YOHANES 21
21
I Tiberias mogoma at Yesus ebe, it agoromi inebe 7 mene nen ineilenggen hoageluk inelokhoma menlagaikhe wene
1At Yesus nen a'nogo hilingitikhesik oba nen i Tiberias mogoma, at agoromi ane wanhi lagaukwa mene omanogo hobuk inelokhoma menlagaikheat. Inelokhoma menlagaikhe andi, were ebe re, yi'nogo. 2Inenggi ekhe sambul he, at Simon enu ekhe Petrus agarek a'nogo inom, Tomas enu ekhe Hulipmio agarek a'nogo inom, Nataniel awi o Galilea o sili enu Kana mene inom, Sepeteus againafuri inom, Yesus agoromi inebe pire ekhe inom, andogotukwa. 3A'nogo andogotukwasik he, Simon enu ekhe Petrus agarek a'nogo nen, it fenakwe yagaisikhi logolik he, mel yagaisasikhe: ”An yogondak he, ikan wani lageluk,” iluk isikhemo, it fena omanogo nen he, ”Nit ninomat louwogo,” iluk isukwasik he, inom lagaukwasik e soba kwisukwasik lagaukwa mene re, o hup inukhogo a'nogo ikan misik iluk ogo ekhe wanhukwa mondok lek.#Luk. 5:5 4A'nogo wanhi'legat were'ma o wei ugu kwelek, at Yesus lagaikhesik, i esanggoma mendek welagaikhe meneat he, it agoromi ane wanhi lagaukwa mene omanogo nen he, ”Ari Yesus ebe aro,” iluk futfigi'lek. 5A'nogo futfigi'lek were'ma, at Yesus nen yagaisikhi logolik he, mel yagaisasikhe: ”Ap yi sani. Nagoromi. Ikan ekhe wanheba?” iluk yagaisasikhemo, iren he, ”Mondok lego,” iluk yagatukwama, 6at Yesus nen he, mel yagaisasikhe: ”Hinaikan su ari, e so abel fena hinenggi ebekwe higit pelakfeni. A'nogo pelabumo ikan wanugun o,” iluk yagaisasikhemo inaikan su a'nogo ima pelak fesukwama ikan mondok hokhorogo kwalagaikhemo re, lisogo wanu elok legagaikhe.#Luk. 5:6
7A'nogo elok legagaikhemo logolik, at Yesus agoromi mene ekhe, at endawinggen hundik mene a'nogo nen he, Petrus mel yagatikhe: ”Petrus, ap ari ninoe Enupogot a'nogo aro,” iluk yagatikhe. At Yesus agot a'nogo nen, ”Ap ari ninoe Enupogot a'nogo aro,” iluk Petrus yagatunem esanggo holhikhesik he, asu endakwe mene nonggologo fesikhesik welagaikhe mene weak-weak laberasikhesik he, ima pokhogo pisikhe. 8A'nogo pugu kwelek, Yesus agoromi fenakwe omanogo it welagaukwaba nen huli i aik oba re, yatma lek. We horogat 100 meter hangge andi nen he, ikan hokhorogo su ikan su ambem peterek a'nogo lisogo waluk e so warogo i aik oba wulibi wagaukwa. 9Arat wulibi wagaukwasik e so elema nen pi wagaukwa hak he, ikan inom, sumburu roti mene inom, werago endu enggen oba louksek were'ma ineilenggen hasukwa. 10A'nogo hasukwama, at Yesus nen he, mel yagaisasikhe: ”Nagoromi. Ikan kerat wanhep omanogo fenakwe waluk we'ni o,” iluk yagaisasikhemo, 11Simon, enu ekhe Petrus agaregat a'nogo, e so elema kwisikhesik he, iikanr hokho mene nek 153 nen su ambe peterogo kwalagaikhemo re lisogo waluk i aik oba wulibi wagaikhe. Ikan mondok hokhorogo meneat ekhe, su a'nogo endephogo ekhe tilibilagi'lek, we, fano welagaikhe. 12Su a'nogo waluk wulibi wagaikhemo, at Yesus nen he, mel yagaisasikhe: ”Nagoromi. Sumburu nouwogen we'ni o,” iluk yagaisasikhe. A'nogo yagaisasikhemo, it at agoromi omanogo nen he, ”Yi ninoe Enupogot ebe aro,” iluk enegat hasukwasik nogo nen he, at ekhe nen, ”Hat sa,” iluk ailo lekhogo heinok wokhigi'lek kamo isukwa. 13A'nogo kamo isukwasik werek kwelek, at Yesus nen hobuk inoba horokhogo higilha lagaikhesik he, sumburu roti mene a'nogo wanhikhesik it sumburisasikhesik he, ikan a'nogoat sumburisasikhe. 14At Yesus a'nogo hilingitikhe andi re, at ebe wa'lagaikhesigen hobuk ambotkwe eluk agaikhesik oba nen, enggi pireba agoromi inelokhoma menlagaikhesigen ekhe hobuk menlagaikhe andi.
Yesus nen, ”An nanggo domba fanorogo kwelaginarek logoino,” iluk Petrus yagatikhe wene.
15Sumburu a'nogo arat nasukwama, at Yesus nen Simon enu ekhe Petrus agarek a'nogo anema wokhikhi logolik he, ”Simon Yohanes amlogo nagore. It hagaila'lak fena yoma re, an inendawinggen hundik he, lek hak meneat he, hat enek he, an hendawinggen tulemhogo welagen a?” iluk yagatikhemo, at Petrus nen he, ”I o, Noe. An nen hat hebe nendawi aro,” iluk yagatikhemo, at Yesus nen he, mel yagatikhe: ”Halok he, nanggo domba ena mene fanorogo kwelaginarek logoino o,” iluk yagatikhe. 16Attak a'nogo yagatikhesik, hobuk ekhe inom anema wokhikhi logolik: ”Simon Yohanes amlogo nagore. Haren an hendawinggen eberogoat tulemhogo welagen a?” iluk yagatikhemo, aren he, ”I o. Noe. An nen hat hebe nendawi welagi andi, hat helu aro, Noe,” iluk yagati lagaikhemo, at Yesus nen he, ”Halok he, an nanggo domba mene konhi logoin o,” iluk yagatikhe.
17Anema enggi pireba wokhasikhesik hobuk anema ekhe wokhasikhe: ”Simon Yohanes amlogo nagoro. Haren an nebe hendawi a?” iluk, anema a'nogo enggi pireba wokhasikhesigen, hobuk ekheba, ”Haren an nebe hendawi welagen a?” iluk yagatikhe andi nen he, endawinggen weak agaikhemo, aren Yesus mel yagatikhe ”Noe. Hat he, yi wene ti wene mondogat helu o. Halok an nen noe hebe nendawi welagi andi, hat helu o,” iluk ikhi lagaikhemo, at Yesus nen he, mel yagatikhe: ”Halok he, an nanggo domba fanorogo kwelaginarek logoin o,” iluk yagatikhe. 18A'nogo yagatikhesik he, wene ekhe mel yagatikhe: ”Attagat hat hebe alage logolik he, An o andoma lagain, iluk halinggin honggwaregenat ninghogo ikhaluk laga lagagin meneat he, hobuk hat hebe yaman asumo, henggi pisarogo lakfugunem he, it ekhe nen hat henggi hele ninghogo homakhabimbik he, o hat lagain habit oba wokharek logoin o, iluk eberogoat yagaheti,” 19iluk wene a'nogo yagatikhe andi re, at Petrus hobuk yi'nogo hilingisogo wasugun oba Allah fogerasugun mene faget yagatikhe andi. A'nogo arat yagatikhesik he, mel yagatikhe: ”An nombo'ne nikhi logoino,” iluk yagatikhe.
Yesus nen at agoromi mene ekhe endawinggen hundik mene faget abok yagaisasikhe wene.
20At Yesus nen wene a'nogo yagatikhemo, at Petrus elokhe hebekhogo eilenggen ambotkwe yethasikhe hak he, Yesus agot ekhe endawinggen hundik mene a'nogo inombo'ne wagunem yethasikhe. At andi ebe re, attagat sumburu ninggi logolik Yesus era'lu horokhogo hurek logolik he, ”Yesus noe. Sa nen noe Henupogot hoasuageluk yonggo lagain,” iluk oba heinok wokhasikhe mene a'nogo.#Yoh. 13:25 21At Petrus nen ap andi eilenggen yethasikhesik he, Yesus mel yagatikhe: ”Noe. At ap ari hobuk ninggi'nogo hilingisigin anggegen,” iluk yagati lagaikhemo, 22aren he, ”An nendawimo nen he, ap ari ebe elugat were'ma, an hobuk wesigin anggigi halok he, haren hilingisu mene fuk. An nobalombogo. A'nogo meneat he, hat enek he, an nombo'ne nikhi logoino o,” iluk wene a'nogo yagatikhe mene andi, 23it Yesus agoromi ane wanhi lagaukwa mene nen he, ”Yesus nen he, Nagot ari ebe hobuk wa'lasigin mondok lego,” iluk ikhe heaba, abok wial fesukwa. Meneat he, at Yesus nen he, ”An nagot ari hobuk wa'lasigin mondok lego,” iluk igi'lek. We, An nendawimo nen, ap ari ebe eluk at were'ma an hobuk wesigin anggigi halok he, haren hilingisu mene fuk. An nobalombogo,” iluk wene andi mene faget isikhe meneat, a'nogo isukwa andi. 24Wene Yesus agot ekhe faget isikhe andi, nebe an aro. An neilenggen hasigi mene nenat fakhogo yagahisa hak, lisu palogo figi yi. Wene andi an neilenggen hasigi mene nenat fakhogo yagahisigi yi eberogoaren he, nit mondogat ninelu o.
Wene wurep kobokhogo lisu palhikhe wene
25At Yesus nen yi wene ti wene fenakwe hilingiti lagaikhe mene hokhorogoat werek meneat he, wene mondogat misiktek-misiktek piling-palanghogo lisu palogo feilema re, o kweangma yoma peterogo re, obuluk koma fou heat hilingla'lep anggigi.
Zvasarudzwa nguva ino
YOHANES 21: inohap
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda