Mak 8
8
Yesu pagan yeririna la miyuve manu vari [4000]
Matiu 15:32-39
1Ana e pogos tai, pupia p̃ina na yeririna la moki apimi sina pu Yesu, la asum̃a amio pano-o, viso kar la, ana la pe kala kinanen re poli. Ana Yesu pio kiena nalogena la apimi lavisi puna, pisa pan la pisape 2“E, in na sineu miye p̃ina la nini pap̃isi, komin nap̃a la asike amio ita legiena telu p̃aro rui, kala kinanena la p̃isi. 3Ana visae netam̃an la ava um̃a m̃ala nap̃a pe akinana re sanene poli, pona lap̃as viso kar la e mrapa komsusa, kilamarala malko, komin lap̃asia m̃ala um̃a la sike koperina pap̃isi.”
4Ana kiena nalogena la apisa pania, asape “?Ana tevagan yeririna la nene e yo korena nini sanape ne?”
5P̃isi na naga piun tan la, pisape “?Amiu amlarar ke kilaparavi via?”
Ana la apisatam̃ea “Olua ga p̃a.”
6P̃isi na Yesu pisa pan p̃ina moki la nene, pisape “Amiu atotano e yo nene wa.” Naga mla kilaparavi la olua nene, pisa potena pan Ntewa panonia, p̃isi na kawewowaia, kian pan kiena nalogena lala vena akianlelein van yeririna lala, p̃isi na la apion tetain pan la. 7Ana la amla m̃ena narin satin lua la ga e pogos nene, a Yesu mlotuwo m̃ena ga, pisa pan la sape ava avionlelein m̃ena ga van yeririna lala. 8Ana la nap̃a akinana pano-o, mep̃ela la kawa, ana korkoro kinanena nap̃a akanligania, ap̃ar akon pa e karo olua. 9Ana la nap̃a akinana e pogos nene tol sane manu vari.
P̃isi na Yesu miila si p̃ina la nene ap̃asup̃e si m̃ala um̃a lala, 10ana naga pa e kiela wa, amio kiena nalogena lala, apetan yo nene, akusro apa atol yo tai nap̃a kiena ki Talmanuta.
Yar keviu la p̃asia asape avisu kile tai
11 #
Mat 12:38; Luk 11:16 Ana e pogos tai, le Varasi lap̃asia apim asape agorua Yesu, asape atap̃ali m̃ena ga naga, ana la apisa asape “Imimi sinemimin mesape okilali pupia kile tai van imimi, nap̃a sane okila e puriu kawaena nae ma e peni.”
12 #
Mat 12:39; Luk 11:29 Ana Yesu naga miyuveve pa kona, sa nap̃a sinena maren la pa rui, naga pisatam̃e la, pisape “?Sanape na amiu na nanagane, sinemiun asape avisu kile tai ne sanene? Nepisa ke pe lelaga pan amiu, sane peraga, yoko kiamiu lus la na nanagane tap̃atete avisu kile tai.”
13Ana Yesu pure petan la mligan la asike na, pa si e wa, pa kusro lapa komp̃asia pa lepas na vano.
Nasumonena nalotena la asum̃a akila ke p̃elaga viowa la kapurulue ke
14Ana pogos nap̃a la apetan yo nene apa atol komp̃as nen lapa nene, amilan sane sinela pon nawararen kala kilaparavi p̃asia amio la, ana la amlarar ga kilaparavi taaga teke amio la e wa. 15#Luk 12:1Ana Yesu pisa visena tai pan la, pisape “Amiu monar avisuar ruru amiu, vanon is kiena ne le Varasi la amio Erot.”
Yesu pisa is nene, kana kinasia p̃elaga viowa kiena ne nasumonena lala, ana nalogena la pe asitom kilia re poli. 16La amloge visena nene, apisayu ke pan la, apisape “Pona naga pis sanene vanon ita pe top̃ar re kilaparavi lap̃as pimi poli yo.”
17Ana Yesu kilia m̃a kiela sitomena lala, p̃isi na pisape “?Amiu apisayu ke asape ita pe top̃arar re kilaparavi komin ya? ?Sanape, amiu pe amloge kilia re poli, pona pe apisu kilia re sur la poli wa? !Sinemiu la m̃arera pap̃isi wa! 18#Mak 4:12Amiu kilamaramiu la sike na, ana apisu kilale re sur poli, ana kiligamiu la sike na, ana amloge kilia re sur poli. ?Pona amiu pe asitom̃al re si sur la nap̃a nemiyum̃aen pan yeririna la poli? 19?Pogos nap̃a nekiantetain kilaparavi lima nanua ne pan yeririna la manu lima nap̃ane, akan pano-o mep̃ela kawa, ana akon korkoro kinanena la nene pa e karo via?”
La apisatam̃ea, asape “Imimi mokonkonia lualima taaga pa lua [12].”
20P̃isi na naga piun sina ga, pisape “?A pogos nap̃a lala manu vari nanua ne akan kilaparavi olua ga nap̃ane, p̃isi na amiu akon si karo via?”
Ana la apisatam̃ea, asape “Imimi mokonkonia olua.”
21Ana naga pis pan la, pisape “?Pogaga, ana sanapen nanagane? ?Amiu akiliali m̃a sur la nene, pona pere ke ga wa?”
Yesu kila ruru kilamara kata tai nae Petsaeta
22Ana Yesu la apam atol pulkumali nene, Petsaeta. Ana la nae yo nene, a sumon kilamara kata tai pimi puna, atagi pania vena tol ruru yaru nene. 23Ana Yesu tarar limana ne kilamara kata, sumon naga pano, la lua amiyuve kumali apa lepas na vano. P̃isi na Yesu mla wasirina, mligan e kilamaran yar luwoka nap̃ane, mligan liman tea, ana piun petania, pisape “?Sanape, ko na opisu ke suria, pona pere ke ga wa?”
24Ana yar nap̃ane kirava, kira pisu suri lala, naga pisape “Ee, nepisu ke yar lala, ana nepisu la sa ga purp̃es nen laki la amiyal ke na.”
25Ana Yesu mligan si limana e naga, yam luania, p̃isi na yar nene kilamarana pimi po ruruia, naga kilia kira pisu si suri lala, kira pisu la merarava po na po pap̃isi. 26Ana Yesu pisa pania, pisape “Yoko ko ove ova re si ovisu la nene gar um̃a, oto mesmes ga mom̃a.”
Pita pisawal sape Yesu pe Navisaarena lelaga
Matiu 16:13-20; Luk 9:18-21
27P̃isi na Yesu amio kiena nalogena la asape avato e narin pulkumali lala nap̃a lavisin kumali keviu nap̃a Sisaria Pilip̃ae, a e pogos nap̃a la amiyal ke apato e yo nene, naga piun tan la pisape “?Amiu amloge ke yar la apisa ke asape in na ai?”
28 #
Mak 6:14,15; Luk 9:7,8 La apisatam̃ea apisape “Lap̃asia apisa ke asape ko na Yoane Nakeena sina ga, lap̃asia asape ko na Elaisa, p̃asia asape ko na navisawalena tai nap̃a na konua rui.”
29 #
Yoan 6:68,69 Ana naga piun si tan la, pisape “?A sanapen amiu, amiu na apisa ke asape in na ai?”
Ana Pita pisatam̃ea, pisawalia pisape “Ko na ope kiamimi Navisaarena kemua lelaga.”
30Ana Yesu pisa mesmesun ga pan la, pisape “Pogaga, ana amiu ve ava avisawal lelein re sur nene van yeririna lala.”
Yesu pisawal kiena marena
Matiu 16:21-28; Luk 9:22-27
31Ana e pogos nene, Yesu siar nap̃a mlologon ke pan kiena nalogena lala, pisape Narin Yeririna, monar akila sur la ve moki nap̃a naga loge viowagania, ana nasumonena kiena le Israel lala, amio yar keviu kiena yar wa lala, amio navianena navisaluaena, p̃isi na la akovenlua naga. Ana Yesu pisa m̃ena ga sape la awem̃ar naga mare, ana e kiena legiena na telu, sum̃alu sina, taulu marena. 32Visena la nene, Yesu pisa meraravan po pan la, ana pogos nap̃a Pita mloge, naga piolua Yesu, pis m̃arera pania, sape visawoia, yoko monar ve ve sa re nene.
33Ana veraga ga Yesu pilon m̃asina pimi pu Pita, kira pa pun kiena nalogena tap̃ena la nap̃a asike ne, pisalup̃ar m̃arera pa Pita, pisape “!Yermare, oure vetan inu! Kiom̃a sitomena nene naga pe sitomena kien yeririna ga, pe pe sitomen kiena re Ntewa poli.”
Nalogena kiena ne Yesu naga monar sitom korenan nasinenanena kiena
34 #
Mat 10:38; Luk 14:27 Ana Yesu pio p̃ina lala amio kiena nalogena lala, sape aim puna, pisa pan la, pisape “Yar nap̃a sinenan sape taveve inu, monar sitom korenan nasinenanena kiena, monar kus kiena laki torovia, siraun inu. 35#Mat 10:39; Luk 17:33; Yoan 12:25Yar nap̃a sape taulu kiena malena, yoko kilaluia. A yar nap̃a kilalu kiena malena vanon inu pona vanon kiau lologena wo, naga yoko tauluia. 36Visae yar tai war make sur na yomarava la punu ga ne, p̃isi na kuspal mrapa na malena, naga pe taulu re sur wo tai poli. 37Ana kiena sur nowo la nap̃a naga p̃aria, tap̃atete ulmaran si kiena malena. 38Yeririna moki nap̃a lus na nanagane, la atap̃a mlamulena viowa, la pe ape lelaga re pan Ntewa poli, la apiowa manene la, a la amawan ke yar tap̃ena la vanon inu a vanon m̃ena kiau visena. Ana siraunia, Narin Yeririna naga yoko wasup̃e sina ga, amio kiena navisi wa lala, amio naurarena kiena arimana, ana pogos nap̃a avim, visae yar nap̃a yepena mavin ke naga nanagane, naga m̃ena yoko yepena mavin yar nene.”
Zvasarudzwa nguva ino
Mak 8: lww
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2016, Wycliffe Bible Translators, Inc. All rights reserved.