Эвел 20
20
Ибрагьимна Сара Авимелехдихь
1Ибрагьим учв айи йишвариан, кьибла терефнаъ айи Негев кӀуру ичӀи чюлин багарихьна, удучӀвну гъягъюру ва Кадешна Сур йишварин арайиъ яшамиш хьуз хъюгъру. Ибрагьимди гъурабади Герариъ бина ккебгъру, 2ва дугъу душваъ чан хпир Сара чан чи вуйиз кӀуру. Гьаддиз Герарин паччагь Авимелехди Сара чан хпаригъна хуз гъитру. 3Амма йишвну нивкӀукди Авимелехдиз Заанур ачмиш шулу ва Заанури дугъаз кӀуру:
– Уву увуз швувахь хьайи дишагьли гъадагъувал себеб вуди йикӀидиву.
4Сарайик сабан Авимелех гьич куркӀнукьан адайи.
– Йиз Аьхюр! – ккарагуз хъюгъру Авимелех. – Тахсир кадру халкь тӀанкь апӀуз ккайва? 5Гьадму адмийи чав гъапунзуз, аьхир, думу йиз чи вуйиз кӀури. Думу дишагьлийира гьаци гъапнийи. Узу му ляхин кӀваъ фукӀа адарди гъапӀуб вуйиз, йиз хилар марцциди вуйиз.
6– Ав, – жаваб туву Заанури нивкӀуъ, – уву думу ляхин яв юкӀв марцциди гъапӀуб вуйиб Узуз аьгъязуз. Узу уву Узуз къаршу гуннагь апӀбахьан гъюрхюнзаву, гьаддиз думу дишагьлийик кучӀуз гъитундарзавухьди. 7Хъа гьамус думу чан жилирихьна кьяляхъ гьаъ. Ибрагьим пайгъамбар кас ву, думу, уву сагъди гъузбан бадали, увхъанди ккарагиди. Аьгъю йибхьки, эгер думу чан жилирихьна уву кьяляхъ гьадраиш, увура яв вари архара йихидичва!
8Гьиринган Авимелехди чан гъуллугъчйир уч дапӀну му гафар дурариз ктитуру. Дурариз гизаф гучӀ гъабхьнийи. 9Авимелехди Ибрагьимдиз чахьна дих дапӀну, дугъаз, тягьна йивури, кӀуру:
– Уву учкан гьапӀрава? Узу увуз фтин гиран ктапӀну гьамциб чӀуру гунгьихъна узуна йиз вари паччагьлугъ хъапӀуз? Мици апӀруб дар аьхир! 10Уву гьаз мици гъапӀунва?
11Ибрагьимди жаваб туву:
– Му йишвариъ айидариз Заанурихьан гучӀдар кӀури фикир гъапӀунза ва, йиз хпир бадали, узу йивну йикӀуру кӀури, гучӀ гъабхьунзуз. 12Тмуну терефнаан кӀури гъабшиш, дугъриданра думу йиз чи вуйиз – жара хпирикан вуйи йиз адашдин риш. Думу шуркан йиз хпир гъахьну. 13Хъа Заанури узуз йиз адашдин хал дипну гъарах гъапиган, узу йиз хпириз гьамци гъапнийза: «Увуз миннат вуйиз, ухьу наана гъушишра, узу яв гъардаш вуйиз, йип».
14Авимелехди Ибрагьимдиз марччар, хюнйир, лукӀар, лукӀ дишагьлийир пешкеш апӀуру ва Сарара кьяляхъ гьаъну, 15кӀуру:
– Йиз вари уьлке яв улихь хьайиз: увуз наан ккундуш, гьадушваъ яшамиш йихь. 16Хъа Сарайиз дугъу кӀуру:
– Узу яв гъардшиз агъзур шекел арс#20:16 ЙицӀисаб килана гьацӀкьан арс. тувраза. Яв багахьлуйирин улихь увуз гъабхьи дерд миди ккебкди ва яв намус марцц апӀиди.
17Ибрагьим Заануриз ккарагуру ва Заанури Авимелех, дугъан хпирна гъараваш дишагьлийир, хъана бицӀидар апӀуз шлуси, сагъ апӀуру. 18Гьаз гъапиш Заанури, Ибрагьимдин хпир Сарайин кӀуллан, Авимелехдин хулаъ гьич сар дишагьлийихьанра бицӀир апӀуз даршлуси дапӀнайи.
Zvasarudzwa nguva ino
Эвел 20: ТабГК
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Институт перевода Библии, 2010, 2013, 2016, 2018, 2023