ഓഗന്നാ് 20
20
ഏസു ഉജുറേ്റാ്
1ബാരാത്തില്യ മുദ ണാള് മദ്ദള പട്ടണക്കാറിസി മറിയ ബെ്ഡ്യാകാല ജാമാത്തിലി, ഇ്റ്‌ട്ട് ഇര്‌ക്കാട്ടി താനെ കല്ലളേക്കെ പോന. പോയി ണോഡുഗാട്ടി കല്ലളെ ബായിക്ക് അഡേത്ത് ബെത്തിര്‌ന്ത കല്ല്‌ണ ഉന്തി ജറേത്തിര്‌ക്കാദ്‌ണ കണ്ട. 2അദ്‌ണാലെ അവ ഓഡി പോയി സീമോന് പത്ത്‌റോസ്‌ദ്‌മ് ഏസു സീവാ് ബ്‌ട്ടിര്‌ന്തവാന്‌മ് ഏസുദ് സൊല്ലുപഡി ണഡാന്തിര്‌ന്തവാന്‌മാന ഇനി ഒരുത്താന്‌ദ്‌മ് പട്ട്‌ക്ക് പോയി: <<അവാര് ആണ്ടവാന കല്ലളേലിര്‌ന്ത് എ്ഡ്‌ത്ത് പോനാര്. അയാള്‌ണ അവാര് ഏദ്‌ക്ക് ബെത്താര് എന്ത് എമാക്ക് തെര്യ>> എന്ത് അവ സൊന്ന.
3അദ്‌ണാലെ പത്ത്‌റോസ്‌മ് ഏസുദ് സൊല്ലുപഡി ണഡാക്ക പിന്നെ ഒരുത്താന്‌മ് കല്ലളേക്കെ പോനാര്. 4റണ്ട് ആള്‌മ് ഒന്റായി ഓഡിനാര്. ആന ഏസുദ് സൊല്ലുപഡി ണഡാക്ക പിന്നെ ഒരുത്താ് പത്ത്‌റോസ്‌ണ ബ്‌ഡ ബേഗ ഓഡി കല്ലളേക്കെ മുദ എജ്ജിനാ്. 5അയാള് കല്ലളേന ബഗ്ഗി ണോഡിനാ് അക്കുളെ അദിലി സുറ്റി കെ്ട്ടിര്‌ന്ത ബെ്ഡിപ്പുള്ള സീലെന മാട്ട് ഇര്‌ക്കാദ്‌ണ കണ്ടാ്. ആന അയാള് ഉള്ളുക്ക് പുക്കാലെ. 6അയാള് പിന്ന്‌ക്ക് താനെ സീമോന് പത്ത്‌റോസ്‌മ് ബന്ത് കല്ലളേക്കുള്ളെ പുക്കി അദിലിര്‌ന്ത ബെ്ഡിപ്പുള്ള സീലെഗണ കണ്ടാ്. 7അദ്‌ദ് ഒപ്പ അയാള്‌ദ് തലേക്കെ സുറ്റിര്‌ന്ത തോറ്‌ത്ത മ്‌ണ്ട്‌മ് തന്ന് പാഡ്‌ക്ക് സുറുണ്ട് അലാക്ക ഇര്‌ക്കാദ്‌ണാമ് കണ്ടാ്. 8അദ്‌ക്ക് പ്‌റ, മുദ കല്ലളെ പട്ട്‌ക്ക് എജ്ജിന ഏസുദ് സൊല്ലുപഡി ണഡാന്ത പിന്നെ ഒരുത്താന്‌മ് ഉള്ളുക്ക് പുക്കി അവാ് അദ്‌ണ കണ്ട് ണമ്പിനാ്. 9അവാ് സത്തവാര് പട്ടിലിര്‌ന്ത് ഉജുറെ്ന്തുഡൊ എങ്ക സാമി സൊല്ലുസുലാക്കണ അന്നാരമാട്ട്‌മ് അവാര്‌ക്ക് ണെപ്പ്‌കെ്ഡേക്കാദെ ഇര്‌ന്ത്‌ദ്. 10അച്ചെ ഏസുദ് സൊല്ലുപഡി ണഡാക്കവാര് തമ്മ്‌ദ് കൂരെഗാക്കെ തിലിമ്പി പോനാര്.
ഏസു മദ്ദള പട്ടണക്കാറിസി മറിയാദ് കണ്ണ്‌ക്ക് കാട്ട്‌റാ്
11ആന മറിയ കല്ലളേക്ക് ബെ്ള്യെ താനെ ണിന്റ് അഗ്‌ദ് കൊണ്ടിര്‌ന്ത. അച്ചെ അഗ്‌ദ് കൊണ്ടിര്‌ക്ക ഗള്യേലി അവ കല്ലളെ കുള്ളുക്ക് ബഗ്ഗി ണോഡിന. 12ണോഡുഗാട്ടി ഏസു സാവുണ ക്‌ഡാത്തിര്‌ന്ത പട്ടിലി ബെ്ള്ളെ ഉഡുപ്പിക്കിന റണ്ട് സാമിദൂദല ഒരുത്താ് തലെസാരിമ് ഒരുത്താ് കാല് സാരിമ് ഇര്‌ക്കാദ്‌ണ കണ്ട.
13അവാര് അവാക്കെ: <<പൊമ്പുളേഗെ, ണീ എന്ത്‌ക്ക് അഗ്‌റെ>> എന്ത് കേ്ട്ടാര്.
അക്കുളെ അവ: <<എന്ന് ആണ്ടവാന അവാര് എ്ഡ്‌ത്ത് പോനാര്, അവാര് ഏദ്‌ക്കെ ബെത്താര് എന്ത് എനാക്ക് തെര്യ>> എന്ത് അവാര്‌ക്കെ സൊന്ന. 14ഇച്ചെ സൊല്ലി അവ പിന്ന്‌ക്ക് തിലിമ്പിന, അക്കുളെ ഏസു അദിലി ണിന്റ് ഇര്‌ക്കാദ്‌ണ കണ്ട. ആന അദ് ഏസു എന്ത് അവാള്‌ക്ക് തെര്യാലെ.
15ഏസു അവാണ: <<പൊമ്പുളെഗെ, ണീ എന്ത്‌ക്ക് അഗ്‌റാദ്? ണീ ആര്‌ണ പരാക്കെ?>> എന്ത് കേ്ട്ടാ്.
അയാള് ദോട്ടക്കാറാ്ത്തെ എന്ത് ണെനേത്ത് അവ അവാന്‌ക്കെ: <<പണ്ണാഡ്യെ, ണീ അവാന എ്ഡ്‌ത്ത് പോയിര്‌ന്താക്കി അവാന ഏദ്‌ക്ക് ബെത്തെ എന്ത് എനാക്ക് സൊല്ലി താ, ണാന് അവാന എ്ഡ്‌ത്ത് പോരെ>> എന്ത് സൊന്ന.
16അക്കുളെ ഏസു: <<മറിയ>> എന്ത് ഒളേത്താ്.
അവ അയാള് സാരി തിലിമ്പി ണോഡി, എവുറാര്‌ദ് ണായാത്തിലി: <<റബ്ബൂനി>> എന്ത് സൊന്ന. അദ്‌ദ് അര്‌ത്ത ഗുരുവെ എന്ത്‌ത്തെ.
17ഏസു അവാള്‌ക്കെ: <<ണീ എനാണ പ്‌ഡിക്കാദെ, എന്ത്‌ക്കെന്റ ണാന് ഇന്നാരമാട്ട്‌ക്ക്‌മ് അപ്പനാന സാമി പട്ട്‌ക്ക് തിലിമ്പി പോഗാലെ. ആന ണീ പോയി എന്ന് സൊല്ലുപഡി ണഡാക്കവാര്‌ക്കെ: <എന്ന് സാമിമ് എന്ന് അപ്പാന്‌മ് ണിമ്മ് അപ്പാന്‌മ് ണിമ്മ് സാമിമ് ആനവാ് പട്ട്‌ക്ക് ണാന് തിലിമ്പി പോരെ> എന്ത് സൊല്ലു>> എന്ത് സൊന്നാ്.
18മദ്ദള പട്ടണക്കാറിസി മറിയ ഏസുദ് സൊല്ലുപഡി ണഡാക്കവാര്‌ക്കെ പോയി, <<ണാന് ആണ്ടവാന കണ്ടെ>> എന്ത് സൊല്ലി ആണ്ടവാ് തനാക്ക് സൊന്ന കാര്യഗണാമ് അവാര്‌ക്കെ സൊന്ന.
ഏസു തന്ന് സൊല്ലുപഡി ണഡാക്കവാര്‌ദ് കണ്ണ്‌ക്ക് കാട്ട്‌റാ്
19ബാരാത്തിലി ഒണ്ണാവദ് ണാള് അന്ത്യോഡെ ഏസുദ് സൊല്ലുപഡി ണഡാക്കവാര് ഒന്റായി കൂരേലി ഇര്‌ക്കാട്ടി എഗുദാര്‌ണ അഞ്ചി അവാര് ബാസണ അഡേത്തിര്‌ന്താര്. അക്കുളെ ഏസു അവാര്‌ദ് ണഡ്‌ക്കെ ബന്ത് ണിന്റ്: <<ണിമ്മ ണിമ്മദ്യോഡെ ഇരിരി>> എന്ത് സൊന്നാ്. 20ഇച്ചെ സൊന്ന പ്‌റ ഏസു തന്ന് കയ്യിഗണാമ് അള്ളെനാമ് സൊല്ലുപഡി ണഡാക്കവാര്‌ക്കെ കാട്ടിനാ്. അവാര് ആണ്ടവാന കണ്ട് റമ്പ പിര്യപട്ടാര്.
21ഏസു പിന്നേമ് അവാര്‌ക്കെ: <<ണിമ്മ ണിമ്മദ്യോഡെ ഇരിരി, അപ്പനാന സാമി എനാണ സൊല്ലിബ്‌ട്ട പാസെ ണാന്‌മ് ണിമാണ സൊല്ലിബ്‌ഡ്‌റെ>> എന്ത് സൊന്നാ്. 22പ്‌റ ഏസു അവാര്‌ക്കെ ഊദിര്‌ന്ത്, ഇച്ചെ സൊന്നാ്: <<സാമിണിഗാല്‌ണ ണിമ്മ ഏറ്റ്‌കൊള്ളിരി. 23ണിമ്മ ആരാറ്റ്‌ദ് പാവഗണ പൊറുത്താക്കി അവാര്‌ദ് പാവഗാക്ക് പൊറിമെ കെ്ഡേക്കു. ണിമ്മ ആരാറ്റ്‌ദ് പാവഗണ പൊറുക്കാദെ ഇര്‌ന്താക്കി അവാര്‌ദ് പാവഗാക്ക് പൊറിമെ കെ്ഡേക്കമാട്ട.>>
ഏസുമ് തോമാസ്‌മ്
24ആന ഏസു അവാര്‌ദ് പട്ട്‌ക്കെ ബര്‌ഗാട്ടി, തന്ന് സൊല്ലുപഡി ണഡാക്ക പന്നന്റ് ആളിലി ദിദിമോസ് എങ്ക തോമാസ് അവാര്‌ദ് ഒപ്പ ഇര്‌ക്കാലെ. 25പ്‌റ ഏസുദ് സൊല്ലുപഡി ണഡാക്ക ബാക്ക്യുള്ളവാര് അവാന്‌ക്കെ: <<എമ്മ ആണ്ടവാന കണ്ടേര്!>> എന്ത് സൊന്നാര്.
അക്കുളെ അവാ്: <<ണാന് അവാന്‌ദ് കയ്യിഗളിലി ആണി അഡിത്ത ബണ്ട്‌ണ കണ്ട് എന്ന് ബിരാലിലി അദ്‌ണ അണ്ണി അവാന്‌ദ് അള്ളേക്കെ കയ്യിന ഇക്കിനാത്തെ ണാന് ണമ്പുവെ>> എന്ത് അവാര്‌ക്കെ സൊന്നാ്.
26എ്ട്ട് ണാള് കളിന്ത പ്‌റ ഏസുദ് സൊല്ലുപഡി ണഡാക്കവാര് പിന്നേമ് കൂരെക്കുള്ളുക്ക് ഒന്റായി ഇര്‌ക്കാട്ടി തോമാസ്‌മ് അവാര്‌ദ് ഒപ്പ ഇര്‌ന്താ്. ബാസ അഡേത്തിര്‌ക്കാട്ടി ഏസു ബന്ത് അവാര്‌ദ് ണഡ്‌ക്കെ ണിന്റിര്‌ന്ത്: <<ണിമ്മ ണിമ്മദ്യോഡെ ഇരിരി>> എന്ത് സൊന്നാ്. 27പ്‌റ തോമാസ്‌ണ: <<ണിന്ന്‌ദ് ബിരാലിലി ഇദ്‌ണ അണ്ണി എന്ന് കയ്യിഗണ ണോഡ്, ണിന്ന്‌ദ് കയ്യിന ണീ്ട്ടി എന്ന് അള്ളേക്കെ ഇക്ക്, ണമ്പിക്കില്ലാത്തവാ് ആഗാദെ ണമ്പിക്കെ ഉള്ളവാനായി ഇര്>> എന്ത് സൊന്നാ്.
28അക്കുളെ തോമാസ്: <<എന്ന് ആണ്ടവാനെ, എന്ന് സാമ്യെ!>> എന്ത് ഏസുക്കെ സൊന്നാ്.
29അക്കുളെ ഏസു അവാന്‌ക്കെ: <<ണീ എനാണ കണ്ടാദ്‌ണാലെ ണമ്പിനെ. ആന എനാണ കാണാദെ ണമ്പ്‌റവാര് ബാഗ്യക്കാറാര്>> എന്ത് സൊന്നാ്.
30ഈ ബുക്ക്‌ക്കെ എ്ള്‌ദിര്‌ക്കാദ് അല്ലാദെ താനെ ബേ്റെ എത്തിന്യൊ അദിസ്യമാന അഡ്യാളഗാമ് ഏസു തന്ന് സൊല്ലുപഡി ണഡാക്കവാര്‌ദ് കണ്ണ് മുന്തുക്ക് സെയ്‌ദിര്‌ക്കാ്. 31ആന സാമിമഗനാന ക്‌റ്‌സ്‌ത്ത്‌ത്തെ ഏസു എന്ത് ണിമ്മ ണമ്പ്യാമ് അച്ചെ ണമ്പി അവാന്‌ദ് പേരിലി ണിമാക്ക് ഉജുറു കെ്ഡേക്ക്യാമ് ബേ്ണ്ടിത്തെ ഈ കാര്യഗണെല്ല എ്ള്‌ദിര്‌ക്കാദ്.
Zvasarudzwa nguva ino
ഓഗന്നാ് 20: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature