ലൂക്കോസ് 24
24
ഏസു സാവുലിര്‌ന്ത് ഉജുറേ്റാ്
1ബാരാത്തില്യ മുദ ണാള് ബെ്ഡ്യാകാലാത്തിലി താനെ അയ്യി പെ്ണ്ണ്‌മക്കഗ ഒരിക്കി ബെത്തിര്‌ന്ത ബാഡെ അഡിക്ക ജാദിഗണാമ് എ്ഡ്‌ത്ത് കല്ലളെ പട്ട്‌ക്കെ എജ്ജിനാര്. 2അക്കുളെ കല്ലളെ ബായിക്ക് അഡേത്ത് ബെത്തിര്‌ന്ത കല്ല്‌ണ ഉന്തി ജറേത്തിര്‌ക്കാദ്‌ണ കണ്ടാര്. 3അവാര് അളേക്കുള്ളുക്കു പുക്കി ണോഡുഗാട്ടി ആണ്ടവാനാന ഏസുദ് സാവുണ അദിലി കാണാലെ. 4അദ്‌ണ കണ്ട് അവാര് മെഗെമെഗേത്ത് കൊണ്ടിര്‌ക്കാട്ടി സട്ടന മിച്ചണ പാസെ മിന്ന്‌റ ഉഡുപ്പ് ഇക്കിര്‌ക്ക റണ്ട് ആണ്‌മക്ക അര്‌ഗെ ണിന്റിര്‌ക്കാദ്‌ണ കണ്ടാര്. 5അയ്യി പെ്ണ്ണ്‌മക്കഗ കോവെ പ്‌ഡിത്ത് മൂഞ്ചിന കപ്പാസിര്‌ക്കാട്ടി അയ്യി ആണ്‌മക്കഗ പെ്ണ്ണ്‌മക്കാക്കെ: <<ണിമ്മ ഉജുറിര്‌ക്കവാന സത്തവാര്‌ദ് പട്ടിലി പരാക്കാദ് എന്ത്‌ക്ക്? 6-7അയാള് ഇദിലി ഇല്ലെ, ഉജുറെ്ന്തിര്‌ക്കാ്. ണേരാത്തിലി അയാള് ണിമ്മ്‌ദൊപ്പ ഗെലീലേലി ഇര്‌ക്കാട്ടി താനെ അയാള് ണിമാക്കെ: <മന്‌സാനായി പ്‌റാന്തവാന പാവ സെയ്‌രവാര്‌ദ് കയ്യിക്കെ ഒപ്പഡിക്കുവാര് എന്ത്‌മ് അവാര് അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ലുവാര് എന്ത്‌മ് പ്‌റ മൂണാവദ് ണാള് എങ്കാട്ടി ഉജുറെ്ന്തുവാ് എന്ത്‌മ്> സൊന്നാദ്‌ണ ണിമ്മ ണെനേത്ത് ണോഡി>> എന്ത് സൊന്നാര്. 8അക്കുളെ അയ്യി പെ്ണ്ണ്‌മക്കഗ ഏസു സൊന്ന കാര്യണ ണെനേത്താര്.
9അവാര് അപ്പ്‌താനെ കല്ലളേലിര്‌ന്ത് തിലിമ്പി പോയി അവാര് കണ്ട കാര്യഗണ ഏസുദ് സൊല്ലുപഡി ണഡാക്ക പദിണൊണ്ണ് ആള്‌ഗാക്ക്‌മ് ബാക്കി ആള്‌ഗാക്ക്‌മ് സൊന്നാര്. 10മദ്ദള പട്ടണക്കാറിസി മറിയാമ്, ഓഗന്നീമ്, ആക്കോവുദ് അവ്വാസി മറിയാമ്, പിന്നെ അവാരോഡെ ഇര്‌ന്ത ബേ്റെ പെ്ണ്ണ്‌മക്കഗാമ്‌ത്തെ ഇദ്‌ണ അപ്പൊസലലാക്കെ സൊന്നവാര്‌ഗ. 11ആന പെ്ണ്ണ്‌മക്കഗ സൊന്നാദ്‌ണ അപ്പൊസലല ണമ്പാലെ. എന്ത്‌ക്കെന്റ അവാര് സൊന്ന കാര്യണ ണെപ്പ്‌ണേരില്ലാത്ത കാര്യ എന്ത് അവാര് ണെനേത്താര്. 12ആന പത്ത്‌റോസ് കല്ലളെ പട്ട്‌ക്കെ ഓഡി പോയി ബഗ്ഗി ണോഡിനാ്. അക്കുളെ സാവുക്ക് ഇക്കിര്‌ന്ത ബെ്ഡിപ്പുള്ള സീലെന മാട്ട്‌ത്തെ കണ്ടാ്. എന്ത ണഡാന്ത്‌ദൊ എന്ത് അദിസ്യപട്ട് കൊണ്ട് അയാള് കൂരേക്കെ തിലിമ്പി പോനാ്.
എമ്മാവാസ്‌ക്ക് പോരാര്
13അയ്യി ണാള് താനെ ഏസുദ് സൊല്ലുപഡി ണഡാക്കവാരിലി റണ്ട് ആള് എര്‌സലേമിലിര്‌ന്ത് എമ്മാവാസ് എങ്ക ഊര്‌ക്കെ പോയി കൊണ്ടിര്‌ന്താര്. അയ്യി ഊര്‌ക്കെ പോഡൊന്ത ഏദൊ ഏ്ള് മയില് ദൂര പോഡൊ. 14അദിലി ണഡാന്ത കാര്യണ പറ്റി അവാര് ആങ്കീങ്ക് ണായ പേസികൊണ്ട് പോയിര്‌ന്താര്. 15അച്ചെ അവാര് ഈ കാര്യണ പറ്റി പേസികൊണ്ട് പോയി കൊണ്ടിര്‌ക്കാട്ടി ഏസുമ് അവാര്‌ക്കെ എജേന്ത് അവാര്‌ദൊപ്പ ണഡാന്താ്. 16അവാര് അയാള്‌ണ കണ്ടാര്. ആന ഏസുത്തെ എന്ത് അവാര്‌ക്ക് ണെപ്പ്‌കെ്ഡേസ്യ മുഡ്യാത്തപഡി ആക്കിര്‌ന്താ്.
17ഏസു അവാര്‌ണ: <<ണിമ്മ ണഡാന്ത് പോഗാട്ടി എന്ത കാര്യണ പറ്റി പേസികൊണ്ട് പോരേര്?>> എന്ത് കേ്ട്ടാ്.
അക്കുളെ അവാര് റണ്ട് ആള്‌മ് ബഡിക്കിന മൂഞ്ച്യോഡെ അദ്‌ക്ക് താനെ ണിന്റാര്. 18പ്‌റ ഒരു മൂസ് കളിന്ത് ക്‌ളെപ്പാവു എങ്കവാ് ഏസുണ: <<ഇന്റെത്ത ണാള്‌മാട്ട് ണഡാന്ത കാര്യണ പറ്റി എര്‌സലേമ്‌ക്ക് ബന്തവാരിലി ണിനാക്ക് മാട്ട് തെര്യാലേഗ?>> എന്ത് കേ്ട്ടാ്.
19അക്കുളെ ഏസു: <<എന്ത കാര്യഗ?>> എന്ത് കേ്ട്ടാ്.
അക്കുളെ അവാര് ഇച്ചെ സൊന്നാര്: <<ണസറത്ത് ഊര്‌ക്കാറാ് ഏസുണ പറ്റിത്തെ. അയാള് സൊന്ന ണായാത്തിലിമ് സെയ്‌ദ കാര്യാത്തിലിമ് സാമിദ് കണ്ണ്‌ക്ക്‌മ് മന്‌സാര് കണ്ണ്‌ക്ക്‌മ് മ്‌ഗ്‌ന്ത സക്‌ദി കാട്ടിര്‌ന്ത സാമിദാസ്‌ത്തെ. 20എഗുദ പൂസാരി തലെവലാമ് ണമ്മ്‌ദ് തലെവലാമ് ഏസുണ കൊല്ല്യ ബേ്ണ്ടി ബിദിക്ക്യ ബ്‌ട്ട് കൊഡുത്താര്. അച്ചെ അയാള്‌ണ കുരുസ്‌ക്കെ സേത്തി ആണി അഡിത്താര്. 21ആന എമ്മ ഇസ്‌റേല് റാജ്യണ തിലിപ്പി എ്ഡ്‌ത്ത് തരുവാ് എന്ത് അവാന ണെഞ്ചഡെ ബെത്തിര്‌ന്തേര്. അദ്‌താനെമല്ല ഇച്ചെല്ല ണഡാന്ത് ഇന്റോഡെ മൂണ് ണാളാറ്റ്. 22അദല്ലാദെ താനെ എമ്മ്‌ദ് കൂട്ടാത്തിലിര്‌ക്ക ലേസ പെ്ണ്ണ്‌മക്കഗ ഇന്റ് ബെ്ഡ്യാകാലാത്തിലി താനെ കല്ലളേക്ക് പോയി അദിസ്യപട്ടാര്. 23എന്ത്‌ക്കെന്റ ഏസുദ് സാവു അദിലി ഇര്‌ക്കാലെ. ദൂദല തമ്മ് കണ്ണ്‌ക്കെ കാട്ടി ഏസു ഉജുറോഡെ ഇര്‌ക്കാ് എന്ത് തമാക്ക് സൊന്നാദ്‌ണ അവാര് ബന്ത് എമാക്കെ സൊന്നാര്. 24എമ്മ് കൂട്ടാത്തില്യ ലേസ ആള്‌ഗ കല്ലളേക്കെ പോനാര്. അയ്യി പെ്ണ്ണ്‌മക്ക സൊന്ന പാസെതാനെ കണ്ടാര്. ആന ഏസു ഇര്‌ക്കാലെ.>>
25അക്കുളെ അയാള് അവാര്‌ക്കെ: <<അവ്വൊ, ണിമ്മ ഇത്തറ ബുദ്ദില്ലാത്തവാര് ആയെക്കിനേര? സാമിദാസ്‌ഗ സൊല്ലിര്‌ക്ക കാര്യഗണ ണമ്പ്യ എന്ത്‌ക്ക് ഇത്തറ ബുദ്ദിമുട്ടു. 26ക്‌റ്‌സ്‌ത്ത് ഈ കജട്ടഗെല്ലപ്പട്ട പ്‌റ മേലോഗാക്ക് മദ്‌പ്പോഡെ പോയിര്‌ക്കുഡൊ>> എന്ത് സൊന്നാ്. 27പ്‌റ മോസെ തൊട്ട് എല്ല സാമിദാസ്‌ഗാമ് തനാണ പറ്റി സാമി ബുക്കിലി എ്ള്‌ദിര്‌ക്കാദ്‌ഗണ മുച്ചുഡ അവാര്‌ക്ക് ഒനോന്റ് ഒനോന്റായി സൊല്ലികൊഡുത്താ്.
28അച്ചെ അവാര് തമ്മ പോര ഊര്‌ക്കെ എജ്ജ്യഗാട്ട്യെല്ല, ഏസു അവാര്‌ദ് മുന്നുക്ക് പോരവാന പാസെ പോയ പട്ടാ്. 29അക്കുളെ അവാര്: <<ണേര ബ്‌ന്ത് മജാക്കെ ആറ്റല്ല. ഇന്റ് എമ്മോഡെ തങ്ക്>> എന്ത് ണത്തിനാര്. അക്കുളെ ഏസു അയ്യി അന്തി ണാള് അവാരോഡെ തങ്ക്യ പോനാ്.
30അയാള് അവാര്‌ദൊപ്പ തീനി തിന്ന്യ കുക്കാന്ത പ്‌റ ഏസു അഡേന എ്ഡ്‌ത്ത് സാമിക്ക് ണണ്ണി സൊല്ലി മുറുത്ത് അവാര്‌ക്ക് കൊഡുത്താ്. 31അക്കുളെ അവാര്‌ക്ക് ഏസുത്തെ എന്ത് തെരിരാദ്‌ക്കുള്ള ബുദ്ദി ബന്ത് അദ് ഏസുത്തെ എന്ത് ണെപ്പ്‌കെ്ഡേത്ത്‌ദ്. ആന ഏസു അപ്പ്‌താനെ അവാര്‌ദ് മുന്തുക്കിര്‌ന്ത് മായിന്തെക്കിനാ്. 32<<ഏസു ബയ്യിക്ക്‌റാഗ ണമ്മോഡെ ണായ പേസ്‌ഗാട്ടിമ് സാമി സൊല്ലുസുലാക്കണ പറ്റി സൊക്കാന സൊല്ലി തര്‌ഗാട്ടിമ് ണമ്മ്‌ദ് മനേസ്സ് തീ കത്ത്‌റ പാസെ ആയിര്‌ന്ത്‌ദല്ല?>> എന്ത് അവാര് തമ്മ തമ്മ പേസിനാര്.
33അപ്പ്‌താനെ അവാര് എ്ന്ത് എര്‌സലേമ്‌ക്കെ തിലിമ്പി പോനാര്. ഏസുദ് സൊല്ലുപഡി ണഡാന്തിര്‌ന്ത പദിണൊണ്ണ് അപ്പൊസലലാമ് അവാര്‌ദ് ഒപ്പ ഇര്‌ന്ത ബേ്റെ ആള്‌ഗാമ് അദിലി കൂഡിര്‌ക്കാദ്‌ണാമ് കണ്ടാര്. 34<<ആണ്ടവാ് സെരിക്ക്‌മ് ഉജുറെ്ന്തിര്‌ക്കാ്>> എന്ത്‌മ് <<അയാള് സീമോന്‌ക്കെ ബെ്ളിപട്ടാ്>> എന്ത്‌മ് അവാര് അദിലി സൊല്ലികൊണ്ടിര്‌ന്താര്. 35അക്കുളെ ബയ്യിലി ബെത്ത് ണഡാന്ത കാര്യണ പറ്റിമ് അഡെ പങ്കി കൊഡുക്കാട്ടി ആണ്ടവാ്ത്തെ എന്ത് തെരിരാദ്‌ക്കുള്ള ബുദ്ദി ബന്താദ്‌ണ പറ്റിമ് അവാര് റണ്ട് ആള്‌മ് അവാര്‌ക്കെ സൊന്നാര്.
ഏസു തന്ന് സൊല്ലുപഡി ണഡാക്കവാര് കണ്ണ്‌ക്ക് കാട്ട്‌റാ്
36ഇച്ചെ അവാര് റണ്ട് ആള്‌മ് ഇദ്‌ണ പറ്റി ണായ പേസികൊണ്ട് ഇര്‌ക്കാട്ടി ഏസു താന്‌താനെ അവാര്‌ദ് ണഡ്‌ക്കെ ബന്ത് ണിന്റ് അവാര്‌ക്ക്: <<ണിമ്മ ണിമ്മദ്യോഡെ ഇരിരി>> എന്ത് സൊന്നാ്.
37തമ്മൊരു പിജാദ്‌ണാത്തെ കാണ്‌റേര് എന്ത് ണെനേത്ത് അവാര് കോവേക്ക്‌പട്ട് സദ്‌റബെ്ട്ടിനാര്. 38ആന അയാള് അവാര്‌ക്കെ: <<ണിമ്മ എന്ത്‌ക്ക് മെഗെമഗെക്കാദ്? എന്ത്‌ക്ക് സന്തേഗപഡ്‌റാദ്?>> എന്ത് സൊന്നാ്. 39<<എന്ന് കയ്യികാല്‌ഗണ ണോഡിരി ഇദ് ണാന്‌ത്തെ. അണ്ണി ണോഡിരി. എനാക്ക് ഇര്‌ക്ക പാസെ പിജാദ്‌ക്ക് സദേമ് എല്‌മ്പ്‌മ് ഇല്ലെ എന്ത് ണിമാക്ക് തെര്യുമല്ല>> എന്ത് സൊന്നാ്.
40ഇച്ചെ സൊല്ലികൊണ്ട് ഏസു തന്ന് കയ്യികാല്‌ഗണ അവാര്‌ക്ക് കാട്ടി കൊഡുത്താ്. 41എന്ത്‌ട്ട് ഗൂഡി അവാര്‌ക്ക് ണമ്പ്യമുഡ്യാലെ. എന്ത്‌ക്കെന്റ അവാര്‌ക്ക് അത്തറാക്ക്‌മ് പിര്യ ബന്ത് മദിമറാന്ത് അദിസ്യപട്ടെക്കിര്‌ന്താര്. അക്കുളെ ഏസു: <<ണിമ്മ് കയ്യിലി തിന്ന്യ എന്താറ്റ് ഇര്‌ക്ക്‌ദ>> എന്ത് കേ്ട്ടാ് 42അക്കുളെ അവാര് ഒരു മുറി സുട്ട മീന്‌ണ കൊഡുത്താര്. 43അവാ് അദ്‌ണ എ്ഡ്‌ത്ത് അവാര് മുന്തുക്ക് ബെത്ത് തിന്താ്.
44അദ്‌ക്ക് പ്‌റ ഏസു അവാര്‌ക്കെ സൊന്നാ്: <<ഈ കാര്യ ആയിര്‌ന്ത്‌ദ് ണാന് ണിമ്മ്‌ദൊപ്പ ഇര്‌ക്കാട്ടി ണിമാക്ക് സൊന്നാദ്. മോസെ ബെത്ത സാമി സട്ടാത്തിലിമ് സാമിദാസ്‌ഗ ബുക്കിലിമ് സാമി പാട്ട് ബുക്കിലിമ് എനാണ പറ്റി എ്ള്‌ദിര്‌ക്കാദെല്ല ണഡാക്കുഡൊ.>>
45പ്‌റ ഏസു സാമി സൊല്ലുസുലാക്കാക്ക് ഇര്‌ക്ക അര്‌ത്തഗണ തെരിരാദ്‌ക്കുള്ള ബുദ്ദി അവാര്‌ക്ക് കൊഡുത്ത്‌കൊണ്ട് ഇച്ചെ സൊന്നാ്: 46<<ക്‌റ്‌സ്‌ത്ത് കജട്ടപട്ട് സത്ത പ്‌റ മൂണാവദ് ണാള് എങ്കാട്ടി ഉജുറെ്ന്തുവാ് എന്ത്‌മ്, 47തപ്പ് സെയ്‌രാദ്‌ണ തള്ളി സാമി സാരി തിലിമ്പ്‌റവാര്‌ക്ക് തമ്മ സെയ്‌ര പാവാക്ക് പൊറിമെ കെ്ഡേക്കു എങ്ക സേദിന പറ്റിമ് എര്‌സലേമിലിര്‌ന്ത് എല്ല ണാഡ്‌ക്ക്‌റാഗാമ് അയാള് പേരിലി സൊല്ലുവാര് എന്ത്‌മ്‌ത്തെ സാമി ബുക്കിലി എ്ള്‌ദിര്‌ക്കാദ്. 48ഇദ്‌ഗണെല്ല കണ്ടിര്‌ക്ക ണിമ്മ ഇദ്‌ണ പറ്റി അഡ്‌ത്തവാര്‌ക്ക് സൊല്ലുവേര്. 49എന്ന് അപ്പനാന സാമി ണിമാക്ക് തരുവെ എന്ത് ബാക്ക് തന്താദ്‌ണ ണാന് ണിമാക്ക് അന്‌പ്പ്‌വെ. ആന മേലോഗാത്തിലിര്‌ന്ത് സക്‌ദി ണിമാക്ക് ബരമാട്ട്‌ക്ക് ണിമ്മ എര്‌സലേമിലിതാനെ കാത്തിര്‌ക്കുഡൊ.>>
ഏസു മേലോഗാക്കെ പോരാ്
50അദ്‌ക്ക് പ്‌റ ഏസു തന്ന് സൊല്ലുപഡി ണഡാക്കവാര്‌ണ ബെദനിക്കെ കൂട്ടി പോയി കയ്യിന ഉജാത്തി അവാര്‌ക്ക് ബാക്ക്‌വര കൊഡുത്താ്. 51ഏസു അവാര്‌ക്ക് ബാക്ക്‌വര കൊഡുത്ത് കൊണ്ടിര്‌ക്കാട്ടി താനെ ഏസുണ അവാര് പട്ടിലിര്‌ന്ത് സാമി മേലോഗാക്കെ എ്ഡ്‌ത്താ്. 52അവാര് ഏസുണ കുമ്മുഡിന പ്‌റ റമ്പ പിര്യപിര്യാത്ത് എര്‌സലേമ്‌ക്കെ തിലിമ്പി പോനാര്. 53സാമിത്തെ ബെല്ല്യവാ് എന്ത് സൊല്ലികൊണ്ട് അവാര് സാമികൂരേലി താനെ ഇര്‌ന്താര്.
Zvasarudzwa nguva ino
ലൂക്കോസ് 24: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature