Mataayo 2
2
Abhamenyegesha bha ginjota
1Yeesu ꞉eebhuuywe mu-musi gwa Bhetereemu ya Ebhuyawudi mu-kabhaga ka obhutungi bhwa omukama Yerode Omukuru.#2:1a Yerode Omukuru. Ringira riingʼana rinu mu-Mangʼana Amakomeeye. Mmbe, ku-kabhaga kayo, abhamenyegesha bha ginjota bhanu ꞉bhaasookaga mu-bhyaro bhya ebhuwuruka esuubha, ꞉bhaayikire mu-musi gwa Yerusareemu.#2:1b Yerusareemu. Ringira riingʼana rinu mu-Mangʼana Amakomeeye. Abhamenyegesha bhayo ꞉bhaariga mbabhuusha ati, 2“Ari aaki omukama wa Abhayawudi unu ꞉eebhuuywe? Kimenyere ati eebhuuywe kwa okubha ꞉kyarorere injota yaaye ewaasu eyo ebhuwuruka esuubha. Na kiyo nikyo kyakora eswe kiije okumuramya.”
3Bhunu omukama Yerode na abhaanu bha Yerusareemu bhoone kutyo ꞉bhoonguuywe amangʼana gayo, mbatitibhara muno. 4Niwe Yerode ˆnaabhirikira abhashengesi abhakuru#2:4a Abhashengesi abhakuru. Ringira riingʼana Abhashengesi mu-Mangʼana Amakomeeye. bhoone kutyo na abheeyigisha bha ebhiraagiro bhya Musa,#2:4b Abheeyigisha bha ebhiraagiro bhya Musa. Ringira riingʼana rinu mu-Mangʼana Amakomeeye. ˆnaabhabhuusha ati, “Angu, Kiriisitu ariibhurirwa aaki?” 5Abheene mbamusubhya ati, “Ariibhurirwa mu-musi gwa Bhetereemu ya Ebhuyawudi. Nikwo kutyo Nyamuwanga ꞉aaikire okuturira ku-makaamo ga omuragi Miika, ati,
6‘Awe omusi gwa Bhetereemu ya Ebhuyawudi,
waasiga okwirora ati usuuyire ku-bhutangasha bhwa Ebhuyawudi.
Okusooka ku-awe aribha-wo omuunu unu aritangasha abhaanu bhaani abha Ijirayeeri,
rwa omureefi unu kaareebha giingʼondi gyaye.’#2:6 Ringira Miika 5:2.”
7Niwe Yerode ˆnaabhirikira bhwiyibhise abhamenyegesha bha ginjota bharya, insonga bhaaje bhamubhwire kujomu riibhaga rinu ꞉bhaaroreeye-mo injota inu bhaaikaga, mbagenda. 8Okumara gayo, ˆnaabhatuma Bhetereemu, ˆnaabhabhwira ati, “Mugende mubhuusirishe kujomu mumenye enu omwana uyo ari. Mukamunyoora, muuje bhwangu mumbwire anye noone nigende okumuramya.”
9Bhunu abhamenyegesha bha ginjota bhayo ꞉bhaamarire okuroma na omukama, mbeemuka. Mbarora kweki injota irya ꞉bhaarorere bhari mu-bhyaro bhya ebhuwuruka esuubha, niibhatangasha. Niigenda niiyambaara ku-bhwima bhwa iinyumba inu omwana ꞉aariga arimo. 10꞉Bheejire bhaarora injota irya niiyambaara, mbajomerwa muno. 11Mmbe, mbeengira mu-nyumba iyo, mbarora omwana na Maryamu nyiramwene, mbeefukamira omwana okumuramya. Mbasurumura ebhikapo bhyebhwe, mbasoosha-mo emisanga gya bhugusi bhunene, iijaabhu, obhubhaani, na amafuta ganu agarangirira kujomu, mbayaana omwana. 12Mmbe, Nyamuwanga ˆnaagaanya abhamenyegesha bha ginjota bhayo mu-kirooto, ati bhaasiga okusubha kweki ku-Yerode. Mbeemuka, mbasubha eweebhwe nawe ꞉bhataasubhiiye ku-njira inu ꞉bheejiiye-ko.
Yuusufu na Maryamu abheerukira Miisiri
13Bhunu abhamenyegesha bha ginjota bhayo ꞉bheemukire, niwe maraayika wa Raatabhugenyi Nyamuwanga ˆneejira Yuusufu mu-kirooto, ˆnaamubhwira ati, “Iimuka! Ugege omwana na nyiramwene, mwirukire mu-kyaro kya Miisiri. Mwikare eyo okuyikira anu niribhabhwirira okusubha, kwa okubha Yerode kaagara okwita omwana.” 14Ingeta iyoiyo, Yuusufu ˆneemuka, ˆnaagega mukaaye na omwana, mbeerukira mu-kyaro kya Miisiri. 15Mbayika Miisiri, mbeekara eyo okuyikira mu-kabhaga kanu Yerode ꞉aafwiriiye-mo. Amangʼana gayo ꞉gaabheeye kutyo, insonga riingʼana rinu Raatabhugenyi Nyamuwanga ꞉aaikire okuturira ku-muragi waaye rikuumire ati, “꞉Naabhirikiiye omwana waani asooke Miisiri.”#2:15 Ringira Woseya 11:1.
Abhaana abhamura abha Bhetereemu abheetwa
16Bhunu Yerode ꞉aamenyere ati abhamenyegesha bha ginjota bharya bhaamujimya, ˆnaabhiiyirwa muno. Niwe ˆnaatuma abhasirikare bhaaye Bhetereemu na mu-bhiseera bhyende-mo bhyone kutyo, ˆnaabharagirira ati bheete abhaana abhamura bhoone kutyo kwambira bhanu bhari na myaka ebhiri okusubha emwaro. ꞉Aakorere kutyo okuriingʼaana na riibhaga rinu ꞉aabhwiriiywe na abhamenyegesha bha ginjota. 17Niwe riingʼana rya omuragi Yeremiya ndikuumira ati,
18“Ekiriro ekisookerera mu-musi gwa Raama,
abhaanu abharira muno.
Raayeeri kaaririra abhaana bhaaye,
atakwenda kujibhisibhwa,
kwa okubha abhaana bhaaye bhafuuye.”#2:18 Ringira Yeremiya 31:15.
Yeesu na abheebhusi bhaaye abhasubha okusooka Miisiri
19Yerode ꞉eejire aafwa, maraayika wa Raatabhugenyi Nyamuwanga ˆneejira Yuusufu mu-kirooto Miisiri eyo, 20ˆnaamubhwira ati, “Iimuka! Ugege omwana na nyiramwene, musubhe mu-kyaro kya Ijirayeeri, kwa okubha bhanu ꞉bhaariga mbeenda okwita omwana uyo, bhaafuuye.”
21Mmbe, Yuusufu ˆneemuka, ˆnaagega mukaaye na omwana, ˆnaasubha nabho mu-kyaro kya Ijirayeeri. 22Nawe bhunu ꞉oonguuywe ati Arikeraawo omumura wa Yerode, niwe ꞉aariga agegere obhutungi bhwa esemwene Ebhuyawudi eyo, ˆnoobhaya okugenda-yo. Nyamuwanga ˆnaamubhwira mu-kirooto ati, “Waasiga okugenda eyo.” Mbeemuka mbagenda mu-kyaro kya Gariraaya, 23mbayika mu-musi gwa Naajareeti, mbeekara eyo. Niwe riingʼana rinu ꞉ryaaikirwe na abharagi ati, “Yeesu aritogwa Munaajareeti,” ndikuumira.
Zvasarudzwa nguva ino
Mataayo 2: kya
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Wycliffe Bible Translators, Inc. All rights reserved