അപ്പൊസലല 1
1
ലൂക്കോസ് ബേ്റെ ഒരു ബുക്ക് ഗൂഡി എ്ള്‌ദ്‌റാ്
1എന്ന് തേപലോസേ, ഏസു തന്ന് ബേലെ സെയ്യ പ്‌ഡിത്ത ണാള് തൊട്ട് മേലോഗാക്ക് പോഗമാട്ട്, താന് സെയ്‌ദ എല്ല കാര്യഗണ പറ്റിമ് പഡിസിനാദ്‌ണ പറ്റിമ് ണാന് മുദാത്തില്യ ബുക്കിലി എ്ള്‌ദി ബെത്തിര്‌ക്കേനല്ല. 2താന് തെരിന്തെ്ഡ്‌ത്ത അപ്പൊസലലാക്കെ സാമിണിഗാലിലി ഏസു അവാര് ഇനി സെയ്യ ഉള്ള ഒരൊരു ണായഗ സൊല്ലികൊഡുത്താ്. അദ്‌ക്ക് പ്‌റ അയാള്‌ണ സാമി മേലോഗാക്കെ എ്ഡ്‌ക്കാമ് സെയ്‌ദാ്. 3അയാള് സത്ത പ്‌റ താന് അവാര്‌ക്ക് ണാപ്പദ് ണാളിലി എത്തിന്യൊ ജമ്പ് ബെ്ളിപട്ടാ്. താന് ഉജുറോഡെ ഇര്‌ക്കെ എന്ത് അവാര്‌ക്ക് ഒരു സന്തേഗാമ് ഇല്ലാത്തപഡി സെരിക്ക്‌മ് കാട്ടി കൊഡുത്താ്. അച്ചെ ഏസുദ് സൊല്ലുപഡി ണഡാക്കവാര് ഏസുണ കണ്ടാര്. ഏസു അവാര്‌ക്ക് സാമി ആള്യ പോരാദ്‌ണ പറ്റി സൊല്ലികൊഡുക്കാമ് സെയ്‌ദാ്. 4അച്ചെ തമ്മ ഒന്റായിര്‌ക്കാട്ടി ഏസു ഇച്ചെ സൊന്നാ്: <<ണിമ്മ എര്‌സലേമ്‌ണ ബ്‌ട്ട് പോഗ ബേ്ഡ. എന്ന് അപ്പാ് ണിമാക്ക് തരുവെ എന്ത് ബാക്ക് തന്താദ്‌ണ കെ്ഡേക്കമാട്ട് അദിലിതാനെ ഇരിരി. അദ്‌ണ പറ്റി ണാന് ണിമാക്കെ സൊല്ലിര്‌ക്കേനല്ല. 5ഓഗന്നാ് ആള്‌ഗണ തണ്ണിക്കെ മുളുഗിസിനാ്. ആന ഒരു ലേസ ണാള് പോന പ്‌റ ണിമാണ സാമിണിഗാലിലി മുളുഗ്‌സ്‌വാ്.>>
ഏസുണ മേലോഗാക്കെ എ്ഡ്‌ക്കാ്
6ഏസുമ് അപ്പൊസലലാമ് ഒന്റായിര്‌ക്കാട്ടി അവാര് ഏസുണ ഇച്ചെ കേ്ട്ടാര്: <<ആണ്ടവാനെ, ഈ കാലാത്തിലിത്തേഗ ണീ ഇസ്‌റേല്‌ക്കാറാര്‌ക്ക് അവാര്‌ദ് ണാഡ്‌ണ തിലിപ്പി എ്ഡ്‌ത്ത് കൊഡുക്കാദ്?>>
7അക്കുളെ ഏസു അവാര്‌ക്കെ ഇച്ചെ സൊന്നാ്: <<ഇദ്‌ദ് ണാള്‌മ് ഗള്യേമ് എന്ന് അപ്പനാന സാമി തന്ന് അദിഗാരത്തിലി ഒരിക്കി ബെത്തിര്‌ക്കാ്. അദ് ഒന്റുണാമ് ണിമ്മ തെര്യ ബേ്ഡ. 8ആന സാമിണിഗാല് ണിമാക്ക് ബന്ത് ഏ്റ്‌ഗാട്ടി ണിമാക്ക് ണല്ല ബില കെ്ഡേക്കു. അക്കുളെ എര്‌സലേമ് ണാഡിലിമ്, എഗുദ ണാഡ്‌ദ് എല്ല പട്ടിലിമ് സമര്യ ണാഡിലിമ് എനാണ പറ്റി ണിമ്മ സൊല്ലുവേര്. പിന്നെ ബൂമിലിര്‌ക്ക എല്ല എ്ഡേഗാക്കേമ് പോയി എനാണ പറ്റി സൊല്ലുവേര്.>>
9ഇച്ചെ സൊല്ലി തീന്താദ്‌മ് അവാര് ഏസുണ ണോഡിര്‌ക്കാട്ടി താനെ, അവാന സാമി മേലോഗാക്കെ എ്ഡ്‌ത്താ്. അക്കുളെ ഒരു മഞ്ച് ബന്ത് മറേത്ത്‌ദ് അച്ചെ അവാര്‌ക്ക് ഏസുണ കാട്ടാദായെക്കിറ്റ്.
10ഏസു മേലോഗാക്കെ പോനാദ്‌ണ ഏസുദ് സൊല്ലുപഡി ണഡാക്കവാര് സൊക്കാന ണോഡി ഇര്‌ന്താര്. അക്കുളെ ബെ്ള്ളെ ഉഡുപ്പ് ഇക്കിന റണ്ട് ആമ്പ്‌ളെഗ ണെലെമനെ അവാര്‌ദ് മുന്തുക്ക് ബന്ത് ണിന്റ് അവാര്‌ക്കെ ഇച്ചെ സൊന്നാര്: 11<<അല ഗെലീലെക്കാറാരെ, എന്ത്‌ക്ക് ണിമ്മ ഇദിലി ണിന്റ് ബാന്‌ണ ണോഡിര്‌ക്കാദ്? ണിമ്മ് പട്ടിലിര്‌ന്ത് ഏസുണ മേലോഗാക്കെ എ്ഡ്‌ത്താ്. ഈ ഏസു മേലോഗാക്കെ പോനാദ്‌ണ ണിമ്മ കണ്ട പാസെതാനെ അവാ് പിന്നേമ് തിലിമ്പി ബരുവാ്.>>
ജൂദാന്‌ക്ക് ബന്ത് ബേ്റെ ഒരുത്താന എ്ഡ്‌ക്കാര്
12അദ്‌ക്ക് പ്‌റ അവാര് ഒലിവ് മലേലി ഇര്‌ന്ത് എര്‌സലേമ്‌ക്ക് തിലിമ്പി പോനാര്. ഒലിവ് മലേലിര്‌ന്ത് എര്‌സലേമ്‌ക്ക് ഒരു മുക്ക മയില് ദൂര ഇര്‌ക്കു. 13അവാര് പട്ടണാക്ക് എജ്ജിനാദ്‌മ് തമ്മ മുദ ഇര്‌ന്ത കൂരേക്ക് പോനാര്. പത്ത്‌റോസ്, ആക്കോവു, ഓഗന്നാ്, അന്ത്‌റോസ്, പീലിപ്പോസ്, തോമാസ്, ബറ്‌ത്തലാമായി, മത്തായി, അല്‌പ്പായിദ് മഗാ് ആക്കോവു, തന്ന് ജാദിഗാക്ക് എന്ത സെയ്യാമ് ഗട്ടിക്കാറാനാന സീമോന്, ആക്കോവു മഗാ് ജൂദാ് എങ്ക ഇവാര്‌ത്തെ അയ്യി ആള്‌ഗ. 14അച്ചെ അപ്പൊസലല എല്ലാര്‌മ് ഒന്റായി എപ്പ്‌മ് പരേസിര്‌ന്താര്. ഇവാര്‌ദൊപ്പ ഏസുദ് അവ്വെ മറിയാമ്, ഏസുദ് തമ്പിലാമ്, ബേ്റെ പെ്ണ്ണ്‌മക്കഗാമ് ഇര്‌ന്തിര്‌ന്താര്.
15ഒരു ലേസ ണാള് പോന പ്‌റ ഒപ്പത്തപ്പ ണൂറ്റി ഇരുവദ് ഏസുക്കാറാര് എ്ണേന്ത് ഒരു മദ്ദേസ ബെത്താര്. അയ്യി കൂട്ടാത്തിലി പത്ത്‌റോസ് എ്ന്ത് ണിന്റ് ഇച്ചെ സൊന്നാ്: 16<<ഏസുക്കാറാരെ, ഏസുണ പ്‌ഡിക്ക്യ ബന്ത ആള്‌ഗണ ജൂദാ് ഏസു പട്ട്‌ക്ക് കൂട്ടി എ്ഡ്‌ത്ത് പോനാ്. അയാള്‌ണ പറ്റി ദാവീദ് പാട്ടാന്‌ക്ക് സാമിണിഗാല് സൊല്ലിസി ഇര്‌ക്കാദ് സാമി ബുക്കിലി എ്ള്‌ദി ബെത്തിര്‌ക്ക പാസെ ണഡാന്ത്‌ദ്. 17അയാള് എമ്മ് കൂട്ടാത്തിലി പട്ടവാ് ആയിര്‌ന്താ്. അയാള് സാമിക്ക് ബേ്ണ്ടി ബേലെ സെയ്യ എമ്മ്‌ദ് ഒപ്പ തെരിന്തെ്ഡ്‌ത്തവാന്‌മ് ആയിര്‌ന്താ്.>>
18(ആന അവാ് കെ്ട്ടാദ് സെയ്‌ദാദ്‌ക്ക് പണ കെ്ഡേത്ത്‌ദ്. അയ്യി പണാക്ക് അയാള് ലേസ ഗദ്ദെ ബാങ്കിനാ്. അദേ ഗദ്ദേലിതാനെ അവാ് ബ്‌ന്ത് ബേ്റ് പ്‌ക്കി പണ്ടകുഡാര് ബെ്ള്യെ കഡാന്ത് സത്തെക്കിനാ്. 19ഇച്ചെ ആനാദ്‌ണ എര്‌സലേമിലി ഇര്‌ക്ക എല്ലാര്‌ക്ക്‌മ് തെരിന്ത്‌ദ്. അവാര് അയ്യി ഗദ്ദെന തമ്മ് ണായാത്തിലി <<സോരെ ഗദ്ദെ>> എന്ത് അര്‌ത്ത ഇര്‌ക്ക അക്കല്‌ദാമ എന്ത് പേര് ബെത്താര്.)
20<<സാമി പാട്ട് ബുക്കിലി,
<അയാള്‌ദ് കൂരേലി ഒന്റുമ് ഇല്ലാദെ ഇര്‌ക്കുഡൊ,
അയാള്‌ദ് കൂരെ ബ്‌ട്ടകൂരെ ആയെക്കുഡൊ,>#സാമി പാട്ട് ബുക്ക് 69:25
എന്ത്‌മ്
<അയാള്‌ക്ക് ഇര്‌ന്ത പദാവിപട്ട ബേ്റെ ആള്‌ക്ക് കൊഡുക്കുഡൊ>#സാമി പാട്ട് ബുക്ക് 109:8
എന്ത്‌മ് എ്ള്‌ദി ബെത്തിര്‌ക്ക്‌ദ്.
21അദ്‌ണാലെ ആണ്ടവനാന ഏസു ഉജുറെ്ന്താദ് കണ്ടാദ്‌ണ ആള്‌ഗാക്ക് സൊല്ല്യ എമ്മോഡെ ഒരുത്താന ബേ്ഡു. 22ഓഗന്നാ് ആണ്ടവനാന ഏസുണ തണ്ണിക്ക് മുളുഗിസിന ണാള് തൊട്ട് ഏസു മേലോഗാക്കെ പോര ണാള്‌മാട്ട്‌മ് ണമ്മ് ഒപ്പ ഏസു ണഡാന്തിര്‌ന്താ്. അയ്യി കാലാത്തിഗ ണമ്മ്‌ദ് ഒപ്പ ണഡാന്തിര്‌ന്തവാ് ആയിര്‌ക്കുഡൊ ണമ്മ തെരിന്തെ്ഡ്‌ക്ക ആള്.>>
23അദ്‌ക്ക് അപ്പൊസലല ബറ്‌സേവാസ് എങ്ക ഓസേപ്‌ണാമ് (ഒസ്‌ത്തോസ് എന്ത്‌മ് അയാള്‌ക്ക് പേര് ഇര്‌ന്ത്‌ദ്) മത്ത്യാസ്‌ണാമ് ഒളേത്ത് ആള്‌ഗ മുന്തുക്ക് ണില്ലിസിനാര്. 24-25അദ്‌ക്ക് പ്‌റ അവാര് ഇച്ചെ പരേസിനാര്: <<മന്‌സാര്‌ദ് ണെനേപ്പ്‌ണ തെരിര ആണ്ടവാനെ, ണീ കൊഡുത്ത ബേലെന തള്ളി ജൂദാ് തനാക്ക് തഗ്‌ന്ത എ്ഡേക്ക് പോനാ്. അദ്‌ണാലെ അയാള്‌ക്ക് ബദ്‌ള് ഇവാര് റണ്ട് ആളിലി ണീ തെരിന്തെ്ഡ്‌ത്ത അപ്പൊസലാ് ആര് എന്ത് എമാക്ക് കാട്ടി തരുഡോമെ.>> 26അച്ചെ അവാര് പേര്‌ക്ക് ണറ്‌ക്ക് ബീ്ത്തിനാര്. ണറ്‌ക്ക് മത്ത്യാസ്‌ക്ക് ബ്‌ന്ത്‌ദ്. പ്‌റ ഇയാള്‌ണ പദിണൊണ്ണ് അപ്പൊസലലാക്കെ എജേത്താര്.
Zvasarudzwa nguva ino
അപ്പൊസലല 1: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature