Génesis 3
3
Adan ha Éva naiñe’ẽrendúi
1Ha upe mbói iñaranduve opaite ambue mymbakuéra Ñanderuete, pe Jaraitéva ojapova’ekuégui; ha péva he’i pe kuñáme: Añete piko Ñanderuete he’i peẽme: Aníke pe’útei opaite yvyra’a yvatýpe oĩva guive.
2Ha pe kuña ombohovái mbóipe: Pe yvaty pegua yvyrakuéragui ore ikatu ro’u;
3pe yvyra oĩva yvaty mbytépegui katu Ñanderuete he’íkuri: Ndape’uiva’erã ichugui, ni ndapepokoiva’erã hese, ani hag̃ua pemano.
4Upéramo pe mbói he’i pe kuñáme: Napemanomo’ãi.
5Ñanderuete oikuaa porã voi pe ára pe’úvo hi’akue, pejehesape’atahahína, ha peikotaha Ñanderuetéicha, peikuaáta iporãva ha ivaíva.
6Ha pe kuña oma’ẽvo pe yvyra’a rehe, ombohoryete hesa ha iporã oje’u hag̃ua ha’e oipotaite voi ohupity hag̃ua arandu, oipo’o hi’a ha ho’u; ha ome’ẽ avei iménape hendive oĩva, ha ha’e ho’u avei.
7Ha upevovete mokõivéva ojesape’a, ha ojohecha ijopivoha hikuái; upéramo omopẽ hikuái pe yvyra hígo rogue, oñemo’ã hag̃ua.
8Ha ohendúvo hikuái Ñanderuete, pe Jaraitéva ñe’ẽ, oguatavahína pe yvaty rupi, pe ára ipiro’yve jave; Adan ha hembireko okañy Ñanderuete resa renondégui ka’aguype.
9Ñanderuete katu ohenói Adánpe, ha he’i ichupe: Mamo piko reime.
10Adan ombohovái: Ahendúvo ne ñe’ẽ yvatýpe akyhyje, aikógui opívo akañy.
11Ha Ñanderuete he’i ichupe: Máva piko nembo’e nde opívoha. Re’u piko ra’e pe yva Che ha’eva’ekue ndéve ani hag̃ua re’u.
12Ha pe kuimba’e ombohovái: Pe kuña reme’ẽva’ekue chéve, che irũrã ramo, ome’ẽ chéve pe yva, ha che ha’u.
13Upéramo Ñanderuete he’i pe kuñáme: Mba’e piko rejapo. Ha pe kuña he’i: Pe mbói chembotavy, ha ha’u.
14Ha Ñanderuete he’i mbóipe: Rejapo haguére péva Che romaldeci umi mymba tuicháva apytépe ha mymbakuéra maymáva ñu rupigua apytépe avei; nde pyti’áre retyryrýta, ha yvytimbo re’úta reikove aja pukukue.
15Ha oikóta ñorãirõme kuña ha iñemoñare ha ne ñemoñare apytépe; ha’ekuéra omongu’íta ne akã ha nde reisu’úta ichupekuéra ipytápe.
16Ha Ñanderuete he’i pe kuñáme: Heta rehasa asýta ha nderasyetéta nememby hag̃ua; ha ne remikotevẽ ne ménape g̃uarã, ha repytáta ipoguýpe.
17Ha kuimba’épe he’i: Nde rehendu haguére ne rembirekópe, re’úgui pe yva ha’eva’ekue ndéve: Ani hag̃ua re’u, ha rejapógui péicha oñemaldecíta ko yvy; ha jeiko asypópe rekaruva’erã ichugui reikove aja pukukue.
18Ñuatĩndy ha javorái heñóita ndéve, ha ka’avo ñu megua ne rembi’urã.
19Nde syva ry’aikuépe re’úta ne pan oiko jevy peve ndehegui yvy, yvýgui voi ningo resẽva’ekue; ha yvytimbo oiko jevýta ndehegui.
20Ha Adan ombohéra hembirekópe, Éva, (he’ise: Oikovéva sy) ha’égui hína opaite yvyarigua sy.
21Ha Ñanderuete, pe Jaraitéva ojapo pe kuimba’e ha hembirekópe g̃uarã ijaorã mymba pirekuégui, ha omonde hesekuéra.
22Ha Ñanderuete, pe Jaraitéva he’i: Péina ápe, ko’ág̃a pe kuimba’e Ñandeichagua, oikuaáma iporãva ha ivaíva; ha ág̃a ho’u ramo avei pe yva oporomoingovéva oikoveva’erã tapia g̃uarã.
23Ani hag̃ua péva oiko, Ñanderuete, pe Jaraitéva omosẽ ichupekuéra Eden yvatýgui, omba’apo hag̃ua pe yvýre ha’e voi oñemoingo haguégui.
24Ha omosẽ okápe Adan ha Évape, ha omoĩ Eden yvatýpe kuarahyresẽ gotýo querubinkuéra (ángel ruvicha) ikyse puku hendýva ha omýiva opa gotýo, oñangareko hag̃ua pe yvyra oporomoingovéva rape rehe.
Zvasarudzwa nguva ino
Génesis 3: ÑÑP2015
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.