Dzɔ̌n 3

Yɛso ghèe Nìkòdɛmùs

1Ghùw ù Falàsîi ù lì n lo, ghe fə̀ tɔŋlo enyəa à lǒ Nìkòdɛmùs, mò ù fə̀ lo tsoʼ aŋ kaŋsì è Tə̀dzûu. 2Tûw vʉ m bùghò kòʼ wò Yɛso â tsuʼ wo, dzɛ̀ â wə̄n enyəa, “Wàdè, ghàʼ kwo nû enyəa ghù lo ghùw wəla Zə̀ kə̀ tum wo alebùghò zoʼnlo àghì, tɔŋlo enyəa ghùw yò aledeē sə̀ghàa mə̀là ghù děe ghè mò, mò Zə̀ kə̀ kâ ghu ko a te gāʼ.” 3Yɛso mo e bɛlɛ̀ nù, dzɛ̀ â wə̄n enyəa, “Kùmkùm, Ǹ so Ǹ dzâa wô â ghù enyəa, ghùw yò alekòʼ fɔ̀e ù Kəzə̀ mo ghe kâ wə̄n kôom dzə̀ kuènlò.” 4Nìkòdɛmùs m bvʉ â wə̄n enyəa, “Ghe lo ênzə̂n aledzəā kuêen ghùw lo, mò ù n noō a? To ù ŋ kòom nyə̀ kɔ̀ʼ ndùw ebàm an nʉ̀ghà u zə̂ à, ghe dzəā kpeʼē tsughu wə̄n a?” 5Yɛso m bɛ̀lɛ̀ tsùghù enyəa, “Kùmkùm, Ǹ dzâa wò à ghù enyəa, à gɔ̀ʼɔ̀ ko mo ghe ŋ wə̄n â mùghù ŋ Kə̀zə̀ m fughu, Zuʼ tə̀ Zɔlɔ tia tə lo mo tə wə̄n nyəə̄n sùghò a zəŋo ughùe, ù yò alenyə am fɔ̀e ù Kəzə̀. 6Ghê a tsele sɛ̀ ghèe ghê zə̀ a sɛ̀ dzə̌a tsughûu ŋgwə̄n e ughùe, Zuʼ tə Kəzə̀ tia kuūwn fughuu Zuʼ to. 7E kwo dzughu e lô zuū ghû enyəa Ǹ dzɛ̂ wò â ghù enyəa, ghe kì aledzəā kûeen ghù. 8Kʉ̌ɛɛ kə tsəghàa ndùw an lùʼù kəla kə ləghaa, ghù n zuw dəm kə te ko, kuuwn yò aledzɛ̀ luʼū kəla kə nughù wo a te ŋkāa luʼū kəla kə nduūw a te; à lò sugho ghəa è mɔʼɔ̄ zo â ghùw wəla ghe dzə an Zuʼ tə̀ Zɔlɔ to.” 9Nìkòdɛmùs m bvʉ â wə̄n enyəa, “Ghəa ghən lo alesə̄ ênzə̂n?” 10Yɛso mo e bɛlɛ̀ nù ù n dzɛ̀ â wə̄n enyəa, “Ghù lò wàdè ù ne an Ezə̀lɛ̂, à lò kwò ghù sò məghaan ghəa ghə̀n à? 11Kùmkùm, Ǹ dzâa wò â ghù enyəa, ghàʼ kə̂a wò kô ghəa ghəla ghàʼ kwo, dzàa wò sùghò fəgha kə̀la a lo mo aŋ kòʼ, ghɛ̀ yia tsoō zuūw yô shwaʼ waʼa wo. 12Abugho Ǹ lo aledzàa wô ghù â ghəa a mbī gho, ghù vʉ̀a ghù tàʼkè boo, ghù lò ênzə̂n aleboō a, abugho Ǹ dzɛ̂ wô ghû à ghəa a kəwālā gho a? 13Ghùw ù lì kaām bûʼ kɔ̀ʼ kòʼ sùghò alo kəwālā, à gɔ̀ʼɔ̀ ko wə̄n wəla ù fə̀ sə tsughu wo alo kəwālā; tɔɔŋ Wɛ ù Ghùw.

14 # Taŋ 21:9 Aŋghəa Musî fə̀ ti naŋā kɔʼ zughu e dzūŋ am mbàŋ alo e bə̄ghā, ghê lô Wɛ ù Ghùw telè tǐ naaŋ kɔʼɔ̄ sùghò èzə̀; 15enyəa ghùw wəla ù boō fughu dzə â wə̄n lo kelê mùghù è doʼn təla zo.

16Tɔŋlo enyəa Zə̀ kə fə̀ ŋge ləgha nu mbī alenìi fughuu wô sɔ̀ʼ kə wɛ̀ kə wə̄n kə mɔ̀ʼ enyəa mò ghùw bǒo fùghù ndùw dzə̀ â wə̄n, ghùw ù te ŋ kè kpuūw mîa alo kəleŋe, ù n laam kelê mùghù è doʼn təla zo. 17Zə̀ kə̀ ka fə Wɛ ù Wə̄n am mbī tum wò dzə̀ alebùghò saʼ ghî a gho, à fə̀ laam lo enyəa to ghî à mô zə kətuw am bàm e Wə̄n. 18Ghùw wəla ù bôo fughu nduw â wə̄n, Zə̀ kə̀ lo saʼa wə̄n; wəla ù dòʼkè boō fughu â wə̄n, Zə̀ kə̀ ŋ wə̄n saʼ chia kə naŋā wə̄n aŋ ŋgōʼ bòʼ ù kà bǒo fughu â sɔ̀ʼ kə Wɛ ù Kəzə̀ʼ kò. 19Sa zə eghəa zəla Zə̀ kə̀ saʼā ghî ghò a te lo enyəa, tsə̀ tùghù nyəa wò am mbī, ghî yia kuūwn ləghaa ləm ko tsə̀ghàtàʼà tsə̀, ghəa a ghee à ghəəŋ gho a sô lô ghəa à biigh gho. 20Tɔŋlo enyəa, ghùw wəla ù tsoō ghəə̄ŋ dzə̂ bo zo bɛ̂ ndùw ko tsə̀ ènyə, tsoo ləghaa sùghò yò alesəā wô an tsə̂, enyəa è lò dêe fughuu ghəa a wə̄n à biigh gho. 21Ghùw wəla ù kuūwn ghəəŋ ghəa a səŋò ghò, ù sə̌a wò nù an tsə̂, enyəa to ghəa a wə̄n a mô dêe səā wô enyəa à lò ghəa ghə̀là Zə̀ kə̀ ləghaa.”

Yɛso ghèe Dzɔ̌n fùghù m̀mùghu

22A m bùghò Yɛso kə̀a mɛʼɛ̀ tsughu ghəa gho, Ù n nùghùu nyə̀ ndùw an naʼ e Dzùdîa ghèe ghê tsə̀təndə̄ghā tə wə̄n to; ù n tsùuŋ dòʼò kə̀ŋo ndùw fughu ghèe ghee, fùghù sùghò àghì fughu â mùghù ŋ Kə̀zə̀ mò. 23Dzɔ̌n ŋ kuuwn fughuu sùghò àghì â mùghù ŋ Kə̀zə̀ mò an Ɛnɔ̀n am bùghu e Salìm, bòʼ mùghu m fə̀ ŋge lo tsəgha fughu; ghî ghə̀ m bughòo fughu enyəa ghe e fughu ghee â mùghù ŋ Kə̀zə̀ mò. 24#Mat 14:3; Mâk 6:17; Lûk 3:19, 20À fə lo mo ghe ka ŋ kaam kwù dzə̀n dzə̌ Dzɔ̌n an ndùghùtsāʼ. 25Tsə̀təndə̄ghā tə Dzɔ̌n tə̀ lì to ghèe ghê ghùw ù Dzùdîa ù lì ŋ kaʼ tsughu tuw ù sughuu wo êzəŋ aŋghəa ghùw lò alesùw ghue u wə̄n a te aŋghəa bughoo kə enaʼ kə ghee kə deē enyəa u e zɔlɔ an sə kə Kəzə̀. 26Ghe m bùghò dzɛ̀ â Dzɔ̌n enyəa, “Wàdè, ghùw wəla ghàa wə̄n mò lo a dzə̀m a ŋgùŋù tsə̀, abugho a dâŋ sə kɔʼ Dzodàn, wəla ghù fə̀ teso dzàa ghəa a wə̄n gho enyəa ù lǒ Ù tsùʼu, ù lò fɛ, fughu àghì â mùghù ŋ Kə̀zə̀ mò, ghî a fi tsòo nyə̀ŋo ko a fughu.” 27Dzɔ̌n m bɛ̀lɛ̀ tsùghù enyəa, “Ghùw yò aletsoō kele kôʼ fəgha kə̀ li ko, à gɔ̀ʼɔ̀ kô kəla Zə̀ kə̀ fughu tsughu wô â wə̄n alo kəwālā. 28#Dzn 1:20Ghue e ughùe zɛʼɛ zəa e tɔ̂ʼ kwo sughò enyəa M̀ maā dzɛ̂ â ghɛ̀ enyəa Ǹ yo dzə̂ Kə̀lestò ù te, àsùghò enyəa, ghe mugho kuuwn tùm wò â sə ko enyəa M̀ bughò fəghaān naŋā tə̀luʼū â wə̄n. 29Ghùw wəla ù nǐi wìzən lò nùuwìzən; fən ù nùuwìzən wəla ù ti, zhəən ndùw shwaʼ u nùuwìzən vʉ̀, ù ŋ ŋgěe duʼnlo abugho ù zuūw aŋghəa nùuwìzən ù te kə̂aa ghəa gho a te; À lò sugho êzə̀ Ǹ duʼnlō êzə̄ŋ. 30Ù kì ko aletsoō duūw miān kɔʼɔ nduw ko nû, mùghò è kuuwn tsoō tsughuu miān wo ko a ghueetsə̄.”

Ghùw wəla ù tsughuu wô alo kəwālā

31“Ghùw wəla ù səā tsughuu wô alo kəwālā, ù tsə̀ghàsə ghî ghə̀n à dzə̀m; ghùw wəla ù sə am mbī, à lǒ ghùw nsɔ̌ɔŋnchùw, ù kə̀aa kô ghəa a mbī gho; ghùw wəla ù səā tsughuu wô alo kəwālā, ù tsə̀ghàtàʼà ghì ghən à dzə̀m. 32Ù bɔ̌ɔm teso dzàa kô fəgha kə̀là ù kǒʼ ghè kò, àsùghò kə̀là ù zuw; ghùw ù mɔʼɔ̄ vʉ̀a ù tsoo nîi yô shwaʼ u wə̄n wo tò eghəa. 33Ghùw wəla ù zuw shwaʼ u wə̄n wo, ù fi dê tsùghù dzə̀ nù enyəa Zə̀ kə̀ kə̂aa èsəŋò. 34Tɔŋlo enyəa ghùw wəla Zə̀ kə̀ tum wo, ù kə̀aa sə̌a wò shwaʼ u Kəzə̀; nu Zə̀ kə kâ wə̄n â Zuʼ tə te fughu mò Kə fòʼ kɔ̀ʼ nû. 35#Mat 11:27; Lûk 10:22Tsele ləghaa wɛ ù wə̄n, vʉ̀a ù fughu nyə tsughu fʉgha wo u dzə̀m aŋ ghu kə wə̄n. 36Ghùw wəla ù boō fughu nduw â wɛ̀ ù te, ù ki mughù è doʼn təla zo, wəla ù zuūw yo â Wɛ̀ ù te, ù kè zə̀ yo tuw ko; nʉghà u Kəzə̀ ù pfʉa u kê kǔuwn dòʼn tə̀là an tuw kə wə̄n.”

Zvasarudzwa nguva ino

Dzɔ̌n 3: agq

Sarudza vhesi

Pakurirana nevamwe

Sarudza zvinyorwa izvi