लूका 18
18
प्रार्थना बारे यीशु शिक्षा
1तोउं यीशु रोज दुआ करणे त कदी हार ना मानणे यक कथा अपु चेली शुणाई : 2“केसे यक ग्रां अन्तर यक पंच भुन्ताथ। से ना परमेश्वर हेर डरताथ होर ना केसे मदत करणे बारे सोचताथ। 3तेस ग्रां अन्तर यक विधवा जिल्हाणु बि भुन्तीथ। त से तसे भेएड़ एई कइ रोज तस जे बोतीथ, ‘मोउं जुओई न्याय करे त में दुश्माण केआं बचा।’ 4कुछ रोज तकर त तेन ना मनी। पता तेन अपु मन अन्तर विचार कर कइ बोलु, ‘ना अउं परमेश्वरे हेर डरता, होर ना मेह्णु के परवाह कता। 5तोउं बि एस विधवाई न्याय कइ छान्ता। किस कि ए रोज एई कइ मोउं तंग करण लगो असी। अगर अउं एसे न्याय ना करुं त से रोज एई कइ मोउं जीण ना देन्ती।’”
6तोउं प्रभु बोलु, “शुणे, ए बेधर्मी पंच की बोता। 7जे दन रात परमेश्वरे प्रार्थना कते रेहन्ते, कि परमेश्वर तेन्हि तेन्के दुश्माणी केआं ना छुड़कान्ता नउ ना? कि से तेन्के बारे चेरे सोचता ना? 8ना, अउं बोता कि से झट न्याय कता। तोउं बि मनखे कुआ जपल एईयाल त तेस की धरती पुठ एस विधवा ईं विश्वास मेता ना?”
फरीसी त मामला नेणे बाड़ी के कथा
9यक रोज यीशु तेन्हि जे, जे अपफ बोडे धर्मी समझतेथ त होरे मेह्णु पापी समझतेथ, ई कथा शुणाई: 10“कोई दुई मेह्णु देहेर अन्तर प्रार्थना करण जे गो थिए। तेन्हि बुच यक फरीसी थिआ त होरा मामला नेणे बाड़ा थिआ। 11फरीसी खड़ भोई कइ अपु मन अन्तर प्रार्थना करुं लगा कि ‘ए परमेश्वर, अउं तें धन्यवाद कता कि अउं होरे मेह्णु के ईं दुष्ट त डाकु नेईं, होर ना नाजायज रिश्ता रखणे बाड़ा भो। अउं त ई मामला नेणे बाड़ा के ईं बि नेईं। 12अउं हर हफ्ते, दुई दुई लिंगि ब्रत रखता, त अपु सम्हाई कमाई दसवाँ हेस्सा तेन्धे देन्ता।’ 13पर से मामला नेणे बाड़ा अपफ बोडा पापी समझ कइ देहरे केआं दूर खड़ भुआ त तेनि स्वर्गे कना अपु नजर बि उठाणे हिम्मत ना कइ बटी। पर सुआ दुखी भोई कइ अपु डडोर बजाई बजाई कइ बोलु, ‘ए परमेश्वरा, मोउं पापी पुठ दाह कर त मोउं माफ कर!’”
14“त अउं तुसी जे बोता कि परमेश्वरे बेलि से फरीसी ना, बल्कि ए मामला नेणे बाड़ा धर्मी मनिआ त अपु गी जे घेई गा। किस कि जे अपफ बोडा समझता, तस परमेश्वर मठुड़ कता; त जे अपफ मठुड़ समझता, तस परमेश्वर बोडा कइ छता।”#मत्ती 23:12; लूका 14:11
गभुर ईं भुणे जरूरत
मत्ती 19:13-15; मरकुस 10:13-16
15तोउं मेह्णु अपु मठ मठ गभुर तस केईं नेण लगे ताकि यीशु तेन्हि पुठ हथ रख कइ अशुश दियेल; पर चेली ईं हेर कइ लेहरिए। 16पर यीशु तेन्हि मठ मठ गभुर भेएड़ भिआई कइ बोलु, “गभुर मोउं केईं एण दिए त अन्हि रोके नउ, किस कि परमेश्वरे राज्य इन्हि गभुर के ईं मेह्णु के भो। 17अउं तुसी जे बोता कि जे कोउं गभुरु के ईं बण कइ परमेश्वरे राज्य ना मानियेल, से कदी बि तेस राज्य अन्तर ना घेई बटता।”
अमीर नेता त अमर जीवन
मत्ती 19:16-30; मरकुस 10:17-31
18केनि नेते यीशु केआं पुछु, “ए खरा गुरु! अमर जीवन मेण जे मोउं की करुण?” 19यीशु तस जे बोलु, “तु मोउं जे खरा किस बोता? परमेश्वर छड़ दी कइ कोई खरा नेईं। #18:19 यीशु इठि ईं नेईं बोलुण लगो कि से खरा नेईं। इस मेह्णु सुसुर पता असा कि अमर जीवन बारे परमेश्वरे नियम की बोता। से पता करण चहन्ताथ कि जे यीशु बोता से खरा परमेश्वर बोलुण केआं बि ज्यादा खरा असा ना। पर यीशु अपु जवाबे बेलि ईं हरालता कि परमेश्वर जे खरा असा, तसे हर यक बोक बि खरी असी। विधि 30:15-20 20तोउ नियम त पता असा :
नाजायज रिश्ता ना रखण,
कोउं मारण नउ,
चोरुण नउ,
झुठी उगाही ना देण,
अपु ईये बोउए इज्जत करीण।”
21तेन बोलु, “अउं त ई सोब मठड़ियार केआं कता अओ असा।” 22ईं शुण कइ यीशु तस जे बोलु, “तोउ अन्तर हउ बि यक चीजे कमी असी। अपु सोब कुछ बेच कइ गरीबी कें धे बांट छड़। तोउं, तोउ स्वर्ग अन्तर धन मेता; त में पता आई।” 23से ईं शुण कइ सुआ उदास भोई गा, किस कि से सुआ अमीर थिआ। 24यीशु तसे उदासी हेर कइ बोलु, “अमीरी के परमेश्वरे राज्य अन्तर घेण कतु औखु असु! 25अमीर मेह्णु के परमेश्वरे राज्य अन्तर घेण ईं औखु असु, जीं ऊंटे स्नाणि छिने बइ निशरुण।” 26एस पुठ शुणणे बाड़ी बोलु, “अगर एसे ईं अमीर मेह्णु ना बचियेल त फि कोउं बच सकता?” 27तेन बोलु, “जे मेह्णु के बेलि ना भोई सकतु, तस परमेश्वर कइ सकता।” 28पतरसे बोलु, “हेर, अस त अपु घरबार छड़ दी कइ तें पतोती ओ असे”। 29यीशु तेन्हि जे बोलु, “अउं तुसी जे बोता कि केहि जेईं असे जेन्हि परमेश्वरे राज्य जे अपु घरबार, अपु धाणि जुएली, अपु भाई भेण, ई बोउ, त अपु गभुर छड़ दुतो असे। 30तेन्हि इस जुग अन्तर तेस केआं केहि गुणा ज्यादु जरूर मेतु त तेन्हि एणे बाड़े जुग अन्तर परमेश्वर केआं अमर जीवन मेता।”
अपु मरणे बारे यीशु टेकी भविष्य वाणि
मत्ती 20:17-19; मरकुस 10:32-34
31तोउं यीशु बारोह साते नीए कइ तेन्हि जे बोलु, “हेरे, अस यरुशलेम शेहर घेण लगो असे, त जीं बि भविष्य वक्ती मनखे कोईये बारे मतलब में लिखो असु से सोब पूरु भोई घेन्तु। 32किस कि से गैर यहूदी के हतेउ दी घेण अस, त से तसे मखोल बणान्ते त तसे बेज्जती कते, होर तस पुठ थूकते। 33त तस चाबुके #18:33 ई यक चाबुक ईं भुन्ता, जेसे पुठ निकी निकी मिएखि त हलोटे लगो भुन्ते। एन बइ जपल केसे मडतेथ त ए सुआ घा कर कइ लहुलुहान कतेथ। बइ मडते, त तस मार छान्ते। तोउं से टेके रोज अन्तर दुबारी जीं घेन्ता।” 34पर, तेन्हि एन्हि बोकी अन्तरा कोई बोक ना समझी। त ए बोक तेन्हि पता ना लगी। त यीशु जे बोलो थिउ, से तेन्हि समझ ना आउ।
अन्हा भिकारी सारेरण
मत्ती 20:29-34; मरकुस 10:46-52
35जिखेईं यीशु यरीहो नओएं शेहर भेएड़ पुजा, त यक अन्हा बते औत पुठ बिश कइ भीक मगण लगो थिआ। 36से सुआ मेह्णु के हंटणे अवाज शुण कइ पुछुण लगा, “ए की भुण लगो असु?” 37तेन्हि तस जे बोलु, “नासरत ग्रांए यीशु इनिम्बाई घेण लगो असा।” 38तोउं तेन जोर जुए हक दी दी कइ बोलु, “ए यीशु, दाऊदे कोईया#18:38 दाऊदे कोईया - यीशु सच्चे बि दाऊदे कुआ नेओथ। पर दाऊदे राजे खानदान अन्तर जमो थिआ।, मोउं पुठ दाह कर!” 39जे अगर अगर घेण लगो थिए तेन्हि तस जड़कइ कइ चुप बिशुण जे बोलु। पर से हउ बि लियार देण लगा, “ए दाऊदे कोईया, मोउं पुठ दाह कर।” 40तोउं, यीशु रुक गा त तस भेएड़ अण्हुण जे बोलु। त जपल से भेएड़ आ त तेन तस केआं पुछु, 41“तोउ की लौतु? मोउं तोउ जे की करुण?” त तेन तस जे बोलु, “ए प्रभु, छने में टीर सारेरीण दिए।” 42यीशु तस जे बोलु, “हेरिण दे! मोउं पुठ तें विश्वासे तु सारेरो असा।” 43तिखेईं से झट हेरण लगा त परमेश्वरे गुणगान कते-कुते तसे पतोती घेण लगा। त सम्हाई मेह्णु ई हेर कइ प्रभु गुणगान करण लगे।
Zvasarudzwa nguva ino
लूका 18: pgg
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023 (Active) Wycliffe Bible Translators, Inc. All rights reserved.