ꤜꤢꤨꤊꤢ꤬ 12
12
ꤒꤢꤩ꤬ꤘꤣꤧꤚꤢꤪ꤬ꤘꤣꤧꤚꤢꤩ꤭ ꤊꤣꤧ꤬ꤛꤢꤧ꤭ ꤢꤧꤡꤢꤪꤢꤧꤒꤢꤩ꤬ ꤙꤛꤢ꤬ꤖꤢꤧꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭
1ꤙꤣꤧꤔꤣꤧ꤬ꤋꤢꤩ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤘꤣ ꤢ꤬ꤚꤤꤊꤢꤨ꤭ ꤟꤢꤧ꤭ ꤥ꤬ꤕꤜꤢꤪꤥ꤬ꤕꤜꤢꤨ꤬ ꤙꤢ꤭ꤒꤣꤧ꤬ꤕꤤ ꤜꤢꤪ꤭ ꤡꤣꤧ, ꤢ꤬ ꤒ꤫ꤥ꤬ ꤡꤣꤧ ꤘꤣ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤛ꤫ꤤ꤬ꤙꤢꤩ꤬ ꤡꤣꤧ ꤋꤛꤢ꤭ꤜꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤏꤛꤢꤨ ꤟꤢꤩꤏꤥ꤬ꤥ꤬ꤔꤢꤩ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤢꤧ ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤟꤥ꤭ꤗꤢꤦ꤬ ꤘꤣ ꤛꤢꤩ꤬ꤞꤤ꤭ ꤢꤧꤡꤢꤪꤢꤧꤒꤢꤩ꤬ ꤙꤛꤢ꤬ꤖꤢꤧ ꤢ꤬ꤔ꤫ꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭꤯#ꤗꤢꤞꤢꤧ ꤁꤆:꤆, ꤗꤢ꤬ꤊꤢꤨ ꤈:꤁꤅ 2ꤜꤢꤪ꤭ ꤒꤢꤩ꤬ ꤘꤢꤪꤥꤘꤢꤪꤙꤤ ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤙꤢꤗꤥ꤭ꤓꤢꤧ꤬ ꤜꤥ꤭ꤜꤢꤪ꤭ ꤢ꤬ ꤕꤢ꤭, ꤚꤣꤧ꤬ ꤜꤢꤪ꤭ ꤒꤢꤩ꤬ꤗꤢꤩ꤬ꤟꤥ꤬ꤗꤢꤩ꤬ꤞꤝꤢꤩ ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤓꤢꤩ꤬ꤜꤥ꤭ꤜꤢꤪ꤭ ꤢ꤬ ꤕꤢ꤭꤯ 3ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤍ꤫ꤥ꤬ ꤘꤣ ꤔꤢꤧ꤬ ꤟꤢꤩꤙꤢꤩ꤬ ꤘꤣ ꤗ꤫ꤢꤪ꤬ꤋꤤ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤔ꤫ꤤ꤬ꤟꤥ꤭ꤜꤢ꤭ꤒꤢꤩ꤬ ꤢ꤬ ꤘꤣ ꤗ꤫ꤢꤪ꤬ꤞꤤ꤭ꤊꤜꤢꤩ꤭ ꤕꤢ꤭꤯ ꤓꤥ꤭ꤚꤣꤧ꤬ ꤍ꤫ꤥ꤬ ꤘꤣ ꤔꤢꤧ꤬ ꤟꤢꤩꤙꤢꤩ꤬ꤟꤥ꤬ꤟꤢꤩꤙꤢꤩ꤬ꤞꤝꤢꤩ ꤢ꤬ ꤘꤣ ꤟꤤ꤬ꤘꤢꤪꤊꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤓꤢꤧ꤬ ꤢꤩꤓꤥ꤭ꤜꤥ꤭ ꤢ꤬ ꤘꤣ ꤟꤤ꤬ꤊꤢꤨꤊ꤫ꤥ꤬ꤋꤢꤨ꤬ ꤕꤢ꤭꤯
ꤊꤣꤧ꤬ꤛꤢꤧ꤭ ꤘꤣ ꤕꤢꤩ꤬ ꤒꤥ꤭ꤙꤢꤩ꤬ ꤞꤤꤤ꤬ꤏꤢꤩ꤭ ꤢ꤬
(ꤗꤢꤞꤢꤧ ꤁꤀:꤂꤈-꤃꤁)
4“ꤠꤢꤧ꤭ ꤋꤥ꤭ꤙꤢꤧꤞꤝꤢ ꤞꤤ꤭꤮, ꤠꤢꤧ꤭ ꤟꤢꤩ ꤞꤤ꤭, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤞꤣꤧ꤭ ꤡ꤫ꤢꤧ꤬ ꤞꤤ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤒꤣꤧ꤬ꤘꤢꤦꤚꤣꤧ꤬ ꤘꤣꤋꤛꤢ꤭ꤔꤣꤧ꤬, ꤢ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤡ꤫ꤢꤧ꤬ ꤕꤢ꤬ ꤞꤤ꤭ ꤒꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤞꤤꤤ꤬ꤏꤢꤩ꤭ ꤒ꤫ꤢꤧ꤬ ꤢ꤬ ꤒ꤫ꤢꤧ꤬ꤗꤢꤩ꤬꤯ 5ꤞꤤ꤭ ꤒꤥ꤭ꤙꤢꤩ꤬ ꤞꤤꤤ꤬ꤏꤢꤩ꤭ ꤢꤨ꤭ꤕꤢꤩ꤭ ꤔꤣꤧ꤬, ꤠꤢꤧ꤭ ꤊ꤫ꤢꤦ꤬ ꤘꤣꤧꤜꤥ꤭ ꤕ꤫ꤢꤩ꤬ꤚꤣꤧ ꤞꤤ꤭꤯ ꤞꤤꤤ꤬ꤏꤢꤩ꤭ ꤜꤢ꤭ꤋꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤢ꤬ ꤗꤢꤩ꤬ꤞꤣꤧ꤭ ꤡ꤫ꤢꤧ꤬ ꤞꤤ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤚꤣꤧ꤬ ꤘꤣꤋꤛꤢ꤭ꤔꤣꤧ꤬ ꤢ꤬ ꤥ꤬ ꤕꤢ꤬ ꤔꤢꤧ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤘꤣ ꤢ꤬ ꤊ꤫ꤢꤦ꤬ ꤠꤤ꤭ꤒꤢ꤭ ꤞꤤ꤭ ꤘꤣ ꤗꤢꤪꤚꤢ꤬ꤕꤢꤪ꤬ꤒꤢꤧ꤬ꤊꤢꤨ꤭ ꤕꤢ꤭ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤔꤤ꤮꤯ ꤠꤢꤧ꤭ ꤊ꤫ꤢꤦ꤬ ꤟꤢꤩ ꤕ꤫ꤥ꤬ ꤋꤛꤢ꤭ꤞꤢꤧ ꤞꤤ꤭ ꤔꤢꤧ ꤞꤤꤤ꤬ꤏꤢꤩ꤭ ꤜꤢ꤭ꤋꤢꤧ꤭ ꤢ꤬ ꤔꤤ꤮꤯ 6ꤓꤢꤨ꤬ꤖꤚꤢꤩꤟꤢꤨ ꤍꤢꤧ꤭ꤙꤢꤩ꤬ꤔꤣꤧ꤬ ꤢꤨ꤭ ꤤ꤬ꤏꤢꤩ꤭ ꤖꤢꤧ ꤜꤢꤨ꤭ ꤔꤢꤧ ꤚꤢꤦ꤭ꤛꤢ꤬ ꤔꤣꤧ꤭ꤗꤢꤩ ꤖꤢꤧ ꤠꤢꤧ꤭ꤟꤢꤩꤒ꤫ꤥ꤬? ꤗꤢ꤬ꤔꤢꤧꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤏꤥ꤭ꤒꤣꤧ꤬ꤕꤢ꤬ ꤛꤢꤩ꤬ꤞꤤ꤭ ꤒꤣ꤬ꤙꤢꤩ꤬꤮ ꤒꤥ꤬꤯ 7ꤜꤢꤪ꤭ ꤞꤤ꤭ ꤊꤢꤨꤜꤥ꤬ ꤘꤣ ꤞꤤ꤭ ꤊꤢꤨ꤬ꤊꤜꤢꤪꤜꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧꤚꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤘꤢꤧꤙꤢꤩ꤬ ꤥ꤬ꤔꤢꤩ꤬ ꤓꤥ꤭ꤜꤢꤪ꤭ꤕꤜꤤ꤭ ꤡꤣꤧꤟꤣꤧ꤯ ꤞꤤꤤ꤬ꤏꤢꤩ꤭ ꤒ꤫ꤢꤧ꤬ꤗꤢꤩ꤬! ꤞꤤ꤭ ꤍꤢꤨ꤬ꤘꤢꤨ꤬ꤖꤚꤤ꤬ꤘꤢꤨ꤬ ꤜꤣ ꤡꤣꤧ ꤔꤢꤧ ꤓꤢꤨ꤬ꤖꤚꤢꤩꤟꤢꤨ ꤔꤣꤧ꤬ ꤒꤣ꤬ꤕꤜꤢꤨ꤬ꤒꤣ꤬ꤖꤢꤩ꤬ ꤡꤣꤧ꤯
ꤒꤢꤩ꤬ꤢꤪꤜꤢꤧ꤬ ꤖꤛꤢꤏꤢꤦ꤬ ꤔꤢꤧ ꤒꤢꤩ꤬ꤓꤢꤩꤙꤤꤏꤢꤦ꤬ꤋꤛꤢ꤭ ꤋꤚꤤ
(ꤗꤢꤞꤢꤧ ꤁꤀:꤃꤂-꤃꤃, ꤁꤂:꤃꤂, ꤁꤀:꤁꤉-꤂꤀)
8“ꤠꤢꤧ꤭ ꤟꤢꤩ ꤞꤤ꤭, ꤢꤨ꤭ꤕꤢꤩ꤭ꤕꤢꤩ꤭꤮ ꤙꤢꤩ꤬ꤙꤢꤩ꤬ ꤢ꤬ ꤊꤢꤩ꤬ ꤢꤪꤜꤢꤧ꤬ ꤔꤢꤧ ꤛꤢꤩ꤬ꤏꤛꤢꤨꤋꤚꤤ ꤗꤢ꤬ ꤠꤢꤧ꤭ ꤙꤢꤧ꤬ꤡꤢꤩ꤬ ꤘꤣ ꤊꤣꤧ꤬ꤛꤢꤧ꤭ ꤢꤩꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤟꤢꤩꤔꤣꤧ꤬, ꤖꤚꤢꤩ꤬ꤜꤢꤨ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭, ꤠꤢꤧ꤭ ꤊ꤫ꤢꤦ꤬ ꤢꤪꤜꤢꤧ꤬ꤊꤣꤧ꤭ꤘꤢꤦ꤬ ꤢ꤬ ꤟꤢꤨꤔꤣꤧ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤕꤢ꤭꤯ 9ꤗꤢ꤬ꤔꤢꤧꤚꤣꤧ꤬ ꤢꤨ꤭ꤕꤢꤩ꤭ꤕꤢꤩ꤭꤮ ꤙꤢꤩ꤬ꤙꤢꤩ꤬ ꤢ꤬ ꤊꤢꤩ꤬ ꤓꤢꤩꤏꤢꤦ꤬ꤙꤤꤊꤢꤧ꤭#12:9 ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬ ꤢ꤬ ꤟꤢꤩ ꤔꤢꤧ ꤏꤢꤨ꤬ꤗꤥ ꤠꤢꤧ꤭ ꤔꤢꤧ ꤢ꤬ ꤛ꤫ꤢꤦ꤬ꤢꤩ꤬ ꤠꤢꤧ꤭ ꤒꤥ꤬ ꤘꤣ ꤊꤣꤧ꤬ꤛꤢꤧ꤭ ꤢꤩꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤟꤢꤩꤔꤣꤧ꤬, ꤖꤚꤢꤩ꤬ꤜꤢꤨ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭, ꤠꤢꤧ꤭ ꤊ꤫ꤢꤦ꤬ ꤓꤢꤩꤏꤢꤦ꤬ꤙꤤꤊꤢꤧ꤭ ꤊꤣꤧ꤭ ꤢ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤕꤢ꤭꤯ 10ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤟꤢꤩꤞꤢꤦ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ ꤣꤧ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤕꤜꤝꤢ꤭ꤊꤢꤧ꤭ ꤜꤢꤨ꤭ꤒꤢꤩ꤬ꤞꤢꤦ ꤖꤢꤧ꤯ ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤟꤢꤩꤞꤢꤦ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤕꤜꤝꤢ꤭ꤊꤢꤧ꤭ ꤡ꤫ꤢꤧ꤬ ꤕꤢ꤬ ꤛꤢꤩ꤬ꤞꤤ꤭ ꤒꤢꤩ꤬ꤞꤢꤦ ꤒꤥ꤬꤯#ꤗꤢꤞꤢꤧ ꤁꤂:꤃꤂, ꤗꤢ꤬ꤊꤢꤨ ꤃:꤂꤉
11“ꤏꤢ꤮ ꤢꤨ꤭ ꤕ꤫ꤢꤦ꤬ꤞꤢꤨ꤭ꤡꤝꤢ ꤞꤤ꤭ ꤘꤣ ꤒꤢꤩ꤬ꤡꤢꤪꤙꤢꤩ꤭ꤟꤥ꤭ꤊꤢꤨ꤭ ꤕꤢ꤭ ꤢ꤬ꤋꤢꤩ꤭ꤔꤣꤧ꤬ ꤙꤢꤩ꤬ꤙꤢꤩ꤬, ꤘꤣ ꤋꤝꤤꤘꤢꤨ꤬ ꤒꤣꤧ꤬ꤟꤢꤩ꤬ ꤢ꤬ꤕꤣꤧꤞꤢꤩ꤬ꤑꤢꤩ꤭ ꤕꤢ꤭ꤔꤣꤧ꤬ ꤙꤢꤩ꤬ꤙꤢꤩ꤬, ꤔꤢꤧ ꤘꤣ ꤖꤚꤢꤩ꤬ꤕꤣꤓꤣꤧ꤭ꤊ꤫ꤢꤩ꤬ ꤒꤣꤧ꤬ꤟꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤢ꤬ꤋꤢꤩ꤭ꤕꤢ꤭ꤔꤣꤧ꤬ ꤙꤢꤩ꤬ꤙꤢꤩ꤬, ꤔꤢꤧ꤬ ꤒꤥ꤭ꤙꤢꤩ꤬ ꤟꤢꤩꤙꤢꤩ꤬ ꤒꤣꤧ꤬ꤊꤢꤩ꤬ꤙꤤ ꤚꤣꤧꤘꤢꤦ꤬ ꤔꤢꤧ꤬ꤔ꤫ꤢꤩ꤬ ꤟꤢꤨꤒꤢꤩ꤭ ꤚꤣꤧ꤬ ꤔꤢꤧ꤬ ꤒꤥ꤭ꤙꤢꤩ꤬ ꤟꤢꤩꤏꤢꤦ꤬ ꤟꤢꤨꤒꤢꤩ꤭ꤔꤣꤧ꤬ ꤙꤢꤩ꤬ꤊ꤫ꤢꤨ꤬ꤙꤢꤩ꤬ꤊꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤯#ꤗꤢꤞꤢꤧ ꤁꤀:꤁꤉-꤂꤀, ꤗꤢ꤬ꤊꤢꤨ ꤁꤃:꤁꤁, ꤜꤢꤨꤊꤢ꤬ ꤂꤁:꤁꤄-꤁꤅ 12ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤏꤢ꤮ ꤔꤢꤧ꤬ ꤒꤥ꤭ ꤟꤢꤩꤙꤢꤩ꤬ꤟꤣꤧ ꤢ꤬ꤏꤣꤧꤢ꤬ꤋꤢꤩ꤭ ꤕꤢ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤊ꤫ꤢꤦ꤬ ꤤ꤬ꤞꤝꤢꤒꤢ꤭ ꤘꤢꤦ꤬ ꤔꤢꤧ꤬ ꤔꤢꤧ ꤔꤢꤧ꤬ ꤒꤥ꤭ꤙꤢꤩ꤬ ꤟꤢꤩꤙꤢꤩ꤬ ꤟꤢꤨꤒꤢꤩ꤭ ꤕꤢ꤭ ꤔꤣꤧ꤬ ꤕꤢ꤭꤯”
ꤒꤢꤩ꤬ꤟꤢꤩꤙꤢꤩ꤬ꤋꤢꤋꤥ꤬ ꤊꤣꤧ꤬ꤛꤢꤧ꤭ꤘꤢꤨ꤬ꤛ꤫ꤢꤧ꤬ ꤘꤣ ꤢ꤬ꤞꤤꤕꤜꤢꤪ꤬ ꤕꤜꤥ꤭ꤖꤢꤩ ꤊꤣꤧ꤭ꤢꤨ꤭ ꤒꤥ꤬ ꤒꤣ꤬ꤖꤚꤢꤩ꤬
13ꤘꤣ ꤊꤣꤧ꤬ꤛꤢꤧ꤭ ꤢꤩꤖꤚꤢꤩ꤬ ꤢ꤬ꤊꤜꤢꤩ꤭ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤟꤢꤩ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤧ, “ꤞꤢꤚꤢ꤮ ꤟꤢꤩ ꤕ꤫ꤢꤩ꤬ꤊꤣꤧ꤭ ꤠꤢꤧ꤭ ꤗ꤫ꤢꤧ꤬ꤖꤚꤢꤩ꤬ꤋꤢꤨ꤭ ꤔꤢꤧ ꤢ꤬ ꤊ꤫ꤢꤦ꤬ ꤙꤢꤩ꤭ ꤕ꤫ꤢꤩ꤬ꤊꤣꤧ꤭ ꤠꤢꤧ꤭ ꤢꤨ꤬ꤡꤢꤩ꤭ꤒꤣꤧ꤬ꤛ꤫ꤢꤩ꤬ ꤘꤣ ꤕꤢꤩ꤬ꤖꤢꤩ꤭ ꤘꤢꤧ꤬ꤊꤢꤧ꤭ ꤕ꤫ꤢꤩ꤬ ꤕꤢꤩ꤬ꤔꤣꤧ꤬ ꤒꤣꤧ꤬ꤟꤢꤩ꤬꤯”
14ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤢ꤬ ꤔꤢꤧ, “ꤗꤢ꤬ ꤢꤨ꤭ꤕꤢꤩ꤭ ꤘꤢꤧ꤬ꤓꤢꤧ꤬ ꤠꤢꤧ꤭ ꤔꤢꤧ ꤠꤢꤧ꤭ ꤊ꤫ꤢꤦ꤬ ꤓꤝꤢ꤭ ꤕ꤫ꤢꤩ꤬ ꤞꤤ꤭ ꤖꤚꤢꤩ꤬ꤡꤢꤧ꤬ꤒꤥ꤭ꤙꤢꤩ꤬ꤒꤢꤩ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤖꤚꤢꤩ꤬ ꤙꤢꤩ꤭ ꤕ꤫ꤢꤩ꤬ ꤞꤤ꤭ ꤢꤨ꤬ꤡꤢꤩ꤭ꤒꤣꤧ꤬ꤛ꤫ꤢꤩ꤬ ꤘꤣ ꤞꤤ꤭ ꤞꤤꤔꤣꤧ꤭ ꤢ꤬ꤕꤜꤢꤩ꤬ꤊꤢꤨ꤭ ꤔꤣꤧ꤬ ꤕꤢꤩ꤭꤯” 15ꤓꤥ꤭ꤚꤣꤧ꤬ ꤢ꤬ ꤟꤢꤩ ꤕ꤫ꤥ꤬ ꤛꤢꤩ꤬ꤞꤤ꤭ ꤔꤢꤧ, “ꤥ꤬ꤚꤢꤪ꤬ꤥ꤬ꤚꤢꤩ꤭ ꤜꤢ꤭ꤋꤢꤧ꤭, ꤡꤝꤢꤠꤢꤪ꤬ ꤋꤢꤩ꤭ꤠꤢꤪ꤬ꤊꤢꤧ꤭ ꤜꤢ꤭ꤋꤢꤧ꤭ ꤒꤢꤩ꤬ꤗꤢꤧꤕꤢꤨ꤭ ꤊꤢꤨꤠ꤫ꤢ꤬ꤊꤢꤨꤠꤢꤩ꤭ ꤢꤩ꤬ ꤡꤣꤧ ꤘꤢꤦ꤬ꤑꤢꤩ꤭#12:15 ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ꤟꤢꤩ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ “ꤜꤢꤪ꤭ꤖꤢ꤭” ꤞꤢꤧꤔꤢꤧ ꤗꤢꤧ꤬ꤍ꤫ꤥ꤬ ꤔꤣꤧ꤬꤯ ꤗ꤫ꤢ꤬ꤒꤥ꤬ꤚꤣꤧ꤬ “ꤞꤤꤜꤢꤪ꤭ ꤢꤨ꤭ꤒꤢꤩ꤬꤯” ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤡꤣꤧꤙꤢꤒꤢꤩ꤭꤮ ꤙꤢꤩ꤬ꤙꤢꤩ꤬, ꤢ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤔꤣꤧ꤬ ꤢ꤬ ꤗꤢꤩ꤬ꤚꤢꤧ ꤡꤝ꤫ꤢ꤬ꤡ꤫ꤢꤧ꤬ ꤜꤢꤨ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤒꤣ꤬ꤡꤣ꤬꤮ ꤒꤥ꤬꤯”
16ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ ꤍ꤫ꤥ꤬ꤋꤢꤋꤥ꤬ ꤒꤣ꤬ꤗꤢꤦ꤭, “ꤒꤣ꤬ꤖꤥꤢ꤬ꤋꤢꤩ꤭ꤔꤣꤧ꤬ ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤥ꤬ ꤒꤣ꤬ꤖꤚꤢꤩ꤬, ꤚꤣꤧ꤬ ꤢ꤬ ꤥ꤬ ꤚꤣꤧꤘꤢꤦ꤬ ꤔꤢꤧ ꤢ꤬ꤊꤢꤨꤊꤜꤢꤩ꤭ ꤒꤣ꤬ꤜ꤫ꤢꤩ꤬ ꤚꤣꤧ꤬ ꤢ꤬ ꤒꤢꤩ꤬ꤗ꤫ꤢꤪ꤬ꤒꤢꤩ꤬ꤙꤥ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤢꤩ꤬ꤒꤝ꤫ꤢ꤬ꤞꤢꤩ꤬ꤚꤢꤧ ꤔꤢꤧ꤬ꤡꤣꤧ꤯ 17ꤚꤣꤧ꤬ ꤢ꤬ ꤒꤣꤧ꤬ꤔꤢꤩ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ꤔꤢꤧ, ‘ꤠꤢꤧ꤭ ꤜ꤫ꤢꤩ꤬ꤊꤜꤢꤪ꤭ꤕꤜꤢꤪ ꤠꤢꤧ꤭ ꤞꤢꤪ꤬ꤞꤢꤩ꤬ ꤠꤢꤩ꤬ꤖꤥ꤭ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ꤔꤣꤧ꤬, ꤢ꤬ ꤜ꤫ꤢꤩ꤬ꤥ꤬ꤜ꤫ꤢꤩ꤬ꤙꤢꤧ꤬ ꤥ꤬ ꤕꤢ꤬ ꤒꤥ꤬ ꤟꤣꤧ, ꤚꤣꤧ꤬ ꤠꤢꤧ꤭ ꤙꤢꤩ꤬ ꤗꤢꤩ꤬ꤟꤢꤨꤒꤢꤩ꤭?’
18“ꤣꤧ꤭ꤒꤣ꤬ꤖꤥꤚꤣꤧ꤬ ꤢ꤬ ꤟꤢꤩ ꤔꤢꤧ, ‘ꤠꤢꤧ꤭ ꤊ꤫ꤢꤦ꤬ ꤗꤢꤩ꤬ꤟꤢꤨꤣꤧ꤭ ꤕꤢ꤭ ꤗꤢꤩ꤭, ꤠꤢꤧ꤭ ꤊ꤫ꤢꤦ꤬ ꤗꤢꤩ꤬ꤖꤚꤥꤊꤢꤧ꤭ ꤠꤢꤧ꤭ ꤡꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬ ꤠꤢꤧ꤭ ꤊ꤫ꤢꤦ꤬ ꤤ꤬ꤏꤢꤪꤓꤢꤧ꤬ꤘꤢꤨ꤬ ꤤ꤬ꤏꤢꤪꤓꤢꤧ꤬ꤜ꤫ꤢꤧ꤬ ꤒꤣꤧ꤬ꤕꤜꤢꤩ꤬ ꤜꤣ ꤔꤢꤧ ꤣꤧ꤭ꤒꤣꤧ꤬ꤟꤢꤩ꤬, ꤚꤣꤧ꤬ ꤠꤢꤧ꤭ ꤊ꤫ꤢꤦ꤬ ꤊꤜꤢꤪ꤭ꤕꤜꤢꤪꤘꤢꤧ꤬ꤕꤜꤢꤪ ꤜꤢꤪ꤭ ꤔꤢꤧ ꤠꤢꤧ꤭ ꤞꤢꤪ꤬ꤞꤢꤩ꤬ꤠꤢꤩ꤬ꤖꤥ꤭, ꤠꤢꤧ꤭ꤙꤥꤠꤢꤧ꤭ꤟꤥ꤭ ꤔꤢꤧ ꤠꤢꤧ꤭ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤒꤣꤧ꤬ꤟꤢꤩ꤬ ꤙꤣꤧꤔꤣꤧ꤬ ꤕꤢ꤭ ꤗꤢꤩ꤭꤯ 19ꤓꤥ꤭ꤚꤣꤧ꤬ ꤠꤢꤧ꤭ ꤊ꤫ꤢꤦ꤬ ꤟꤢꤩꤜꤢꤧ꤬ ꤚꤣꤧꤘꤢꤦ꤬ ꤠꤢꤧ꤭ꤔ꤫ꤢꤩ꤬ ꤔꤢꤧ, “ꤖꤢꤩ꤭ꤙꤝꤤꤚꤢꤧ, ꤔꤢꤧ꤬ ꤘꤢꤧ꤬ꤥ꤬ꤕꤜꤢꤪ ꤜꤢꤪ꤭ ꤟꤣꤧ ꤒꤢꤩ꤬ꤕꤝꤢ꤭꤮ ꤒꤣ꤬ꤡꤣ꤬ ꤘꤣ ꤔꤢꤧ꤬ ꤊ꤫ꤢꤦ꤬ ꤢꤩ꤬ꤥ꤭ꤔ꤫ꤤ꤬ ꤑꤢ꤭ ꤚꤣꤧꤘꤢꤦ꤬ ꤡꤣꤧ ꤢ꤬ ꤢꤩꤔꤢ꤬ꤢꤩꤜꤢꤩ꤭ ꤡꤣꤧ ꤕꤢ꤭꤯ ꤥ꤬ꤗꤣꤧ꤭ ꤔꤢꤧ ꤢꤩ꤬ꤗꤣꤧ꤭, ꤢꤩ꤬ꤊꤢꤪꤥ꤭ꤙꤢ꤭, ꤥ꤬ꤒꤣꤧ꤬ꤡꤣꤧꤒꤣꤧ꤬ꤡ꤫ꤢꤨ꤬ ꤗꤣꤧ꤭꤯”’
20“ꤗꤢ꤬ꤔꤢꤧꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤟꤢꤩ ꤜꤢꤨ꤭ ꤔꤢꤧ, ‘ꤖꤢꤩ꤭ꤥ꤬ꤜꤣꤥ꤬ꤊꤜꤢꤪ꤭, ꤣꤧ꤭ꤒꤣ꤬ꤞꤢꤩ꤭ ꤕꤢ꤭ ꤗꤢ꤬ ꤠꤢꤧ꤭ ꤊ꤫ꤢꤦ꤬ ꤖꤛꤢꤓꤢꤩ꤬ꤊꤢꤧ꤭ ꤟꤣꤧ ꤔꤢꤧ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤕꤢ꤭꤯ ꤟꤢꤨꤔꤣꤧ꤬ꤚꤣꤧ꤬ ꤜꤢꤪ꤭ ꤒꤢꤩ꤬ ꤘꤣ ꤔꤢꤧ꤬ ꤘꤢꤧ꤬ꤕꤜꤢꤪ ꤥ꤬ꤔꤢꤩ꤬ ꤘꤣ ꤔꤢꤧ꤬ꤑꤢꤩ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢꤨ꤭ꤕꤢꤩ꤭ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤕꤢ꤭ ꤕꤢꤩ꤭?’”
21ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤔꤢꤧ, “ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤘꤢꤧ꤬ꤕꤜꤢꤪ ꤚꤣꤧꤘꤢꤦ꤬ ꤢ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤘꤣ ꤢ꤬ꤑꤢꤩ꤭, ꤗꤢ꤬ꤔꤢꤧꤚꤣꤧ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ꤔꤣꤧ꤬, ꤢ꤬ ꤊꤢꤩ꤬ ꤏꤥ꤭ꤖꤢꤏꤥ꤭ꤚꤢꤧ꤬ ꤟꤢꤩꤔꤣꤧ꤬ ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤞꤢꤧꤟꤢꤨ ꤣꤧ꤭ꤔꤣꤧ꤬ ꤕꤢ꤭꤯”
ꤒꤢꤩ꤬ꤛ꤫ꤢꤦ꤬ꤢꤩ꤬ꤚꤣꤧ ꤡꤢꤪꤗꤣꤧ꤬ꤚꤢꤧ꤬
(ꤗꤢꤞꤢꤧ ꤆:꤂꤅-꤃꤄)
22ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤠꤢꤧ꤭ ꤟꤢꤩ ꤞꤤ꤭, ꤙꤢꤩ꤬ꤊ꤫ꤢꤨ꤬ꤙꤢꤩ꤬ꤊꤢꤧ꤭ ꤒ꤫ꤢꤧ꤬ ꤘꤣ ꤞꤤ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤢ꤬ꤑꤢꤩ꤭ꤔꤣꤧ꤬ ꤒ꤫ꤢꤧ꤬ꤗꤢꤩ꤬꤯ ꤞꤤ꤭ ꤜ꤫ꤥ꤬ꤢꤩ꤬ꤜ꤫ꤥ꤬ꤥ꤭ ꤢ꤬ꤑꤢꤩ꤭ ꤙꤢꤩ꤬ꤙꤢꤩ꤬, ꤞꤤ꤭ ꤜ꤫ꤥ꤬ꤊꤢꤦ꤭ꤜ꤫ꤥ꤬ꤞꤢꤧ ꤙꤤꤔꤢꤧ ꤞꤤ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤢ꤬ꤑꤢꤩ꤭ ꤙꤢꤩ꤬ꤙꤢꤩ꤬, ꤙꤢꤩ꤬ꤊ꤫ꤢꤨ꤬ꤙꤢꤩ꤬ꤊꤢꤧ꤭ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤯ 23ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤤ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤔꤣꤧ꤬ ꤢ꤬ ꤜ꤫ꤥ꤬ꤘꤢꤨ꤬ꤜꤣ ꤕꤢ꤬ ꤡꤣꤧ ꤔꤢꤧ ꤞꤤ꤭ ꤜ꤫ꤢꤩ꤬ꤢꤩ꤬ꤜ꤫ꤢꤩ꤬ꤥ꤭ ꤡꤣꤧ, ꤚꤣꤧ꤬ ꤞꤤ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤣꤧ꤭ꤔꤣꤧ꤬ ꤢ꤬ ꤜ꤫ꤥ꤬ꤘꤢꤨ꤬ꤜꤣ ꤕꤢ꤬ ꤡꤣꤧ ꤔꤢꤧ ꤞꤤ꤭ ꤜ꤫ꤢꤩ꤬ꤊꤢꤦ꤭ꤜ꤫ꤢꤩ꤬ꤞꤢꤧ ꤒꤣꤧ꤬ꤟꤢꤩ꤬ ꤡꤣꤧ꤯ 24ꤒꤣꤧ꤬ꤔꤢꤩ꤬ꤗꤢꤧ ꤜꤢ꤭ꤋꤢꤧ꤭ ꤡꤢꤨꤠꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤞꤤ꤭ ꤤ꤬ꤏꤢꤪꤤ꤬ꤕꤜꤢꤦ꤭ ꤊꤣꤧ꤭ꤢꤨ꤭ ꤒꤢꤩ꤬ꤊꤜꤝꤤ꤭ꤒꤢꤩ꤬ꤜꤝꤤ ꤒꤥ꤬, ꤢ꤬ ꤊꤢꤩꤕꤜꤢꤪꤘꤢꤧ꤬ꤘꤝꤢ ꤊꤣꤧ꤭ꤢꤨ꤭ ꤒꤢꤩ꤬ꤞꤢꤩ꤬ꤒꤢꤩ꤬ꤖꤥ꤭ ꤒꤥ꤬꤯ ꤢ꤬ ꤜ꤫ꤢꤩ꤬ꤘꤢꤧ꤬ꤕꤜꤢꤪ ꤜ꤫ꤢꤩ꤬ꤢꤩ꤬ꤜ꤫ꤢꤩ꤬ꤥ꤭ ꤜ꤫ꤢꤩ꤬ꤥ꤬ ꤥ꤬ ꤊꤣꤧ꤭ꤢꤨ꤭ ꤒꤥ꤬, ꤢ꤬ ꤜ꤫ꤢꤩ꤬ꤘꤢꤧ꤬ꤕꤜꤢꤪ ꤙꤥꤡ꤫ꤢ꤬ ꤥ꤬ ꤊꤣꤧ꤭ꤢꤨ꤭ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤙꤥ꤬ꤢꤩ꤬ꤙꤥ꤬ꤥ꤭ ꤛꤢꤩ꤬ꤞꤤ꤭ ꤟꤢꤨꤔꤣꤧ꤬ꤚꤣꤧ꤬, ꤞꤤ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤞꤤ꤭ ꤍꤢꤨ꤬ꤘꤢꤨ꤬ꤖꤚꤤ꤬ꤘꤢꤨ꤬ ꤜꤣ ꤡꤣꤧ ꤔꤢꤧ ꤓꤢꤨ꤬ꤟꤢꤨ ꤣꤧ꤭ꤒꤣꤧ꤬ꤟꤢꤩ꤬ ꤡꤣꤧ꤯ 25ꤘꤣ ꤞꤤ꤭ꤊ꤫ꤢꤨ꤬ꤞꤤ꤭ꤊꤢꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬, ꤞꤤ꤭ ꤡꤝꤤ꤬ꤓꤢꤨ꤭ꤟꤢꤧ꤭ ꤢꤩꤓꤢꤧ꤬ ꤡ꤫ꤢꤧ꤬ ꤜꤣ ꤚꤣꤧꤘꤢꤦ꤬ ꤕ꤫ꤥ꤬ ꤞꤤ꤭ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤒꤣꤧ꤬ꤊꤤ꤬ꤟꤢꤨ ꤖꤢꤧꤔꤣꤧ꤬ ꤢ꤬ ꤥ꤬ ꤒꤣ꤬ꤖꤚꤢꤩ꤬꤮ ꤒꤥ꤬꤯ 26ꤡꤝꤤ꤬ꤓꤢꤨ꤭ꤟꤢꤧ꤭ ꤕ꤫ꤥ꤬ ꤗ꤫ꤢꤪ꤬ꤔꤣꤧ꤭ ꤟꤢꤨꤣꤧ꤭ ꤒꤣꤧ꤬ꤊꤤ꤬ꤟꤢꤨ ꤖꤢꤧ ꤚꤣꤧ꤬, ꤞꤤ꤭ ꤊꤢꤩ꤬ ꤗꤢꤩ꤬ꤡ꤫ꤢꤧ꤬ꤒꤥ꤬ ꤟꤢꤩꤔꤣꤧ꤬ ꤞꤤ꤭ ꤡꤝꤢ ꤙꤢꤩ꤬ꤊ꤫ꤢꤨ꤬ꤙꤢꤩ꤬ꤊꤢꤧ꤭ ꤒꤥ꤬ ꤒꤢꤩ꤬ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ ꤗꤢꤩ꤬ꤒꤢꤩ꤭?
27“ꤒꤢꤩ꤬ꤖꤥ꤭ꤒꤢꤩ꤬ꤊ꤫ꤤ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤖꤢꤩꤓꤢꤧ꤬ꤖꤥ꤭ꤓꤢꤧ꤬ ꤜꤢ꤭ꤋꤢꤧ꤭ ꤟꤢꤨꤒꤢꤩ꤭ꤔꤣꤧ꤬, ꤒꤣꤧ꤬ꤔꤢꤩ꤬ ꤗꤢꤧꤗꤣꤧ꤭ ꤜꤢ꤭ꤋꤢꤧ꤭꤯ ꤛꤢꤩ꤬ꤞꤤ꤭ ꤢꤩ꤬ꤚꤢꤧ꤬ ꤊꤣꤧ꤭ꤢꤨ꤭ ꤒꤣ꤬ꤡꤣ꤬꤮ ꤒꤥ꤬, ꤢ꤬ ꤤ꤬ꤟꤤ ꤊꤣꤧ꤭ꤢꤨ꤭ ꤒꤣꤧ꤬ꤖꤢꤧ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤠꤢꤧ꤭ ꤟꤢꤩ ꤞꤤ꤭꤮, ꤋꤝꤤꤏꤢꤪ꤬ꤜꤢ꤬ꤗꤥ꤬ ꤘꤣ ꤢ꤬ ꤥ꤬ ꤡꤣꤧ ꤔꤢꤧ ꤢ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤜꤢꤪ꤭꤮ ꤕꤜꤤ꤭ ꤡꤣꤧ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤟꤣꤧ꤬ꤡꤢ꤬ ꤘꤣ ꤢ꤬ꤒꤝ꤫ꤢ꤬ ꤋꤚꤢꤦ꤬ꤔꤢꤧ꤬ꤜꤢꤩ ꤔꤢꤧ ꤒꤢꤩ꤬ꤖꤥ꤭ ꤔꤣꤧ꤬ꤒꤣ꤬ꤖꤥ꤭ ꤖꤢꤧꤔꤣꤧ꤬ ꤢ꤬ ꤥ꤬ ꤒꤣ꤬ꤙꤢ꤬꤮ ꤒꤥ꤬꤯#ꤋꤝꤤ ꤢ꤬ꤚ꤫ꤣꤧ꤬ꤜꤣ ꤒꤣ꤬ꤙꤢ꤬ ꤁꤀:꤄-꤇, ꤚꤢ꤭ꤗꤢꤚꤢ꤭ꤒꤢꤩ꤭ ꤔꤣꤧ꤭ꤙꤢ꤬ ꤒꤣ꤬ꤙꤢ꤬ ꤉:꤃-꤆ 28ꤊꤣ꤮ ꤊꤣꤧ꤬ꤛꤢꤧ꤭ ꤒꤢꤩ꤬ꤛ꤫ꤢꤦ꤬ꤕꤣꤧ꤬ꤒꤤ ꤞꤤ꤭꤮, ꤗꤤ꤬ꤞꤢꤩ꤬ꤗ꤫ꤢꤪ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤣꤧ꤭ꤒꤣ꤬ꤔꤣꤧ꤭ ꤢ꤬ ꤥ꤬ ꤜꤢ꤭ꤋꤢꤧ꤭ ꤘꤣ ꤊ꤫ꤢꤩ꤬ꤘꤢꤦ꤭ꤊꤢꤨ꤭, ꤕꤣꤧꤚꤥ꤬ꤕꤢ꤭ ꤢꤨ꤭ ꤏꤢꤦꤔꤥ꤭ꤊꤢꤧ꤭ ꤢ꤬ ꤘꤣ ꤗꤤ꤬ꤊꤢꤨ꤭ ꤖꤢꤧ ꤒꤣꤧ꤬ꤘꤢꤦꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤊꤢꤦ꤭ꤘꤣꤧꤞꤢꤧ ꤢ꤬ ꤊꤢꤩ꤬ꤟꤢꤩꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧꤊꤢꤦ꤭ꤘꤣꤧꤞꤢꤧ ꤚꤢꤧ ꤜꤣ ꤕꤢ꤬ ꤡꤣꤧ ꤞꤤ꤭ ꤔꤢꤧ ꤔꤣꤧ꤬ ꤕꤢ꤭꤯ 29ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤙꤢꤩ꤬ꤊ꤫ꤢꤨ꤬ꤙꤢꤩ꤬ꤊꤢꤧ꤭ ꤙꤢꤩ꤬ꤛꤢꤪ꤬ꤙꤢꤩ꤬ꤞꤤ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬꤯ ꤒꤥ꤭ ꤢꤩ꤬ꤋꤚꤢꤧ ꤕꤢ꤭ ꤤ꤬ꤒꤢꤩ꤭, ꤒꤥ꤭ ꤥ꤭ꤋꤚꤢꤧ ꤕꤢ꤭ ꤤ꤬ꤒꤢꤩ꤭ꤔꤣꤧ꤬, ꤒꤣꤧ꤬ꤔꤢꤩ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤯ 30ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤒꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ꤊ꤫ꤢꤨ꤬ꤢ꤬ꤊꤢꤧ꤭, ꤢ꤬ ꤗꤢꤧꤕꤢꤨ꤭ꤗꤢꤧꤠ꤫ꤢꤧ꤬ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬ꤟꤣꤧ꤯ ꤒꤢꤩ꤬ ꤘꤣ ꤞꤤ꤭ ꤜ꤫ꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤞꤤ꤭ ꤖꤢꤩ꤭ ꤞꤤꤑꤢꤩ꤭ꤘꤢꤦ꤬ ꤟꤣꤧ꤯ 31ꤙꤢꤩ꤬ꤛꤢꤪ꤬ꤙꤢꤩ꤬ꤞꤤ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬ ꤒ꤫ꤢꤧ꤬ꤗꤢꤩ꤬! ꤗꤢꤧꤕꤢꤨ꤭ ꤜꤢ꤭ꤋꤢꤧ꤭ ꤒꤢꤩ꤬ ꤘꤣ ꤢ꤬ ꤜ꤫ꤥ꤬ꤘꤢꤨ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤚꤣꤧ꤬ ꤜꤢꤪ꤭ ꤒꤢꤩ꤬ꤘꤣ ꤞꤤ꤭ ꤜ꤫ꤥ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤘꤣꤧ ꤊꤣꤧ꤭ꤕ꤫ꤥ꤬ꤘꤢꤦ꤬ ꤞꤤ꤭ ꤕꤢ꤭꤯
ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤘꤣ ꤗꤢꤪꤋꤢꤨ꤬
(ꤗꤢꤞꤢꤧ ꤆:꤁꤉-꤂꤁)
32“ꤊꤣ꤮ ꤞꤤꤗꤤ꤬ꤗꤢꤨ꤬ ꤕꤣꤧ꤬ꤒꤤꤟꤢꤨ ꤞꤤ꤭꤮, ꤞꤤꤤ꤬ꤏꤢꤩ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤤ꤭ꤖꤢꤩ꤭ ꤞꤤꤕꤜꤢꤪ꤬ꤥ꤬ ꤘꤣ ꤢ꤬ ꤊ꤫ꤢꤦ꤬ ꤘꤣꤧ ꤞꤤ꤭ ꤔꤢꤧ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ ꤟꤣꤧ꤯ 33ꤤ꤬ꤏꤢꤩ꤭ꤊꤢꤧ꤭ ꤞꤤ꤭ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤗꤢꤩ꤬ꤜꤢꤨ꤭ ꤔꤢꤧ ꤊꤣꤧ꤬ꤛꤢꤧ꤭ ꤏꤥ꤭ꤖꤢꤏꤥ꤭ꤚꤢꤧ꤬ꤖꤢꤨ ꤔꤣꤧ꤬ꤒꤣꤧ꤬ꤟꤢꤩ꤬꤯ ꤞꤤ꤭ ꤊꤢꤩ꤬ ꤗꤢꤩ꤬ꤟꤢꤨꤔꤣꤧ꤬ ꤟꤢꤩꤚꤣꤧ꤬ ꤞꤤ꤭ ꤘꤢꤧ꤬ꤔꤥ꤭ ꤥ꤬ꤕꤜꤢꤪ ꤜꤢ꤭ꤋꤢꤧ꤭ ꤟꤣꤧ ꤞꤤ꤭ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤘꤣ ꤚꤢꤦ꤭ꤕꤛꤢ꤭ ꤘꤣ ꤢ꤬ ꤜꤣꤧ꤬ꤛꤢ꤭ ꤕ꤫ꤢꤩ꤬ꤒꤥ꤬ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤭ ꤟꤣꤧ꤯ ꤘꤣ ꤞꤤ꤭ ꤘꤣꤧ ꤊꤣꤧ꤬ꤛꤢꤧ꤭ ꤏꤥ꤭ꤖꤢꤏꤥ꤭ꤚꤢꤧ꤬ꤖꤢꤨ ꤒꤣꤧ꤬ꤟꤢꤩ꤬ ꤟꤢꤨꤔꤣꤧ꤬ ꤋꤝꤢ꤬ꤋꤛꤢ꤭, ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤕ꤫ꤢꤩ꤬ ꤞꤤ꤭ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤘꤣ ꤗꤢꤪꤋꤢꤨ꤬ ꤕꤢ꤭꤯ ꤞꤤ꤭ ꤊꤢꤩ꤬ ꤘꤢꤧ꤬ꤥ꤬ꤕꤜꤢꤪ ꤘꤣ ꤗꤢꤪꤋꤢꤨ꤬ ꤟꤢꤩꤔꤣꤧ꤬ꤗꤢ꤬, ꤞꤤ꤭ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤛꤝꤢ꤬ꤊꤣꤧ꤬ꤜꤢꤧ꤬ ꤒ꤫ꤥ꤬ꤡ꤫ꤢꤧ꤬ ꤒꤣ꤬ꤖꤥ꤮ ꤒꤥ꤬, ꤖꤚꤢꤩ꤬ꤢꤩ꤬ꤟꤥ꤬ꤢꤩ꤬ꤟꤤ ꤒꤣꤧ꤬ꤟꤢꤩ꤬ ꤢꤩ꤬ꤟꤥ꤬ꤡ꤫ꤢꤧ꤬ꤒꤥ꤬, ꤢ꤬ꤋꤚ꤫ꤢꤩ꤬ꤢ꤬ꤓꤥ꤬ ꤗꤢꤩ꤬ꤕꤛꤢ ꤡ꤫ꤢꤧ꤬ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤘꤢꤧ꤬ꤥ꤬ꤕꤜꤢꤪ ꤜꤢ꤭ꤋꤢꤧ꤭ ꤘꤣ ꤗꤢꤪꤋꤢꤨ꤬ꤔꤣꤧ꤬꤯ 34ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤞꤤ꤭ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤥ꤬ꤙꤣꤧꤒꤢꤩ꤭ ꤒꤣ꤬ꤖꤥ꤬ꤔꤣꤧ꤬, ꤞꤤ꤭ ꤞꤤꤕꤜꤢꤪ꤬ ꤥ꤬ꤒ꤫ꤣ꤬ꤊꤣꤧ꤭ ꤙꤣꤧꤔꤣꤧ꤬꤯
ꤜꤢꤨ꤬ꤜꤢꤩ ꤘꤣ ꤢ꤬ ꤞꤢ꤬ꤞꤢꤩ꤭ ꤒꤣꤧ꤬ꤟꤢꤩ꤬
(ꤗꤢꤞꤢꤧ ꤂꤄:꤄꤅-꤅꤁)
35“ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤘꤣ ꤞꤤ꤭ ꤊ꤫ꤢꤦ꤬ ꤗꤢꤩ꤬ ꤒꤢꤩ꤬ꤗꤢꤩ꤬ ꤢ꤬ꤑꤢꤩ꤭, ꤚꤣꤧ꤬ ꤚ꤫ꤢꤧ꤬ꤓꤢꤧ꤬ ꤥ꤬ꤔꤢꤩ꤬ ꤜꤢ꤭ꤋꤢꤧ꤭ ꤞꤤ꤭ꤟꤢꤪꤓꤢꤪ, ꤏꤤ꤭ꤜꤤ꤭ ꤥ꤬ꤔꤢꤩ꤬ ꤜꤢ꤭ꤋꤢꤧ꤭ ꤞꤤ꤭ꤗꤤ꤬ ꤒꤣꤧ꤬ꤟꤢꤩ꤬꤯#ꤗꤢꤞꤢꤧ ꤂꤅:꤁-꤁꤃ 36ꤗꤢꤩ꤬ ꤜꤢ꤭ꤋꤢꤧ꤭ ꤟꤢꤨ ꤟꤤ꤬ꤙꤢꤧ꤬ꤡꤢꤩ꤬ ꤥ꤬ ꤘꤣ ꤕꤝꤢꤩ꤬ ꤊꤢ꤬ꤏꤥ꤭ꤘꤢꤧ꤬ꤏꤥ꤭ꤗꤢꤩ꤭ ꤊꤢ꤬ ꤚꤣꤧ꤬ ꤢ꤬ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤥ꤬ꤕ꤫ꤢꤪ꤬ꤏꤢꤦ꤬ꤚꤣꤧ ꤜꤢꤨ꤭ꤔꤣꤧ꤬꤯ ꤙꤣꤧ ꤢ꤬ ꤊꤢ꤬ ꤘꤢꤪ꤬ꤔꤥ꤭ ꤊꤣꤧ꤬ꤘꤢ꤭ ꤢ꤬ꤋꤢꤩ꤭ꤔꤣꤧ꤬, ꤔꤢꤧꤔꤢꤧꤚꤣꤧ꤬ ꤢ꤬ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤙꤢꤗꤥ꤭ ꤕ꤫ꤢꤩ꤬ ꤜꤢꤨ꤭ ꤊꤣꤧ꤬ꤘꤢ꤭꤯#ꤗꤢ꤬ꤊꤢꤨ ꤁꤃:꤃꤄-꤃꤆ 37ꤜꤢꤨ꤬ꤜꤢꤩ ꤘꤣ ꤢ꤬ꤙꤢꤧ꤬ꤡꤢꤩ꤬ ꤊꤢ꤬ꤗꤢꤧꤓ꤫ꤣꤧ꤬ ꤛꤢꤩ꤬ꤞꤤ꤭ ꤔꤢꤧ ꤢ꤬ ꤥ꤬ꤞꤢ꤬ꤞꤢꤩ꤭, ꤢ꤬ ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤔ꤫ꤤ꤬ꤙꤢꤩ꤬ ꤜꤢ꤭ꤋꤢꤧ꤭ ꤒꤢꤩ꤬ꤏꤢꤪ꤭ꤚꤤ꤬꤯ ꤠꤢꤧ꤭ ꤟꤢꤩ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤞꤤ꤭, ꤙꤢꤧ꤬ꤡꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤊ꤫ꤢꤦ꤬ ꤊꤢꤦ꤭ꤓꤢꤧ꤬ꤞꤢꤧꤓꤢꤧ꤬ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤢ꤬ꤟꤣꤧ꤬ꤡꤢ꤬ ꤚꤣꤧ꤬ ꤢ꤬ ꤊ꤫ꤢꤦ꤬ ꤔꤢꤪ꤭ꤥ꤬ꤔꤢꤧ꤭ꤥ꤬ ꤛꤢꤩ꤬ꤞꤤ꤭ ꤞꤢꤧꤔꤢꤧ ꤞꤤꤖꤚ꤫ꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤕꤢ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤙꤥ꤬ꤢꤩ꤬ꤙꤥ꤬ꤥ꤭ ꤛꤢꤩ꤬ꤞꤤ꤭ ꤕꤢ꤭꤯ 38ꤢ꤬ ꤊꤢꤩ꤬ ꤊꤢ꤬ ꤘꤣ ꤗ꤫ꤢꤪ꤬ꤔꤢꤩ꤬ꤋꤢꤩ꤭ ꤙꤢꤩ꤬ꤙꤢꤩ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤘꤣ ꤗ꤫ꤢꤪ꤬ꤜꤤ꤭ꤚꤥ꤬ꤗꤢꤦ ꤢꤨ꤭ ꤥ꤬ꤗꤣꤧ꤭ꤕꤢ꤬ ꤢ꤬ꤋꤢꤩ꤭ ꤙꤢꤩ꤬ꤙꤢꤩ꤬, ꤢ꤬ ꤊꤢꤩ꤬ ꤊꤢ꤬ꤗꤢꤧꤓ꤫ꤣꤧ꤬ ꤔꤢꤧ ꤛꤢꤩ꤬ꤞꤤ꤭ ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤢ꤬ꤔ꤫ꤢꤩ꤬ ꤟꤢꤩꤔꤣꤧ꤬ꤗꤢ꤬, ꤛꤢꤩ꤬ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤒꤢꤩ꤬ꤏꤢꤪ꤭ꤚꤤ꤬ ꤕꤢ꤭꤯ 39ꤗꤢ꤬ꤔꤢꤧꤚꤣꤧ꤬ ꤞꤤꤔ꤫ꤢꤩ꤬ꤓꤢꤧ꤬ꤙꤢꤩ꤬ ꤜꤢ꤭ꤋꤢꤧ꤭ ꤠꤢꤧ꤭ ꤊ꤫ꤢꤦ꤬ ꤟꤢꤩ ꤕ꤫ꤢꤩ꤬ ꤞꤤ꤭ ꤣꤧ꤭ꤔꤣꤧ꤬ ꤔꤤ꤮꤯ ꤟꤤ꤬ꤙꤢꤧ꤬ꤡꤢꤩ꤬ ꤊꤢꤩ꤬ ꤞꤤꤑꤢꤩ꤭ ꤔꤢꤧ ꤖꤚꤢꤩ꤬ꤢꤩ꤬ꤟꤥ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ ꤢ꤬ꤏꤣꤧꤢ꤬ꤋꤢꤩ꤭ ꤟꤢꤩꤔꤣꤧ꤬ꤗꤢ꤬ ꤢ꤬ ꤊ꤫ꤢꤦ꤬ ꤥ꤬ꤕ꤫ꤢꤪ꤬ꤏꤢꤦ꤬ ꤚꤣꤧ꤬ ꤖꤚꤢꤩ꤬ꤢꤩ꤬ꤟꤥ꤬ ꤟꤢꤧ꤭ꤔꤥ꤭ꤙꤢꤦ꤬ ꤒꤥ꤬꤯#ꤗꤢꤞꤢꤧ ꤂꤄:꤄꤃-꤄꤄ 40ꤚꤣꤧ꤬ ꤞꤤ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤙꤢꤩ꤬ꤙꤢꤩ꤬, ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤊꤣꤧ꤭ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤏꤣꤧꤋꤢꤩ꤭ ꤙꤣꤧ ꤞꤤ꤭ ꤒꤣꤧ꤬ꤔꤢꤩ꤬ꤒ꤫ꤥ꤬ ꤒꤥ꤬ ꤕꤢ꤭ꤔꤣꤧ꤬, ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ ꤟꤢꤧ꤭ ꤕꤢ꤭꤯”
ꤜꤢꤨ꤬ꤜꤢꤩ ꤘꤣ ꤢ꤬ ꤞꤤꤕꤜꤢꤪ꤬ꤡꤢꤪ ꤔꤢꤧ ꤜꤢꤨ꤬ꤜꤢꤩ ꤘꤣ ꤢ꤬ꤞꤤꤕꤜꤢꤪ꤬ ꤒꤣꤧ꤬ꤊꤢ꤬
41ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤩ ꤔꤢꤧ, “ꤙꤢꤧ꤬ꤡꤢꤩ꤬꤮ ꤔꤢꤧ꤬ ꤟꤢꤩ ꤍ꤫ꤥ꤬ꤋꤢꤋꤥ꤬ ꤣꤧ꤭ꤔꤣꤧ꤬ꤗꤢ꤬ ꤘꤣ ꤕꤢꤩ꤬ꤑꤢꤩ꤭ ꤟꤢꤧ꤭? ꤗ꤫ꤢ꤬ꤒꤥ꤬ꤗꤢ꤬, ꤊꤣꤧ꤬ꤛꤢꤧ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤢ꤬ꤑꤢꤩ꤭ ꤟꤢꤧ꤭?”
42ꤙꤢꤧ꤬ꤡꤢꤩ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤟꤢꤨꤔꤣꤧ꤬ꤚꤣꤧ꤬, ꤢ꤬ ꤓꤝꤢ꤭ ꤜꤢꤨ꤬ꤜꤢꤩꤊꤢꤨ꤬ꤊꤜꤢꤪ ꤘꤣ ꤢ꤬ꤡꤢꤪ ꤚꤣꤧ꤬ ꤢ꤬ ꤥ꤬ ꤔꤢꤧ ꤒꤢꤩ꤬ꤞꤤꤖꤢꤩ ꤒꤣ꤬ꤖꤚꤢꤩ꤬ꤗꤢ꤬ ꤢꤨ꤭ꤕꤢꤩ꤭? ꤜꤢꤨ꤬ꤜꤢꤩꤊꤢꤨ꤬ꤊꤜꤢꤪ ꤘꤣ ꤢ꤬ꤡꤢꤪ ꤣꤧ꤭ꤒꤣ꤬ꤖꤚꤢꤩ꤬ ꤔꤣꤧ꤬ꤗꤢ꤬ ꤗ꤫ꤢ꤬ꤟꤣꤧ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ ꤘꤣ ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤘꤣꤧꤒꤢ꤭ ꤜꤢꤪ꤭ ꤢ꤬ꤜꤢꤨ꤬ꤜꤢꤩ ꤢ꤬ꤚꤥ꤬ꤒꤣꤧ꤬ꤟꤢꤩ꤬ ꤘꤣ ꤜꤢꤨ꤭ ꤊꤢꤨꤛꤢ꤭ꤊꤢꤨ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤔꤢꤪ꤭ꤗꤢꤧꤔꤢꤪ꤭ꤡꤢꤧ꤬ꤚꤣꤧ ꤜꤢꤨ꤭ ꤔꤢꤧ ꤛꤢꤩ꤬ꤞꤤ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧꤢꤩ꤬ꤒꤥ꤭ꤘꤣꤧꤥ꤭ꤙꤢꤩ꤬ ꤕ꤫ꤢꤩ꤬ ꤢꤨ꤭ ꤢ꤬ꤏꤣꤧꤢ꤬ꤋꤢꤩ꤭ ꤒꤣ꤬ꤖꤥ ꤔꤢꤧ ꤒꤣ꤬ꤖꤥ ꤔꤣꤧ꤬ꤒꤣ꤬ꤖꤚꤢꤩ꤬ ꤕꤢ꤭ ꤗ꤫ꤢ꤬ꤒꤥ꤬ ꤟꤢꤧ꤭? 43ꤢ꤬ꤙꤢꤧ꤬ꤡꤢꤩ꤬ ꤊꤢꤩ꤬ ꤊꤢ꤬ꤗꤢꤧꤓ꤫ꤣꤧ꤬ ꤔꤢꤧ ꤢ꤬ ꤜꤢꤨ꤬ꤜꤢꤩꤊꤢꤨ꤬ꤊꤜꤢꤪ ꤣꤧ꤭ꤒꤣ꤬ꤖꤚꤢꤩ꤬ ꤗꤢꤩ꤬ ꤒꤢꤩ꤬ꤗꤢꤩ꤬ ꤊꤢꤩ꤬ꤟꤢꤩꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧ ꤜꤢꤨ꤭ ꤒꤢꤩ꤬ꤗꤢꤩ꤬ꤔ꤫ꤤ꤬ꤋꤝꤢꤊꤢꤩ꤬ ꤕꤢ꤭꤯ 44ꤠꤢꤧ꤭ ꤟꤢꤩꤡꤢꤪꤡꤢꤪ꤮ ꤡꤣꤧ ꤞꤤ꤭, ꤙꤢꤧ꤬ꤡꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤜꤢꤪ꤭꤮ ꤕꤜꤤ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧꤒꤢ꤭ꤜꤢꤪ꤭ ꤘꤣ ꤜꤢꤨ꤭ ꤊꤣꤧ꤬ꤘꤢ꤭ꤊꤢꤨ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤔꤢꤪ꤭ꤗꤢꤧꤔꤢꤪ꤭ꤡꤢꤧ꤬ ꤚꤣꤧ ꤔꤢꤧ ꤜꤢꤨ꤭ ꤕꤢ꤭꤯ 45ꤗꤢ꤬ꤔꤢꤧꤚꤣꤧ꤬ ꤜꤢꤨ꤬ꤜꤢꤩꤊꤢꤨ꤬ꤊꤜꤢꤪ ꤣꤧ꤭ꤒꤣ꤬ꤖꤚꤢꤩ꤬ ꤊꤢꤩ꤬ ꤟꤢꤩꤜꤢꤧ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ ꤔꤢꤧ, ‘ꤠꤢꤧ꤭ꤙꤢꤧ꤬ꤡꤢꤩ꤬ ꤊꤢ꤬ꤋꤛꤢ꤭ꤗꤢ꤬ ꤢ꤬ꤑꤢ꤭꤮ ꤜꤥ꤬ ꤒꤣꤧ꤬ꤕꤜꤢꤩ꤬꤮ ꤕꤢ꤬ ꤊꤣꤧ꤭ꤔꤢꤧꤊ꤫ꤢꤩ꤬,’ ꤢ꤬ ꤟꤢꤩ ꤚꤣꤧ꤬ ꤢ꤬ꤗꤢꤦ꤭ꤢ꤬ꤕꤢꤪ꤬ꤚꤣꤧ ꤜꤢꤨ꤬ꤜꤢꤩ ꤖꤚꤢꤩ꤬ꤗꤢꤪ꤬ꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬, ꤓꤥ꤭ꤚꤣꤧ꤬ ꤢ꤬ ꤢꤩ꤬ꤗꤢꤦ꤬ꤥ꤭ꤖꤚꤢꤧ꤯ 46ꤚꤣꤧ꤬ ꤏꤣꤧꤋꤢꤩ꤭ ꤙꤣꤧ ꤢ꤬ ꤒꤣꤧ꤬ꤔꤢꤩ꤬ ꤒ꤫ꤥ꤬ꤒꤥ꤬ ꤚꤣꤧ꤬ ꤢ꤬ ꤢꤩ꤬ꤥ꤭ ꤏꤥ꤭ꤒꤣꤧ꤬ꤕꤢ꤬ ꤒꤣ꤬ꤔꤣꤧ꤭ꤔꤣꤧ꤬, ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤊꤢ꤬ꤋꤛꤢ꤭ꤒꤥ꤭ ꤙꤣꤧꤔꤣꤧ꤬ ꤒꤣ꤬ꤔꤣꤧ꤭ ꤕꤢ꤭꤯ ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤘꤣꤧꤡꤢ꤭ꤡꤢ꤭ ꤘꤣꤧꤡꤢ꤭ꤡꤢꤦ꤬ ꤜꤢꤨ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤢꤧ꤬ꤔꤥ꤭ ꤒ꤫ꤣ꤬ꤊꤢꤧ꤭ ꤜꤢꤨ꤭ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯
47“ꤜꤢꤨ꤬ꤜꤢꤩꤊꤢꤨ꤬ꤊꤜꤢꤪ ꤘꤣ ꤢ꤬ ꤞꤤꤑꤢꤩ꤭ꤟꤣꤧ ꤢ꤬ꤙꤢꤧ꤬ꤡꤢꤩ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤊꤢꤩ꤬ ꤥ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤢ꤬ꤔ꤫ꤢꤩ꤬ ꤒꤥ꤬, ꤓꤥ꤭ꤒꤥ꤬ ꤢ꤬ ꤊꤢꤩ꤬ ꤗꤢꤩ꤬ꤟꤢꤨ ꤢ꤬ꤙꤢꤧ꤬ꤡꤢꤩ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ꤔꤣꤧ꤬ ꤒꤥ꤬ ꤟꤢꤩꤔꤣꤧ꤬, ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤘꤣꤧꤡꤢ꤭ ꤕꤜꤤꤏꤢꤩ꤭ ꤔꤢꤧ꤬ꤡꤣꤧ ꤜꤢꤨ꤭ ꤕꤢ꤭꤯ 48ꤗꤢ꤬ꤔꤢꤧꤚꤣꤧ꤬ ꤜꤢꤨ꤬ꤜꤢꤩꤊꤢꤨ꤬ꤊꤜꤢꤪ ꤘꤣ ꤢ꤬ ꤞꤤꤑꤢꤩ꤭ ꤢ꤬ꤙꤢꤧ꤬ꤡꤢꤩ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤒꤥ꤬ ꤒꤣ꤬ꤖꤚꤢꤩ꤬ꤔꤣꤧ꤬, ꤊꤢꤩ꤬ ꤢ꤬ ꤗꤢꤩ꤬ꤞꤢꤦ ꤒꤢꤩ꤬ ꤒꤣ꤬ꤡꤣ꤬ꤡꤣ꤬ ꤘꤣ ꤢ꤬ ꤒꤥ꤭ꤙꤢꤩ꤬ ꤕꤜꤤ ꤜꤢꤨ꤭ ꤟꤢꤩꤔꤣꤧ꤬, ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤘꤣꤧꤡꤢ꤭ ꤕꤜꤤꤏꤢꤩ꤭ ꤛꤢ꤬ꤋꤢꤩ꤬ꤜꤣ ꤜꤢꤨ꤭ ꤕꤢ꤭꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤙꤢꤩ꤬ ꤢꤩ ꤒꤢꤩ꤬ꤡ꤫ꤢꤧ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤗꤢꤧꤏꤢꤦ꤭ꤚꤣꤧ ꤜꤢꤨ꤭ ꤘꤣ ꤢ꤬ ꤊ꤫ꤢꤦ꤬ ꤙꤢꤩ꤬ꤗꤢꤩ꤬ ꤢꤩꤜꤣ ꤔꤢꤧ ꤢꤨ꤭꤯ ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤛ꤫ꤢꤦ꤬ꤢꤩ꤬ꤚꤣꤧ ꤜꤢꤨ꤭ ꤚꤣꤧ꤬ ꤢ꤬ ꤘꤣꤧ ꤢꤩꤜꤣ ꤜꤢꤨ꤭ ꤒꤣ꤬ꤖꤚꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊꤝꤤ꤭ ꤢꤩꤜꤣ ꤜꤢꤨ꤭ ꤕꤢ꤭꤯
ꤛꤢꤩ꤬ꤏꤛꤢꤨ ꤘꤣꤧꤥ꤬ ꤓꤝꤢ꤭ꤓꤢꤧ꤬ ꤒꤢꤩ꤬ꤜꤢꤨ꤬ꤖꤚꤥꤜꤢꤨ꤬ꤖꤚꤢꤧ꤭
(ꤗꤢꤞꤢꤧ ꤁꤀:꤃꤄-꤃꤆)
49“ꤠꤢꤧ꤭ ꤟꤢꤧ꤭ ꤠꤤ꤭ꤒꤢ꤭ ꤒꤢꤩ꤬ꤘꤣꤧꤡꤢ꤭ ꤗꤤ꤬ ꤘꤣ ꤟꤢꤩ꤬ꤋꤢꤨ꤬ꤣꤧ꤭ ꤟꤣꤧ꤯ ꤠꤢꤧ꤭ ꤞꤤꤛ꤫ꤢꤦ꤬ ꤔꤢꤪ꤭ꤢꤦ꤭ꤓꤢꤧ꤬ ꤜꤢ꤭ ꤟꤣꤧ ꤜꤢꤨ꤭꤯ 50ꤗꤢ꤬ꤔꤢꤧꤚꤣꤧ꤬ ꤒꤢꤩ꤬ꤡꤢꤩ꤬ ꤘꤣ ꤠꤢꤧ꤭ ꤜ꤫ꤥ꤬ ꤡꤢꤩ꤬ ꤔꤣꤧ꤬ ꤢ꤬ ꤥ꤬ꤕꤢ꤬ ꤒꤣ꤬ꤡꤣ꤬꤯ ꤒꤢꤩ꤬ꤗꤢꤩ꤬ ꤣꤧ꤭ꤒꤣ꤬ꤡꤣ꤬ ꤊꤢꤩ꤬ ꤓꤥ꤭ꤒꤣꤧ꤬ꤜꤝꤢ ꤜꤢ꤭ꤟꤤꤒꤥ꤬ ꤚꤣꤧ꤬ ꤠꤢꤧ꤭ ꤞꤤꤕꤜꤢꤪ꤬ ꤙꤢꤩ꤬ꤊ꤫ꤢꤨ꤬ꤙꤢꤩ꤬ꤊꤢꤧ꤭ ꤔꤢꤧ꤬ꤡꤣꤧ꤯#ꤗꤢ꤬ꤊꤢꤨ ꤁꤀:꤃꤈ 51ꤗꤢ꤬ ꤞꤤ꤭ ꤒꤣꤧ꤬ꤔꤢꤩ꤬ ꤔꤢꤧ ꤠꤢꤧ꤭ ꤖꤛꤢꤟꤢꤧ꤭ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤘꤣ ꤟꤢꤩ꤬ꤋꤢꤨ꤬ ꤣꤧ꤭ꤔꤣꤧ꤬ ꤟꤢꤧ꤭? ꤠꤢꤧ꤭ ꤟꤢꤩ ꤞꤤ꤭꤮, ꤠꤢꤧ꤭ ꤖꤛꤢꤟꤢꤧ꤭ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤗ꤫ꤢ꤬ꤒꤥ꤬꤯ ꤠꤢꤧ꤭ ꤟꤢꤧ꤭ꤜꤢꤧ꤬ ꤗꤢꤩ꤬ꤖꤚꤥꤗꤢꤩ꤬ꤖꤚꤢꤧ꤭ ꤒꤢꤩ꤬ ꤖꤢꤧ꤯ 52ꤡꤢꤓꤢꤧ꤬ ꤊꤢꤨꤔ꤫ꤢꤧ꤬ꤣꤧ꤭ ꤒꤢ꤭ꤟꤢꤧ꤭ꤑꤢꤩ꤭ ꤔꤣꤧ꤬, ꤊꤣꤧ꤬ꤛꤢꤧ꤭ ꤒꤣ꤬ꤗ꤫ꤥ꤬ ꤚꤣꤧ꤬ ꤢ꤬ ꤊꤢꤩ꤬ ꤥ꤬ ꤞꤤꤍꤢꤧ꤭ ꤟꤢꤩꤔꤣꤧ꤬ ꤞꤤꤞꤥ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤥ꤬ ꤒꤣ꤬ꤊꤛꤢ꤭ ꤕꤢ꤭, ꤘꤣ ꤣꤧ꤭ ꤞꤤꤔꤣꤧ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤥ꤬ ꤒꤣ꤬ꤊꤛꤢ꤭ ꤕꤢ꤭ ꤚꤣꤧ꤬ ꤛꤢꤩ꤬ꤞꤤ꤭ ꤔꤢꤧ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤞꤤꤓꤢꤩ꤬ꤞꤤꤟꤢ꤭ ꤋꤛꤢ꤭ ꤚꤣꤧꤘꤢꤦ꤬ ꤜꤢꤨ꤭ ꤕꤢ꤭꤯ 53ꤛꤢꤩ꤬ꤞꤤ꤭ ꤔꤢꤧ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤜꤢꤨ꤬ꤖꤚꤥꤜꤢꤨ꤬ꤖꤚꤢꤧ꤭ ꤜꤢꤪ꤭ ꤜꤢꤨ꤭ ꤕꤢ꤭꤯ ꤖꤢꤩ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤤꤓꤢꤩ꤬ ꤚꤣꤧꤘꤢꤦ꤬ ꤢ꤬ ꤖꤢꤨꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤖꤢꤨꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤤꤓꤢꤩ꤬ ꤚꤣꤧꤘꤢꤦ꤬ ꤢ꤬ꤖꤢꤩ꤭ ꤒꤣꤧ꤬ꤟꤢꤩ꤬ ꤕꤢ꤭꤯ ꤗ꤫ꤥ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤤꤓꤢꤩ꤬ ꤚꤣꤧꤘꤢꤦ꤬ ꤖꤢꤨꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤖꤢꤨꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤤꤓꤢꤩ꤬ ꤚꤣꤧꤘꤢꤦ꤬ ꤢ꤬ꤗ꤫ꤥ꤬ ꤒꤣꤧ꤬ꤟꤢꤩ꤬ ꤕꤢ꤭, ꤖꤚ꤫ꤢꤩ꤬ꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤤꤓꤢꤩ꤬ ꤚꤣꤧꤘꤢꤦ꤬ ꤢ꤬ꤘꤢꤧ꤬ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤢ꤬ꤘꤢꤧ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤤꤓꤢꤩ꤬ ꤚꤣꤧꤘꤢꤦ꤬ ꤢ꤬ ꤖꤚ꤫ꤢꤩ꤬ꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤕꤢ꤭꤯”#ꤗꤤꤊꤢ꤬ ꤇:꤆
ꤞꤤꤑꤢꤩ꤭ ꤒꤢꤩ꤬ꤏꤣꤧꤒꤢꤩ꤬ꤋꤢꤩ꤭꤯
(ꤗꤢꤞꤢꤧ ꤁꤆:꤂-꤃, ꤅:꤂꤅-꤂꤆)
54ꤛꤢꤩ꤬ꤏꤛꤢꤨ ꤟꤢꤩ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤙꤣꤧ ꤞꤤ꤭ ꤗꤢꤧꤓ꤫ꤣꤧ꤬ ꤢꤪꤜ꤫ꤥ꤬ꤒꤣꤧ꤬ꤟꤢꤩ꤬ ꤓꤢꤧ꤬ ꤘꤣ ꤞꤤꤔꤥ꤭ ꤒꤣ꤬ꤊꤛꤢ꤭ ꤢ꤬ꤋꤢꤩ꤭ꤔꤣꤧ꤬, ꤒꤣ꤬ꤖꤥꤒꤥ꤬ ꤞꤤ꤭ ꤟꤢꤩ ꤘꤢꤦ꤬ ꤔꤢꤧ, ‘ꤊ꤫ꤢꤩ꤬ ꤊ꤫ꤢꤦ꤬ꤚꤢꤩ꤭ ꤡꤢꤦ꤭ ꤟꤣꤧ,’ ꤚꤣꤧ꤬ ꤊ꤫ꤢꤩ꤬ꤡꤢꤦ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ꤯ 55ꤚꤣꤧ꤬ ꤙꤣꤧ ꤊ꤫ꤢꤩ꤬ꤜꤣꤧ꤬ꤞꤢꤩ ꤟꤢꤧ꤭ ꤘꤣ ꤞꤤꤜꤢꤧ꤬ ꤒꤣ꤬ꤊꤛꤢ꤭ ꤢ꤬ꤋꤢꤩ꤭ꤔꤣꤧ꤬, ꤞꤤ꤭ ꤟꤢꤩ ꤔꤢꤧ, ‘ꤊ꤫ꤢꤩ꤬ꤊ꤫ꤢꤨ꤬ ꤟꤣꤧ ꤕꤢ꤭,’ ꤚꤣꤧ꤬ ꤊ꤫ꤢꤩ꤬ꤊ꤫ꤢꤨ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ꤯ 56ꤖꤚꤢꤩ꤬ ꤢꤧꤡꤢꤪꤢꤧꤒꤢꤩ꤬ ꤙꤛꤢ꤬ꤖꤢꤧ ꤢ꤬ꤔ꤫ꤢꤩ꤬ ꤞꤤ꤭꤮, ꤞꤤ꤭ ꤗꤢꤧ ꤟꤢꤩ꤬ꤋꤢꤨ꤬ ꤔꤢꤧ ꤗꤢꤪꤜꤢꤩ꤭ ꤚꤣꤧ꤬ ꤒꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤟꤢꤨꤒꤢꤩ꤭ ꤕꤢ꤭ꤔꤣꤧ꤬ ꤞꤤ꤭ ꤗꤢꤧꤜꤝꤢ ꤞꤤꤑꤢꤩ꤭ꤥ꤬ꤔꤢꤩ꤬ ꤚ꤫ꤣꤧ꤬ ꤡꤣꤧ ꤒꤣꤧ꤬ꤘꤢꤦꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤓꤝꤢ꤭ꤓꤢꤧ꤬ ꤒꤢꤩ꤬ ꤊꤢꤨꤔ꤫ꤢꤧ꤬ꤣꤧ꤭ ꤒꤣꤧ꤬ꤟꤢꤩ꤬ ꤢ꤬ꤍ꤫ꤥ꤬ꤜꤣꤧ꤬ꤏꤢꤔꤣꤧ꤬, ꤞꤤ꤭ ꤗꤢꤧꤜꤝꤢ ꤞꤤꤑꤢꤩ꤭ꤥ꤬ꤔꤢꤩ꤬ ꤚ꤫ꤣꤧ꤬ ꤡ꤫ꤢꤧ꤬ꤒꤥ꤬ ꤗꤢꤩ꤬ꤒꤢꤩ꤭?
ꤗꤢꤩ꤬ꤋꤚꤥ꤭ꤊꤜꤢꤩ꤭ ꤔꤢꤧ꤬ꤔ꤫ꤢꤩ꤬ ꤔꤢꤧ ꤖꤚꤢꤩ꤬ ꤘꤣ ꤢ꤬ ꤞꤤꤓꤢꤩ꤬ ꤔꤢꤧ꤬ ꤒꤣꤧ꤬ꤟꤢꤩ꤬
57“ꤒꤢꤩ꤬ ꤘꤣ ꤢ꤬ ꤊꤢꤪ꤬ꤗꤢꤩ꤬ ꤔꤢꤧ ꤢ꤬ ꤊꤢꤪ꤬ꤗꤢꤩ꤬ꤒꤥ꤬ ꤔꤣꤧ꤬, ꤞꤤ꤭ ꤙꤢꤩ꤬ ꤘꤣꤧꤟꤣꤧ꤭ꤜꤢꤧ꤬ ꤚꤣꤧꤘꤢꤦ꤬ ꤞꤤ꤭ ꤞꤤꤕꤜꤢꤪ꤬꤯ 58ꤙꤣꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤓꤢꤩ꤬ ꤔꤢꤧ꤬ ꤒꤣ꤬ꤖꤚꤢꤩ꤬ ꤢꤩꤓꤢꤧ꤬ ꤔꤢꤧ꤬ ꤘꤣ ꤕꤥ꤬ꤊꤢꤟꤤ꤬ ꤢ꤬ꤋꤢꤩ꤭ꤔꤣꤧ꤬, ꤢꤧꤡꤢꤦ ꤗꤢꤩ꤬ꤋꤚꤥ꤭ꤗꤢꤩ꤬ꤊꤜꤢꤩ꤭ ꤖꤚꤢꤧ꤭ꤚ꤫ꤣꤧ꤬ꤜ꤫ꤢꤩ꤬ꤊꤢꤧ꤭ ꤢ꤬ ꤘꤣ ꤊꤜꤢꤧꤜꤥ꤬ ꤔꤣꤧ꤬꤯ ꤕꤢ꤭ꤗꤢ꤬ ꤢ꤬ ꤊ꤫ꤢꤦ꤬ ꤢꤩꤓꤢꤧ꤬ ꤔꤢꤧ꤬ ꤘꤣ ꤕꤥ꤬ꤊꤢꤟꤤ꤬ ꤚꤣꤧ꤬ ꤖꤚꤢꤩ꤬ꤡꤢꤧ꤬ꤒꤥ꤭ꤙꤢꤩ꤬ꤒꤢꤩ꤬ ꤊ꤫ꤢꤦ꤬ ꤘꤣꤧꤒꤢ꤭ ꤘꤤ꤭ꤒ꤫ꤢꤦ꤬ ꤔꤢꤧ꤬ ꤘꤣ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤢ꤬ ꤊꤢꤨꤛꤢ꤭ꤊꤢꤨ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤢꤪꤔꤥ꤭ꤊꤢꤧ꤭ ꤔꤢꤧ꤬ ꤘꤣ ꤢ꤬ꤕꤥ꤬ꤊꤢꤨ꤭ ꤕꤢ꤭꤯ 59ꤠꤢꤧ꤭ ꤟꤢꤩ ꤞꤤ꤭꤮, ꤔꤢꤧ꤬ ꤊꤢꤩ꤬ ꤕꤜꤢꤜꤢꤪ꤭ꤙꤢꤩ ꤔꤢꤧ꤬ꤏꤢꤨ꤬ ꤣꤧ꤭ꤔꤣꤧ꤬ ꤒꤥ꤬ ꤟꤢꤩꤔꤣꤧ꤬ꤗꤢ꤬, ꤔꤢꤧ꤬ ꤓꤢꤩ꤬ꤙꤢꤩ ꤒꤥ꤬꤯”
Zvasarudzwa nguva ino
ꤜꤢꤨꤊꤢ꤬ 12: eky-Kali-MM
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda