனுஷனாயி பந்தா நா நன்ன ராஜெயாளெ திரிச்சு பொப்புது காணாதெ, ஈ நிந்திப்பாக்களாளெ செலாக்க சாயரு” ஹளி ஹளிதாங்.

Terera ku மத்தாயி 16