San Mateo 8
8
Jesús myunyakna dub xa nsén gealgizh lepra
(Mr. 1:40-45; Lc. 5:12-16)
1Leꞌa gor nchaꞌlaꞌ Jesús bet wa, leꞌa kwaꞌad be men usankea tsoꞌo xa. 2Cha ulen dub xabgiꞌi nsaꞌgea las na, leꞌa ta wa dub gealgizh nsaleaꞌ lepra. Cha msaxib xa ndoꞌ Jesús gast ndoꞌ yo ngol xtuzh xa, ndab xa:
—Señor, tal go nlad yunyakna go naꞌ, leꞌa naꞌ uní leꞌa ga sunka gan.
3Leꞌa Jesús cha mxoꞌob yaꞌa na tsoꞌo xa wa, cha ndab Jesús:
—Nladka naꞌ yakna lu. ¡Nat myakna lu!
Cha bi leꞌa gor wa leꞌa gealgizh wa cha mnitndoꞌ. 4Leꞌa Jesús cha ndab ndoꞌ xa:
—Blaꞌach, naꞌan ton ndoꞌ ná gudiꞌizh lu xteꞌe myakna lu. Ndi waꞌ ndoꞌ uleꞌay iniꞌí xa leꞌa lu myaklana. No biꞌi be man xnab lak unibeꞌe ley mkeꞌa Moisés usaꞌa be men zha nyakna bexa, ndontsa iniꞌí be men leꞌa lu myaklana.
Jesús myunyakna xa ndun tiꞌin ten dub soldad
(Lc. 7:1-10)
5Leꞌa gor na ulayaꞌ Jesús gezh Capernaum, leꞌa wats Jesús ulen dub soldad, dub xa Roma nibeꞌe dub gayoꞌoga be soldad. Cha unab xa ndoꞌ Jesús, 6ndab xa:
—Señor, leꞌa dub xa ndun tiꞌin ndoꞌ naꞌ uzheꞌeb kweaꞌ nsak. Leꞌa xa lá yoota gan isea, uzhebpa gealkweaꞌ nax niꞌí xa ta lid naꞌ.
7Leꞌa Jesús cha ndab:
—Naꞌ gaa yunyakna xa.
8Ná leꞌa soldad wa cha ndab:
—Señor, leꞌa naꞌ naꞌanpa isayaꞌ yate go len lid naꞌ. Nat gudtsa go yakna xa, leꞌa xa syakkana. 9Leꞌa naꞌ ndee nxobgek ndoꞌ xa mas nibeꞌe ndoꞌ naꞌ. No ncho be soldad nibeꞌe naꞌ ndoꞌ na. Leꞌa gor na ndáp naꞌ ndoꞌ dub xa yaꞌ xa, leꞌa xa cha ndaꞌkaga. No gor na ndáp naꞌ giꞌid stub xa, leꞌa xa cha ndiꞌidkaga. No gor na nibeꞌe naꞌ ndoꞌ xa ndun tiꞌin ndoꞌ naꞌ, leꞌa xa wa cha ndunkaga ta li ndáp naꞌ wa.
10Leꞌa gor na mbiꞌín Jesús ta wa, cha ngwanseana xa, ndab xa ndoꞌ be men nchankea tsoꞌo xa:
—Leꞌa naꞌ gáp ndoꞌ bego, naꞌanpa izheal naꞌ ni dub xa Israel lndeꞌeta ngeꞌ ladna naꞌ. 11No gáp naꞌ ndoꞌ bega leꞌa gal dub wizh leꞌa kwaꞌad be men itoꞌo lad nlen wizh no lad ndaꞌas wizh, cha kwe bexa wats Abraham no Isaac no Jacob sa nibeꞌe Dios gibeꞌa. 12Naꞌ leꞌa bexa Israel, bexa na ndiꞌizh nsabndoꞌ yaꞌbe sa nibeꞌe Dios, leꞌa bexa wa ndi itatebe tsoꞌo juer sa ukaw. Cha goꞌon bexa gast ndeay bexa gaw bexa tant dub gealkweaꞌ siꞌil iniꞌí bexa.
13Cha ndab Jesús ndoꞌ soldad nibeꞌe wa:
—Nat byaꞌ ga, leꞌa lak mgeꞌ ladna go naꞌ, li gak‑a.
Cha bi leꞌa gor wa leꞌa xa ndun tiꞌin ndoꞌ soldad wa cha myakna.
Jesús myunyakna xnazhaꞌap Pedr
(Mr. 1:29-31; Lc. 4:38-39)
14Cha nchaꞌa Jesús ta lid Pedr, cha uniꞌí Jesús xnazhaꞌap Pedr nax ndoꞌ loꞌon uzhebpa ncho xlea. 15Cha mgal Jesús yaꞌa xa, cha mtoꞌo xlea xa. Leꞌa xagots wa cha ngwaste msaꞌa ta gaw bexa.
Jesús myunyakna kwaꞌad bexa gizh
(Mr. 1:32-34; Lc. 4:40-41)
16Leꞌa gor uyoꞌo teꞌal, leꞌa be men ulenno kwaꞌadpa bexa ncho mbi bxin ladoꞌo na. Leꞌa Jesús cha ulantuꞌub be mbi bxin nsea sbeꞌen diꞌizhtsa, no myunyakna xa itea bexa gizh. 17Li ngok‑a lak ta polta ndab Isaías, xa mbidiꞌizh sakndoꞌ Dios: “Leꞌa xa leꞌa uloꞌo beuna ndoꞌ be gealgizh nsén beuna no be gealkweaꞌ nchono beuna.”
Bexa na nlad isankea tsoꞌo Jesús
(Lc. 9:57-62)
18Leꞌa gor uniꞌí Jesús idub gangeak wats xa nde be men kwaꞌad, cha ndab xa ndoꞌ be xmen xa itakea bexa stub toꞌo lagun Galilea. 19Weꞌe leꞌa dub mech ten ley cha ulen wats Jesús, ndab xa:
—Mech, leꞌa naꞌ no isankea tsoꞌo go guniꞌi pa yaꞌ ga.
20Leꞌa Jesús cha ndab:
—Leꞌa be mbeas ndap geꞌed nyoꞌo na, no leꞌa be migin ndap be xuꞌun ten na, parea leꞌa Xa Myak Men Ndoꞌ Gizhliyo lá ndap sa uneꞌe xa.
21Leꞌa stub xa na no nkeseano Jesús cha ndab:
—Señor, blaꞌa ga ned yaꞌukaꞌach naꞌ xus naꞌ. Cha weꞌeta isankea naꞌ tsoꞌo ga.
22Leꞌa Jesús cha ndab ndoꞌ xa wa:
—Usankea tsoꞌo naꞌ. Blaꞌa leꞌa bexa lá ndap gealnaban ndoꞌ Dios ukaꞌach ltsaꞌa ngut na.
Jesús mtsaw ndoꞌ mbi siꞌil ulen ndoꞌ nits
(Mr. 4:35-41; Lc. 8:22-25)
23Leꞌa Jesús cha ukea ndoꞌ barco no be xmen xa, cha nchaꞌbe bexa ndoꞌ nits. 24Leꞌa sa wa cha ulen dub mbi siꞌil gast nyoꞌo nits wa len barco. Ná leꞌa Jesús ndi naxyats. 25Leꞌa be xmen xa cha mkwaꞌan xa, ndab bexa:
—¡Señor, lá ulaꞌa ga gat beuna, leꞌa beuna ngi slaꞌyoꞌo len nits!
26Leꞌa Jesús cha ndab:
—¿Xtaꞌan lbaꞌata nzheb bega zha? ¿Lid ndangea ladna bega naꞌ zha?
Weꞌe cha ngwaste xa, uteyo xa mbi no nits, cha uleas mbi no ndon xe ute nits. 27Leꞌa bexa wa cha ngwanseana, ndab bexa ndoꞌ be ltsaꞌa xa:
—Wen, ¿tonxá xa ndee zhaga, gast mbi nsea nits nxobgek ndoꞌ diꞌizh ten xa?
Jesús ulantuꞌub mbi bxin ncho ladoꞌo top xa Gadara
(Mr. 5:1-20; Lc. 8:26-39)
28Leꞌa gor ulayaꞌ bexa stub toꞌo lagun sa nibeꞌe gezh Gadara, weꞌe cha ulen top xabgiꞌi wats Jesús, utoꞌo bexa lat be geꞌloꞌo sa ngaꞌach be men ngut. Leꞌa bexa wa ncho mbi bxin len ladoꞌo bexa, no uzhebpa ugiꞌi bexa, gast ni dub men lá yoo gan itid nes nax sa wa. 29Cha ugeꞌ ndab bexa ndoꞌ Jesús:
—¿Xtaꞌan ngi besa nsea ugal lu zha, Jesús Xin Dios? ¿Nsea utsaksi lu besa, zha biseata gal wizh li gun lu?
30Leꞌa gax sa wa ndeseayaw kwaꞌadpa kuch. 31Cha ndab be mbi bxin wa ndoꞌ Jesús:
—Tal leꞌa lu kontuꞌub besa, blaꞌa yate besa len be kuch baꞌ.
32Leꞌa Jesús cha ndab:
—Waꞌbe bega.
Leꞌa be mbi bxin wa cha utoꞌo ladoꞌo be xabgiꞌi wa, cha uyoꞌo beya len be kuch wa. Leꞌa itea be kuch wa cha karrel nchaꞌa gek dub weꞌa toꞌo nits. Cha ubix bema gast len nits ulaꞌyoꞌo bema, cha ngut bema.
33Leꞌa bexa nkeno kuch wa cha mxoꞌon. Ngol gezh wa cha mbidiꞌizh bexa itea be ta uyoꞌo wa, gast xteꞌe myakna bexa ncho mbi bxin len ladoꞌo na. 34Leꞌa kwaꞌadpa bexa gezh wa cha utoꞌo nchaꞌbe sa nsoꞌ Jesús. Leꞌa gor uniꞌí bexa Jesús, cha unab bexa ikaꞌan xa sa wa.
Zvasarudzwa nguva ino
San Mateo 8: zpt
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2015, Wycliffe Bible Translators, Inc. All rights reserved.