Texte de la Bible: Gulei © Alliance Biblique du Tchad, 2004 Enregistrement du Nouveau Testament Gulei ℗ 2008 Hosanna

Gulei - 2004 Edition (NT) Drama

Magtub Mann-ra ke Kige ©Alliance Biblique du Tchad, 2004

Ndɔ karé bè, Jésu unde kêm ndɔr gang. Ndɔ nè nga è ndɔ taa kebe. Ɓo ra njékuwe-girnge ade unni gir têti dè ko tonmi usei. Loo ke Pharisienge an-in nyan nè nga bè ɓaa, ei deji Jésu edi nè:
– An! Ké bain á njékuwe-girige unni kum de dɔ rai nyan ke gute-ndu le jéi ɔge jéi ra se ndɔ taa kebe nga wa?
Jésu deje de ede nè:
– Nyan ke ndɔ ke David ra nga, ké sei i tutei tà’n an-in lé wa? Ndɔ karé bè ɓo ra’n. Njé ke awi se’n géa ɓo ra de tɔ. E aw kêm kei kubu’t le Nube, unn ngurwal ke tò se ninn’n use a, ade njé ke awi se’n usei a tɔ. Nè ngurwal nè nga tò ɔje dè njékuje nyan-mesege kuwe deri. Eké tà ke tò kêm magtub gute-ndu’t nga, ké sei tutei an-in lé wa? Njékuje nyan-mesege ke rai kule kêm kei’t le Nube se ndɔ taa kebe nga ali tà tà gute-ndu’t, nè tà’n uwe dè de lé. Nè man m’ede sei, doo karé ke bòi dum dè kei le Nube è laa. Ke nè á sei geri tà ke dé tam d’ede nè: «Kêmkanm á m’ndige m m’aw ndoo nyankuje-mese lé» nga ɓaa, bainléa a in-in kalang gangi tà dè njé ke tà uwe dè de lé ɓai nga lé. Oiyo, man Ngonn doo nga, m’ee ngar dè ndɔ taa kebe.


Jésu in loon’t nè aw kêm kei kebe nan’t le de. Doo karé ke ji’n wei tonrin ndi kêm kei kebe nan’t nè nga tɔ. Dé deje Jésu d’ede nè:
– Ké d’inye loo d’ade doo le kade ɔr ratur ra njèratur’t se ndɔ taa kebe nga wa?
Dé deje’n tà nè nga titeke bè le kile’n tà denn’t kede nè è altà tà gute-ndu’t. Nè Jésu deje de ede nè:
– Ké nan dann si’t ke nè á bate le’n ke karé bere luk-luk oso bolé se ndɔ taa kebe nga ɓaa, à kuwe’n kɔr’n nata lé wa? Doo karé nga gate’n dum dè le bate karé nja bule lé wa? Ndɔ taa kebe nga, d’inye d’ade doo le kade ra’n nyan ke maje.
E á Jésu ede doo ke ji’n wei tonrin nè nga ede nè:
– I ndaje jii.
Ɓaa doo nè nga ndaje ji’n. Ke loon’t nè kuwe, ji’n ke karé ke wei tonrin nga tel mong maje tite made ke karé. Loo ke Pharisienge undei loo teei ɓaa, awi ɔri nan tà dè nyange ke kum kade adi dé ra le kuwe’n Jésu tɔl’n kɔke.

Loo ke Jésu ger titeke Pharisienge ɔri nan tà dènn’t le kuwe’n tɔl’n ɓaa, è inye loo nè ɔr ra’n aw rang. Kosdoo-bulege ngain ndolèi goo’n. E ɔr ratur ra de’t malang. Jésu on de njanm-njanm le kade d’ade doo karé bè géa ger’n lé. Tà ke Esaie, njèribe-dè-tà ke tà Nube’t tam kété mari ede nè:
«An! ngonn njèndi le’m ke man kuwe m’ɔr’n a,
m’tár’n a, ra’m nel’n dènn’t ngain a tɔ.
M’a m’ade ndil’m à um dènn’t
le kade ile mber nyanra ke se dè naje’n ade dooge ke geri Nube lé.
A è njè kɔl nan se doo kade ndu’n ɓar beng-beng lé a,
doo à oo ndu’n se ka-rebege lé a tɔ.
Tuwe mann ke gudu ngoin-ngoin nga à uwe’n tête’n danné lé,
tà kubu ke à su sa ɓai nga, è à tɔl’n lé sár
kade ade nyanra ke se dè naje’n unn’n banga.
Dooge ke geri Nube lé à undei kêm de tchên ke dè rinn’t.»
Tà nè nga aw loon’t deĵ.


Dé ree se dingem karé ke ndil ke majelé tò kêmn’t ra Jésu’t. Dingem nè nga è njèkumtɔ a, tam tà lé a tɔ. Jésu ɔr ratur ra dingem’t nè ade tam tà yoror-yoror a, an loo njai-njai a tɔ. Tà ige kosdoo-bulege sêl ade tami edi nè:
– Ké è nè nga á è ngonnkà David lé wa?
Loo ke Pharisienge ooi tà nè nga bè ɓaa, teli tami edi nè:
– Doo nè nga rɔ ndilge ke majelé se tɔgmong ke Béelzébul, ngar le ndilge ke majelé ade’n.
Jésu ger tàgir le de ke kêm de’t mbak, gir’n ke nè á ede’n de ede nè:
– Ke nè á dooge ke kêm ɓeekon le ngar karé kuwe in-in kayai nan loo joo ɓaa, ɓeekon nè nga à tel k’ee ndube. Ɓee-bò ke rara ke kaya ra’n danné loo joo ɓaa, à asekum tò lé a, girkoje ke rara ke kaya ra’n danné loo joo ɓaa, à asekum ndi lé a tɔ. Ke nè á Sú rɔ se Sú nata ɓaa, è kaya ra’n danné loo joo. Ke nè á Sú kaya ra’n danné loo joo titeke bè ɓaa, ké ɓeekon le’n à asekum tò titeke bain wa? Ke nè á m’rɔ ndilge ke majelé kɔke se tɔgmong ke Béelzébul ade’m ɓaa, ké nan ade tɔgmong pajage le si á rɔii ndilge ke majelé nga ta wa? Gir’n ke nè á dé pajage le si kuwe d’a k’ee njégangtà dè sige’t. Ke nè á m’rɔ ndilge ke majelé se tɔgmong le Nube ɓaa, è tà le kade i geri titeke Konɓee le’n ube sei nang ɓá ta.
Ké doo karé asekum kaw kêm kei le njètɔge ndur nyange le’n tàkumn’t anje kuwe’n tɔ’n njanm-njanm kété wa? Ke nè á uwe’n tɔ’n njanm-njanm kété ɓaa, è asekum ndur nyange ke kêm kei le doo nè nga ndát-ndát kɔke. Nanan ke nain se’m lé ɓaa, è njèkɔse se’m tà. Nanan ke ra se’m dè kɔse nja batege nan’t lé ɓaa, è njé sanrin de sák-sák. Gir’n ke nè á man m’ede sei ndàt, kaiya ke rara ke dooge rai nga, d’a kade kêm de tin mbit dè’t ɓai a, nede ke dooge nedi Nube nga géa, d’a kade kêm de tin mbit dè’t ɓai a tɔ. Nè nede ke dooge nedi Ndil-Kêmnda nga, d’a kade kêm de tin mbit dè’t ndan lé. Ke nè á doo karé tam tà ke majelé se’m man Ngonn doo ɓaa, d’a kade kêm de tin mbit dè’t ɓai. Nè ke nè á doo karé tam tà ke majelé se Ndil-Kêmnda ɓaa, d’a d’ade kêm de tin mbit dènn’t kêm ɓalge’t ke ɗarinè éké kêm ɓalge’t ke à reei nga lé a tɔ.


Bainléa sei i tami edi nè: Ke nè á ra kage maje ɓaa, kann’n à è ke maje. Ke nè á ra kage majelé ɓaa, kann’n géa à è ke majelé tɔ. Oiyo, kann kage á d’a ger’n ra kage. Sei ke i tooi asinan se li jênênnge ke njékêmyêrge! Ké a asikum tam tàge ke maje loo ke ra’t wa? Nyan rusu kêm ɓengre doo njin-njin ɓita tà’n tee tànn’t ɓai. Doo ke maje à tee se nyanra ke maje ke tò kêm ɓengrenn’t ke nata. Doo ke majelé à tee se nyanrage ke majelé ke tò kêm ɓengrenn’t ke nata a tɔ. E á man m’ede sei ndàt, titeke tà malang ke dooge tami ke nonon karè nga, à ugei kure’n ndɔ gangtà’t. Kerɔte kuwe, tàge ke teei tài’t á Nube à ɔr’n tà dèi’t a, à gang’n tà dèi’t a tɔ.


Njékɔrgir gute-nduge se Pharisienge ke nange deji Jésu edi nè:
– Ngar, jè ndige le kade i ra nyankɔbe karé ade j’an.
Nè Jésu ile de dè’t ede nè:
– Sei njékêm majelége ke njé tur gide si kade Nube ke ɗarinè i ndii dè nang nè nga, i sangi le kan-in nyankɔbe. Nè nyankɔbe karé bè ke rang géa a an-in lé. Nè Jonas njèribe-dè-tà ke tà Nube’t ke ndɔ ke è nyankɔbe ke an-in kété ɓá non kuwe ase. Titeke kété Jonas too’n kêm kanje bò’t ase ndɔ mute nga, man ke m’ee Ngonn doo nga géa le’m à è titeke bè tɔ. M’a m’tò ngaran nang’t ase ndɔ mute tɔ. Dooge ke kêm ɓee-bò ke Ninive nga ndɔ ke in-in kalang turi hal de se go mber kile le Jonas ke ile ade de. An-in! doo karé ke bò ke dum dè Jonas nda laa. Gir’n ke nè á ndɔ ke Nube à gangtà dè girkoje dooge ke ndii dè nang nè ɗarinè nga ɓaa, njé ke kêm ɓee-bò ke Ninive à in-in le kilei tà dè de’t. Ndɔ gangtà’t nga, ngar ke dinye ke in kêl dè jikon le ɓeekon le Arabege à in le kile tà dè girkoje dooge ke ndii dè nang nè ɗarinè nga, tede kin ke è in ngei ɓee’t nú ree le koo gostà kumkunju le ngar Salomon. An-in! doo karé ke bò dum dè Salomon nda laa.


Loo ke ndil ke majelé unde loo tee kêm doo’t ɓaa, aw ile gam-gam kêm looge ke mann goto tutu, sang loo taa kebe nè inge lé sár. E á è tam kêmn’t ede nè: «M’a m’tel kaw kêm kei le’m ke kété m’unde loo m’tee tutu nga.» Loo ke è tel ree tee pan ɓaa, è an titeke kêm kei le’n tò wei karè a, d’ɔi náng-náng a, dé gɔl maje a tɔ. E ɔse wan tel aw ɔr ndilge ke majelé ngain dumi è ɓai ji sejimute ree se de ade awi ndii se’n kêm kei nè nga tɔ. Doo nè nga, kêm’n tel majelé ngain dum è ke kété. Girkoje dooge ke njékêm majelége ke ndii dè nang nè ɗarinè nga géa le de à è titeke bè tɔ.


Loo ke Jésu ndi à ede kosdoo-bulege tà bè-bè ɓai ɓaa, an! kon’n se ngakonnge ke dingem reei ndai nata. Ei sangi le kedi nin tà. Doo karé bè ede Jésu ede nè:
– An! koin se ngakoinge ke dingem ndai nata non, sangi le kedi nin tà.
Nè Jésu ile doo nè nga dè’t ede nè:
– Ké nan è kon’m se ngakonmge ke dingem wa?
Jésu tel ule ji’n njúng ke dè njékuwe-girnge’t ede nè:
– An! kon’m se ngakonmge ke dingem á ndii nè. Nanan ke ra nyan ke kêm Bɔ’m ke danrán ndige ɓaa, è nè nga è tite ngokon’m ke dingem se kon nann’m se kon’m ke get a tɔ.

Terera ku Matthieu 12