Matyu 5
5
Yesu Tyiet tazwa tangka̱i Á̱niet nang A̱gwaza Tyei mba A̱li̱ba̱rka a̱ni
1Á̱ghyang á̱tuk, nang Yesu ndi á̱kpa á̱niet ma̱ a̱di̱di̱t ntung a̱ni, a̱ si̱ nyeak tazwa ntsok, a̱ si̱ swan a̱ja. Mman ta̱m nggu na si̱ bai, á̱ ba̱ swan á̱ tyong gu á̱ keang. 2A̱wot a̱ si̱ nwuo tyiet baa nyia̱,
3“A̱gwaza tyei a̱li̱ba̱rka da̱ á̱niet,
ba̱ li lat mba hu da̱ a̱vwuo nggu a̱ni#5:3 Lyuut cha̱chaat: “Ba̱ li lat mba hu mi̱ tswa ji a̱ni.”.
Mat ba̱ yet mman Tyok Ma A̱gwaza tswazwa nia.
4A̱gwaza tyei a̱li̱ba̱rka da̱ á̱niet,
ba̱ shya̱ ma̱ng byian fwuo
mat a̱ka̱tuk nyia̱ mba wu a̱ni.
Mat á̱ na shyim mba nfwuo na.
5A̱gwaza tyei a̱li̱ba̱rka da̱ á̱niet
ba̱ ghyuai á̱pyia̱ mba a̱ni.
Mat ba̱ na ya gado a̱byin hu.#5:5 Za̱b 37:11.
6A̱gwaza tyei a̱li̱ba̱rka da̱ á̱niet
ba̱ fwuong zong ma̱ng mashyi a̱ni,
mat ba̱ nyia̱ tsotswat
nang A̱gwaza nchat a̱ni.
Mat A̱gwaza na tyia̱ mba
ba̱ shya̱ nkyang nang ba̱ chat a̱ni, ba̱ swa̱i.
7A̱gwaza tyei a̱li̱ba̱rka da̱ á̱niet
ba̱ fwuong kunak á̱ghyang á̱niet a̱ni.
Mat mba meang, á̱ na fa̱k kunak ba.
8A̱gwaza tyei a̱li̱ba̱rka da̱ á̱niet,
ba̱ byia̱ a̱za̱za̱rak nfwuo a̱ni.
Mat ba̱ na li A̱gwaza.
9A̱gwaza tyei a̱li̱ba̱rka da̱ á̱niet,
ba̱ tyei swat nyinyang a̱ni.
Mat á̱ na yei mba mman A̱gwaza.
10A̱gwaza tyei a̱li̱ba̱rka da̱ á̱niet nang
á̱ ya̱shuk mat yet tsotswat mba hu a̱ni.
Mat ba̱ yet mman Tyok Ma A̱gwaza tswazwa nia.
11“A̱gwaza tyei nyin a̱li̱ba̱rka ka̱nang á̱niet lyiat nyin lihyat, ba̱ si̱ bu ya̱shuk nyin, a̱wot ba̱ si̱ bwoi a̱ka̱laa á̱ tyei nyin, ba̱ si̱ bu tyam nyin ma̱ng kuzang tangka̱i a̱ka̱tuk a̱lyiat, mat nang nyi ngyet á̱niet khwi nung bya a̱ni.
12“Nyi fa̱k a̱lyia̱ a̱sai di̱ si̱ a̱hwa! Nyi gwai ba̱t! Mat nyi shya̱ ma̱ng a̱gba̱ndang zang a̱ fwuong nyin Ma A̱gwaza tswazwa a̱ni. A̱wot nyi jhyung nang ma a̱nia wa á̱ ku nya̱shuk a̱yaata̱m a̱kwonu A̱gwaza ba gbangbang.
Yesu Tyan Á̱niet Khwi ma̱ng Nfak ma̱ng Sai
13“Nyin bya yet nfak na mi̱ swanta hu. A̱wot ki̱ nfak na tyak ta̱m nna hu#5:13 Wa̱i a̱lyiat: ki̱ nfak na tyak ta̱m nna hu. “Nfak” tyei kyayak nyinyang, a̱wot na̱ si̱ bu vwuong nam ku bwui. Ma a̱nia wa, ku myim á̱niet khwi ba ba̱ swan a̱za̱za̱rak nswat ku ka beang á̱niet nwai khwi ba ba̱ khwi Yesu, á̱niet khwi ba ba̱ bu fwun a̱ka̱tuk nyia̱., zang ta̱m hwa na̱ bu na nyia̱? Á̱ na weam nfak na, a̱wot á̱ shai na ma̱ng a̱ti̱tak nang a̱buk kyang a̱ni.
14“Nyin bya yet sai hu mi̱ swanta hu. Ma̱nang a̱keang ka̱ shya̱ tazwa a̱fan a̱ni, á̱ si̱ mi̱n niat sai nka hu bah. 15Ma a̱nia wa, á̱ mbyia̱ a̱tyu a̱ na tyia̱ long fi̱tila a̱ sii kyiak kham a̱ nkup hu a̱ni bah. Da̱ a̱kwonu a̱kya, á̱ ni̱ sak hu da̱ a̱tyii wa, ku ka sai konyan mali ka.
16“Ma a̱nia wa, nyi yok sai a̱tsotswat swat nyin hu ku ghwut kpa̱sai konyan a̱ lii, da̱nian konyan a̱ ka dyep A̱tyia̱ nyin wu a̱ shya̱ tswazwa ka a̱ni.
Yesu Bai a̱ Ngaan Tyiet nang Doka ji Fa a̱ni
17“Nyi yok dam nyia̱ n bai n dyang doka Musa ji, ku kyang nang a̱yaata̱m a̱kwonu A̱gwaza ba lyuut wa a̱ni bah. Kaai, n bai n ngaan tyiet nang ba̱ fa wa a̱ni. 18N shei nyin a̱tsak a̱lyiat; tswazwa ma̱ng a̱byin na tyak, a̱wot ku a̱bada̱dei ndang zwunzwuo a̱nyiung nang á̱ ta̱zut di̱ lyuut doka A̱gwaza ji a̱ni na ta̱yuut bah; si̱ nang kuzang kyang bai cha̱chaat da̱ a̱nu ka!
19“Mat a̱nia, ka̱ nyi lak khwi ku a̱bada̱dei doka a̱nyiung mi̱ doka Musa ji, nyi si̱ bu tyiet á̱ghyang á̱niet ba̱ lak khwi nji hu a̱ni, á̱ na kyiak nyin a̱batsatsak a̱chyuang á̱niet nia mi̱ Tyok Ma A̱gwaza tswazwa hu. A̱wot a̱mgba̱m nyin nyi khwi doká jini, nyi si̱ tyiet ji a̱ni, nyin bya á̱ na kyiak nyin nang a̱cha̱chet á̱niet a̱ni mi̱ Tyok Ma A̱gwaza tswazwa hu.
20“A̱wot n tak nyin; ka̱ tsotswat nyin hu swak si̱ A̱fa̱risawa hu ma̱ng á̱niet tyiet doká ba bah, a̱tsak a̱lyiat; nyi si̱ mi̱n mak nwuo Tyok Ma A̱gwaza tswazwa hu bah.
Yesu Tyiet tazwa Mwai Lyen
(Luk 12:57-59)
21“Nyi wa ka̱n fa̱k á̱ tak a̱yaatyia̱ a̱khwop nzi̱t ba gbangbang nyia̱, ‘Nyi yok hyat a̱yin bah. Konyan wa hyat a̱yin a̱ni, á̱ na nyia̱ gu shi̱ri̱ya.’#5:21 Ghw 20:13; KDok 5:17; 16:18. 22A̱wot n bu mbeang shei nyin hu. Ku nang a̱yin mwai lyen#5:22 Lyuut ghyang mbyia̱: “Mwai lyen di̱ mi̱n jat.” ma̱ng a̱ghyang nggu, á̱ na nyia̱ gu shi̱ri̱ya. A̱wot konyan wa yorong a̱yin ‘A̱pa̱mpang a̱yin,’ á̱ na tyia̱ gu mbwak a̱cha̱chet á̱niet shi̱ri̱ya! A̱wot konyan wa shyi a̱yin, nyia̱, ‘A yet a̱bwuon!’, a̱ shya̱ kpa̱mkpaan mi̱ swuo a̱bung ma̱ a̱nga̱ngak ndong sang sangba̱p.
23“Mat a̱nia, ka̱ a naat neap za̱nang ang ji da̱ a̱tyii A̱gwaza wu Mali Nwuat Za̱nang ka, a̱ja a si̱ jhyung nang a̱na̱nyiuk ang mba̱ng ang mi̱ fwuo,#5:23 Mat 5:24. 24ghwon za̱nang ang ji a̱ja. Mi̱ di̱ yong a̱hwa, bwuok a ba̱ shya̱ a̱na̱nyiuk ang wu, nyi jhyi swat nyin hu, a sii bwuok a neap za̱nang ang ji.
25“Ma a̱nia wa, ka̱ a̱tyu lak li ang wu naat ma̱ng a̱nwan mi̱ tutu shi̱ri̱ya, nyia̱ a ba̱ng ta nggu, a kwan a̱nggang nyi jhyi ma̱ng á̱ghyang nyin neet nang nyi ni̱ shya̱ di̱n vak. Kalak a̱tyu lak li ang wu a̱ si̱ tyia̱ ang mbwak a̱li̱kali, a̱li̱kali meang a̱ tyia̱ ang mbwak a̱gba̱ndang a̱tyu chok a̱khwo wu, a̱wot a̱ nyim ang mi̱ jaru. 26A̱wot ka̱ ku li a̱nia, a na shot a̱ja bah, si̱ nang a tan a̱mgba̱m kurum nang á̱ sak ang ndyo a̱ni mut!
Yesu Tyiet tazwa Katnaan
27“Nyi ka̱n fa̱k doka ji nyia̱, ‘Ku yet ta hwa nyi yok katnaan.’#5:27 Ghw 20:14; KDok 5:18. 28A̱wot n bu mbeang shei nyin hu. Ku nang a̱yin wa nwuan a̱byii̱k a̱ si̱ fa̱k di̱dang kwai ngguu, a̱ wa ka̱n tyak katnaan ma̱ng a̱nggu mi̱ fwuo. 29Mat a̱nia, ku nang a̱tan tswa a̱li a̱zayak ang wa na tyia̱ a fa̱k di̱dang nyia̱ a̱ka̱tuk, ti̱n ji ji̱i̱p. Ku na lan a lyin kap nyiung mi̱ vam ang hu, nang á̱ na nta a̱jhyem vam wu ma̱ a̱nga̱ngak ndong sang sangba̱p a̱ni. 30Ma a̱nia wa, ku nang a̱tan bwak yak ang wa na tyia̱ ang a nyia̱ a̱ka̱tuk, tyat hu ji̱i̱p! Ku na lan a lyin kap nyiung mi̱ vam ang hu nang á̱ na ntyia̱ a̱jhyem vam ang wu ma̱ a̱nga̱ngak ndong sang sangba̱p a̱ni.
Yesu Tyiet tazwa Tyat Nyeang
31“A̱wot nyi ka̱n fa̱k doka ji tyiet nyia̱, ‘Konyan wa chat tyat nyeang ma̱ng a̱kyuo nggu a̱ni, ku yet ta hwa a̱ lyuut ta̱ka̱da tyat nyeang, a̱ nwuak guu.’#5:31 KDok 24:1-4. 32A̱wot n bu mbeang shei nyin hu. Ka̱ a̱yin tyat nyeang ma̱ng a̱kyuo gu, da̱nang gu ta̱bat gu di̱ katnaan hwa bah, a̱ tyia̱ a̱byii̱k a̱wa katnaan hwa, ka̱ a̱ nyeang a̱tyok a̱ghyang. A̱wot konyan wa bwuo a̱byii̱k nang a̱tyok tyat nyeang ma̱ng a̱nggu a̱ni, nggu meang, a̱ katnaan hwa.
Yesu Tyiet tazwa Shyishyi
33“Ma̱ a̱nia wa, nyi ka̱n fa̱k doka ji nang á̱ tyiet a̱yaatyia̱ nzi̱t ba gbangbang a̱ni nyia̱, ‘Ku yet ta hwa, nyi yok tyat shyishyi nyin ji bah. A̱wot ku yet ta hwa, nyi yong di̱ shyishyi ji nang nyi nyia̱ ma̱ng A̱gwaza a̱ni.’#5:33 Fang 30:2. 34A̱wot n bu mbeang shei nyin hu. Nyi yok mak shyi bah! Nyi yok nyia̱, ‘N shyi da̱ a̱lyoot Ma A̱gwaza tswazwa!’ Mat Ma A̱gwaza tswazwa ka yet a̱gba̱ndang chuk Tyok A̱gwaza ja. 35A̱wot nyi yok nyia̱, ‘N shyi da̱ a̱lyoot a̱byin!’ Mat a̱byin ka yet a̱vwuo saai a̱ti̱tak A̱gwaza kya. Nyi yok nyia̱, ‘N shyi da̱ a̱lyoot Urusha̱lima!’ Mat Urusha̱lima hu yet a̱keang a̱gba̱ndang A̱gwam kya. 36Yok shyi ku da̱ a̱lyoot a̱pyia̱ ang bah, mat a si̱ mi̱n bwuak a̱tyin pyia̱ a̱nyiung ang, ka̱ tyia̱ a̱sai ku a̱dyundyung bah. 37Da̱ a̱kwonu a̱kya, nyi yok a̱lyiat nyin na na̱ yet a̱fang. Ka̱ nyi shim na nyia̱ kyang, nyi tyia̱ ‘Ii.’ Ka̱ nyi shim bah, nyi tyia̱ ‘Kaai.’ A̱wot ka̱ nyi shyi shyishyi ji̱ swak a̱nia a̱ni, ji̱ neet da̱ a̱vwuo A̱ta̱nyeang kya.
Yesu Tyiet tazwa Tan A̱ka̱tuk ma̱ng A̱ka̱tuk#5:37 Wa̱i a̱lyiat: Tan A̱ka̱tuk ma̱ng A̱ka̱tuk. Yesu tyiet a̱ji nyia̱, á̱niet khwi nggu ba ba̱ yok tan a̱ka̱tuk ma̱ng a̱ka̱tuk bah. A̱tyu a̱ nwuak fwuo di̱ Yesu a̱ni, gu yok chat a̱ bwuo a̱tyu a̱wa a̱ka̱tuk kun bah.
(Luk 6:29-30)
38“Nyi ka̱n fa̱k á̱ tyiet nyin mi̱ doka ji nyia̱, ‘Ku yet ta hwa, ka̱ a̱yin ti̱n ang tswa a̱li jhyung, ma a̱nia wa á̱ na nti̱n si̱ nggu jhyung. Ka̱ a̱ ma nti̱n ang a̱nyung a̱nyiung kya, ma a̱nia wa á̱ na nti̱n a̱si̱ nggu a̱nyiung.’ 39A̱wot n bu mbeang shei nyin hu. Nyi yok nyia̱ na̱nvan nyi tan a̱ka̱tuk ma̱ng a̱ka̱tuk da̱ a̱tyu a̱ nyia̱ nyin a̱ka̱tuk a̱ni bah! Ka̱ a̱yin lwi ang di̱ lihyat#5:39 Wa̱i a̱lyiat: lwi ang di̱ lihyat. Lwi huni mi̱ taada A̱yahudawa ji, tak nang a̱yin ni̱ ndwi a̱ghyang á̱niet ma̱ng a̱ma̱nta a̱tai mbwak yak di̱ kpang bwak yak a̱tyo a̱hwa. Tangka̱i lwi huni tyei a̱gba̱ndang nsum mami á̱niet. Ma a̱nia wa di̱n Tyap, ka̱ a̱yin tuk ang a̱zakpeang ku tak nang gu nyia̱ ang lihyat hwa mami á̱niet. di̱ kpang bwak yak ang hu, a bu bwuak kpang bwak myian hu, gu lwii.
40“Ma a̱nia wa, ka̱ á̱ nat ma̱ng a̱nwan da̱ a̱vwuo shi̱ri̱ya, a̱wot á̱ si̱si̱ tyia̱ ang a̱tan, nyia̱ a nwuak a̱toot mami ang wu, a mun nwuak a̱ta̱swak ang wu mbeang.
41“Ma a̱nia wa, ka̱ a̱tyu nzwang tyia̱ ang, a kyiak kpa̱t di̱n khwo, nyi chong met a̱nyiung, shim a kyiak kpa̱t hu a faat, nyi chong met a̱feang#5:41 Wa̱i a̱lyiat: Met a̱feang. A̱tyu nzwang A̱romawa byia̱ a̱wat a̱ tyia̱ a̱tyu A̱yahudawa a̱ kyiak kpa̱t a̱ faat ba̱ chong met a̱nyiung..
42“Ma a̱nia wa, ka̱ a̱tyu swuo a̱bung naai kyang ma̱ng a̱nwan, a nang gu. Ka̱ a̱ ma nchat khwap ja, a yok lak bah.
Yesu Tyiet tazwa Chat Á̱niet ba̱ Lak Li nzi̱t a̱ni
(Luk 6:27-28,32-36)
43“Nyi ka̱n fa̱k á̱ tyiet nyin mi̱ doka ji nyia̱, ‘Chat a̱kpa̱ndang swat ang wu,’#5:43 Li̱v 19:18. a̱wot á̱ nyia̱, ‘A lak li a̱tyu a̱ lak li ang a̱ni.’#5:43 Wa̱i a̱lyiat: A lak li a̱tyu a̱ lak li ang a̱ni. A̱cha̱chet A̱yahudawa á̱ghyang ba̱ ku tyiet nyia̱ a̱tyu a̱ yet a̱kpa̱ndang swat ang wu a̱ni, nggu wa yet a̱tyu A̱yahudawa nang a ghwut mi̱ kwai jhyung ma̱ng a̱nggu a̱ni. 44A̱wot n bu mbeang shei nyin hu. Nyi chat á̱niet ba̱ lak li nyin a̱ni! Nyi bu naai A̱gwaza da̱nian á̱niet ba̱ ya̱shuk nyin a̱ni!
45“Ka̱ nyi chat á̱niet lak li nyin ba, ma a̱nia wa nyi na nnyia̱ ma̱nang á̱tsatsak mman A̱tyia̱ nyin wu a̱ shya̱ tswazwa ka a̱ni. Mat nggu wa ni̱ tyia̱ mam hu ku sai tazwa á̱ka̱tuk ma̱ng a̱tan á̱niet ba. Nggu wa bu ni̱ ta̱m ma̱ng za ji, ji̱ va da̱ a̱vwuo á̱tsotswat á̱niet ma̱ng á̱si̱ nwai yet á̱tsotswat. 46Ka̱ nyi chat ma̱ á̱niet ba ba̱ chat nyin wa a̱ni ma̱nyin ba, yihwa yet zang nyin ji? Mee á̱niet saai kurum ga̱ndu bya nang á̱ kyiak ba̱ yet á̱ka̱tuk á̱niet a̱ni, mun á̱ nyia̱ a̱nia a?
47“A̱wot ka̱ nyi byat á̱kpa̱ndang nyin bya ma̱nyin ba, yihwa nang nyi nyia̱ ku vwuon ma̱ng á̱kum á̱niet ka? Mee nnwap na̱ chyi A̱gwaza a̱ni, mun á̱ nyia̱ a̱nia a? 48Mat a̱nia, ku yet ta hwa nyi yet á̱tsatsak á̱niet, ma̱nang A̱tyia̱ nyin wu a̱ shya̱ tswazwa ka ngyet a̱tsatsak a̱ni.”
Zvasarudzwa nguva ino
Matyu 5: TyapNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2015, The Nigeria Bible Translation Trust and Wycliffe Bible Translators, Inc. All rights reserved.