Yanesha - 2014 Edition (NT)

Yanesha - 2014 Edition (Drama NT)

Allempoña oꞌ alla xherrerr allempoch alla kosherrerr allowen judioneshaꞌ ñeñth ateth anarethet ñokpoet. Jesúsñapaꞌ alla awerrerr ñamha Jerusaléño. All Jerusaléño eꞌñe allameꞌtets allothekma aꞌbeꞌtheñet carnero allñapaꞌ alloꞌtsen oñ apkoꞌsathtatareth ñeñth sochen hebreoneshaꞌ poꞌñoño Betesda. Ñeñthñapaꞌ eñall amnar poechaꞌpetar. Allña poechaꞌpetarothpaꞌ shonteꞌ atsnañethneshaꞌ ñeñth penaꞌrrartetsa all —ñeñth aporoꞌyethexhno ñamha ñeñth cheꞌkaꞌrepaxhno ñamha ñeñth echarretyetsa. Ñetñapaꞌ añ kowenet ñerraꞌm esempoch pelleꞌllchena oñ. Tharroꞌmar ñerraꞌm esempoch pelleꞌllchena ñeñth oñerpaꞌ mellañotheñoꞌch sowetsa all oꞌch pelleꞌllchatosan oñ. Ñerraꞌm eseshaꞌ ñanom eshaꞌtostsa all oño allempo pelleꞌllchena ñeñthña atsnañetherpaꞌ akrrerrochayoꞌch, amaꞌt erraꞌtsena atsnañtsor rromoenawet. Allñapaꞌ alloꞌtsen poesheñarr yakma ñeñth maꞌpoch xharraꞌ poechena posok char atsnaꞌten. Allempoña entos Jesús alla phanena ñañapaꞌ eñotos shonteꞌ char atsnaꞌten ñeñthoꞌmarña ateth otos:
—¿Amaꞌt pemno oꞌch phokrrerra?
Atsnañethñapaꞌ ateth otan Jesús:
—Amakaꞌye, Ayochreshathe, eñalle ñeñthchaꞌ neshaꞌteꞌ oño allempo pelleꞌllchena. Napaꞌ oꞌch thaya awen poꞌpsheñeññapaꞌ awoꞌtchaꞌ eshaꞌtosa ñanom.
Jesúsñapaꞌ ateth otererr:
—Theꞌpaꞌ oꞌch notoseph: Petantena, pechtaꞌnen allo pemoen, pechopeꞌchen thayekma.
Yakmañapaꞌ allorokmoepaꞌtchaꞌ korrena, ñañapaꞌ allentha chetenan allo moenpaꞌ allentha chopeꞌchnen. Ñewa, ñeñthña yethropaꞌ allempo amesen judioneshaꞌ. Ñeñthoꞌmarña judioneshaꞌpaꞌ ateth ochet ñeñth oꞌ korrerra:
—Theꞌ añe yethro allempokma yamesen. Amakaꞌye pokteyaye oꞌch phanen pemoeꞌ.
Tharraña ñapaꞌ ateth otanet:
—Ñeñth oꞌ aꞌkrratosenpaꞌ atethkaꞌ otosen: “Pechtaꞌnen pemoeꞌpaꞌ pechopeꞌchnen.”
Ñetñapaꞌ allentha aꞌphthoꞌchet:
—¿Eseshaꞌtña photoseꞌña, “Oꞌch pechtaꞌnen pemoeꞌpaꞌ oꞌch pechopeꞌchen”?
Tharraña ñeñth aꞌkrratarethterrtsapaꞌ ama eñoteñe eseshaꞌtheꞌña aꞌkrraterreꞌ tharroꞌmar Jesúspaꞌ ama alloꞌtsenaro, ñapaꞌ oꞌ awerr aꞌnawa, tharroꞌmar all shontosa acheñeneshaꞌ ñeñthchaꞌ entenayaꞌ. Oꞌña atarr oꞌchetpaꞌ Jesúsñapaꞌ alla enterran ñeñth aꞌkrraterr ñorraꞌ eꞌñe alla Parets paꞌpakllo. Allñapaꞌ ateth oter:
—Theꞌpaꞌ oꞌ phokrrerra. Theꞌñapaꞌ amach alla phoꞌchñaꞌtatsterrerro ñatoꞌrraña alla nanak pemoeroxhterrerr.
Yakmañapaꞌ oꞌ awerr, ateth otwerran judioneshaꞌ:
—Jesúsepaꞌtkaꞌyeña ñeñth naꞌkrraterreꞌ.
Ateth pena Jesús añe yethro allempo amesen judioneshaꞌ ñeñthoꞌmarña ñetpaꞌ oꞌpateñet Jesús. Jesúsñapaꞌ ateth otanet:
—Nompor eꞌñe themeꞌttsen atarr thorrena ñeñthoꞌmarña napaꞌxhoꞌña atarr nemneñ oꞌch nethorra namha.
Ñeñthoꞌmarña judioneshaꞌ paꞌmhchaꞌtaretherneshaꞌpaꞌ ello atarr nanak oꞌpateñet oꞌch moetset, tharroꞌmar ñetpaꞌ ateth otyeset:
—Ñapaꞌ ama ñapthayeꞌ añe yether oꞌ poeswerro allempokma yamesen, ñapaꞌ añeꞌnaña oten eꞌñoꞌ Pompor penan Parets, ñapaꞌ atthakaꞌye moeneñ oꞌch Partsokoptartena.

Jesúsñapaꞌ ateth oterraneterr:
—Eꞌñe poꞌñoxh notenes, na ñeñthen Poechemer pen Yompor amatheꞌ errothenoth es nephoña eꞌñe notha. Napaꞌ añña ateth nephaꞌyen ateth nenteññañ Apa, tharroꞌmar ñeñth ateth pen Apapaꞌ napaꞌxhoꞌña ñeñthen Poechemerenpaꞌ atethchaꞌ es nephaꞌyen namha. Apapaꞌ atarr moerenna tharroꞌmar napaꞌ eꞌñekaꞌye poꞌñoxh Poechemeren, ñeñthoꞌmarña gatyenen ora allowen ñeñth ateth phaꞌyen ña. Elloña ñapaꞌ añ gatyenen ñeñth nanak thorrapotyets ñeñth ateth etsotayen ña; ñeñthpaꞌ añekop ateth pennan atthoña sapaꞌ atarrchaꞌ sekwanrrortenen. Ñewa, yeñoteñ Apapaꞌ tantaterran arromñatheneshaꞌpaꞌ apoerranet allochña ñetpaꞌ korretsetach. Napaꞌxhoꞌña eꞌñekaꞌye ateth nepenaña namha ñeñthen Poechemeren. Ñerraꞌm erraꞌtsenchaꞌ nemnaꞌ na oꞌch napanet allochña ñetpaꞌ korretsetach atethchaꞌkaꞌye napoerranet. Apapaꞌ amaꞌt poesheñarrapaꞌ amach aꞌmethamperraneto errothenchaꞌ entyeswerranet. Naña apoen llesens ñeñthen Poechemeren nachña aꞌmethamperrawet errothenchaꞌ nentyeswerranet eꞌñe poesheñaꞌttset. Allochñapaꞌ atthochña allowenet mechaꞌnaꞌtennetchaꞌ namha ñeñthen Poechemeren eꞌñe ateth mechaꞌnaꞌtennanet Nompor Parets. Ñerraꞌm eseshaꞌ ama nemhchaꞌnaꞌtenaye na ñeñthen Poechemeren, Nomporeꞌnakaꞌyeña ama mechaꞌnaꞌteneto ñeñth nellsenseneꞌ.
‘Napaꞌ eꞌñe poꞌñoxh ateth notenes: Ñerraꞌm eseshaꞌ eꞌmhñoteꞌ neñoñ ñamha ñerraꞌm yemterrnanet Nompor ñeñth nellsenseneꞌ ñetñapaꞌ korretsetach poksheñeshokmañen thayotheñ errponañowen. Amach aꞌkoñchatarethterreto amaꞌt errponaña. Tharroꞌmarña ñetpaꞌ oꞌ metanerretña ñeñth eꞌñe poꞌñoxh rromoeñets, oꞌ xherret allña ñetpaꞌ korretsetach thayothen errponañowen. Eꞌñe poꞌñoxh oꞌch noterrserr: Oꞌ xherrmoch allempoch ateth perra, ñeñth arromñatheneshaꞌpaꞌ ñetñapaꞌ eꞌmoerrnanetchaꞌ neñoñ ñeñthen Yompor Poechemeren. Ñeñthchaꞌ eꞌmhñoterreꞌ na neñoñ ñetñapaꞌ korretsetach. Ñewa, Apapaꞌ eꞌñe ñotha korrena, ña napoeneꞌña atthoch napaꞌxhoꞌña korretsanach namha ñeñthen Poechemeren. Ñamha ña napoeneꞌña llesens atthoch nemñe patantaꞌtets acheñeneshaꞌ koñcheñtso, poꞌpotantaññapaꞌ amach nemñerraneto koñcheñtso. Atethkaꞌye allsensarethenña na Ñeñthen eꞌñe Acheñetosets. Ñeñth ateth oꞌ notwaspaꞌ amach xha semoññeꞌtatsche tharroꞌmar esempopaꞌ xherrchaꞌ amaꞌt ñeñth poepamproꞌtsaꞌyenpaꞌ eꞌmoerrnanetchaꞌ neñoñ. Xhaꞌnmaxherretchaꞌ alloth apamparethteteꞌth. Ñeñth ateth phaꞌyesayeꞌth eꞌñe kowen ñeñth poktetsa ñetñapaꞌ añekopchaꞌ tanterret atthoch ello alla korrerret. Ñeñthña phaꞌyesayeꞌth ñeñth ama pokteyaye ñetñapaꞌ añekpach tanterret atthoch ello alla amñarethterret koñcheñtso.

‘Amatheꞌ errothenoth es nephaꞌyesoña eꞌñe notha. Ateth eñotatenen Nomporpaꞌ atthochña nemñe patantaꞌtets acheñeneshaꞌ koñcheñtso, poꞌpotantaññapaꞌ amach. Ñamha errothenchaꞌ nentyeswerranetpaꞌ ñeñthpaꞌ eꞌñe pokteꞌ tharroꞌmar ama eꞌñe na nemnenñotheyeꞌ es nephaꞌyeno. Nomporña poemnenñoth es nephaꞌyen tharroꞌmar ña nellsenseneꞌ. Ñerraꞌm eꞌñe nañeña aꞌpothetsa, ñeñth attho naꞌpothenapaꞌ amatheꞌ es sherbeno. Eñallña poꞌpsheñeñ ñeñth eꞌñe no Nompor ñeñthña naꞌpotheneꞌña na. Ñamha neñoteñ ñerraꞌm ña naꞌpotheꞌpaꞌ ñeñth attho aꞌpothenen ñeñthña eꞌñe poꞌñoxh sherbets. Ñamha sa awañmoꞌchapaꞌ semñe acheñ Juanesho ñeñth aꞌphthoꞌtoseꞌ nokop. Juanña attho aꞌpothanpaꞌ ñeñthña eꞌñe poꞌñoxh ateth. Napaꞌ ama eꞌñe nokpa neꞌneno ñeñth naꞌpotheꞌ; añekpaꞌnaña notenes sa ñatoꞌ sapaꞌ sameꞌñoñatheꞌ Juan poꞌñoñ attho aꞌpothan na, allochñapaꞌ atthoch sekeshperra sameꞌñeñothen. Juanpaꞌ eꞌñe ateth peꞌth ñerraꞌmrratheꞌ lampareñ korretsa, atthoña xhoyoꞌteꞌth. Sañapaꞌ sa moenatseꞌth oꞌch sokshameꞌta mameꞌ all aꞌpoetarsamphsas. Tharraña ateth naꞌpothen napaꞌ ñeñthña nanak sherbets. Ello metanenan ñeñth ateth aꞌpothan na Juan. Allowen es nephaꞌyen ñeñth ateth yechenna Apa oꞌch eꞌñe netsotoñ, añ netsotateñpaꞌ ñeñthña oꞌ eñotatanet napaꞌ Apa nellsenseneꞌ. Ñamha Apa ñeñth nellsenseneꞌ ñapaꞌxhoꞌña ñakaꞌyeña naꞌpotheneꞌ. Sapaꞌ amaꞌt awathapaꞌ ama seꞌmaroñeña poꞌñoñ ateth eꞌmorrtena, ñamha ama sentareña ateth orrtena ña. Sapaꞌ amaꞌt poꞌñoñapaꞌ ama xhennasoña seyoxhro tharroꞌmar na ñeñthen llesensen Apa, sañapaꞌ ama sameꞌñenno. Sapaꞌ añchaꞌ sethorraꞌyesa Yompor poꞌñoñ ñeñth ateth anwareth awathotheñ tharroꞌmar sapaꞌ xhatheꞌ sotenapañ eꞌñe ñoñtsochayothapaꞌ sapaꞌ korretsasatheꞌ errponowañen. Tharraña Yompor poꞌñoñ ñeñth anwareth awathotheñ ñeñthpaꞌ nakaꞌyeña aꞌpotheꞌth. Sañapaꞌ amaña semnoña oꞌch sameꞌñerrna atthochña eꞌñe sokrrerrañ.
‘Tharraña napaꞌ ama añeyeꞌ neꞌneno atthoch ayeꞌchoxhtatennan acheñeneshaꞌ. Tharroꞌmar napaꞌ neñotenes sapaꞌ amaꞌt mameshapaꞌ ama semorrenteño Yompor amaꞌt seyoxhra. Napaꞌ attho nowapa Nomporña nellsenseneꞌ tharraña sapaꞌ amaña sameꞌñenno. Ñerraꞌm eseshaꞌchña wapatsañ ñeñth eꞌñe ñotha wena saña ñeñthpaꞌ atarrtheꞌ sameꞌñyañ. Sapaꞌ tharroꞌmarña ama sameꞌñenno sapaꞌ añakaꞌye seꞌnen oꞌch eꞌñe sañeña ayeꞌchoxhtatannetsa, amakaꞌyeña añeyeꞌña seꞌneno atthoch eꞌñe kowen entas ñapoeth Yompor. Amach sokthapeꞌchatsche ñatoꞌ nach sotteñeꞌcherreꞌ esempowañen Apoesho. Tharraña eñallkaꞌyeña poꞌpsheñeñ ñeñthchaꞌ sotteñeꞌcherreꞌ ñeñthpaꞌ añkaꞌye Moisés, sañapaꞌ ñeñthaña atarr nanak seyemtena. Ñerraꞌm poꞌñoxh sameꞌñeñañ Moiséspaꞌ napaꞌxhoꞌña sameꞌñennañchaꞌ tharroꞌmar ñapaꞌ nokopkaꞌye kellkonas. Tharraña ñerraꞌm ama sameꞌñeññaño ñeñth ateth kellkonaseꞌth ña, ñeñthoꞌmarña napaꞌxhoꞌña amach errothenoth sameꞌñonoña namha neñoñ.

Terera ku San Juan 5