Лука 19
19
Заккай
1Хъасин Иса, Ерихондиъ учӀвну, шагьриантина гъягъюри гъахьну. 2Душваъ налук гъюдюбхрударин аьхюр вуйи Заккай кӀуру сар девлетлу кас айи. 3Дугъаз Иса рякъюз ва фицир вуш лигуз ккун гъабхьи, амма халкьдигъян рякъюз шуладайи, фицики Заккай жандкин исчӀлир вуйи. 4Хъа улихьинди жаргъну, Иса рякъбан бадали, Заккай инжирин гьаригъ гъючӀвру, гьаз гъапиш Иса гьадушвхьантина душну ккунди айи. 5Исайиз, душвахьна гъафиган, Заккай рякъюру ва кӀуру:
– Заккай! Чикиди гъюдучӀв, фицики гъи Узу яв хулаъ хялижв духьну ккунду.
6Дугъу, дишлади гъюдучӀвну, Иса чан хулаъ шадвалиинди кьабул апӀуру. 7Му гъябкъю халкьдик гъал кабхъру ва, Иса гунагькар касдихь дергну кӀури, наразиди улхури гъахьну. 8Заккайи Агъайиз кӀуруки:
– Агъа! Йиз девлетнан гьацӀ узу касибариз тувдиза ва, эгер узу шлихьан артухъ гъадабгънуш, юкьуб ражари артухъ тувдиза.
9Исайи дугъаз гъапи:
– Гъи му хулазра уьрхювал гъафну, фицики мура Ибрагьимдин насликан ву. 10Инсаниятдин Бай пуч шулайидар агуз ва ккадагъуз дуфнайир ву.
11Гьамдихъ хъпехъурайидариз Исайи сабсана тахалус ктибтуру, фицики, Думу Ерусалимдиз багахь духьнайиган, гизафдари, лап багарихьди Аллагьдин Паччагьлугъ улубкьиди пну, фикир апӀурайи. 12Гьаци вуйиган Исайи кӀуру:
– Заан тухмиан вуйи сар кас, учв паччагьвализ тяйин апӀбан кьяляхъ хътакуз кӀури, ярхла уьлкейиз гъягъюру. 13Рякъюъ учӀвайиз, дугъу чан йицӀур гъуллугъчийиз дих дапӀну, гьардихьна йицӀуб гъизилин манат тувру ва кӀуру: «Узу хътакайиз, му пул ляхник кипай». 14Хъа му юрднан агьалйириз думу ккунир дайи, ва дугъан кьяляхъди учв гъягърушваз адмийир гьаъру: «Дугъу ич паччагьвал дапӀну ккундарчуз» пуз. 15Мидизра дилигди, паччагьди тяйин дапӀну хътакиган, чав пул туву гъуллугъчйириз, шли фу гъазанмиш гъапӀнуш аьгъю апӀбахъди, чахьна дих апӀуру. 16Сарпири дуфну кӀуру:
– Агъа, яв саб гъизилин манатди йицӀуб гъизилин манат гъазанж гъабхну.
17Агъайи дугъаз гъапну:
– Аферин увуз, ужур гъуллугъчи! Уву бицӀи ляхниъ дугъри хьувализ яв хилиз йицӀуб шагьур гъадагъ.
18Кьюрпири дуфну кӀуру:
– Агъа, яв саб гъизилин пули хьуб гъизилин манат гъазанж гъабхну. 19Мугъазра кӀуру:
– Увухьнара идара апӀуз хьуб шагьур тувраза.
20Шубурпири дуфну кӀуру:
– Агъа, магьа яв гъизилин манат: ягълухъигъ гъивну гъюбхюнза. 21Фицики узуз увхьан гучӀ гъабхьнийзуз, гьаз гъапиш уву инсафсуз адми вува: жвуву дидривуб гъадабгърур ва жвуву дурубзуб ккадабцӀрур.
22Паччагьди дугъаз гъапну:
– Узу яв гафариинди яв диван апӀидиза, аьмалдар лукӀ! Увуз узу инсафсуз адми вуйиб, жвуву дидривуб гъадабгърур ва жвуву дурубзуб ккадабцӀрур вуйиб аьгъяди, 23уву йиз пул, узуз гъазанж гъюруганси, гьаз ишлетмиш гъапӀундарва?
24Ва чан улихь дийигънайидариз кӀуру:
– Дугъахь хьайи пул дибисну, йицӀуб гъизилин пул хьайириз тувай.
25Хъа дурари паччагьдиз кӀуру:
– Я агъа, дугъахь йицӀуб гъизилин манат гьацира хьа.
26– КӀуразачвуз, гьарсар айириз хъана тувну хьибди, хъа адрурихьан айибра тадабгъиди. 27Хъа узу чпин паччагь духьну даккни, йиз душмнар гьамина аькъинай ва йиз улихь урччвай.
28Гьамци дупну, рякъ давам апӀури, Иса Ерусалимдиз багахь шулайи. 29Елион дагъдихь, Вифагия ва Вифания гъуларихьна багахь шулайиган, Дугъу Чан кьюр ученик, гьамци дупну, дина гьаъру:
30– Гьатму гъаншариъ айи гъулаз гъарахай, душваъ учӀвиган, мегьел сар каскьан элелеу, дибтӀнайи гъудугъ бихъидичвуз. Думу тудубчну гьамина аьбкъинай. 31Нагагь шликӀа: «Му гьаз тудубчурачва?» пну, гьерхиш, дугъаз гьамци йипай: «Думу Агъайиз бакарди ву».
32Гьаъдар гъушу ва, Исайи гъаписи, дурариз гъудугъ бихъуру. 33Дурари гъудугъ тудубчурайиган, дидин эйсийи дурарихьан гьерхру:
– Гъудугъ гьаз тудубчурачва?
34Дурари жаваб тувру:
– Думу Агъайиз бакарди ву.
35Думу Исайихьна хуру. Даждиин чпин палтар илирчну, хъасин Иса дидʼин илитуру. 36Иса гъягъруган, халкьди рякъюкк чпин палтар ккирчуйи.
37Хъа Думу Елион дагъдин канчӀлихъна гъурукьиган, вари Дугъан ученикари шадвалиан, чпиз гъяркъю вари аьламатарин сагълугънаан, зарб сесниинди Аллагьдин тяриф апӀуз хъюгъру:
38– Агъайин ччвурнахъди гъюрайи
Паччагьдиз ужʼвал ишри!
Завариин мясляаьт, аьршариъ ад ибшри!
39Халкьдин арайигъян бязи фарисйири Исайиз кӀуру:
– Мялим! Яв ученикариз гъадагъа апӀин.
40Хъа Дугъу дурариз жаваб вуди кӀуру:
– КӀуразачвузки, нагагь дурар ккебехъиш, гъванар улхиди.
41Хъа Ерусалимдиз багахь гъашиган, дидиз лигури, Иса гъишу. 42Хъа кӀуру:
– Хуб ужу шлийи, эгер увуз мясляаьт шли хураш, гьамус аьгъю гъабхьнийиш! Амма му яв уларихьан гьамусяаьт гьебкна. 43Увʼин гьацдар йигъар улуркьидики, яв душмнари увлан барйир илтӀикӀиди, кьялаъ тӀапӀди ва варишварихъанди увʼина гьюжум апӀиди. 44Ва яв веледарихъди уву ккидипиди, яв гъван гъвандиин гъибтидар, фицики увухьна Аллагь гъафи йигъ аьгъю гъабхьундарвуз.
45Хъасин Аллагьдин хулаъ учӀвну, Дугъу душваъ шейʼар масу туврайидарна гъадагъурайидар, гьамци кӀури, утӀурккуру:
46– Гирами китабариъ дибикӀна: «Йиз хал ккарагру хал хьибди», хъа учву дидкан тӀарашчйирин мугъара дапӀначва.
47Хъа гьаддихъантина Исайи Аллагьдин хулаъ гьар йигъан аьгъювалар улупури гъахьну. Жугьдарин аьхюну маллйирина, аьлимарина халкьдин улихь хьайидари Думу йикӀуз чара абгури шулу. 48Хъа бихъури гъабхундар, гьаз гъапиш халкь, Дугъхьан гьудудучӀври, Дугъахъ хъпехъури шуйи.
Zvasarudzwa nguva ino
Лука 19: ТабГК
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Институт перевода Библии, 2010, 2013, 2016, 2018, 2023