Joyn 4
4
Yesò ə gaʼa wenə wùwì Sàmalìyà
1Viʼi Falàsi ə nzhʉ li la Yesò sə kiʼi ndzɨ̀mtə̀sə, ku mu a vəwenə, sə ghoʼo chò sə Joyn sə. 2Və ngaʼa alì, ko a laynsə ku tebè Yesò ku mu a mì. A ə ku ndzɨ̀mtə̀sə bàm ə wen. 3Yesò ə zhʉ̀ li kənyʉ̀ na kèn a və ə ngaʼa kumə wen li ghə̀ ə lù fa Jùdiyà ə bwenə dyʉ̀ a Galìlì, 4ghə̀ ndiʼ ə chò fa ji a Sàmalìyà.
5A sə ndiʼ to ando ghə̀ chò fa Sàmalìyà, ə zàʼa a ntə̀ʼ ə tsen a və toŋtə la Sikà, ghə̀ mboʼsə a ben kəshi kə nse ki a Jàkob ə ku li a wàyn wen ə Josèf, 6ə bwaʼ, ə shiʼi nyʉ̀ʼmə a ben kwoŋ yì a Jàkob ə tyùŋə və sə chʉ mu fa tsu. A ndiʼ a kəlyɨŋ kə zhʉ na ghèn, mu chwìchwì bayn li nto.
7Wùwì Sàmalìyà ə tsen ə vi ə chʉ mu, Yesò ə loyn mu fa wen ə gàʼ la, “Ku mo nə̀ mu mà nyʉ.” 8A ndiʼ alì mu ndzɨ̀mtə̀sə bàm ə wen sə kwen li dyʉ̀ a tyi ntə̀ʼ ə zen fozhɨvə.
9Wùwì ayi ə gàʼ a Yesò la, “Wù diʼ wù ə Jus, ma diʼ wù ə Sàmalìyà? Wu jèʼ ale ə sə loynə mu fa mò a?” A ndiʼ ali, viʼi Jus wenə viʼi Sàmalìyà ə ko zhɨmə.
10Ando ghə̀ bèmə alì, Yesò ə mu gàʼ a wen la, “Wu to kɨ fo vyi a Nyìngòŋ ə ku a viʼi be kɨ wìʼ yi a ghə̀ loynə mu mèyn fa wù, mu wù loyn li mu, a kodiʼ mu mə fwàyn, ghə̀ ku a wù.”
11Wùwì a ghèn ə mù bèm a wen la, “Wu lə lyɨ mu na mèyn fa fe ku a mò a Tikəbəŋ, ko andiʼ la wù kiʼi kəfo ə chʉ tsu, nkwòŋ a ghèn be shwemə a? 12A wù le kwòʼtə la wù chò tìʼ ə tìʼ yès ə Jàkob yi a ghə̀ ntyùŋə nkwòŋ a mu a ghèn a yès, a diʼ tò fa nkwòŋ a ghèn a wenə vunə wen nə̀ nyamsə wen sə ə nyʉ mu fa tsu a?”
13Yesò ə bwensə gàʼ la, “no ndò a ghə̀ nyʉ mu a mèyn mu ətoŋ mu be na zɨmtə wen to zɨmtə. 14Alì, mu à nyʉ̀ no ndò nyʉ mu mì a ma ku, mu ətoŋ mu ko lu be zɨmə wen. Wìʼ ə sətsen nyʉ mu na mèyn, ma dyʉ̀ kaʼkə ndiʼ a wen a wèn to nə̀ fədyàn fə, ə ne wen la ghə̀ kiʼi ntsìnə̀ yì a ghə̀ ko lu mè.”
15Wùwì ə Sàmalìyà a ghèn gaʼa a Yesò la, “ku mu na mì ma nyʉ, kə ətoŋ mu be lu zɨmə mo, kò andiʼ la ma lə be ə vi chʉ mu”.
16Yesò ə be gàʼ a wen la, “Dyʉ̀ dzàŋ lɨmə wù, ghə̀ŋ vi ə yèn mò.”
17Wùwì ghèn ə gàʼ la ghə̀ ko kiʼi tebè lɨm.
Yesò ə mu gàʼ a wen la, “wù gàʼ to no nəmwèʼè la wù ko kiʼi tebè lɨm. 18Wù diʼ alə̀, mu wù lam li və lɨm vətàyn, be fʉ no və tsèm. Nò wìʼ yì a wù tsi a wen a ngə̀ŋ luwen ə ko diʼ lɨmə wù. Kə diʼi la wù gàʼa tò no nəmwèʼè.”
19Wùwì ghèn gàʼ a wen la, “Ma yen li a Tikəbəŋ la wù diʼi nshə̀ʼtə̀ ə ghoʼo. 20Vətiʼi vyesə ə kuʼsə Nyìngòŋ a pfen a shèn, ali ghə̀ŋ viʼi Jus sə ghʉ̀ luwen la və diʼi ə nkuʼsə Nyìngòŋ a Jelusalèm.”
21Yesò ə gàʼ a wen la, “Ma gaʼa a wù no nəmwèʼè la, byɨmə mo, əzhʉ ne vi a və ko be ne nkuʼsə Nyìngòŋ a pfèn a shèn, ko kuʼsə tebè a Jelusalèm. 22Ghə̀ŋ viʼi Sàmalìyà ko kɨ tèbe wìʼ yì a ghə̀ŋ kùʼsə̀, alì yès viʼi Jus əkɨ li wìʼ yì a yès ə kuʼsə, byìʼì ando ə bwòŋ ə nvì ə chò fa viʼi Jus. 23Əzhʉ ə kuʼ vi, alì mu ghə̀ sə diʼ mu ghə̀ kuʼ li no kwʉ̀ʼ a viʼi a və kuʼsə Nyìngòŋ nəmwèʼè, diʼ kuʼsə əwen a kəzhwì bènə̀ a nəmwèʼè. A diʼ nki viʼi a venə a Nyìngòŋ ə kəŋ la və ə kuʼsə wen. 24Nyìngòŋ ə diʼ Kəzhwì, viʼi vyi a və kuʼsə wen ə diʼ ə kuʼsə tò no nəmwèʼè to a kədyòʼ kì a kəzhwì kə wen kə ku.”
25Wùwì a ghèn mu gàʼ a wen la, “Ma kɨli la wìʼ yì a və tsuʼ li, a və toŋtə wen nə̀ Klistò, ne vì, ə shə̀ʼtə̀ laynsə no nyʉ̀ ə tsèm a yès.”
26Yesò ə mu shə̀ʼtə mwètə̀ a wen la, “A diʼ mò na yì a və ntsuʼ li ə ghʉ li a ma gàʼà a wù lə̀.”
27To ando Yesò ə ngàʼà, ndzɨ̀mtə̀sə bàm ə wensə bwensə vi ə yen tò ando ghə̀ gaʼa wenə wùwì ghèn, ə sə diʼ nə̀ əkaynə, alì no wìʼ ə mùʼ fa vəwenə a ntìntìn nko bèm a wùwì ayi la, ghə̀ kəŋ gho lo, ko və lu bèm a Yesò la, byìʼì ghoʼ a wù gaʼa a ve wùwì ghèn lo.
28Wùwì ayi ə lù mòʼtə̀ ntòyn a mu ə wen tsu ə bwenə kwen dyʉ̀ a ntə̀ʼ ə gàʼ a viʼi la, 29“Ghə̀ŋ vi yèn wìʼ a ghə̀ shə̀ʼtə no nyʉ̀ ə tsèm a ma ə ne li a. Wù gaʼa a ko diʼ wen wìʼ yì a və Ntsuʼ li, li a?” 30Viʼi zhʉ̀ ali mu ə fʉ̀ dyʉ̀ ə yenə Yesò.
31A ndiʼ a zhʉ na ghèn, ndzɨ̀mtə̀sə bàm ə Yesò sə sensə wen gàʼ la, “Ndìʼsə̀, zhɨ li kəfo lò.”
32Yesò ə gàʼ a vəwenə la, “Mà kiʼi kəfo kəzhɨkə, a ghə̀ŋ ko kɨ kənyʉ̀ byìʼì kəwenkə.”
33Ndzɨ̀mtə̀sə bàm ə wensə sə kayntə to vəwenə ntìntìn bèm la, “A lə diʼ la wìʼ ə yì vì nə̀ kəfo kəzhɨkə a wen mu?”
34Yesò ə gàʼ vəwenə la, “ə fozhɨvə ə mò ə diʼ tò la ma ə ne shwèʼè yì a Nyìngòŋ a ghə̀ tɨmə mo ə kòŋ, ə ne ə mwètə̀ shwèʼè a ghenə. 35A kò ghə̀ŋ kiʼi ngàyn ə tsen a və mo la, ‘Və we, à chò tò və sàŋ la və kàʼ, və pfi.’ Alì, Ghə̀ŋ boʼtə ashɨ à ghəŋə ə ki ando təsɨm tə sə diʼ mu ə fozhɨvə sə diʼ mu və bi li ə sə diʼ tò mə pfi. 36Luwen wìʼ yi a ghə̀ pfi ə kiʼi əlòʼ ə jùŋ ghə̀. Ghə̀ pfi viʼi və byɨməvə vyi a zizi və kiʼi ə ntsìnə̀ yì a ghə̀ ko lu mè, ndiʼ wù we nə̀ wu pfi ə tsèntə saŋlə. 37Kə diʼi la ngàyn ghèn la, ‘Wìʼ ə we, ghətsen ə pfi’ diʼ to nəmwèʼè. 38Ma tɨm li ghə̀ŋ la Ghə̀ŋ fʉ̀ pfi ə fozhɨvə fa sɨm ko andiʼ la ghə̀ŋ tə shyèʼ. Viʼi kədyàŋ tə ə shyèʼ, ghə̀ŋ sədiʼ ə pfì.”
39Viʼi Sàmalìyà fa loʼ a yi ə mbyɨmə li to kədə̀ŋ byìʼì kənyʉ̀ ki a wùwì yì ə gàʼ a vəwenə li la, “Ghə̀ shə̀ʼtə̀ li no gho a mà ne li.” 40To ando Viʼi Sàmalìyà ə vi li ə yen Yesò, vəwenə sensə wen la ghə̀ faŋ wenə vəwenə. Ghə̀ tsi wenə vəwenə a mətsi ə mbò.
41Viʼi vətsevə be zhʉ̀ əziʼi ə Yesò ə byɨmə, to kədə̀ŋ, 42ə gàʼ a wùwì na yì la, “Yès ə byɨmə li luwen, a ko diʼ to byìʼì kənyʉ̀ kì a wù shə̀ʼtə̀ a yès. Yès ə zhʉ li əziʼi ə wen no fa yès a ngeŋsə nkɨ la à diʼ tò no wen Mbwòŋsə̀ mbyi.”
Yesò ə chʉʼ wàyn ə kətʉ kətsen
43Yesò ə tsì mətsi mbò ə lù dyʉ̀ alòʼ ə Galìlì. 44Andiʼ ali, mu ghə̀ ngaʼa li no fa wen a ngeŋ la, “Və ko təmə lu gumlə nshə̀ʼtə̀ Nyìngòŋ a wen a loʼ.” 45A ə ndiʼ ando ghə̀ dyʉ̀ zàʼa alòʼ ə Galìlì li, viʼi tsu ə shisə wen to akayn byìʼì ando vəwenə ndiʼ mu və ə yen li no nyʉ̀ ə tsèm vi a ghə̀ nè a Jelusalèm a mətsi yi a və ə zhɨ kəzhɨ kə məzaʼsə tsu li.
46Yesò ə be bwenə dyʉ̀ a ntə̀ʼ Kanà, alòʼ ə Galìlì, akəshi yi a ghə̀ nkaʼsə mu a məlyʉ̀ʼ tsu li ə dyʉ̀ yen wù to ə tsen tsu, a ghə̀ shyèʼ a fòyn. Ghə̀ nkiʼi wàyn wen a ghə̀ nkwaʼa no nànto a ntə̀ʼ Kàbanùm. 47Wù ə shwèʼè na ghèn ə vi ali ando ghə̀ zhʉ la Yesò vi li a Galìlì mu ghə̀ lù fa Jùdiyà ə sə sensə Yesò la ghə̀ vì chʉʼ wàyn wùlɨm ə wen a ghə̀ kwaʼa diʼi la ghə̀ pfʉ. 48Yesò ə gàʼ a wen la, “wìʼ fa ghə̀ŋ zizi ko ghə̀ lu byɨmə no fa mphen, a bwen la ghə̀ yen nchwi nyʉ̀ ə kaynəvə a mà nè.”
49Wù ə shwèʼè ayì be gàʼ la, “Tikəbəŋ, zaŋsə vi yowù dyʉ̀, bwen ali wàyn ghom a pfʉ.”
50Yesò ə mu gàʼ a wen la, “Ə ndyʉ̀. Wàyn wù ə tò li.”
Wìʼ ayi ə zhʉ̀ to ali ə lù. 51To ando ghə̀ bwenə sə dyʉ̀ ə bùmtə viʼi shyèʼ ə wen vəwenə gàʼ a wen la, “Wàyn wù to li.” 52Ghə̀ bèm a vəwenə la, kwaʼa na ghenə ə yi bwaʼmə a zhʉ ko? Vəwenə gàʼ la, “ghə̀ tə bwaʼmə zòyn nə̀nchwì.” 53Tìʼ wàyn a ghèn ə kɨ la kətaʼ na kì kə tə bwaʼmə to zhʉ̀ yi a Yesò tə gàʼ a wen li la, “Wàyn wù ə tò li” no zhʉ̀ko wenə ngwaʼ ə ngə̀ŋ ə wen ə byɨmə to vətsèm.
54Nakènkə ndiʼ kənkùmtə̀ kə kənyʉ̀ kə kaynəkə kì a Yesò ə nè a Galìlì ando ghə̀ bwenə vi fa Jùdiyà.
Zvasarudzwa nguva ino
Joyn 4: bbkDBLnt
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda