ലൂക്കോസ് 20
20
ഏസുക്കിര്‌ക്ക അദിഗാരണ പറ്റി കേ്ക്കാര്
1ഒരു ണാള് സാമികൂരേലി ഏസു ആള്‌ഗാക്ക് പഡിസികൊണ്ട്‌മ് അവാര്‌ക്ക് ണല്ല സേദിന സൊല്ലികൊഡുത്ത്‌കൊണ്ട്‌മ് ഇര്‌ന്താ്. അക്കുളെ എഗുദ പൂസാരി തലെവലാമ്, ബേദ ബാത്ത്യലാമ്, എഗുദ മൂപ്പലോഡെ സേന്ത് ഏസു പട്ട്‌ക്കെ ബന്ത് അയാള്‌ണ: 2<<ണീ എന്ത അദിഗാരത്തിലി ഈ കാര്യഗെല്ല സെയ്‌രെ? ണിനാക്ക് ഈ അദിഗാര ആര് തന്താദ്? എമാക്ക് സൊല്ലു>> എന്ത് കേ്ട്ടാര്.
3അക്കുളെ ഏസു അവാര്‌ക്ക്: <<ണാന്‌മ് ണിമാണ ഒരു കേ്ള്‌വി കേ്ക്കെ. അദ്‌ക്ക് ണിമ്മ ബദ്‌ള് സൊല്ലിരി? 4ഓഗന്നാന്‌ക്ക് തണ്ണിക്ക് മുളുഗ്‌സ്‌റാദ്‌ക്കുള്ള അദിഗാര കെ്ഡേത്താദ് സാമ്യോഡിര്‌ന്തൊ, ഇല്ലെ മന്‌സാരോഡെ ഇര്‌ന്തൊ?>> എന്ത് കേ്ട്ടാ്.
5അവാര് തമ്മ തമ്മ പേസി ഓസണെ എ്ഡ്‌ത്ത് ഇച്ചെ സൊന്നാര്: << <സാമിലിര്‌ന്ത്> എന്ത് സൊന്ന <പിന്നെ എന്ത്‌ക്ക് ണിമ്മ ഓഗന്നാന ണമ്പാലെ> എന്ത് ഏസു കേ്ക്കുവാ്. 6<മന്‌സാരോഡിര്‌ന്ത്> എന്ത് സൊന്നാക്കി ആള്‌ഗ ഒട്ടുക്ക് ഓഗന്നാന ഒരു സാമിദാസ് എന്ത് ണെനേത്തിര്‌ക്കാദ്‌ണാലെ ണമാണ കല്ല് എ്റിന്ത് കൊല്ലുവാര്.>>
7അദ്‌ണാലെ <<ഏദിലിര്‌ന്ത് എന്ത് എമാക്ക് തെര്യ>> എന്ത് അവാര് ഏസുക്ക് സൊന്നാര്.
8അക്കുളെ ഏസു: <<അപ്പ് ണാന് എന്ത അദിഗാരത്തിലി ഇദെല്ല സെയ്‌രെ എന്ത് ണാന്‌മ് ണിമാക്കെ സൊല്ലുറാദില്ലെ>> എന്ത് അവാര്‌ക്ക് സൊന്നാ്.
കാഡ് ഗുത്തഗേക്ക് കൊഡുത്ത കദെ
9അദ്‌ക്ക് പ്‌റ ഏസു ആള്‌ഗാക്ക് ഇച്ചെ ഒരു കദെ ബ്‌ട്ടാ്: <<ഒരുത്താ് ഒരു മുന്തിരി ദോട്ട ഉണ്ടാക്കിനാ്. പ്‌റ അദ്‌ണ ഗുത്തഗെക്കാറാര്‌ക്ക് ഗുത്തഗേക്ക് കൊഡുത്ത് റമ്പ കാല ഇര്‌ക്ക്യ എന്ത് അയാള് ദൂര ണാഡ്‌ക്ക് പോനാ്. 10മുന്തിരി പഗ പറ്‌ക്ക ഗള്യെ ആഗാട്ട്യെല്ല മുന്തിരി ദോട്ടക്കാറാ് തനാക്കുള്ള പങ്ക്‌ണ ഏറ്റ് ബര്യ തന്ന്‌ദ് ഒരു ബേലെക്കാറാന ഗുത്തഗെക്കാറാര് പട്ട്‌ക്കെ സൊല്ലിബ്‌ട്ടാ്. ആന അവാര് അവാന അഡി എന്ത് അഡിത്ത് ബെ്റ്‌ങ്കയ്യോഡെ ബ്‌ട്ടാര്. 11അയാള് പിന്നേമ് ബേ്റൊരു ബേലെക്കാറാന ഗൂഡി സൊല്ലിബ്‌ട്ടാ്. അവാര് അവാനാമ് അഡിത്ത് ണാണഗെ്ഡ്‌സി ഒന്റുമ് കൊഡുക്കാദെ ബ്‌ട്ടാര്. 12അദ്‌ക്ക് പ്‌റ മൂണാവദ് ഒരു ബേലെക്കാറാന ഗൂഡി ബ്‌ട്ടാ്. അവാനാമ് അവാര് അഡിത്ത് ഈ്ഡാക്കി ദോട്ടാക്ക് ബെ്ള്യെ ബ്‌ട്ടാര്.
13അക്കുളെ മുന്തിരി ദോട്ടക്കാറാ് ഇച്ചെ സൊന്നാ്: <ഇനി ണാന് എന്ത സെയ്യ? ണാന് റമ്പ സീവാ് ബ്‌ഡ്‌റ എന്ന് മഗാന താനെ സൊല്ലിബ്‌ഡുവെ. ഒരു ബേ്ള്യെ അവാന അവാര് മദിക്കുവാര്> എന്ത് സൊല്ലി അവാന ബ്‌ട്ടാ്.
14ആന ഗുത്തഗെക്കാറാര് അവാന കണ്ട് തമ്മ തമ്മ ഇച്ചെ ഓസണെ കെ്ട്ടിനാര്: <ഇവാ്ത്തെ ഈ ദോട്ടാക്ക് ഉരിമെക്കാറാ്. അവാന്‌ദ് സൊത്തുണൊട്ടുക്ക് ണമാക്ക് കെ്ഡേക്ക്യ ബേ്ണ്ടി ണമ്മ ഇവാന കൊന്റെക്കില.> 15അച്ചെ ഗുത്തഗെക്കാറാര് അയ്യി മുന്തിരി ദോട്ടക്കാറാന്‌ദ് മഗാന ദോട്ടാക്ക് ബെ്ള്യെ എ്ഡ്‌ത്ത് പോയി കൊന്റെക്കിനാര്.
അച്ചാനാക്കി മുന്തിരി ദോട്ടക്കാറാ് എന്ത സെയ്‌വാ്? 16അയാള് ബന്ത് ഗുത്തഗെക്കാറാര്‌ണ കൊന്റെക്കി അയ്യി മുന്തിരി ദോട്ടണ ബേ്റെ ആള്‌ഗാക്ക് കൊഡുക്കുവാ്.>>
ഈ കദേന കേ്ട്ട് അവാര്: <<അവ്വൊ സാമ്യെ, ഇച്ചെല്ല ണഡാക്ക ബേ്ഡ>> എന്ത് സൊന്നാര്.
17ഏസു അവാര്‌ണ ണോഡികൊണ്ട്:
<< <കൂരെ ബേലെക്കാറാര് മോസ എന്ത് എ്റിന്തെക്കിന അദേ കല്ല് താനെ
കൂരെ എ്ഡ്‌ക്കാട്ടി എല്ല കല്ല്‌ഗണ ബ്‌ഡ മുക്ക്യമാന കല്ല്#20:17 മുക്ക്യമാന കല്ല് ബേസ്‌മട്ടാദ് മൂലേല്യ കല്ല് എന്തൊ കാവഡിന പാസെ ഇര്‌ക്ക ബാസാക്ക് മേലെ ണഡ്‌ക്കെ ആയി ബെക്ക കല്ല് എന്തൊ ഇദ്‌ണ അര്‌ത്ത ആക്കില. ണമ്മ് ആള്‌ഗ കൂരെ എ്ഡ്‌ക്കാട്ടി പെ്ര്‌ങ്കാ് കമ്പ് കൂരേന ഒറേപ്പാക്കി ബെക്ക പാസെ എഗുദാര് കൂരെ എ്ഡ്‌ക്കാട്ടി ഈ കല്ല്‌ത്തെ അവാര്‌ദ് കൂരേന ഒറേപ്പാക്കി ബെക്കാദ്. ആറ്റ്.>#സാമി പാട്ട് ബുക്ക് 118:22
എന്ത് എ്ള്‌ദിര്‌ക്കാദ്‌ദ് അര്‌ത്ത എന്ത? 18അയ്യി കല്ല്‌ക്കെ ബീ്റവാനെല്ല തുണ്ടുതുണ്ട ആവാര്. ആന ഈ കല്ല് ആരാറ്റ്‌ക്കെ ബ്‌ന്താല്‌മ് അദ് അവാന തവുഡുപൊഡി ആക്കി തള്ളു>> എന്ത് സൊന്നാ്.
ണ്‌ഗ്‌ദി അഡേക്കാദ്‌ണ പറ്റി കേ്ക്ക കേ്ള്‌വി
19ഏസു സൊന്ന ഈ കദെ തമാണ പറ്റിത്തെ സൊന്നാദ് എന്ത് എഗുദ പൂസാരി തലെവലാക്ക്‌മ് ബേദ ബാത്ത്യലാക്ക്‌മ് തെരിന്ത്‌ദ്. അദ്‌ണാലെ അവാര് ഏസുണ അപ്പ്‌താനെ പ്‌ഡിക്ക്യ ണോഡിനാര്. ആന അവാര് ആള്‌ഗണ അഞ്ചി ഏസുണ പ്‌ഡിക്കാലെ.
20അദ്‌ണാലെ അദ്‌ക്കുള്ള തഞ്ച കെ്ഡേക്ക്യ ബേ്ണ്ടി അവാര് ണോഡികൊണ്ടിര്‌ന്താര്. പ്‌റ ഏസു സൊല്ലുറ ണായാത്തിലി കുറ്റ കണ്ട്‌പ്‌ഡിക്ക്യ ണല്ലവാര്‌ണ പാസെ ണഡിത്ത് കാട്ടി കൊഡുക്കവാര്‌ണ അവാര് ഏസു പട്ട്‌ക്ക് സൊല്ലിബ്‌ട്ടാര്. അച്ചെ അയാള്‌ണ റോമ ണാഡ് തലെവാ് അദിഗാരാക്ക് കെ്ട്ട്‌പട്ട് ണഡാക്കവാന്‌മ് അയാള് കാല്‌ക്കഡിര്‌ക്കവാന്‌മ് ആക്ക്യ അവാര്‌ക്ക് മുഡ്യു. 21അവാര് ബന്ത് ഏസുണ: <<ഗുരുവെ, ണീ പഡ്‌സ്‌റാദ്‌മ് സൊല്ലുറാദ്‌മ് സത്ത്യാത്തെ എന്ത് എമാക്ക് തെര്യു. താന്തവാരെന്തൊ ഉജാന്തവാരെന്തൊ ണോഡാദെ, ആള്‌ഗ എച്ചെ പെ്ളേക്കുഡൊ എന്ത് സാമി സൊല്ലിര്‌ക്കാനൊ അദ്‌ണ അദേപാസെ പഡ്‌സ്‌റവാ് എന്ത്‌മ് എമാക്ക് തെര്യു. 22മോസെ ബെത്ത സാമി സട്ടപഡി ണമ്മ റോമ ണാഡ് റാജാവുക്ക് ണ്‌ഗ്‌ദി കൊഡുക്കാദ് സെര്യൊ ഇല്ലെ തപ്പൊ>> എന്ത് സൊല്ലി കേ്ട്ടാര്.
23അവാര് ഓസണെ കെ്ട്ടിര്‌ക്കാദ്‌ണ തെരിന്ത് ഏസു അവാര്‌ക്കെ: 24<<ഒരു ബെ്ള്ളി പണാണ കാട്ടിരി. ഈ പണാത്തിലിര്‌ക്ക മൂഞ്ചിമ് പേര്‌മ് ആര്‌ദ്>> എന്ത് കേ്ട്ടാ്.
25അക്കുളെ അവാര്: <<റോമ ണാഡ് റാജാവുദ്>> എന്ത് സൊന്നാര്.
<<അച്ചാനാക്കി റോമ ണാഡ് റാജാവുക്ക് കൊഡുക്കാദ്‌ണ അയാള്‌ക്ക് കൊഡിരി. സാമിക്ക് കൊഡുക്കാദ്‌ണ സാമിക്ക് കൊഡിരി>> എന്ത് ഏസു അവാര്‌ക്കെ സൊന്നാ്.
26അച്ചെ ആള്‌ഗ മുന്നുക്ക് ബെത്ത് ഏസു സൊന്ന ണായാത്തിലി അവാര്‌ക്ക് കുറ്റ കണ്ട്‌പ്‌ഡിക്ക്യ മുഡ്യാലെ. ഏസു സൊന്ന ബദ്‌ള്‌ണ കേ്ട്ട് അവാര് അദിസ്യപട്ട് ഒന്റുമ് മ്‌ണ്ടാലെ.
സത്തിര്‌ന്ത് ഉജുറേ്റാദ്‌ണ പറ്റി കേ്ക്കാര്
27സത്താക്കി ഉജുറെ്ന്ത്‌റാദില്ലെ എന്ത് സൊല്ലുറ സദൂക്യലാദിലി ലേസ ആള്‌ഗ ബന്ത് ഏസുണ ഇച്ചെ കേ്ട്ടാര്: 28<<ഗുരുവെ, ഒരുത്താ് പെ്ണ്ണ് എ്ഡ്‌ത്ത് പ്‌ള്ളെഗ പ്‌റാക്കാദെ സത്താക്കി അയാള്‌ദ് പെ്ണ്ട്‌ണ അയാള് അണ്ണാനൊ തമ്പ്യൊ എ്ഡ്‌ത്ത് അയ്യി സത്തവാന്‌ദ് പേര്‌ക്ക് പ്‌ള്ളെഗ പ്‌റാത്തുഡൊ എന്ത് മോസെ ബെത്ത സാമി സട്ടാത്തിലി എ്ള്‌ദിര്‌ക്ക്‌ദല്ല. 29ഒരു പട്ടിലി ഏ്ള് അണ്ണതമ്പില ഇര്‌ന്താര്. അദിലി തലെകോഡില്യവാ് പെ്ണ്ണ് എ്ഡ്‌ത്ത് പ്‌ള്ളെഗ പ്‌റാക്കാദെ സത്ത്‌കൊണ്ട് പോനാ്. 30അയാള്‌ക്ക് അഡ്യസാരില്യവാന്‌മ് അവാണ എ്ഡ്‌ത്താ്. 31അദ്‌ക്ക് അഡ്യസാരില്യവാന്‌മ് അവാണ എ്ഡ്‌ത്താ്. അച്ചെ ഏ്ള് ആള്‌മ് അവാണ എ്ഡ്‌ത്ത് പ്‌ള്ളെഗ പ്‌റാക്കാദെ സത്ത്‌കൊണ്ട് പോനാര്. 32കഡേസിലി അവാമ് സത്ത്‌കൊണ്ട് പോന. 33ആന സത്തവാര് ഉജുറേ്ഗാട്ടി ഇവ ഈ ഏ്ള് ആളിലി ആര്‌ക്ക് പെ്ണ്ടാവ? ഏ്ള് ആള്‌ക്ക്‌മ് ഇവ പെ്ണ്ടായിര്‌ന്താളല്ല?>>
34അക്കുളെ ഏസു അവാര്‌ക്ക് ഇച്ചെ സൊന്നാ്: <<ഈ ഉലഗാത്തിലിര്‌ക്ക ആള്‌ഗെല്ല പെ്ണ്ണ്‌മ് എ്ഡ്‌ക്കാര്, പെ്ണ്ണ്‌മ് കൊഡുക്കാര്. 35ആന സത്തിര്‌ന്ത് ഉജുറേ്യാമ് ഇനി ബര്യ പോര ഉലഗാത്തിലി പെ്ളേക്ക്യാമ് തഗ്‌ദി കെ്ഡേത്തവാര് പെ്ണ്ണ് എ്ഡ്‌ക്കാദ്‌മില്ലെ, പെ്ണ്ണ് കൊഡുക്കാദ്‌മില്ലെ. 36അവാര്‌ക്ക് ഇനി സായ മുഡ്യമാട്ട. എന്ത്‌ക്കെന്റ അവാര് സത്തിര്‌ന്ത് ഉജുറെ്ന്തവാര് ആനാദ്‌ണാലെ സാമിദൂദലാണ പാസേമ് സാമിദ് പ്‌ള്ളെഗാമ്‌ത്തെ. 37കത്തികൊണ്ടിര്‌ക്ക മുള്ളുഗുമ്പിലി സാമി ബെ്ളിപട്ടാദ്‌ണ പറ്റി എ്ള്‌ദിര്‌ക്ക പട്ടിലി സത്തവാര് ഉജുറെ്ന്തുവാര് എന്ത് മോസെ ഗൂഡി സൊല്ലിര്‌ക്കാ്. അദിലി മോസെ ആണ്ടവാന: <ണാന് അവുറഗാമ്‌ദ്‌മ്, ഇസാക്ക്‌ദ്‌മ് ആക്കോവുദ്‌മ് സാമിത്തെ>#പയണ 3:6 എന്ത് സൊല്ലിര്‌ക്കാ്. 38ഈ മൂണ് പാട്ടല സത്തിര്‌ന്താല്‌മ് സാമിക്ക് അവാര് സാഗാലെ. ആന സാമി സത്തവാര്‌ദ് സാമി അല്ല ഉജുറിര്‌ക്കവാര്‌ദ് സാമിത്തെ. സാമിദ് മുന്നുക്ക് എല്ലാര്‌മ് ഉജുറോഡെ ഇര്‌ക്കവാരല്ല.>>
39അക്കുളെ ബേദ ബാത്ത്യലാദി ലേസ ആള്‌ഗ: <<ഗുരുവെ, ണീ സൊന്നാദ് സെരിത്തെ>> എന്ത് സൊന്നാര്. 40അദ്‌ക്ക് പ്‌റ അവാര് ഏസോഡെ എന്താറ്റ് കേ്ക്ക്യ അഞ്ചിനാര്.
ക്‌റ്‌സ്‌ത്ത് ആര്‌ദ് കാല്‌ക്ക് പട്ടവാ്
41ആന ഏസു അവാര്‌ക്ക് ഇച്ചെ സൊന്നാ്: <<ക്‌റ്‌സ്‌ത്ത് ദാവീദ് കാല്‌ക്ക് പട്ടവാ് എന്ത് എച്ചെ സൊല്ല്യ മുഡ്യു?
42-43<ആണ്ടവാ് എന്ന് ആണ്ടവാന്‌ക്കെ സൊന്നാ്,
ണാന് ണിന്ന് പോട്ടിക്കാറാര്‌ണ
ണിന്ന് കാല്‌ക്കഡി ആക്കമാട്ട്‌ക്ക്,
എന്ന് ബല സാരി ഇര്>#സാമി പാട്ട് ബുക്ക് 110:1
എന്ത് സാമി പാട്ട് ബുക്കിലി ദാവീദ് താനെ സൊല്ലിര്‌ക്കാനല്ല. 44ദാവീദ് താനെ ക്‌റ്‌സ്‌ത്ത്‌ണ ആണ്ടവാ് എന്ത് ഒളേക്കദാനാക്കി പിന്നെ എച്ചെ ക്‌റ്‌സ്‌ത്ത് ദാവീദ് കാല്‌ക്ക് പട്ടവാനാവാ്?>>
ബേദ ബാത്ത്യലണ സൂസാരിത്തിരിരി
45ആള്‌ഗൊട്ടുക്ക് കേ്ട്ട്‌കൊണ്ടിര്‌ക്കാട്ടി താനെ ഏസു തന്ന് സൊല്ലുപഡി ണഡാക്കവാര്‌ക്കെ ഇച്ചെ സൊന്നാ്: 46<<ബേദ ബാത്ത്യലണ ണിമ്മ സൂസാരിത്ത് ഇര്‌ക്കുഡൊ. എന്ത്‌ക്കെന്റ അവാര് ണല്ല ണല്ല ജൊഗെ ഇക്കി ണഡാക്ക്യ ആസെപഡ്‌റാര്. സന്തേക്ക്‌റാഗ ആള്‌ഗ തമാണ മദിക്ക്യ ആസെപഡ്‌റാര്. എഗുദാര് പരേസ്‌റ കൂരെക്ക്‌റാഗ മുക്ക്യമാന എ്ഡേലി കുക്കാക്ക്യാമ് അവാര് ആസെപഡ്‌റാര്. ബിര്‌ന്ത് പട്ടിലി മുന്തുക്ക് കുക്കാക്ക്യാമ് അവാര് ആസെപഡ്‌റാര്. 47അവാര് മ്‌ണ്ടേസിഗാദ് മുദാല്‌മൂഡ്യഗണ ഊഗത്തോഡെ ഏമാത്തി എ്ഡ്‌ക്കാര്. അദ്‌ക്ക് പ്‌റ ണല്ലവാര് എന്ത് കാട്ട്യ ബേ്ണ്ടി എത്തറാഗൊ ഗള്യെ പരേസാമ് സെയരാര്. ബേ്റെ ആള്‌ഗണ ബ്‌ഡ ഇവാര്‌ഗാക്കെല്ല ണല്ല ദണ്ടണെ കെ്ഡേക്കു.>>
Zvasarudzwa nguva ino
ലൂക്കോസ് 20: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature