ഓഗന്നാ് 18
18
ഏസുണ പ്‌ഡിക്കാര്
1ഇച്ചെ പരേസി തീന്ത പ്‌റ ഏസു തന്ന് സൊല്ലുപഡി ണഡാക്കവാര്‌ണാമ് കൂട്ടി കെദ്‌റോന് അഡിബാരാദ് അയ്യേ്ട്ടി പോനാ്. അവാന്‌മ് തന്ന് സൊല്ലുപഡി ണഡാക്കവാര്‌മ് അദിലിര്‌ന്ത ഒരു ദോട്ടാക്കുള്ളുക്ക് പോനാര്.
2ഏസുമ് തന്ന് സൊല്ലുപഡി ണഡാക്കവാര്‌മ് അദ്‌ക്കെ എ്ഡേക്കെ്ഡേക്ക് പോയികൊണ്ട് ഇര്‌ന്താദ്‌ണാലെ അയാള്‌ണ കാട്ടി കൊഡുത്ത ജൂദാന്‌ക്ക്‌മ് അയ്യി എ്ഡെ തെരിന്തിര്‌ന്ത്‌ദ്. 3അച്ചെ ജൂദാ് പഡെഗണാമ് എഗുദ പൂസാരി തലെവലാമ് പരിസലാമ് സൊല്ലിബ്‌ട്ട സാമികൂരെ കാവക്കാറാര്‌ണാമ് കൂട്ടി ബന്താ്. അവാര് ബ്‌ളാക്ക്‌ഗാമ് സൂട്ടെഗാമ് പ്‌ഡിത്ത്‌കൊണ്ട് ബാള്‌ഗണാമ് തഡിഗാണാമ് എ്ഡ്‌ത്ത്‌കൊണ്ട് അദ്‌ക്കെ ബന്താര്.
4തനാക്ക് ണഡാക്ക്യ പോര കാര്യഗണൊട്ടുക്ക് തെരിന്താദ്‌ണാലെ ഏസു ബെ്ള്യെ പോയി: <<ണിമ്മ ആര്‌ണ പരാക്കേര്?>> എന്ത് അവാര്‌ണ കേ്ട്ടാ്.
5<<ണസറത്ത്‌ക്കാറാ് ഏസുണാത്തെ>> എന്ത് അവാര് സൊന്നാര്.
അക്കുളെ ഏസു <<ണാന്‌ത്തെ അവാ്>> എന്ത് സൊന്നാ്. ഏസുണ കാട്ടി കൊഡുക്ക്യ പോര ജൂദാന്‌മ് അവാര്‌ദ് ഒപ്പ അദിലി ണിന്റ് ഇര്‌ന്താ്. 6ഏസു ണാന്‌ത്തെ എന്ത് സൊന്നാദ്‌മ് അവാര് പിന്ന്‌ക്ക് പിന്ന്‌ക്ക് പോയി മറ്‌ന്ത് കൊഡുത്താര്.
7ഏസു പിന്നേമ് അവാര്‌ണ കേ്ട്ടാ്: <<ണിമ്മ ആര്‌ണ പരാക്കേര്?>>
<<ണസറത്ത്‌ക്കാറാ് ഏസുണാത്തെ>> എന്ത് അവാര് സൊന്നാര്.
8<<ണാന്‌ത്തെ അവാ് എന്ത് ണിമാക്കെ സൊന്നേനല്ല? എനാണാത്തെ പരാക്കദാനാക്കി ഇവാര്‌ണ പോയ ബ്‌ഡിരി>> എന്ത് ഏസു അവാര്‌ക്കെ സൊന്നാ്. 9<<ണീ എനാക്ക് തന്തിര്‌ക്കവാരിലി ആര്‌മ് കെ്ട്ട് പോഗാലെ>>#ഓഗന്നാ് 6:39 എന്ത് താന് സൊന്ന ബാക്ക് അദേപഡി ണഡാക്ക്യ ബേ്ണ്ടിത്തെ ഏസു ഇച്ചെ സൊന്നാദ്.
10അക്കുളെ സീമോന് പത്ത്‌റോസ് തന്നോഡെ ഇര്‌ന്ത ബാള്‌ണ ഊരി എ്ഡ്‌ത്ത് പോയി എഗുദ ബെല്ല്യ പൂസാരിദ് ബേലെക്കാറാന്‌ദ് ബല കാദ്‌ണ സെത്തി എ്ഡ്‌ത്തെക്കിനാ്. അയ്യി ബേലെക്കാറാന്‌ദ് പേര് മല്‌ക്കോസ് എന്ത്‌ത്തെ.
11ഏസു പത്ത്‌റോസ്‌ക്കെ: <<ണിന്ന് ബാള്‌ണ ഒറേക്ക് ഇക്ക്, അപ്പനാന സാമി എനാക്ക് തന്തിര്‌ക്ക കജട്ടമാന സെമ്പിലിര്‌ന്ത് ണാന് കുഡിക്കുഡൊമല്ല?>> എന്ത് സൊന്നാ്.
ഏസുണ അന്നാസ്‌ദ് പട്ട്‌ക്ക് എ്ഡ്‌ത്ത് പോരാര്
12പ്‌റ പഡെഗാമ് പഡെതലെവാന്‌മ് സാമികൂരെ കാവക്കാറാര്‌മ് ഏസുണ പ്‌ഡിത്ത് കെ്ട്ടി, 13മുദ അന്നാസ്‌ദ് പട്ട്‌ക്കെ എ്ഡ്‌ത്ത് പോനാര്. ഇയാള് അയ്യി ബര്‌സാത്തില്യ എഗുദ ബെല്ല്യ പൂസാരി ആയിര്‌ന്ത കയ്യപ്പാവുദ് മാമനച്ചാ് ആയിര്‌ന്താ്. 14ആള്‌ഗാക്ക് ബേ്ണ്ടി ഒരുത്താ് സാരാദ് ണല്ലാദ്‌ത്തെ എന്ത് എഗുദാര് തലെവലാക്കെ സൊന്നവാ് ഈ കയ്യപ്പാവുത്തെ.
പത്ത്‌റോസ് ഏസുണ തെര്യ എന്ത് സൊല്ലുറാ്
15സീമോന് പത്ത്‌റോസ്‌മ് ഏസുദ് സൊല്ലുപഡി ണഡാക്ക ബേ്റെ ഒരുത്താന്‌മ് ഏസുദ് പിന്ന്‌മേലെ പോനാര്. ഏസുദ് സൊല്ലുപഡി ണഡാക്ക അയ്യി ബേ്റെ ഒരുത്താ് എഗുദ ബെല്ല്യ പൂസാരിക്ക് ണല്ല പളാക്കുള്ളവാ് ആയിര്‌ന്താ്. അദ്‌ണാലെ അയാള് ഏസുദ് ഒപ്പ എഗുദ ബെല്ല്യ പൂസാരി കൂരേദ് ണഡ് കളമാട്ട് പോനാ്. 16ആന പത്ത്‌റോസ് ണഡ് കളാക്ക് കഡാക്ക ബാസാക്ക് ബെ്ള്യെ താനെ ഇര്‌ന്താ്. അക്കുളെ എഗുദ ബെല്ല്യ പൂസാരിക്ക് പളാക്കുള്ളവാന്‌മ് ഏസുദ് സൊല്ലുപഡി ണഡാക്കവാന്‌മ് ആയിര്‌ന്ത അയ്യി ബേ്റൊരുത്താ് ബെ്ള്യെ ബന്ത് ബാസ കാവക്കാറ്‌സിക്ക് സൊല്ലി പത്ത്‌റോസ്‌ണ ഉള്ളുക്കു കൂട്ടി പോനാ്.
17അക്കുളെ അയ്യി ബാസ കാവക്കാറ്‌സി: <<ണീമ് ഇവാ് സൊല്ലുപഡി ണഡാക്കവാരിലി ഒരുത്താന?>> എന്ത് പത്ത്‌റോസ്‌ണ കേ്ട്ട.
അക്കുളെ പത്ത്‌റോസ്: <<ണാനല്ല>> എന്ത് സൊന്നാ്.
18അയ്യി ണാള് സളി ആയിര്‌ന്താദ്‌ണാലെ ബേലെക്കാറാര്‌മ് സാമികൂരെ കാവക്കാറാര്‌മ് തീബെ്ണ്ടിക്കി അദ്‌ക്ക് സുറ്റുമ് ണിന്റ് തീ കായിന്ത് കൊണ്ടിര്‌ന്താര്. അവാര്‌ദൊപ്പ പത്ത്‌റോസ്‌മ് ണിന്റ് തീ കായിന്ത് കൊണ്ടിര്‌ന്താ്.
എഗുദ ബെല്ല്യ പൂസാരി ഏസുണ കേ്ള്‌വി കേ്ക്കാ്
19അക്കുളെ ഏസുദ് സൊല്ലുപഡി ണഡാക്കവാര്‌ണ പറ്റിമ് ഏസു പഡ്‌സ്‌റ കാര്യഗണാമ് പറ്റിമ് എഗുദ ബെല്ല്യ പൂസാരി ഏസുണ കേ്ട്ടാ്.
20അക്കുളെ ഏസു: <<ണാന് എല്ലാര്‌ക്ക്‌മ് എദ്‌ക്കാത്തെ സൊല്ലിര്‌ക്കെ, എഗുദാര് പരേസ്‌റ കൂരെഗളിലിമ് എല്ല എഗുദാര്‌മ് ബന്ത് കൂഡ്‌റ സാമികൂരേലിമ് ണാന് ഒപ്പ പഡിസിര്‌ന്തെ. ണാന് ഒളിസി മറേസി ഒന്റുമ് സൊല്ലാലെ. 21ണീ എന്ത്‌ക്ക് എനാണ കേ്ള്‌വി കേ്ക്കാദ്? ണാന് സൊന്നാദ് എന്തായെന്റ് കേ്ട്ടിര്‌ന്തവാര്‌ണ കേ്ട്ട് ണോഡ്, ണാന് സൊന്നാദ് അവാര്‌ക്ക് തെരിദ്>> എന്ത് ബദ്‌ള് സൊന്നാ്.
22ഏസു ഇച്ചെ സൊല്ലുഗാട്ടി സാമികൂരെ കാവക്കാറാരിലി അവാ് അര്‌ഗെ ണിന്റിര്‌ന്ത ഒരുത്താ്: <<ഇച്ചെത്തേഗ എഗുദ ബെല്ല്യ പൂസാരിക്ക് ബദ്‌ള് സൊല്ലുറാദ്?>> എന്ത് സൊല്ലി ഏസുദ് പഗ്‌ഡ്‌ക്ക് ഒരു അഡി കൊഡുത്താ്.
23ഏസു അവാന്‌ക്ക്: <<ണാന് തപ്പായി എന്താറ്റൊന്റ് സൊല്ലിര്‌ന്താക്കി അദ് എന്തായെന്റ് ഇദിലിര്‌ക്കവാര്‌ക്ക് സൊല്ലികൊഡു. ആന ണാന് സൊന്നാദ് സെരി ആയിര്‌ന്താക്കി പിന്നെ എന്ത്‌ക്ക് എനാണ അഡിക്കാദ്?>> എന്ത് സൊന്നാ്. 24അക്കുളെ അന്നാസ് ഏസുണ കെ്ട്ടിനാദോഡെ താനെ എഗുദ ബെല്ല്യ പൂസാരി കയ്യപ്പാവു പട്ട്‌ക്കെ സൊല്ലിബ്‌ട്ടാ്.
പത്ത്‌റോസ് ഏസുണ തെര്യ എന്ത് പിന്നേമ് സൊല്ലുറാ്
25സീമോന് പത്ത്‌റോസ് തീ കായിന്ത് കൊണ്ട് ണിന്റിര്‌ക്കട്ടി: <<ണീമ് അവാന്‌ദ് സൊല്ലുപഡി ണഡാക്കവാരിലി ഒരുത്താ് അല്ലാഗ?>> എന്ത് ലേസ ആള്‌ഗ അവാന കേ്ട്ടാര്.
അക്കുളെ അവാ്: <<ണീ സൊന്നാദ് സെര്യല്ല>> എന്ത് സൊല്ലി <<അദ് ണാനല്ല>> എന്ത് സൊന്നാ്.
26എഗുദ ബെല്ല്യ പൂസാരിദ് ബേലെക്കാറാരിലി ഒരുത്താന്‌മ് പത്ത്‌റോസ് കാദ് സെത്തി തള്ളിനവാന്‌ദ് സൊന്തക്കാറാന്‌മാന ഒരുത്താ്: <<ണാന് ണിനാണ അയാള്‌ദ് ഒപ്പ ദോട്ടാത്തിലി ബെത്ത് കണ്ടെ>> എന്ത് സൊന്നാ്. 27അക്കുളെ പത്ത്‌റോസ് <<ണീ സൊന്നാദ് സെര്യല്ല>> എന്ത് പിന്നേമ് സൊന്നാ്. അപ്പ്‌താനെ കോയിമ് കൂഗിറ്റ്.
ഏസു പീലത്തോസ്‌ദ് മുന്തുക്ക്
28എഗുദാര് തലെവല ബെ്ഡ്യാകാലാത്തിലി താനെ കയ്യപ്പാവു പട്ടിലിര്‌ന്ത് ണാഡ് തലെവാ് കോട്ടെക്കെ ഏസുണ കൂട്ടി പോനാര്. ആന അവാര് തമ്മ് സട്ട്‌മെ്ട്ട്‌പഡി സീ്ണ്ട്‌റപഡാദെ ഇര്‌ക്ക്യ ബേ്ണ്ടി കോട്ടെക്കുള്ളുക്കെ പോഗാലെ. എന്ത്‌ക്കെന്റ സീ്ണ്ട്‌റപഡാദെ ഇര്‌ന്താത്തെ പെസഗെ സാപാഡ് തിന്ന്യ മുഡ്യു. 29അദ്‌ണാലെ പീലത്തോസ് ബെ്ള്യെ അവാര് പട്ട്‌ക്ക് ബന്ത്: <<ഇയാള്‌ക്ക് ണേരെ ണിമാക്ക് എന്ത കുറ്റ സൊല്ല്യ ഇര്‌ക്ക്‌ദ്>> എന്ത് കേ്ട്ടാ്.
30അക്കുളെ അവാര്: <<ഇവാ് കുറ്റ സെയ്യാദെ ഇര്‌ന്തിര്‌ന്ത എമ്മ ഇവാന ണിന്ന് പട്ട്‌ക്ക് എ്ഡ്‌ത്ത് ബന്തിര്‌ക്കമാട്ടേര്>> എന്ത് സൊന്നാര്.
31പീലത്തോസ് അവാര്‌ക്കെ: <<ണിമ്മ താനെ ഇയാള്‌ണ എ്ഡ്‌ത്ത് പോയി ണിമ്മ് സട്ടപഡി ഇയാള്‌ക്ക് ദണ്ടണെ ബിദിരി>> എന്ത് സൊന്നാ്.
അക്കുളെ എഗുദാര്: <<ഒരുത്താന കൊല്ലുറാദ്‌ക്കുള്ള അദിഗാര എമാക്ക് ഇല്ലെ>> എന്ത് സൊന്നാര്. 32അവാര് ഇച്ചെ സൊല്ലുഗാട്ടി താന് എച്ചെ സാവാ് എങ്കാദ്‌ണ പറ്റി ഏസു സൊന്ന കാര്യ അദേപഡി ണഡാന്ത്‌ദ്.
33പീലത്തോസ് പിന്നേമ് കോട്ടെക്കുള്ളുക്കെ പോയി ഏസുണ ഒളേത്ത് ബര്‌സി: <<ണീ എഗുദാര്‌ദ് റാജാവ?>> എന്ത് കേ്ട്ടാ്.
34അദ്‌ക്ക് ഏസു: <<ഇദ് ണീ താനെ ണെനേത്ത് സൊല്ലുറാദൊ? ഇല്ലെ ബേ്റെ ആരാറ്റ് എനാണ പറ്റി ണിനാക്കെ സൊല്ലി തന്തിര്‌ക്കാര?>> എന്ത് കേ്ട്ടാ്.
35അദ്‌ക്ക് പീലത്തോസ്: <<ണാന് ഒരു എഗുദാര് ജാദിക്ക് പട്ടവാന? ണിന്ന് കൂട്ടാര്‌മ് അവാര്‌ദ് പൂസാരി തലെവലാമ്‌ത്തെ എന്ന് പട്ട്‌ക്ക് ണിനാണ എ്ഡ്‌ത്ത് ബന്തിര്‌ക്കാദ്. ണീ എന്ത സെയ്‌ദെ?>>
36ഏസു അദ്‌ക്ക്: <<ണാന് ആള്‌റ ണാഡ് ഈ ഉലഗാക്കെ പട്ടാദല്ല. ണാന് ആള്‌റ ണാഡ് ഈ ഉലഗാക്കെ പട്ടിര്‌ന്തിര്‌ന്ത എനാണ എഗുദാര് കയ്യിക്കെ കൊഡുക്കാദിര്‌ക്ക്യ എന്ന് ബേലെക്കാറാര് എനാക്ക് ബേ്ണ്ടി പഡെ ബെ്ട്ടിര്‌ക്കുവാര്. ആന ണാന് ആള്‌റ ണാഡ് ഈ ഉലഗാക്ക് പട്ടാദല്ല>> എന്ത് ബദ്‌ള് സൊന്നാ്.
37പീലത്തോസ് അവാന: <<അപ്പ് ണീ റാജാവുത്തേഗ?>> എന്ത് കേ്ട്ടാ്.
അദ്‌ക്ക് ഏസു: <<സെരിത്തെ, ണീ സൊല്ലുറ പാസെത്തെ. ആന സെരിക്ക്‌മ് സത്ത്യണ പറ്റി ആള്‌ഗാക്ക് സൊല്ല്യ ബേ്ണ്ടിത്തെ ണാന് പ്‌റാന്താദ്. അദ്‌ക്ക് ബേ്ണ്ടി ഉലഗാക്ക് ണാന് ബന്ത്‌മിര്‌ക്കെ. സത്ത്യാക്ക് പട്ടവാനെല്ല എന്ന് ണായണ കേ്ക്കാ്>> എന്ത് ബദ്‌ള് സൊന്നാ്.
38<<സത്ത്യ എന്ത് സൊന്ന എന്ത?>> എന്ത് പീലത്തോസ് കേ്ട്ടാ്. പ്‌റ അവാ് പിന്നേമ് ബെ്ള്യെ എഗുദാര് തലെവലാദ് പട്ട്‌ക്ക് പോയി: <<ണാന് അവാനോഡെ ഒരു കുറ്റാമ് കാണാലെ. 39ആന ണിമാക്ക് ബേ്ണ്ടി എല്ല പെസഗെ ണോമ്പി ണാള്‌മ് ജെയിലിലിര്‌ന്ത് ഒരു ആള്‌ണ ണാന് ണിമാക്ക് ഇ്റാക്കി ബ്‌ട്ട് തരേനല്ല. ണാന് ണിമാക്ക് ആര്‌ണ ഇ്റാക്കി ബ്‌ട്ട് തരുഡൊ എന്ത് ണെനേക്കേര്? എഗുദാര്‌ദ് റാജാവുണാഗ?>> എന്ത് അവാര്‌ണ കേ്ട്ടാ്.
40അക്കുളെ അവാര്: <<ഇവാന ബേ്ഡ. ബറവാസ്‌ണ എമാക്ക് ഇ്റാക്കി ബ്‌ട്ട് തന്ത മദി>> എന്ത് ആലാത്ത് സൊന്നാര്. ആന ബറവാസ് എങ്കവാ് പ്‌ഡിങ്കിപറ്‌ത്ത് എ്ഡ്‌ക്ക ഒരുത്താ് ആയിര്‌ന്താ്.
Zvasarudzwa nguva ino
ഓഗന്നാ് 18: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature