TOWUNÖT 11
11
1Kingölonöy pich otini le tagh kut akonga akipöghisyegho ngalechini akonga. 2Kïkany otini kiwuwotö pich kutang kongasis, kwitïta tömko Papilonia#11:2 Papilonia: Ompö Eprania kï körö kegh nko mayayat. kïmang wölini. 3Atolapay kïmwochinö lö, “Ne, apkana kegha mataparen akepel lasiny.” Kitïng chane mataparen cho kitektoy nko lam cho kituyegho matapareni. 4Kïmwochinö lö, “Ketekyinö kegh kanasyan nko pchörï nyo kogh nyo itöy yïm, tökemuka kerumtenö tömökïtoyö keghömï ngwïny kïmïkul.”
5Atolapay kïrökï ECHOTYON ngwïny kuros kanasyantanay nko pchörinay kitek pïchay, 6kïlö ECHOTYON, “Arose nyu, pich akonga pïchï, akïngölonöy kut akonga akwanyï ye kanya kutor ngalechï akïtomönye ato lekït kwigh kïgh anka tïkwïl nyo mököy kwighöy! 7Apkana keröytenö tökewura ngalekwa tömökïlïmchinö chane nko chane.” 8Kïlenyona, kutoyö ECHOTYON pïchay kïghömï ngwïny kïmïkul, kïpïstö tekatanay pö kanasyan. 9Kïlenyona, kekurö kaynata kanasyantanay Papilon, ompöwölo kiwura atoni ECHOTYON kutïwa pipö ngwïny kïmïkul. Kitoyeghö ECHOTYON chane wöloni kïghömï ngwïny kïmïkul.
Monïngo Syem
(1Ot 1:24-27)
10Achï monïngo Syem. Kiwer könyiswö odeny otini kiwonyö puseryonta akitïng Syem könyis 100, kïsïch werïnyi Arpaksyad, 11kïtöpö ngat könyis 500, kïsïch monïnge walaka cho le wor nko tipïn.
12Otini kitïta Arpaksyad könyis 35, kïsïch werïnyi Syela, 13kïtöpö ngat könyis 403 kïsïch monïnge walaka cho le wor nko tipïn.
14Otini kitïta Syela könyis 30, kïsïch werïnyi Eper, 15kïtöpö ngat könyis 403 kïsïch monïnge walaka cho le wor nko tipïn.
16Otini kitïta Eper könyis 34, kïsïch werïnyi Pelek, 17kïtöpö ngat könyis 430 kïsïch monïnge walaka cho le wor nko tipïn.
18Otini kitïta Pelek könyis 30, kïsïch werïnyi Reu, 19kïtöpö ngat könyis 209 kïsïch monïnge walaka cho le wor nko tipïn.
20Otini kitïta Reu könyis 32, kïsïch werïnyi Seruk, 21kïtöpö ngat könyis 207 kïsïch monïnge walaka cho le wor nko tipïn.
22Otini kitïta Seruk könyis 30, kïsïch werïnyi Naor, 23kïtöpö ngat könyis 200, kïsïch monïnge walaka cho le wor nko tipïn.
24Otini kitïta Naor könyis 29, kïsïch werïnyi Tera, 25kïtöpö ngat könyis 119, kïsïch monïnge walaka cho le wor nko tipïn.
26Otini kitïta Tera könyis 70, kïsïch Apram nko Naor nko Aran.
Monïngo Tera
27Achï monïngo Tera, nyo kile papoto Apram nko Naor nko Aran, ki papoto Lot Aran, 28kïröpösyï Aran korengwa wölini kikïyichï le kanasyanta Ur nyo pö Papilonia otini kitökïsöpöy paponyi Tera. 29Kwip Apram Saray, kwip Naor Milka, chepö Aran nyo kile papoto Iska. 30Kimösïknye Saray monïng ompöwölo ki sonö nyinte.
31Kumït Tera werïnyi Apram nko Lot kukötanyi nyo kile wero Aran nko potïchtanyi Saray koko Apram. Kïwuwö wöloni chane lapay le Ur nyo pö Papilonia kïpa kutang koro Kanan. Wölo otini kitïta chane Aran, kïtïpï wöloni. 32Kïröpösyï Tera wöloni akitïng könyis 205.
Kökur Tororöt Apram
Zvasarudzwa nguva ino
TOWUNÖT 11: PIPÏLIA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
©Bible Society of Kenya, 2019