Panagnaan 19
19
Kalaatan ni Sodom
1Na pag taabut deꞌ kohap, takka na siga lalla looy ma duwa sasang si Lut ningkōꞌ ni behe lawang kutaꞌ ma ngaliput Sodom. Ni sabana na, sila ilay siꞌ sikaduwa tud malaikat bay manyalupa meꞌ dagbos manusiyaꞌ. Takita jaꞌ siꞌ sila meꞌ si Lut, magti ya pasōng nampang sila, boꞌ na sujud ni awpan da. 2Pag-anu, yuk si Lut ninsila, “Ga Tuwan, meꞌ aku disu ata bi, pahās doꞌ kam ni lumaꞌ kami. Luu du boheꞌ ndooy man ngosoan battis bi maka ndooy na doꞌ kam tuli. Sumawung sayu sa, boꞌ bi palanja ni palanan bi.”
Iya tampung da baw siꞌ tu, “Daa na doꞌ ba. Ndē jaꞌ kami tuli ni plasa.” 3Sugaꞌ hangat si Lut amu-amu ngalogos sila nohoꞌ mmeꞌ niiya pa lumaꞌ na, song hallom lay du sila kuhi. Pag takka jaꞌ sila pilay, lay si Lut buwat jinisan makanan mahap-mahap jaꞌ sampay tinapay ma yaꞌ luu pasulig na. Pag-anu siꞌ, lay na sila mangan.
4Lupus jaꞌ siꞌ, yaꞌ gi san bay pabāk ga bisita looy tuli, liput na lumaꞌ si Lut leꞌ mimon kalallahan ni Sodom, labba man anak-anak bahau sampay na ga matatoa. 5Bbuwatan da ngingan, yuk da, “Lut, ninggai na siꞌ ga lalla looy, ilooy siꞌ ma bay boo nu pitu pa lumaꞌ nu? Boonun sila pitu. Doman kami meekan sila.”
6Pag-anu, ilooy ma lay pōꞌ si Lut ngawpan sila sambayan na nambo lawang ni bukut na, 7boꞌ na halling, “Ga Langaꞌ, junjung ku na ningkaam, daa kam buwat kalalamaan meꞌ naa. 8Bong anu, luu du duwa anak ku budjang. Gam na sila boo ku pa mman bi, pooy-pooy na meꞌ bi buwat sila. Sugaꞌ daa jaꞌ usik-usikun bi ga lalla looy, batan sila ilay bisita ni lumaꞌ ku, boꞌ talpaksaꞌ niyaku ngagpangan sila man bahaya.”
9Sugaꞌ yuk da, “Ā, pingkaan nu ba kami. Kalalaan nu! Kau gi jama sampi, kau gi magpandoy-pandoyan kami! Bong ko yaꞌ kuhi, malasahi gi ko sina man ga lalla looy!” Pag-anu, ilooy ma sinugan meꞌ da si Lut boꞌ da pasōng dak nipaꞌ lawang looy.
10Sugaꞌ magti binukaꞌ meꞌ ga malaikat looy lawang sambayan da ngahelaꞌ si Lut pa jawom, boꞌ lay na tambo da pabalik. 11Pag-anu, ilooy ma lay pinabuta meꞌ da kalallahan looy siꞌ ni poan. Dari yaꞌ na san ga tatammu da lawang lumaꞌ looy.
Kalakka si Lut man Sodom
12Pag-anu, yuk ga malaikat looy ni si Lut, “Luu gi kina paglūng nu ni daira tuu? Bong luu, boonun na lakka mantuu. Boonun na ga anak-nda nu, ga iwan nu atawa soysoy na pin paglūng nu 13sabap hansu kami na situ paglahat tuu. Meka na situ sumbung takale Tuhan pasal kajahatan jama lahat tuu. Ituu na situ kon kami lay na sohoꞌ na pitu ngahansu Sodom.”
14Dari siꞌ, lai na si Lut pa mman siga lalla tunang ga anak na, yuk na ninsila, “Siglaꞌ na kam! Lakka na kitabi mantuu! Hinansu na situ meꞌ Tuhan daira tuu!” Sugaꞌ yaꞌ san sila maruli. Kanna da maglata jaꞌ ya.
15Pag deꞌ sayu, lay na sinohoꞌ si Lut meꞌ ga malaikat looy, yuk da, “Siglaꞌ na ko! Boonun na lakka mantuu ga anak-nda nu. Bong ina kam maglawun-lawun lagi, talapay na sina kam pag taabut hinansu daira tuu.”
16Sugaꞌ kuwan si Lut baw siꞌ tu, alang-kapalang lagi. Lipara, man timbang Tuhan, magti sinintak meꞌ ga malaikat looy ga tangan si Lut ka ga anak-nda na boꞌ da binoo pa poan daira looy.
17Luu jaꞌ siꞌ sila ni poan daira, yuk malaikat looy disu ninsila, “Sonse kam patangkas mari kam llum! Daa na san kam pateleꞌ! Maka daa na kam patagong ni kapantayan tuu. Sonse kam pilay pa kapunu-punuhan looy.”
18Sugaꞌ yuk si Lut, “Uy la Tuwan, junjung ku na ningkau, daa na ba kami sohoun pilay. 19Katoonan ku du bina biddaꞌ na ehe timbang bi niyaku disu ata bi, sampay kaam na bay ngagak umu kami. Sugaꞌ yaꞌ na la takaya kami pilay pa kapunu-punuhan looy. Kalanduꞌ na bilay tā. Banti mintu, duhuꞌ gi kami taabut meꞌ balaꞌ looy sampay man kami matoy. 20Pooy bong pilay na jaꞌ kami pa daira dikiꞌ looy ma tapit? Paku ku na ningkaam, daa na patabeun bi daira looy hinansu sat meꞌ looy du ehe-ehe na. Bong siꞌ kadarihan ningkaam, pilay na jaꞌ kami ndooy mari kami salamat.”
21Pag tampung malaikat looy, “Sigi ba, duwan ta na ko. Yaꞌ sa patabeꞌ ku hinansu daira dikiꞌ looy. 22Sugaꞌ deꞌ-dēꞌ na kam sonse sabap yaꞌ gi situ ku kapabuwat oy maka oy na ngkod-ngkoran bi yaꞌ gi bay takka pilay.” (Na daira looy siꞌ, song hallom lay na inawnan Soal, hatiyan na, “Dikiꞌ,” poonan bay jaꞌ inawnan meꞌ si Lut dikiꞌ.)
Sodom ka Gomora hinansu meꞌ Tuhan
23Yaꞌ gi siꞌ langkaw llaw, lay na takka ga si Lut pa Soal. 24Pag-anu, lay na Tuhan ngalabuꞌ manilang noleyab, subay ga uwan landos taꞌ Sodom ka Gomora, 25sampay lay na katis ampud ga daira looy. Mimon kalumaan ni ga daira looy ka ni kakawum-kawman lahat looy sampay manusiyaꞌ labbasakayi ndooy lay na du ampud. Katumbu-tumbuhan pun ndooy, lay na du katis tutung. 26Sampay nda si Lut, lay na du bay talapay meꞌ balaꞌ looy sabap yaꞌ ya bay ngasip san lay na ya binandaan yaꞌ nohoꞌ pateleꞌ. Dari pagka ya bay pateleꞌ, lay na ya dari timus batu meꞌ bantuk jama-jama.
27Pag meꞌ sumawung, sayu alab lagi, lay du si Ibrahim magdeꞌ-dēꞌ pabeleng pa bay limpaꞌ man da bay magbitsala ka Tuhan. 28Pag ndaꞌ na pilay pa Sodom ka Gomora ndooy ni labbak, ngita na ya humbu kapa banahan subay ga humbu api bay llambunan paeka.
29Dari meꞌ looy na siꞌ, tud lay na du hinansu meꞌ Tuhan ga daira looy ndooy ni labbak man si Lut bay maglahat. San meꞌ looy, yaꞌ du bay takupan Tuhan bay paku si Ibrahim, batan lay du bay lakkahan na si Lut man jawom balaꞌ looy mari salamat.
Si Lut ka ga anak na
30Na si Lut siꞌ tu, pagka hanggaw ya maglahat ni Soal, lay na boo na anak na, ga budjang looy, pilay pa kapunu-punuhan. Maka ndooy na sila bay patannaꞌ ni jawom lowang pampang. 31Pag-anu, hallom maka hallom na, yuk anak na ma siyaka man ariꞌ na, “Simmaꞌ itu toa na, yaꞌ hallom matoy na. Boꞌ yaꞌ na san luu lalla takapin llum ni lahat tuu. Dari yaꞌ na luu dapat ta halla ka hanak meꞌ karuha ndang bay ginantaꞌ ni manusiyaꞌ. 32Sangkon bong anu, palango ta na Simmaꞌ ka tubaꞌ anggul. Pag-anu, kawu-kawu kita kapag-ubay ka iya mari tabangunan awon mmaꞌ ta. Yaꞌ na sina lungay awon na bong ta bay hanak leꞌ na.”
33Dari sangom looy du, lay du palango da mmaꞌ da. Maka lay na paubay anak na ma siyaka niiya. Kuwan mmaꞌ na, yaꞌ na san bay tasayu na bong sumilan anak na bay takka pa mman na atawa pun sumilan ya bay lakka. 34Pag sayu, yuk ilooy ma siyaka ni ariꞌ na, “Hna Diꞌ, lay na kami la ubay ka Simmaꞌ dabuhiꞌ. Bong-anu, palango ta na baw ya pabalik sangom tuu, boꞌ kau na baw ubay ka iya. Meꞌ looy ilay tabangunan ta na awon Simmaꞌ. Yaꞌ na sina lungay awon na bong ta bay hanak leꞌ na.”
35Dari pag sangom, lay du palango da mmaꞌ da sampay lay na du paubay anak na ma siyali niiya. Si Lut siꞌ tu, yaꞌ na du san bay tasayu na sumilan anak na bay takka pa mman na atawa sumilan bay palakka. 36Dari siꞌ, lay na battong ga danda looy siꞌ sikaduwa meꞌ mmaꞌ da. 37Kuwan ilooy ma siyaka, pag hanak na, lalla. Pag-anu, lay awnan na si Moab. Dari iya na poonan bangsa Moab. 38Pag hanak ma siyali, lalla du. Pag-anu, lay awnan na si Ben-ami. Dari iya na poonan bangsa Amon.
Zvasarudzwa nguva ino
Panagnaan 19: sjm
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2021, Wycliffe Bible Translators, Inc. All rights reserved.