KALAQAMA BITIMA
BITIMA
Kalaqamu maxaafi kalqete kalaqama, mannu kalaqama, cubbunna qarru heeshsho hanafamanna Maganoho mannu sirchi lede noosi xaadooshshe kulanno; kalaqamu maxaafi 2 qaru qaru gafira beehamanno:
1. Fooliishsho 1—11 geeshsha: kalqennitanna mannu kalaqamata hundu dhagge coyi'ranno; Addaaminna Heewani, Qaayeelinna Abeeli, Nohinna baote wayi, hattono Baabilooniti minu aana minnoonni mini dhagge noohu kunni gafiraati.
2. Fooliishsho 12—50 geeshsha: Israeelootu akaakka dhagge kulanno. Insa giddonni amma'nosinninna Maganoho hajajamasinni egennaminohu umihu Abirihaamiiti; hakkiinni aante beettisi Yisihaaqiti, beettisi beetti Yaiqoobitinna tonaa lamunku Yaiqoobi ooso dhagge no; kuri tonaa lamunku Yaiqoobi ooso, tonaa lame Israeelete ga're xintitinoreeti; insa giddonnino addinni bade Yooseefi, hattono Yaiqoobinna gattinori oososi maatensa ledo Gibitse hadhu gara roorse kulanno.
Kuni maxaafi mannu dhagge coyi'rannoha ikkiro nafa, duuchunku aleenni Maganu assino looso kulannoho; Maganu kalqe kalaqino gara kulatenni kayise, mannaho hedinore agurannokkita kultanno hexxo xawisatenni gudanno; kunni maxaafi giddo qaccetenni qaccete geeshsha dhaggete umo ikkinohu, sao assitannori aana yoo yaannohunna qorichishannohu, manna massagannohunna kaa'lannohu, dhaggensa biddi assannohu Maganoho. Kuni hundi maxaafi borreessaminohu, mannunnita amma'note dhagge amadateetinna, tini amma'nono ba'annokki gede assaraati.
Maxaafu Amado:
Maganu kalaqama baala kalaqino gara 1:1—2:25
Cubbunna qarru hanafamino gara 3:1-24
Addaaminni kayise Nohi geeshsha 4:1—5:32
Nohinna Baote Waa 6:1—10:32
Baabilooni minnoonniha seeda kinchu mine 11:1-9
Seeminni Abiraami geeshsha 11:10-32
Israeelete akaakka: Abirihaami, Yisihaaqinna Yaiqoobi 12:1—35:29
Eesawu Ilama 36:1-43
Yooseefinna roduuwasi 37:1—45:28
Israeele Gibitsete gobbara 46:1—50:26
Zvasarudzwa nguva ino
KALAQAMA BITIMA: QulMax
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© The Bible Society of Ethiopia; Sidama Holy Bible BSE-UBS 262 P 2014