མེ་ཐིའུ་ལེའུ་ 13
13
སོན་བཏབ་མི་གི་དཔེ་གཏམ།
1ཉིནམ་དེ་ནང་རང་ཡེ་ཤུ་ཁྱིམ་ནང་ལས་ཐོན་ཏེ་ མར་མཚོའི་མཐའ་མ་བྱོན་སྦེ་བཞུགསཔ་ད། 2མི་ཚོགས་སྦོམ་འོངས་ཏེ་ ཡེ་ཤུ་བཞུགས་སར་འཛོམས་ནི་འདི་གིས་ ཡེ་ཤུ་ཁོ་རང་གྲུ་གཅིག་ནང་བཞུགས་སྦེ་ མི་ག་ར་མཚོའི་མཐའ་མ་ཡར་ལོངས་སྡོད་ནུག 3ཁོ་གིས་ཆོས་ལེ་ཤ་ དཔེ་གཏམ་ཨ་ནི་བཟུམ་གྱི་ཐོག་ལས་སྦེ་གསུངས་ནུག་ ཉིནམ་གཅིག་གི་ཚེ་ ཞིང་ལཱ་འབད་མི་གཅིག་གིས་ཞིང་ཁར་སོན་གཏོར་བ་སོང་སྟེ། 4ཁོ་གིས་སོན་གཏོརཝ་ད་ སོན་ལ་ལུ་ལམ་ཁར་བུད་དེ་ བྱི་ཅུང་ཚུ་འོངས་ཏེ་ འཐུ་ཟ་ནུག 5སོན་ལ་ལུ་ཅིག་ས་རུག་རྡོ་རུག་ནང་བུད་དེ་ ས་གཏིང་མེད་ནི་དེ་གིས་ སོན་དེ་མ་ལས་ཡར་མགྱོགས་པར་སྐྱེས་ཏེ། 6ཡར་རྒྱགས་རུང་ ར་ཏོ་མར་གཏིང་རིངམ་སྦེ་ འགྱོ་མ་ཚུགསཔ་ལས་བརྟེན་ཏེ་ ཉིམ་ཤརཝ་ད་ དྲོས་ཀྱིས་སྐམ་སྟེ་ཤི་སོང་ནུག 7སོན་ལ་ལུ་ཅིག་རྩང་གི་ཚང་ནང་བུད་དེ་ རྩང་དང་གཅིག་ཁར་སྐྱེས་རུང་ རྩང་ཡར་སྦོམ་ད་ ལྕུག་གུ་དེ་ལུ་རྩང་གི་མར་མནེམ་སྟེ་ ཡར་སྦོམ་མ་ཚུགས་པས། 8དེ་འབདཝ་ད་ སོན་ལ་ལུ་ཅིག་ས་བཟང་ནང་བུད་དེ་ སོན་ལ་ལུ་གིས་བརྒྱ་གཅིག་ ལ་ལུ་གིས་དྲུག་བཅུ་ ལ་ལུ་གིས་གསུམ་བཅུ་རེ་སྦེ་ལོ་ཐོག་འཚོ་ནུག 9ག་ལུ་ཉན་ནི་གི་རྣམ་ཅོག་ཡོད་མི་དེ་གིས་ཉན་ཞིག་ཟེར་གསུངས་ནུག།
དཔེ་གཏམ་གྱི་ཐོག་ལས་ཆོས་གསུངས་མིའི་དོན་དག
10ཡེ་ཤུ་གི་སློབ་མ་ཚུ་ཁོ་བཞུགས་སར་བཅར་ཏེ་ ནཱ་གིས་ནམ་རང་འབད་རུང་ མི་ཚུ་ལུ་ག་ཅི་འབད་དཔེ་གཏམ་ཚུ་གི་ཐོག་ལས་གསུངསམ་སྨོ་ཟེར་ཞུཝ་ད། 11དེའི་ལན་ལུ་ཡེ་ཤུ་གིས་ ཞིང་ཁམས་ཀྱི་རྒྱལ་སྲིད་ཀྱི་གསང་བ་ཧ་གོ་ནི་གི་ཤེས་རབ་དེ་ ཁྱེད་ངེ་གི་སློབ་མ་སྦེ་འོང་མི་ཆ་ཁྱབ་ལུ་གནང་ཡི་ དེ་འབདཝ་ད་ ཁོང་ལུ་མ་གནང་པས། 12ག་ག་ལུ་ཡོད་མི་འདི་ལུ་ ད་རུང་དེ་ལས་ཡང་ལྷགཔ་སྦེ་བྱིན་འོང་ ཡོད་མི་དེ་གུ་ མ་ལང་ལངམ་སྦེ་སྡོད་འོང་ ག་ག་ལུ་མེད་མི་དེ་ནང་ལས་ ད་རུང་ཡོད་མི་དེ་ཡང་ ལེན་འབག་འགྱོ་འོང་། 13དེ་འབདཝ་ལས་ ང་གིས་ཁོང་ལུ་དཔེ་གཏམ་གྱི་ཐོག་ལས་སྦེ་སླབ་ཨིན་ ག་ཅི་སྨོ་ཟེར་བ་ཅིན་ ཁོང་གི་མིག་ཏོ་གིས་བལྟཝ་མས་ དེ་འབདཝ་ད་ ག་ནི་ཡང་མི་མཐོང་པས་ ཁོང་གི་རྣ་བ་གིས་ཉནམ་མས་ དེ་འབདཝ་ད་ དོན་དག་ག་ནི་ཡང་ཧ་མི་གོ་བས། 14ལུང་སྟོན་པ་ ཨའི་ཟ་ཡ་གིས།
ཁྱེད་ཀྱི་རྣ་བ་གོ་ནི་གོ་འོང་ དེ་འབདཝ་ད་ཧ་གོ་མི་ཚུགས་ ཁྱེད་ཀྱི་མིག་ཏོ་གིས་མཐོང་ནི་མཐོང་འོང་ དེ་འབདཝ་ད་ལེགས་ཤོམ་སྦེ་མི་མཐོང་། 15ག་ཅི་སྨོ་ཟེར་བ་ཅིན་ ཨ་ནི་མི་འདི་ཚུ་ སེམས་སྲ་ཀྲག་དང་ ཁོང་གི་རྣམ་ཅོག་ཡང་བྱ་རྡུགས་སྦེ་ རྣ་བ་ཡང་མི་གོ་བས་ ཁོང་གི་མིག་ཏོ་བཙུམ་སྡོད་དེ་ མིག་གིས་ཡང་མི་མཐོང་པས་ དེ་སྦེ་མེན་པ་ཅིན་ ཁོང་གི་མིག་ཏོ་གིས་ཡང་མཐོང་མཐོངམ་འོང་ རྣམ་ཅོག་གིས་ཡང་གོ་གོཝ་འོང་ སེམས་ཀྱིས་ཡང་ཧ་གོ་སྟེ་ སེམས་འགྱུར་སྦེ་ང་སྡོད་སར་ལོག་ལོགཔ་འོང་ དེ་ལས་ང་གིས་ཡང་ཁོང་ལུ་དྲགཔ་བཟོ་བཟོཝ་འོང་ཟེར་#༡༣:༡༥། ཨའི་ཟ་ཡ་ ༦:༩-༡༠།
ལུང་བསྟན་བཤད་དེ་ བཞགཔ་བཞིན་དུ་གྲུབ་ཨིན། 16དེ་འབདཝ་ད་ ཁྱེད་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱི་མིག་ཏོ་གིས་མཐོངམ་མས་ ཁྱེད་ཀྱི་རྣམ་ཅོག་གིས་ཡང་གོཝ་མས། 17ང་གིས་ཁྱེད་ལུ་དོན་ལས་རང་སླབ་དོ་ ཧེ་མ་ལུང་སྟོན་པ་མང་རབས་གཅིག་དང་མི་ཆོས་སེམས་ཡོད་མི་ཚུ་གིས་ ཁྱེད་ཀྱིས་མཐོང་མི་ཚུ་བལྟ་དགོ་མནོ་ཡི་ དེ་འབདཝ་ད་ བལྟ་ནི་མ་ཐོབ་ དེ་ལས་ཁྱེད་ཀྱིས་ཉན་མི་ཚུ་ཉན་དགོ་མནོ་ཡི་ དེ་འབདཝ་ད་ ཉན་ནི་མ་ཐོབ་ཟེར་གསུངས་ནུག།
སོན་གཏོར་མིའི་དཔེ་གཏམ་གྱི་འགྲེལ་བཤད།
18ད་རུང་ཡེ་ཤུ་གིས་ ད་སོན་གཏོར་མིའི་དཔེ་གཏམ་དེ་གི་དོན་དག་ཉན་ཤིག 19ཨ་ནི་ལམ་ཁར་བུད་མི་སོན་གྱི་དཔེ་འདི་ རྒྱལ་སྲིད་ཀྱི་གཏམ་བཟང་སྐོར་ལས་ཉན་ཏེ་ཧ་མ་གོ་བར་སྡོདཔ་ད་ བདུད་དེ་འོངས་ཏེ་ ཁོང་གི་སེམས་ཁར་ལས་གསུང་འདི་འཐུ་འབགཔ་ཨིན། 20དེ་ལས་ས་རུག་རྡོ་རུག་ནང་བུད་མིའི་སོན་གྱི་དཔེ་འདི་ མི་དེ་གསུང་གོཝ་ཅིག་ དེ་འཕྲོ་ལས་སེམས་དགའ་སྟེ་འབད་རུང་། 21སོན་གྱི་ར་ཏོ་མར་གཏིང་རིངམ་སྦེ་མེདཔ་ལས་ དུས་ཡུན་རིངམ་སྦེ་སྐྱེས་ཏེ་ སྡོད་མ་ཚུགསཔ་བཟུམ་སྦེ་ ཁོང་ཡང་གསུང་གིས་འབད་དེ་ དཀའ་ངལ་དང་གནོད་པ་དེ་ཚུ་བྱུང་བའི་བསྒང་ལས་ ཁོ་གིས་བཟོད་མ་ཚུགས་པར་ རྒྱབ་བཤུད་བརྐྱབས་ཏེ་འགྱོཝ་ཨིན། 22རྩང་གི་ཚང་ནང་བུད་མིའི་སོན་གྱི་དཔེ་འདི་ཨ་ནི་ཨིན་ མི་ཚུ་གིས་གསུང་ཉན་ཏེ་འབད་རུང་ མི་ཚེ་འདི་གི་ཚ་གྱང་དང་ རྒྱུ་ནོར་ལོངས་སྤྱོད་ཀྱི་ཞེན་ཆགས་ཀྱིས་བསྡམས་ཏེ་ ལོ་ཐོག་མ་འཚོ་མི་ཚུ་ཨིན། 23དེ་འབདཝ་ད་ ས་བཟང་སར་བུད་མིའི་སོན་གྱི་དཔེ་འདི་ཨ་ནི་ཨིན་ མི་སེམས་བཟང་པོ་ཚུ་གིས་ གསུང་འདི་གོ་ཞིནམ་ལས་ དོན་དག་ཧ་གོཝ་ཨིན་ དེ་ལས་ཁོ་གིས་ལོ་ཐོག་གི་འབྲས་བུ་དེ་ ལ་ལུ་གིས་བརྒྱ་གཅིག་ ལ་ལུ་གིས་དྲུག་བཅུ་ ལ་ལུ་གིས་གསུམ་བཅུ་རེ་སྦེ་བཏགཔ་ཨིན་ཟེར་གསུངས་ནུག།
དཀར་ཞིང་ནང་གཡུར་མ་སྐྱེས་པའི་དཔེ་གཏམ།
24ད་རུང་ཡེ་ཤུ་གིས་དཔེ་གཏམ་གཞན་གཅིག་ཁོང་ལུ་གསུངས་ནུག་ དཔེར་ན་ཞིང་ཁམས་ཀྱི་རྒྱལ་སྲིད་དེ་ཞིང་ལཱ་འབད་མི་གཅིག་གིས་ ཁོ་རང་གི་ཞིང་ཁར་སོན་ལེགས་ཤོམ་བཏབ་བཞག་མི་དང་འདྲ། 25དེ་འབདཝ་ད་ སོན་བཏབ་བཞག་སྦེ་ ནུབ་མོ་མི་ག་ར་ཉལ་ཚརཝ་ད་ ཁོ་གི་དགྲ་དེ་འོངས་ཏེ་ དཀར་སོན་གྱི་སྦུག་ལུ་ གཡུར་མ་གི་སོན་ཡང་བཏབ་བཞག་ཡར་སོང་ནུག 26ལོ་ཐོག་དཀར་ཚུ་ཡར་སྐྱེས་ཏེ་ཧིང་མགོ་འཐོནམ་ད་ གཡུར་མ་དེ་ཚུ་ཡང་སྐྱེས་ཏེ་སྦོམ་འགྱོ་ནུག 27ཞིང་གི་སྦྱིན་བདག་གི་གཡོགཔོ་ཚུ་ཁོ་ཡོད་སར་འོངས་ཏེ་ ཁོ་ལུ་ནཱ་གི་ཞིང་ཁར་ལུ་སོན་བཏབ་ད་ དཀར་གྱི་སོན་རྐྱངམ་གཅིག་བཏབ་བཏབ་ཨིན་མེན་ན་ དེ་སྦེ་ཨིན་པ་ཅིན་ ཨ་ནི་གཡུར་མ་ཚུ་ག་དེ་སྦེ་སྐྱེས་སྐྱེསཝ་ཨིན་ན་ཟེར་ཞུཝ་ད། 28སྦྱིན་བདག་གིས་ལན་ དེ་དགྲ་བྱང་ཕྱད་ཀྱིས་འབད་འབདཝ་ཨིན་མས་ཟེར་སླབ་ད་ གཡོགཔོ་ཚུ་གིས་ང་བཅས་ཞིང་ཁར་སོང་སྟེ་ གཡུར་མ་ཚུ་འབལ་ཏེ་བཀོག་ད་ག་ཟེར་ཞུཝ་ད། 29ཁོ་གིས་ལན་ འབལ་བཀོ་ནི་མེན་ ག་ཅི་སྨོ་ཟེར་བ་ཅིན་ ཁྱེད་ཀྱིས་གཡུར་མ་འབལཝ་ད་ ལོ་ཐོག་ལུ་སྐྱོན་བརྐྱབ་འོང་། 30ལོ་ཐོག་མ་འཚོ་ཚུན་ཚོད་གཉིས་ཆ་རང་དེ་སྦེ་བཞག་ ལོ་ཐོག་བརྔཝ་ད་ང་གིས་ལས་མི་ཚུ་ལུ་ ཧེ་མ་རང་གཡུར་མ་དེ་ཚུ་བརྔ་སྟེ་ ཆག་པ་བསྡམ་ཞིན་ན་ མེ་བཏང་ནི་སྦེ་བཞག་ དེ་ལས་ལོ་ཐོག་དཀར་བརྔ་སྟེ་ ངེ་གི་མཛོད་ཁང་ནང་བླུགས་ཟེར་སླབ་ནི་ཨིན་ཟེར་གསུངས་ནུག།
པད་དཀར་སོན་གྱི་དཔེ་གཏམ།
31ད་རུང་ཡེ་ཤུ་གིས་ཁོང་ལུ་དཔེ་གཏམ་གཞན་གཅིག་དེ་སྦེ་གསུངས་ནུག་ ཞིང་ཁམས་ཀྱི་རྒྱལ་སྲིད་དེ་ མི་གཅིག་གིས་པད་དཀར་གྱི་སོན་འབག་སྟེ་ ཁོ་རང་གི་ཞིང་ནང་བཏབ་མི་བཟུམ་གཅིག་ཨིན། 32པད་དཀར་གྱི་སོན་དེ་ སོན་ག་ར་ལས་ཆུང་ཀུ་གཅིག་ཨིན་རུང་ དེ་ཡར་སྦོམ་མིའི་བསྒང་ལས་ ལྡུམ་ར་ནང་གི་པད་དཀར་ཤིང་དེ་ ག་ར་ལས་སྦོམ་འགྱོ་སྟེ་ ཞལ་ལག་གུ་བྱི་ཅུང་ཚུ་ཆགས་ཏེ་སྡོདཔ་ཨིན།།
བུལ་ཏོག་གི་དཔེ་གཏམ།
33ད་རུང་ཡེ་ཤུ་གིས་ཁོང་ལུ་དཔེ་གཏམ་གཞན་གཅིག་དེ་སྦེ་ ཞིང་ཁམས་ཀྱི་རྒྱལ་སྲིད་འདི་ ཨམ་སྲུ་གཅིག་གིས་ཕྱེ་བྲེ་གསུམ་ནང་ལུ་ བུལ་ཏོག་སླ་བསྲེས་བརྐྱབས་ཏེ་ ཡར་མ་སྦོས་ཚུན་ཚོད་ བཞག་མི་དང་འདྲ་ཟེར་གསུངས་ནུག།
དཔེ་གཏམ་མེད་པར་ཆོས་མ་གསུངས་པའི་སྐོར།
34ཡེ་ཤུ་གིས་མི་དམངས་ལུ་ ཆོས་ག་ར་དཔེ་གཏམ་གྱི་ཐོག་ལས་སྦེ་གསུངས་ཏེ་ དཔེ་གཏམ་མེད་པར་ཁོ་གིས་ཁོང་ལུ་ཆོས་ག་ནི་ཡང་མ་གསུངས་པས། 35དེ་སྦེ་བྱུང་མི་དེ་ དཀོན་མཆོག་གིས་ཧེ་མ་ལུང་སྟོན་པ་ལས་སྦེ་རྒྱུད་དེ་གསུངས་དོཝ་བཟུམ་སྦེ།
ང་གིས་དཔེ་གཏམ་ནང་ལས་སྦེ་ཁ་སླབ་ཨིན་ ང་གིས་འཇིག་རྟེན་བཀོད་པའི་བསྒང་ལས་ གསང་བཞག་མིའི་ལོ་རྒྱུས་འདི་ འགྲེལ་བཤད་བརྐྱབ་ནི་ཟེར་#༡༣:༣༥། མགུར་མ་ ༧༨:༢།
གསུངས་མི་འདི་ལུང་བསྟན་གྲུབ་ནུག།
གཡུར་མ་སྐྱེས་པའི་དཔེ་གཏམ་གྱི་འགྲེལ་བཤད།
36དེ་ལས་ཡེ་ཤུ་མི་དམངས་དང་ཁ་འབྱལ་ཏེ་ ཁོ་རའི་གཟིམ་ཅུང་ནང་འབྱོནམ་ད་ ཁོ་གི་སློབ་མ་ཚུ་ཁོ་བཞུགས་སར་བཅར་ཏེ་ དཀར་ཞིང་ནང་གཡུར་མ་སྐྱེས་མིའི་དཔེ་གཏམ་གྱི་སྐོར་ལས་ ང་བཅས་ལུ་འགྲེལ་བཤད་རྐྱབ་གནང་ཟེར་ཞུཝ་ད། 37དེའི་ལན་ལུ་ཡེ་ཤུ་གིས་ སོན་ལེགས་ཤོམ་བཏབ་མི་དེ་ མིའི་བུ་ཁོ་ཨིན། 38ས་ཞིང་དེ་འཛམ་བུ་གླིང་ཨིན་ སོན་ལེགས་ཤོམ་འདི་རྒྱལ་སྲིད་ཀྱི་སྲས་དང་སྲསམོ་ཚུ་ཨིན་ དེ་ལས་གཡུར་མ་འདི་ཚུ་བདུད་ཀྱིས་བུ་དང་བུམོ་ཚུ་ཨིན། 39གཡུར་མ་གི་སོན་བཏབ་མི་དགྲ་བྱང་ཕྱད་འདི་བདུད་ཨིན་ ལོ་ཐོག་བརྔ་བའི་དུས་དེ་ འཛམ་བུ་གླིང་གི་མཐའན་མཇུག་གི་དུས་ཨིན་ ལོ་ཐོག་བརྔ་མི་དེ་ཕོ་ཉ་ཚུ་ཨིན། 40གཡུར་མ་ཚུ་འབལ་ཏེ་ མེ་གཏང་བཀོ་དོཝ་བཟུམ་སྦེ་ མཐའན་མཇུག་གི་དུས་ལུ་དེ་སྦེ་འབྱུང་ནི་ཨིན། 41མིའི་བུ་གིས་ཕོ་ཉ་ཚུ་བཏང་སྟེ་ ངན་པ་འབད་མི་ཚུ་དང་ གཞན་ལུ་སྡིག་པའི་ལཱ་འབད་བཅུག་མི་ཆ་མཉམ་རང་ ཁོ་གི་རྒྱལ་སྲིད་ནང་ལས་ཕྱི་ཁར་བཏོན་སྦེ། 42ཁོང་ལུ་མེ་ཐབ་ནང་བཀོག་སྟེ་ ཁོང་འདི་ནང་སོ་བརྡར་ཏེ་སྔུ་སྡོད་འོང་། 43དེ་ལས་ཆོས་སེམས་ཡོད་མི་ཚུ་ ཁོང་གི་ཡབ་ཀྱི་རྒྱལ་སྲིད་ན་ཉིམ་ཤར་དོཝ་བཟུམ་སྦེ་ཤར་སྡོད་ནི་ཨིན་ ག་ལུ་ཉན་ནི་གི་རྣམ་ཅོག་ཡོད་མི་དེ་གིས་ཉན་ཤིག་ཟེར་གསུངས་ནུག།
གཏེར་སྦ་བཞག་མིའི་དཔེ་གཏམ།
44ད་རུང་ཡེ་ཤུ་གིས་ ཞིང་ཁམས་ཀྱི་རྒྱལ་སྲིད་དེ་ ཞིང་གཅིག་ན་གཏེར་སྦ་བཞག་མི་དང་འདྲ་ མི་གཅིག་གིས་གཏེར་དེ་ཐོབ་ད་ ཁོ་གིས་ད་རུང་དེ་སྦ་བཞག་སྟེ་ ཁོ་གནམ་མེད་ས་མེད་སེམས་དགའ་སོང་ཞིནམ་ད་ ཁོ་ནང་ག་ཡོད་མི་དེ་ཚུ་བཙོང་སྦེ་ གཏེར་ཡོད་མིའི་ཞིང་འདི་ཉོཝ་ཨིན་ཟེར་གསུངས་ནུག།
མུ་ཏིག་ཚོང་དཔོན་གྱི་དཔེ་གཏམ།
45ད་རུང་ཡེ་ཤུ་གིས་ ཞིང་ཁམས་ཀྱི་རྒྱལ་སྲིད་དེ་ ཚོང་དཔོན་གཅིག་གིས་མུ་ཏིག་ལེགས་ཤོམ་འཚོལ་མི་དང་འདྲ། 46ཁོ་གིས་རིན་གོང་སྦོམ་གྱི་མུ་ཏིག་གཅིག་ཐོབ་ད་ ཁོ་སོང་ཞིནམ་ད་ ཁོ་ནང་ག་ཡོད་མི་དེ་ཚུ་བཙོང་སྦེ་ མུ་ཏིག་འདི་ཉོཝ་ཨིན་ཟེར་གསུངས་ནུག།
ཉ་རོགསཔ་གི་དྲྭཝ་གི་དཔེ་གཏམ།
47ད་རུང་ཡེ་ཤུ་གིས་ ཞིང་ཁམས་ཀྱི་རྒྱལ་སྲིད་དེ་ ཉ་རོགསཔ་གིས་དྲྭཝ་མཚོ་ནང་བརྐྱབས་ཏེ་ ཉ་རིགས་མ་འདྲཝ་ལེ་ཤ་བཟུང་མི་དྲྭཝ་དང་འདྲ། 48དྲྭཝ་འདི་ཉ་གིས་གངམ་ད་ ཉ་རོགསཔ་ཚུ་གིས་མཚོའི་མཐའ་མ་ཐོན་ཞིནམ་ད་ མར་ས་ཁར་སྡོད་སྦེ་ ཉ་ལེགས་ཤོམ་ཚུ་སྦ་ཟེ་ནང་བཙུགས་ཏེ་ ཉ་ཟོགཔོ་ཚུ་ཕྱི་ཁར་བཀོཝ་ཨིན། 49ཨ་ནི་བཟུམ་སྦེ་རང་ འཛམ་བུ་གླིང་གི་མཐའན་མཇུག་ལུ་འབྱུང་ནི་ཨིན་ དེའི་སྐབས་ལུ་ཕོ་ཉ་ཚུ་འོངས་ཏེ་ ཆོས་སེམས་ཡོད་མི་ཚུ་གི་སྦུག་ལས་ ངན་པ་དེ་ཚུ་རང་ས་འཕྱལ་ཏེ། 50མི་ངན་པ་ཚུ་མེ་ཐབ་ནང་བཀོ་འོང་ ཁོང་དེ་ནང་སོ་བརྡར་ཏེ་སྔུ་སྡོད་འོང་ཟེར་གསུངས་ནུག 51ཡེ་ཤུ་གིས་ཁོང་ལུ་ ཁྱེད་ཆ་ཁྱབ་ཀྱིས་དཔེ་གཏམ་ཚུ་གི་དོན་དག་ག་ར་ ཧ་གོ་ཡི་ག་ཟེར་དྲི་བ་གསུངསམ་ད་ ཁོང་གིས་ཧ་གོ་ཡི་ལགས་ཟེར་ཞུ་ནུག 52དེ་ལས་ཁོ་གིས་ དེ་ལེགས་ཤོམ་ཨིན་ ཞིང་ཁམས་ཀྱི་རྒྱལ་སྲིད་ཀྱི་དོན་ལུ་ སྦྱོང་བརྡར་ཐོབ་མིའི་ བཀའ་ཁྲིམས་ཀྱི་སློབ་དཔོན་དེ་ཚུ་ རིན་གོང་ཆེ་བའི་རྒྱུ་ནོར་ཡོད་མི་སྦྱིན་བདག་བཟུམ་སྦེ་ཨིན་ ཁོ་གིས་ཁོ་རང་གི་བང་མཛོད་ནང་ལུ་བཞག་མི་རྒྱུ་ནོར་གསརཔ་དང་རྙིངམ་ཚུ་ བགོ་བཤའ་བརྐྱབ་ནི་སྦེ་ ཕྱི་ཁར་བཏོན་དོཝ་བཟུམ་སྦེ་ཨིན་ཟེར་གསུངས་ནུག།
ཡེ་ཤུ་ལུ་ཁོ་རའི་གཡུས་ཁའི་མི་ཚུ་གིས་མ་དགའ་བའི་སྐོར།
53ཡེ་ཤུ་གིས་ཨ་ནི་དཔེ་གཏམ་ཚུ་ག་ར་གསུངས་ཚརཝ་ད་ ཁོ་ལུང་ཕྱོགས་དེ་ཁར་ལས་ཐོན་བྱོན་ཏེ། 54ཁོ་རའི་ཡུལ་ཁྲོམ་ནང་ལུ་བྱོན་ཏེ་ སི་ན་གོག་ནང་ལུ་ཆོས་སྟོན་ནི་འགོ་བཙུགས་གནངམ་ད་ ཁོ་ལས་ཆོས་ཉན་མི་ཚུ་ག་ར་ཡ་མཚན་ཆེ་སྟེ་ ཨ་ནི་མི་དེ་གིས་ཨ་ནི་བཟུམ་གྱི་ཤེས་རབ་དང་ རྫུ་འཕྲུལ་བཏོན་ནི་གི་སྟོབས་ཤུགས་དེ་ཚུ་ ག་ལས་ཐོབ་ཐོབ་ཨིན་ན། 55ཁོ་ཤིང་བཟོ་བོ་གི་བུ་དེ་ཨིན་མེན་ན་ ཁོ་གི་ཨའི་ མཱིར་ཡམ་ ཁོ་གི་སྤུན་ཆ་ ཡ་ཀོབ་དང་ ཡོ་སེབ་ སི་མཱོན་ ཡུ་དཱས་དེ་ཚུ་ཨིན་མེན་ན། 56ཁོ་གི་སྲིངམོ་དེ་ཚུ་ང་བཅས་དང་གཅིག་ཁར་ཡོད་མེན་ན་ དེ་སྦེ་འབད་བ་ཅིན་མི་དེ་གིས་ ཨ་ནི་འདི་ཚུ་ག་ཏེ་ལས་ཐོབ་ཐོབ་ཨིན་ན་སྨོ་ ཟེར་གཅིག་གིས་གཅིག་ལུ་དྲིས་ཏེ། 57ཁོང་གིས་ཁོ་ལུ་སྣང་མེད་བརྩིས་ཏེ་ ཆ་མ་བཞག་པས་ དེ་ལས་ཡེ་ཤུ་གིས་ཁོང་ལུ་ ས་ཕྱོགས་གཞན་ཁར་ལུང་སྟོན་པ་ལུ་ཞེ་ས་འབདཝ་ཨིན་ དེ་འབདཝ་ད་ རང་གི་གཡུས་ཁ་དང་ རང་གི་ཁྱིམ་ནང་གི་བཟའ་ཚང་ཚུ་གིས་ ལུང་སྟོན་པ་ལུ་ཞེ་ས་མི་འབད་ཟེར་གསུངས་ནུག 58ཁོང་གིས་ཡེ་ཤུ་ལུ་དད་པ་མ་སྐྱེདཔ་ལས་བརྟེན་ཏེ་ ཁོ་གིས་དེ་ཁར་ལུ་རྫུ་འཕྲུལ་ལེ་ཤ་བཏོན་མ་གནང་པས།།
Zvasarudzwa nguva ino
མེ་ཐིའུ་ལེའུ་ 13: dzoD
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2012, Wycliffe Bible Translators, Inc. All rights reserved