MWAMBĨLĨLYO 6
6
Ũng’endu wa andũ
1Na kweethĩwa, yĩla andũ mambĩlĩlye kwĩngiva ĩũlũ wa nthĩ, na masyaĩwa eĩtu, 2ana ma Ngai moona kana eĩtu ma andũ maĩ aseo; na meetwaĩa aka, onthe ala manyuvie. 3Na Yeova asya, Veva wakwa ndakakĩlan’ya vinya na mũndũ tene na tene, nũndũ we nake nĩ mwĩĩ: ĩndĩ matukũ make makeethĩwa myaka ĩana na mĩongo ĩlĩ. #Sav 78.39; 1 Vet 3.19,20. 4Nevilimu maĩ kũũ nthĩ matukũ asu, o na ĩtina wa ĩvinda yĩu, yĩla ana ma Ngai malikile kwa eĩtu ma andũ, na mamasyaĩa syana: syo syaĩ ngũmbaũ tene, andũ me nguma.
5Na Yeova oona kana ũthũku wa mũndũ waĩ mũnene kũũ nthĩ, na kĩla kĩsũanĩo kya malilikano ma ngoo yake kyaĩ kyathe vyũ mavinda onthe. #Mwa 8.21; Sav 14.2,3; 51.5; Nth 6.18; Yel 17.9; Mt 15.19; Alo 3.23. 6Na Yeova eelila nũndũ nĩwombie mũndũ ĩũlũ wa nthĩ, na eew’ĩthw’a woo ngoonĩ yake. #1 Sam 15.11; 2 Sam 24.16; Isa 63.10; Aev 4.30. 7Na Yeova asya, Ngaananga mũndũ ũla natw’ĩkĩthisye aume ĩũlũ wa nthĩ; mũndũ, vamwe na nyamũ, na kĩla kasamũ katambũkaa, na nyũnyi sya yayaya; nĩkwĩthĩwa nĩngwĩlila nũndũ nĩnasyũmbie. 8Ĩndĩ Noa nĩwendeesye mbee wa Yeova. #Mwa 19.19; Kuma 33.12.
Noa akyaka ngalawa
9Mosyaanĩo ma Noa nĩmo aa. Noa aĩ mũndũ mũlũngalu, na mwĩanĩu nzyawanĩ sya ĩvinda yake: Noa aendanasya na Ngai. #Mwa 5.22. 10Na Noa asyaa ana atatũ, Semu na Amu na Yavethi. 11Na nthĩ yaĩ nthũku mbee wa Ngai, na nthĩ yausũĩte ũng’endu. 12Na Ngai oona nthĩ, na, sisya, yaĩ nthũku; nũndũ mĩĩ yonthe nĩyathũkisye nzĩa yoo ĩũlũ wa nthĩ. #Sav 14.2,3.
13Na Ngai amwĩa Noa, Mũminũkĩlyo wa mĩĩ yonthe nĩwooka mbee wakwa; nũndũ nthĩ nĩyusũĩtwe nĩ ũng’endu kwondũ woo; na, sisya, ngamananga vamwe na nthĩ. #Esek 7.2,3,6; Amo 8.2. 14Ĩyakĩe ngalawa ya mũtĩ wa mũkova; na ũtilanga tũsũmba ngalawanĩ, na ũivaka ngalĩ ya nthĩnĩ na ngalĩ ya nza kĩsia. 15Na ũũ nĩw’o wĩaka: ũasa wa ngalawa mĩkono maana atatũ, na ũthanthau wayo mĩkono mĩongo ĩtano, na ũtũlu wayo mĩkono mĩongo ĩtatũ. 16Ũkaseũvye vandũ va kũete kyenĩ ngalawanĩ, na ũkaseũvye va mũkono ũmwe kuma ĩũlũ; na mũomo wa ngalawa ũkekĩe ũteenĩ wayo; nyũmba ya nthĩ, na ya katĩ, na ya ĩũlũ, nĩw’o wĩseũvya. 17Nakwa, sisya, nĩngũete kĩw’ũ kingĩ ĩũlũ wa nthĩ, kyanange mĩĩ yonthe, yĩ na mĩvevo ya thayũ nthĩnĩ wayo, ungu wa ĩtu, kyonthe kĩla kĩ kũũ nthĩ kĩkakw’a. #Mwa 7.4; 2 Vet 2.5. 18Ĩndĩ ngalũlũmĩlya ũtianĩo wakwa naku; naku ũkalika ngalawanĩ, we, na ana maku, na mũkau, na aka ma ana maku vamwe naku. 19Na kĩla kĩndũ kĩ thayũ kya mĩĩ yonthe, ilĩ sya kĩla mũthemba ũkaete nthĩnĩ wa ngalawa, kũsyĩkalya thayũ vamwe naku; ikeethĩwa nũme na nga. 20Nyũnyi o mũthemba wasyo, na indo o mũthemba wasyo, na kĩla kasamũ katambũkaa ka nthĩ o mũthemba wako, ili sya kĩla mũthemba w’onthe ikakũkĩa, ũsyĩkalye thayũ. 21Naku ũkeyosee lĩu w’onthe ũla ũĩsawa, wĩyũmbanĩsye; na ũkeethĩwa wĩ lĩu waku, na wasyo. 22Noa eeka ũu; kwĩanana na w’onthe ũla Ngai wamwĩaĩe, nĩw’o wekie. #Kuma 40.16; Aevl 11.7.
Zvasarudzwa nguva ino
MWAMBĨLĨLYO 6: Mbivlia
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956