ஆதியாகமம் 4

காயீன் ஆபேல்கெ ஜிவ்னம்

(எபி 11:4; 12:24)

1பல்சொ ஆதாமுக்கின், ஏவாளுக் ஒண்டெ பில்லொ உஜெஸ். “பகவான்கெ கிருபொஹால் எல்லெ பெட்கொ பில்லாக் மீ ஜெனிஸ்” மெனி ஸங்கி தெகொ ‘காயீன்’ மெனி நாவ் தொவிஸ்.

2தெக பல்சொ ஏவாள் அங்குண்டெ பெடாக் ஜெனிஸ். தெகொ நாவ் ஆபேல். ம:ட்ட ஹொடெ பல்சொ, ஆபேல் பெண்டு சொவ்ரஸ்தெனொகன் ஹொயெஸ். காயீன் பெய்ரு காம் கெரஸ்தெனொகன் ஹொயெஸ்.

3பல்சொ ஒண்டெதி காயீன் அபுல் பு⁴ஞிர் ஹொடெ தான்யமுனுக் கள்ளி அவி பகவானுக் தட்சண தியெஸ்.

4ஆபேல் மெளி அபுல் பெண்டு கும்பும்ரீ: பெ²ய்லட்கன் உஜெ தெவ்ட புஷ்டி பெண்டுனுக் கள்ளி அவி பலி தியெஸ். பகவான் ஆபேலுக்கின், தெனொ தியெ தட்சணாக் ஒப்பிலியாஸ். (எபி 11:4)

5ஹொயெதி காயீனுக்கின், தெகொ தட்சணாக் பகவான் ஒப்பிலியானி. தேஹாலிம் காயீனுக் ஜுகு வேன் ராக்³ அவெஸ். தெகொ தோண் லொ:வ்வொ பொடெஸ்.

6தெப்பொ பகவான் காயீனுக் ஸீ, “தூ ககொ ராக்³கன் ஸேஸ்தெ? துரெ தோண் ககொ லொ:வ்வொ பொட்ரியொ?

7தூ ஸெர்க ஹொயெஸ்தெ கெரி ரி:யெதி, துரெ தோண் கெளகாந்திகன் ஹொதி ரா:ய்; திஸனி தூ கெர்னாஸ்தஹால் தூ கெரெ பாப் தொகொ நாஸ் கெரஸ்தக் ர:கிலேத் ஸே. அத்தொ தூ தெல்லெ பாபுக் ஜெகிஞ்சுனொ” மெனி ஸங்க்யாஸ்.

காயீன் ஆபேலுக் மொரடரெஸ்

8பல்சொ காயீன் அபுல் பை⁴ ஆபேல்ஜோள், “அமி சேனுக் ஜியேன் ஆவ்” மெனி பொவெஸ். தெனு சேனும் ர:த, ரி:யெவந்நு காயீன் அபுல் பை⁴ ஆபேலுக் ஹனி மொரடெஸ். (மத் 23:35; லூக் 11:51; 1 யோவா 3:12)

9தெப்பொ பகவான் காயீன்ஜோள், “துரெ பை⁴ ஆபேல் கோட் ஸே” மெனி புஸ்யாஸ்; தெல்லெகொ தெனொ, “மொகொ களானா; மொர் பை⁴க் ஸீலி ரா:ஸ்தேஸ் மொர் காம்கீ?” மெனி மெனெஸ்.

10தெப்பொ பகவான், “துரெ பை⁴க் தூ காய் கெரெஸ்தெ? ஹனி மொரட்டிகியொகீ? தெகொ ரெகத் மத்திம்ரீ: மொகொ ஸீ ரெச்சொ தகி ரொட்லேத் ஸே. (எபி 12:24)

11தூ துரெ பை⁴க் மொரடி, எல்லெ பு⁴ஞிக் அண்டு கெரெஹால் தூ வேன் ஸாபன பொந்தய்.

12தூ பு⁴ஞிக் ஜுண்ணி பெய்ரு காம் கெரெத் மெளி தெல்லெ தொகொ ப²லன் தேனா. தூ எல்லெ பு⁴ஞிர் தேஸாந்திரிகன் ஹிண்டய்” மெனி ஸங்க்யாஸ்.

13காயீன் பகவான்ஜோள், “துமி மொகொ தீரிய தண்டன ஜுகு வேன்; மொர் ஸக்திக் மிஞ்சி ஸே.

14ஹிந்தொ துமி மொகொ ஏட்ரீ: தொவ்டி ஸொடராஸ். அத்தெங்குட் தும்ரெ ப்ரஸன்னம் மொர் ஸெங்கொ ரா:னா. எல்லெ பு⁴ஞிர் மீ தேஸாந்திரிகன் ஹிண்டிலேத் ர:னொ. கோன்தி மொகொ தெக்கெதி ஹனி மொரட்டுகன்னா” மெனி மெனெஸ். (யோபு 15:20)

15தெப்பொ பகவான் தெகொஜோள், “தொகொ கொன்னின் மொரட்னான். தொகொ கோன்தி மொரடெதி தெகொ ஸாத் கு³ணாவ்#4:15 கு³ணாவ் - மடங்கு தண்டன அப்பய்” மெனி ஸங்க்யாஸ். காயீனுக் ஸாரிய கொன்னின் தெகொ ஹனி மொரட்னாஸ்ததானுக் பகவான் தெகொ ஹொல்லெ ஒண்டெ கு³ர்து தொவ்யாஸ்.

16பல்சொ காயீன் பகவான்கெ ஸந்நிதிம்ரீ: நிகிளி ஜீ, ஏதேனுக் க²வ்நஸ்#4:16 க²வ்நஸ் - கிழக்கு. திக்கும் நோத்#4:16 நோத்: ‘தேஸாந்திரிகன் ஹிண்டரெஸ்’ மெனி அர்து. மெனரிய தேஸும் ஜிவெஸ்.

காயீன்கெ ஸந்ததி

17பல்சொ காயீனுக்கின் தெகொ பெய்லுக் ஒண்டெ பெடொ உஜெஸ். தெகொ நாவ் ஏனோக்கு. தெப்பொ காயீன் ஒண்டெ பட்ணமுக் பந்தி தெல்லெகொ ‘ஏனோக்கு’ மெனி அபுல் பெடாகெ நாவ் தொவெஸ்.

18ஏனோக்குக் ஈராத் உஜெஸ்; ஈராதுக் மெகுயாயேல் உஜெஸ். மெகுயாயேலுக் மெத்துசாயேல் உஜெஸ். மெத்துசாயேலுக் லாமேக்கு உஜெஸ்.

19லாமேக்கு தீ³ பெட்கினுக் ஹொராட் கெல்லியெஸ்; ஒண்டெதெகா நாவ் ஆதாள்; அங்குண்டதெகா நாவ் சில்லாள்.

20ஆதாள், யாபாலுக் ஜெனிஸ்; கா³ய் பெண்டுனுக் சொவ்ரரிய டேரா வாஸின்கெ பா³ப் எனோஸ்.

21தெகொ பை⁴கெ நாவ் யூபால்; வீணெ வவ்ஜஸ்தெங்கொகின், புகணி புகஸ்தெங்கொ பா³ப் எனோஸ்.

22சில்லாள், தூபால்காயீனுக் ஜெனிஸ்; கஸாம்கின், லொ:கணும் ஸகல ஸமான்னுக் கெரஸ்தெங்கொ எனோஸ் பா³ப். தூபால்காயீனுக் நாமாள் மெனி ஒண்டெ பெ⁴ய்ன் ஹொதிஸ்.

23ஒண்டெதி லாமேக்கு அபுல் தீ³ பெய்லானுக் ஸீ,

“ஆதாளு, சில்லாளு, மொர் வத்தானுக் கான்தீ அய்குவொ. ஒண்டெதெனொ மொகொ ஹனெஹால் மீ தெகொ மொரட்டிகியொ. தெனொ மொகொ ஹிம்ஸொ கெரெஹால் மீ தெல்லெ ஜவ்ணாக் ஹத்யொ கெர்திகியொ.

24காயீனுக் மொரடெதி ஸாத் கு³ணாவ் தண்டன அப்பய்; ஹொயெதி மொகொ மொரடஸ்தெகொ அங்குன் வேன் தண்டன அப்பய்”

மெனி மெனெஸ். (மத் 18:22)

25பீர் ஆதாமுக்கின், தெகொ பெய்ல் ஏவாளுக் ஒண்டெ பெடொ உஜெஸ். ஏவாள் தெகொ ‘சேத்’ மெனி நாவ் தொவிஸ். “காயீன் ஆபேலுக் மொரடெஹால் தெகொ ப⁴ர்தி அங்குண்டெ பெடாக் தேவ் மொகொ தியாஸ்” மெனி மெனிஸ்.

26பல்சொ சேத்துக் மெளி ஒண்டெ பெடொ உஜெஸ். தெகொ ‘ஏனோஸ்’ மெனி நாவ் தொவெஸ். தெல்லெ தின்னுநுமூஸ் முல்லொ முல்லொகன் மென்க்யான் ஒண்டேஸ்கன் மிளி ‘பகவான்’ மெனரிய பரிஸுத்த தேவுக் பாய்ம் பொடஸ்தக் ஹர்ம்பம் கெர்யாஸ். (யாத் 3:14)

Zvasarudzwa nguva ino

ஆதியாகமம் 4: SAUBSI

Sarudza vhesi

Pakurirana nevamwe

Sarudza zvinyorwa izvi