Texte de la Bible: Gulei © Alliance Biblique du Tchad, 2004 Enregistrement du Nouveau Testament Gulei ℗ 2008 Hosanna

Gulei - 2004 Edition (NT) Drama

Magtub Mann-ra ke Kige ©Alliance Biblique du Tchad, 2004

Jésu se njékuwe-girnge reei teei kêm kɔki ɓee ke ri’n nè Bethpagé, tò kɔte mbal ke kage olivierge ndai tutu. Loo ke ei undei dè ɓee-bò ke Jérusalem ngɔr ɓaa, Jésu ɔr njékuwe-girnge joo ule de kété ede nè:
– Awi kêm ɓee ke tò non si’t kété non. Loo ke i teei kêm ɓee’t nè nga ɓaa, ke loon’t nè kuwe a ingei kon koro ke dɔ nang se ngonn koro ke dingem nda nang se’n. I tuti de i reei se de adi man. Ke nè á doo karé à deje sei tà ɓaa, edi nin edi nè: «E Kuwe-ɓee á aw ndoo de.» Ke loon’t nè kuwe d’a d’inye de kade i reei se de.
Nyan nè nga tee titeke bè le kade tà ke Zacharie njèribe-dè-tà ke tà Nube’t tam kété mari aw’n loon’t deĵ. E tam kété mari ede nè:
«Edi dooge ke kêm ɓee-bò ke Jérusalem edi nè:
An-in! ngar le si à ree ke ra si’t.
Ngar le si nga è doo ke aw lom-lom, è al dè kon koro’t.
E al dè ngonn koro ke dingem tɔ.»
Njékuwe-gir-Jésuge awi rai titeke è unn’n ndu’n ade de. Ei reei se kon koro a, se ngonn’n ke dingem a tɔ. Ei labi kubuge le de gide koroge’t nè adi Jésu al ndi dè’t. Doobulege ngain labi kubuge le de ke bòi yul-yul nang ka-rebe’t. Njé ke nange têti kam labi nang rebe a tɔ. Doobulege ke njiyei non Jésu’t kété a, se njé ke njiyei goon’t a tɔ rai nyan beng-beng edi nè:
– Maje kade dè mong kang-kang nain se Ngonnkà David. E ke ree se ri Kuwe-ɓee nga, maje kade ndutɔr nain se’n. Njèndi sêm danran’t nga, maje kade dè’n mong kang-kang.»
Loo ke Jésu aw kêm ɓee-bò ke Jérusalem ɓá ɓaa, dooge malang ke kêm ɓee-bò’t nè nga, ndil de tee an-in soin-soin ade awi dè nan’t kutri edi nè:
– Ké doo nè nga è nan wa?
Njé ke nange dann doobulege’t nè tami edi nè:
– E Jésu njèribe-dè-tà ke tà Nube’t ke ɓee ke Nazareth ɓeekon ke Galilée.


Go’t gugu, Jésu aw kêm kei le Nube. E unn gir rɔ njékige nyange se njéndogo nyange nata malang. E tile table le njémbel narge se kali ndi le njékige der-ndage piring-piring kɔke. Jésu ede de ede nè:
– Dé ndang kêm magtub ke tò se ninn’n d’ede nè: «Kei le’m nga ,d’a ɓar’n kei kɔje tà se Nube.» Nè sei ɓaa, i telii ke mbonreen loo ɓɔyɔ ra le gon-ɓogege.
Njékumtɔge se njémetege reei ra Jésu’t kêm kei le Nube ade ɔr ratur ra de’t. Nè njékuje nyan-mesege se njéndang magtubge an-in nyange ke dum kum ke Jésu ra a, an-in ngannge ke rai nyan beng-beng kêm kei’t le Nube edi nè:
– Ngonnkà David nga, maje kade dè’n mong kang-kang.
Loo ke njékuje nyan-mesege se njékɔrgir gute-nduge ooi tà nè nga bè ɓaa, wong ra de ade tami se’n edi nè:
– Ké i oo tàge ke ngannge tami nga wa?
Nè Jésu tel ile de dè’t ede nè:
– Oiyo, m’oo maje kuwe. Tà ke Magtub tam ede nè: «I ade tà ngannge ke ndêin bè se ngannge ke à ili mba teen se pa ɗɔyi nin» nga, ké sei i tutei nja karé ndan lé ɓai wa?
Go’t gugu, Jésu inye de unde loo tee kêm ɓee-bò ke Jérusalem aw kêm ɓee ke Béthanie tò tutu nú.


Barè se ndɔgé ɓat, loo ke Jésu tel à ree ke kêm ɓee-bò’t nè nga ɓaa, ɓo ra’n. E an kage koté karé ngang rebe’t ngɔr. E tɔ aw tutu, è inge kann’n karé bè lé nè mbi’n á tò karè. Jésu tel tam se kage koté nè ede nè:
– I a tel kann gugu ndan lé sár se non.
Ke loon’t nè kuwe kage koté nè nga wei tutu njanm. Loo ke njékuwe-gir-Jésuge an-in nyan nè nga bè ɓaa, tà ige de sêl ade deji Jésu edi nè:
– Ké è titeke bain á kage koté nè wei kalang bè wa?
Jésu tel ile de dè’t ede nè:
– Kerɔte kuwe, man m’ede sei ndàt, ke nè á awi se kundekêm ke get á i naji se ra si dè’t lé ɓaa, a i rai nyan ke m’ra se kage koté nè nga á go karé bere lé, nè ke nè á edi mbal nè edi nè: «Ɔr rai loo ke nè’t i kile oso dann ba’t nú» ɓaa, mbal nè nga à ra titeke bè kuwe tɔ. Nyan ke rara ke sei deji Nube se kundekêm ɓaa, a ingei nyan nè nga kuwe.


Jésu aw kêm kei’t le Nube. Loo ke è unn gir ndó dooge nyan ɓaa, maw njékuje nyan-mesege se ngatɔge dooge le kosdooge reei rann’t dejii edi nè:
– Ké takul tɔgmong ke ra á i ra’n nyange nè nga wa? Ké nan unn ndu’n adi á i ra’n nyange nè titeke bè wa?
Jésu tel ile de dè’t ede nè:
– Man géa m’a m’deje sei tà karé bere luk-luk. Ke nè á ilei man dè’t ɓaa, man géa m’a m’ede sei loo ke m’inge tɔgmong le’m tutu á m’a m’ɔde’n nan ra’n nyange nè nga tɔ. Ké kule ke Jean ule dooge manné njonm nga, gir’n in ra wa? Ké gir’n in ra Nube’t éké in ra dooge’t wa?
Dé murin tà kêm de’t d’ede nè:
– Ke nè á j’edi nè: «Gir’n in danran» ɓaa, n’a tel deje jèi kede nè: «A ɓaa, bain á umi kêm si dènn’t lé wa?» A ke nè á j’edi nè: «Gir’n in ra dooge’t» ɓaa, a in-in se jéi se tà tede dooge malang an-in Jean ke njèribe-dè-tà ke tà Nube’t.
D’an bè ɓaa, dé tel d’ile Jésu dè’t d’ede nè:
– Jè jè ger lé.
Jésu géa tel ede de ede nè:
– A ɓaa, man géa m’a m’ede sei loo ke m’in se tɔgmong le’m tutu á m’ndi m’a m’ra’n nyange nè nga lé tɔ.

Jésu tel deje de ede nè:
– Ké tà ri á sei giri dè tà’t nè wa? Doo karé bè aw se ngannge ke dingem joo. E aw ra njé ke desêin’t ede’n ede nè: «Ngonn’m, aw i ra kule kêm ndɔr nduu’t le’m ɓila ade’m.» Ngonn nè nga tel ile bɔ’n dè’t ede nè: «M’ndige lé.» Nè mbɔr ɓaa, ngonn nè nga tel gir ɓaa ɔte aw kêm ndɔr nduu’t. Bɔ ngannge nè ɔte aw ra ngonn’n karé ke rang ede’n ede nè: «Ngonn’m aw i ra kule kêm ndɔr nduu’t le’m ɓila ade’m sei.» Ngonn nè nga tel ile bɔ’n dè’t ede nè: «Kuwe’m, m’a m’aw ɗarinè-ɗarinè kuwe.» Nè go’t gugu ɓaa, è mbate kaw sár. Ngannge ke joo nè nga, ké è ke ra ra nyan ke kêm bɔ’n ndige wa?
Njékɔr non Juipge teli ilei Jésu dè’t edi nè:
– E ke desêin.
Jésu ede de ede nè:
– Kerɔte kuwe, man m’ede sei ndàt, njétaa tirge se kaiya-dinyege á ei non si’t kété kêm Konɓee’t le Nube. Kerɔte kuwe, Jean ree tɔje sei rebe ra nyan ke se dè naje’n kade i taai kum Nube. Nè sei umi kêm si dènn’t lé; nè njétaa tirge se kaiya-dinyege á umi kêm de dènn’t. Sei an-in nyange ke dé ra nè nga se kum si nè sei i turi hal si le kunde’n kêm si dènn’t lé.


Jésu ede dooge ede nè:
– Uri mbi si ooi sertà karé ke rang ɓai. Doo karé bè è kuwe-kei. E uwe loo ndɔr nduu. E ɔr gali gan’n dè a, è nder bolè le kade dé mboré’n mann nduu tutu a, è ra kei ndi ngonm ndɔr tutu a tɔ. E ɓar dooge um kule’n ji de’t ɓaa, è ɔte ɗák aw mba’t. Loo ke nan kuje kann nduu ase ɓá ɓaa, è ule ngann njéndige le’n ra njéra kule ndɔr nduuge’t le kade adi nin kann nduu ke ɔje dè’n. Nè njéra kule ndɔr nduuge nè nga tuwei ngann njéndige nè nga tundei è ke karé gangi ra’n dàp-dàp a, tɔli è ke karé a, tilei è ke karé ke rang se kuberi her tɔli nin ke le’n a tɔ. Kuwe-ndɔr nduu nè nga tel ule ngann njéndige le’n ke rang bule dum njé ke è ule de kété. Nè njéra kule ndɔr nduuge rai ngann njéndige titeke rai njé ke kété nga kuwe ɓai. Loo tɔl tà’n ɓaa, kuwe-ndɔr nduu nè ule ngonn kêm’n kuwe ra de’t. E gir kêmn’t ede nè: «Ngonn’m ɓaa, bainléa d’a d’ile koje dènn’t.» Nè loo ke njéra kule kêm ndɔr nduuge’t an-in pan ɓaa, edi nan edi nè: «An-in! njèkɔi nyan-ndube nga aw nè: i reei adi jè tɔli nin, jè kayai nan nyan-ndube le’n kɔke.» D’uwe’n dé ndɔr’n d’aw se’n ngang ndɔr nduu’t nata, dé tɔl’n. Loo ke kuwe-ndɔr nduu nè nga à ree ɓaa, ké ri á à ra se njéra kule kêm ndɔr nduuge’t nè nga wa?
Njékɔr non Juipge teli ilei Jésu dè’t edi nè:
– E à unn kum’n mbeng le kade dé tɔl njékêmyêrge nè nga kɔke ɓaa, è à um kule ndɔr nduu nga ji njéra kule ndɔr nduuge ke rang. Dé nè nga loo ke nan kuje kann nduu ase deĵ ɓá ɓaa, d’a d’ade’n le’n ke ɔje dè’n.
Jésu tel ede de ede nè:
– Tà ke dé ndang kêm magtub ge ke tò se ninn’n d’ede nè:
«Kuberi her ke njékunde keige mbati nin nga,
tel è kuberi her ke njè mong dè kum kei.
E ke nè á è kule ra Kuwe-ɓee.
Jè j’an ke nyan ke dum kum jé.»
Tà nè nga ké sei tutei ndɔ karé bè ndan lé ɓai wa? Gir’n ke nè á, man m’ede sei ndàt, Konɓee le Nube nga d’a d’uwe wont taa ji si’t le kade girkoje dooge ke à adi nyan tee kɔde. [ Doo ke oso dè kuberi her’t nè nga, à gudu ɗêk-ɗêk a, doo ke kuberi her nè oso dènn’t ɓaa, à ide’n nduju reend-reend a tɔ.]
Loo ke maw njékuje nyan-mesege se Pharisienge ooi gostàge nè bè ɓaa, kum de gang reng ade geri titeke Jésu tam tà nè ɔje’n dè de. Ei sangi le kuwei Jésu nè ei ɓeli kum kosdoo-bulege tede an-in nin ke njèribe-dè-tà ke tà Nube’t.

Terera ku Matthieu 21